1 Ina ata saiki daramuabere ro nou iato gemowapotai, ‘Oro mo mutu komidiro modobo pua nedi tau ro nato, oro modobo ie simara moto ato komidiro, oro simara uramu ro kiauri ie mea mino to. 2-4 Nedi tanaro ro ba-dosioidiro abora duwo. Oro ba-dou bari ohona kisioidiro moro to, Boasi iato ama-owea-ri, oro keba se durupi ba-deremododiai. Ina piro se ba-dodori nou norou kutua moro ba-deibimai. Taie nou norou nama-utua-ri oro nato ba-dabu obotama sairo rido ba-demowatateai, nou edi sairo pepedi ro oro nato ba-dutua. Nou nimo karima boinana ie. Oro nou ro nama-owea-ri nou owera se ba-dirowidiro.’

5 Eterera ro ibo, ‘Anama-isioidiro-ri oro ro beda sosoro owera to aro-die.’

6 Taie Ruti iato gaimai Boasi aboto nou a-gou bari ohona kisioidiro moro to, goto didiri ato na-owamo. 7 Nou neido na-gou, nou ro Boasi se gowea. Nou ohona kiho ro na-gamidimai, kamade mutu obotama to karatimai, norou aise gutuwa, bari soirio abato.

Edi tau ro nato nou norou gorobu, Ruti neido na-gou nou ro obotama aise gemowatateai sairo aboudo. Taie nou sairo pepedi ato aise gutua iato imese gorobu.

8 Taie duwo turi Boasi na-geribuwa-ro nou a-giwagogorai, durupi musuga a-gotobowa-rimo. 9 Nou ro ibo, ‘Oro etu ra?’

Ina Ruti ro ibo, ‘Mo Ruti buro ie. Oro mo uramu karima boinana ie, mo oro ro ba-dapopo-ro, ina mea mino to ba-diauri-ro.’

10 Boasi ro ibo, ‘Oro Iawe ro korosa ba-momia. Oro mea tanaro ta-wisioidirotiti Erimereki urubia aboto. Abora oro ubi tato ie ata sabowa osio ata ro kedea, oro auna ia nirimagare owawea-die nimo Erimereki urubia aboto. 11 Oro kimaragoidiro siriosirio na ie, oro urubia ro morobise orobo to asoro-dumo. Oro ubi tanaro mo ro anama-isioidiro-ri 12-13 kaupoti dodio nou e, ata dubu tomidiro oro uramu karima boinana ie, etu umoro ra oro nou ro ama-edea-ri. Oro nou ro kedea tato, ina oro mo ro anama-edea-ri. Mo kowaroho anama-ou-ri iedi dubu ro nou aboto. Oro nou ro kapopo tato, goto kere mutu, ina oro mo ro anamadi-apopo-ri. Iawe idaibo tau ato na-omidiro, mo ro nou anama-isioidiro-ri. Taie ba-dorobu womu tato saiki bani namadi-iwotowa-ri.’

14 Saiki bani na-giedea-ro Ruti ioudo na-geribua-ro 15 Boasi ro ibo, ‘Eputa obotama debedai-ro, goto ato dosowa.’

Iato nou ro aise gosioidiro. Bari ohona Boasi ro obotama to iato gemawiriti. Nou ro gemowoubua, Ruti ro imese giwidiai daramuabere aboto.

16 Ruti na-gorowateai, daramuabere ro ibo, ‘Tanaro beda sosoro ororosioidiro-dumo?’

Ina nou ro ibo gemowameai, ‘Mo ta-nou bari ohona kisioidiro moro to, Boasi iato nowea, ina nou ro utura-die ibo, “Oro uramu karima boinana iedi dubu ro nou ro kedea tato, oro mo ro anama-edea-ri.” 17 Bari ohona nou ro nimia-madie neitiro. Mabu nou ro ibo, “Oro modobo pua korowameai kawa korowameai daramuabere aboto.” ’

18 Naomi ro ibo, ‘Mona ia mo besere, oro kimaragoidiro tato se, oro ba-deremasebidiro, iedi dubu ro owera beda sosoro ro aro-die, idaibo sosoro tanaro abora nou ro ama-isioidiro-ri.’