﻿Karatamuai.
3.
Iawe Godi ro imese tumu namabu patu gisioidiro, kaupoti bagawe nou auna karasaubuti ie. Taie, iato bagawe ro urubia orobo aboto ibo, ‘Godi ro morobise a-gutura ra nitiro aboto ota iopu iho ate na-worowotoi nedi pari ro nato?’ 
Bagawe iato gemowameai orobo ro, ‘Godi ro ta-nimapoi-ma imese ota iopu iho ri, 
kaupoti nou ro a-gutura ibo, “Nitiro ro ouho ate odio ota iopu ro na-wotoi pari turi ato, ina owasomai ate mabu nitiro pamo amado-owea-ri.”’ 
Bagawe ro iato gutura iedi orobo ro nou aboto, ‘Karasaubuti owera ie! Nitiro orowaburai-ri pua. 
Godi umoro ie oro ro ota iopu nama-ouho-ri, iedi ota ro noudo oro umoro ama-iamotiti-ri meana ra ubauba ra, oro Godi sosoro ama-imidiro-ri!’ 
Ota orobo ro na-giauri meana ia se gotoi, ina ota iopu nou ro na-giauri giropu se giauri na-gorowotoi kiho aboto, ina nou kimaragoidiro to, ‘Mo ro nama-ouho-ri, mo kimaragoidiro mea se ama-iamo-ri eputa ato.’ Taie, nou ro ota iopu na-godohai-ro iato gouho, sapuwo uramu gomia ina nou ro aise gouho. 
Neitiro ota iopu kiho na-giporeai-rido, iato neitiro umoro nato goi-rido neitiro porose se na-gotoi-rido, iato neitiro ro awawo puara na-gidabuti-rido ina iato giwaruwoidiro-rido, taie aise giroiti-rido. 
Adimo sapuwo to Iawe Godi koroho diamo na-girorowai-rido pari ato, iato neitiro aise goropirua-rido ota mabu to. 
Iawe Godi ro iato gorumai, ‘Urubia dubu, oro boira?’ 
Urubia dubu ro ibo ‘Mo nou e, oro ta-nemororowai sairo diamo mo tere ri nou ri noropirowa-die oro aboudo, mabu mo porose se ie.’ 
‘Umoro bida sosoro to oi porose se? Mo ro ta-nemowapotai oro, nedi ota iopu ro oro ro ouho ate. Mo sabi oro ro ta-wesebea.’ 
‘Odio orobo ro oro ro na-gowomi mo abato, nou ro odohai-die ota iopu, mo nou ro nomia-die ina mo ro nato nouho.’ 
Ina Iawe Godi ro ibo orobo aboto, ‘Oro ro otou ri osioidiro?’ Orobo ro ibo, ‘Mo bagawe ro nasaubuti, mo ro ouho ri.’ 
Ina Iawe Godi ro a-gutura bagawe aboto, ‘Oro ro gosioidiro nedi tanaro ro. Oro mo ro ubauba anama-iwai-ri ibo oro sirio sairo ra tu ra to koroho namabu patu neio ro amadimo-otuti-ri, oro nakara se niro to ama-iromudodirotiti-ri, eputa ama-oworohuti-ri goto momoso maumo ato, nedi momoso ro nou ama-ihotiti-ri. 
Oro urubia orobo mutu amadi-irohoiotiti-ri. Oro aramio urubia orobo aramio mutu neio amadimi-irorohoiotiti-ri. Urubia mere ro oro ama-adotiti-ri eputa ato, ina oro ro ama-iagege-ri obonupu ato. Nou se ie.’ 
Ina Godi ro orobo aboto iato gutura ibo, ‘Oro niro mutu komidiro ato, oro temeteme ama-iauri-ri, ibose kirotuti ato, auna ia temeteme ama-iwaibia-ri. Oro ubi ie uramu oro ro kiauri, kaupoti oro uramu ro ama-adohotiti-ri. Nou se ie.’ 
Godi uramu aboto iato gerewesegerai nou ro ibo nou aboto, ‘Oro a-nomia auna woko nou ama-isioidirotiti-ri temeteme mutu mibo mutu, goto ubauba ta-nowai mabu oro orobo owera girorowai ina iato gosioidiro. Mo ro edio sabi ro na-nemedea ota iopu sapuwo to oro ro imaragoidiro pua. Oro ohona ama-iosoratiti-ri kahanekahane sebesebe mutu. 
Amia pari namabu ubauba se amadimi-isuwoduti-ri oro ro kiho aboto, ina sugamuso kumabo ununu ota neio amadimi-isuwoduti-ri, 
oro keremiro neito ama-owaboi-ri bagea ohona kiho. Oro goto to ama-orowameai-ri mo ro boido nosioidiro. Nou se ie.’ 
Urubia dubu nou masiro Adam. Adam ro orobo masiro a-gomia Ibi, ibo owamo Keremiro, nou imese urubia mamu e. 
Iawe Godi ro uramu ra orobo ra turumau sosoro takamai nou giwori-ma. 
Neitiro nou ro na-giauri-ma nou ia sosoro ie, nou ro ibo, ‘Neitiro umoro ta-woi-do meana ra ubauba ra sapuwo to. Neitiro modobo pua iedi keremiro ota iopu ro ina kouho aboto, mabu neitiro umoro ta-woi-do ubauba ra meana ra. Nedi ota iopu ro neitiro ro namado-ouho-ri, neitiro orowaburai-ri pua.’ 
Taie, nou ro ibo uramu ato, ‘Oro ro ama-isioidiro-ri awawo woko idaibo namabu kibouti, ina ohona kiosora.’ Ina neitiro ro Godi sabi owera a-gesebea-rido ota iopu neitiro ro na-gouho-rido, ina Godi ro noudo giwagare-ma iedi mea duriomoro ro neido. Neitiro imese gou-rido Ideni rudo. 
Ina Iawe Godi ro saiki boido idiawado-die pupuwo ia urio iato giwotobowa, neitiro nouto giwasiai-ma, ito korowameai modobo pua. Iato nou ro a-gedea giri era sosoro irewaretiti sapusapuwo, keremiro ota gabo kowasiai aboto. 
