﻿Karatamuai.
7.
Iawe ro ibo Noa aboto, ‘Oro mo ro na-niauri, oro kaupoti mea dubu nou se ie nedi duriomoro ro nato. Oro mere peteibi upi mutu, oro orobo, oro ia ba-dodoro-bimo ota bokose pe goro to. 
Oro ro kiho koroho namabu 7 upi 7 dubu ba-diwodouti, ibose oro ro kiho tato koroho namabu kaupoti orobo kaupoti dubu ba-diwodouti. 
Ina beda mutu erere pawa ra ohu ato na-orowadaudiro-dumo, 7 orobo 7 dubu ba-diwodouti, neio keremiro sapuwo to. 
7 saiki namadimo-oroporeai-ri mo ro auna ia daroho anamadi-emeiriai-ri, iedi daroho ro 40 saiki 40 duwo neito ama-iarotiti-ri. Beda mutu namabu sirio ra mo ro na-nisioidiro nedi duriomoro ro nato, mo ro anama-ipisiamuti-ri.’ 
Taie, Iawe ro beda owera garo, Noa ro aise gisioidiro. 
600 kisimisi na-gorobai Noa auna ia abata ro nato gowea. 
Noa, nou orobo, mere peteibi, upi mutu, neibi ota bokose pe goro to aise godoro-birimo, neibi abata ro kiopia-ibi rie. 
Imese koroho namabu, idaibo kiho namabu, kiho tato namabu, beda mutu pawa ra, koromudidiro namabu goto ato na-oroho-dumo, 
neio orobo ra dubu ra netewa netewa se goroho-rimo Noa aboto, taie nou ro ota bokose pe goro to aise giwodouti. 
7 saiki na-goroporeai-rimo, ina ata sogomi na-gohau-ro, 
17 saiki ato edi kisimisi ro nato Noa 600 kisimisi ro nato na-gorobai, auna abata obo sopu rudo gioro-ro, ibose auna daroho toboro rudo gororuwo-ro. 
Daroho a-wiarotiti duwo saiki womu tato 40 saiki ti-goroporeai-rimo. 
Daroho ido amadi-ou-ri, kebase Noa, nou orobo, mere peteibi Sem Iapeti Ham, neibi upi mutu ta-godoro-birimo ota bokose pe goro to. 
Nou ro ibose ta-giwodouti serawo namabu, serawo tato namabu, tu ra sairo ra to na-woroho-dumo, na-wererepedu-dumo, niro to goto ato na-woromudidiro-dumo. Ibose tamu ra mutu namabu idaibo pawa upi ra dubu ra nou ro ta-giwodouti. Noa ro imese namabu kiwodouti to na-giporeai, taie nou saro rido Iawe ro magere aise gemopai. 
40 saiki obo neito wiorotiti-ro, imese ibo wiorotiti-ro ota bokose pe na-gowoubua, iato nou aise gowadaudiro. Obo ibo wiorotiti imese imese ota mau ti-gimopai, ibo wioro-ro podo ti-gimopai, womu tato podo kiokio 7 mita obo maumo ato giamo. 
Taie, urubia sirio, beda mutu namabu sirio ra sairo to na-woroho-dumo, na-werepedu-dumo, na-woromudidiro-dumo pawa ohu ato na-worowadaudiro-dumo, obo ro aise giopiauti. Ata nakomu ata ro owea pua keremiro nedi sopu duriomoro ro nato, mabu Godi nou tau se ta-giedea kimaragoidiro nedi sopu duriomoro nou ro ubauba kowai aboto. Noa nou se ie kaupoti dubu nou beda urubia mutu godoro ota bokose pe goro to, neio ro se giwia-rimo keremiro. 
Ina ibo pua obo samo to komiodoi, aise wimidirotiti womu tato 150 saiki na-goroporeai-rimo. 
