﻿Karatamuai.
18.
Aberaham ro dubu simara takamai kiasio na-giporeai, nou aise gomidiro Mamere ato. Mamere ato awawo ota neio ro irowotoititi. Taie, ata saiki Iawe nato gorowawea sowake urio teibo mutu, paea dubu peteibi sosoro gou-birimo Aberaham aboto. Aberaham saiki turi ato parai moto magere damo ato gomidiro. 
Urubia dubu peteibi nou ro nato giwiai-ibi na-gou-birimo, nou aise gerebidiro iato gimarario-ibi, taie nou kauhio teibo to girimusubua, sosoro woidomari aise giwaposowa goto ato, mabu nou ubi ie kowawea ibo ‘Nibi awawo ie, mo kainai ie’. 
Ina iato Aberaham ro aise gimagege-ibi, ‘Mo nibi buro ro orohodorai-ri pua, saiki auna ie! 
Domi-birimo ota duwoduwo ato, sebesebe nato deremasebidiro-birimo, ido to amabimo-ou-ri, keba se obo mimiapo-ibiro sairo iwiouti na, iato ohona kainai amabimi-iho-ri.’ Neibi ro Aberaham owera ubi to gomidai-birimo, 
iato Aberaham aise garatea Sera emowapotai-ri sirio beredi isioidiro-ri. 
Nou imese gou mea burumakau dawade nou imeribai-biri, taie imese gowou-ro woko dubu aboto emopia ri, apira urubia iho na. Aberaham woko dubu ro edi ohona ro mea mino to gisioidiro neibi iho na. 
Taie, Aberaham ro iato gimowou-bi burumakau dao, burumakau nono isi, ata ohona mutu. Iedi dubu peteibi ro Aberaham ro aupise gimotoi-ibi, neibi kiwarebai-ibi sapuwo to. 
Iato neibi ata ro Aberaham nato gemodowa, ‘Sera boira?’ Aberaham ro ibo, ‘Tomidiro-die, parai moto ato.’ 
Iawe ro ibo, ‘Kaupoti kisimisi saro gabo ato mo anamadi-orowameai-ri, iedi tau ro nato Sera nou dubu mere ama-oroto-ri.’ Ina Sera ro piro se gimotoi-ibi parai moto magere damo ato, owera gare neido gimedeai-ibi na-geremowauti-birimo. 
Iedi owera ro Sera ro na-girorowai nou gaga iato giroroutiai, ina iato gimaragoidiro, ‘Keba se domere ta-nomidiro. Mo abora modobo pua mere niro mutu koroho, ina mere koroto aboto. Mo abere ie. Mo uramu Aberaham oromano ie.’ Sera mea se imibiria pua iedi dubu peteibi ro beda owera garo-birimo. Nou umoro ta-goi ibo nou sogomi ro ta-gasesere. 
Iawe ro ibo Aberaham aboto ‘Mabu boira Sera gaga na-iroroutiai? 
Morobise ie mo aboudo imese tanaro sirio koko pua. Ido mo anamadi-orowameai-ri kaupoti kisimisi saro gabo ato.’ 
Taie, Sera tere ro aise gorobai, nou a-gerematimai ibo, ‘Mo gaga iroroutiai pua.’ Iawe ro ibo, ‘Oro gaga ta-iroroutiai!’ 
Taie, neibi imese gaimai-birimo Sodom to, Aberaham mutu. Nou ibo gimaragoidiro egea mere se nama-iwaboi-ibiri ipi ato nama-imeserai-ibi. 
Iawe iato geremowagomea nakara se, ‘Aberaham aboudo mo ro iwopirua-ri pua edi tanaro ro mo ro nama-isioidiro-ri Sodom sapuwo to. 
Nou edi aramio merebusere ro pupuwo amadimo-oi-ri, neio ro auna sipu amadimi-iwia-ri. Mo ro korosa anama-aiwai-ri Aberaham aboto, ina ioudo ama-orobodorouti-ri imese erere owera urubia aboto. 
Aberaham mo ro narapoi, nou simara merebusere aramio mea se kiwaboi aboto. Nou ro neio ama-itamudiro-ri mo ubi tanaro kisioidiro aboto, mea tuputupu tanaro kisioidiro aboto, ibose tanaro modobomodobo ato kisioidiro. Ina mo ro beda owera nemasaubiai Aberaham aboudo nedi tanaro ro nou sapuwo to anama-isioidiro-ri.’ 
Ina Iawe ro iato gutura, ‘Mo ro sirio ubauba owera kirowidiro ie Sodom ra Gomora ra sapuwo to, urubia iato na-orowomidiro imese ubauba ia ie. Ubauba tanaro auna se isioidirotiti-dumo, 
mo nakara se anama-odori-ri neio iwia ri, ubauba morobise to a-isioidiro-dumo ra?’ 
Sowake urio teibo paea dubu teibo sosoro gaimai-rido Sodom sabowa to, Aberaham neitiro ro aise gemeserai-rido kotoi moro ato Iawe sosoro gabo ato. 
Aberaham owera mutu iato gerewesegerai ‘Oro ro gabo a-gosioidiro ra Sodom urubia kipisiamuti aboto, ubauba urubia meamea urubia mutu atu se? 
Ina oro ro iato nama-iwia-ri 50 meamea urubia, Sodom sabowa ama-opisiamuti-ri ra, iedi 50 meamea urubia neio mutu? 
Morobise ie, iedi 50 meamea urubia ro neio sapuwo to Sodom sabowa oro ro ama-arasogoro-ri, opisiamuti-ri pua. Oro auna eputa dubu nou se ie, imese duriomoro sirio oro ro iaurititi. Oro ro modobo ie urubia mea se kihoduti.’ 
Ina Iawe ro ibo, ‘Mo ro nama-iwia-ri 50 meamea urubia Sodom sabowa ato, neio sapuwo to mo ro edi sabowa gebari ro ubauba owai-ri pua.’ 
Aberaham ro Iawe ina iato gemodowa, ‘Mo oro ro nedi goto ro noudo nosioidiro, mo dorogora se dubu e, 
kaupoti mo ubi ie oro aboto kararatoro. 50 kowasomai tato, 45 meamea urubia kawakawa nama-orowomidiro-ri, oro ro edi sabowa ro ama-opisiamuti-ri ra?’ Ina Iawe ro ibo, ‘45 mo ro nama-iwia-ri, mo ro iedi sabowa ro opisiamuti-ri pua.’ 
Ina Aberaham ro ibo, ‘40 meamea urubia nama-iwia-ri, iedi sabowa ro oro ro ama-opisiamuti-ri ra?’ Iawe ro ibo, ‘40 meamea urubia mo ro nama-iwia-ri, iedi sabowa ro mo ro opisiamuti-ri pua.’ 
Ina Aberaham ro omuomu se garowado Iawe aboto ibo, ‘Modobo pua oro serawo koi, mo tere ie. Ina 30 meamea urubia oro ro nama-iwia-ri Sodom sabowa ato, oro ro iedi sabowa ro ama-opisiamuti-ri ra?’ Ina Iawe ro ibo, ‘30 meamea urubia mo ro nama-iwia-ri Sodom sabowa ato, iedi sabowa ro mo ro opisiamuti-ri pua.’ 
‘Mo dorogora se dubu e, kaupoti mo ubi ie ina oro aboto kararatoro. 20 meamea urubia nama-iwia-ri, oro ro Sodom sabowa ama-opisiamuti-ri ra?’ Iawe ro iato gemowameai ibo, ‘20 meamea urubia mo ro nama-iwia-ri Sodom sabowa ato, iedi sabowa ro mo ro opisiamuti-ri pua.’ 
Aberaham ro ina iato gutura ibo, ‘Mo ro iana owera nama-aro-ri, mo tere ie oro serawo koi. 10 meamea urubia oro ro nama-iwia-ri iato, iedi sabowa ro oro ro ama-opisiamuti-ri ra?’ Ina Iawe ro ibo, ‘Mo ro 10 meamea urubia iato nama-iwia-ri, mo ro iedi sabowa ro opisiamuti-ri pua.’ 
Iato Iawe owera karo na-goporeai, nou ro Aberaham imese gemeserai, taie Aberaham aise gorowameai-ro simara parai moto to. 
