﻿Karatamuai.
33.
Iakobo na-girarowea nou ro a-giwia 400 urubia sirio na-gou-rimo Iso mutu. Iakobo ro na-giwia neio, nou merebusere iato gihoduti simara mamio mutu giwotoburio. 
Iakobo ro keba to a-giwesia-ma nou sowake koroho orobo teibo neitiro merebusere mutu keba se neibi ro gai-birimo. Iato Ria merebusere mutu neio ie, iato Rasere tiro ie Iosepa mutu neitiro wapo rido. 
Iakobo ia nou keba to geresia nou ro na-gowea nou naramu Iso, nou iato sopu to aise giraposowa. Nou neido kou iato aise kiraposowa ie sopu to, neito gorowati nou kou ato aise kiraposowa ie, nou ro 7 tau to giraposoro sopu ato. 
Taie Iso ro na-gowea Iakobo, nou ioudo aise gerepeduai-ro komidiro moro rido, imese girario-ro Iakobo aboto. Iakobo nou ro nato aise gohiai iato gosome, taie neitiro idobi iato geremerete-rido. 
Iato Iso na-girarowea mamio merebusere mutu a-gorowotoi, nou ro Iakobo iato emodowa, ‘Nou beda mamio ro orowotoi merebusere mutu? Neio etio ra?’ Iakobo ro ibo, ‘Neio mo upi merebusere ro orowotoi, Iawe nou nirimagare ato giaiwo-ro oro sowake dubu, mo aboto.’ 
Taie iato keba se nou ro ta-gihoduti nou upi merebusere ina keba se sowake koroho orobo teibo neitiro ro gou-rido merebusere mutu. Neitiro merebusere mutu na-gou-rido Iso aboto neio sopu to aise giraposowa-rimo. 
Taie ina ibose Ria nou merebusere mutu na-gou neio sopu to aise giraposowa-rimo. Taie iato Rasere Iosepa mutu na-gou idaibo tanaro ibo ti-gosioidiro-rido sopu to aise giraposowa-rido. 
Iso ro ibo, ‘Oro mo ro sirio kiwoubua namabu ta-nemowea mo edio tau ato na-nou-die. Etou mabu ato iwou-die iedi kiwoubua namabu sirio ro?’ Iakobo ro ibo, ‘Auna dubu, oro kamade kowai sapuwo to ie mo ro nou ri niwou-die.’ 
Iso ro ibo, ‘Mona mo neama, mo abato idaibo sosoro namabu sirio se toroho-dumo, oro edi kiwoubua namabu sirio ro oro do ie, ba-diworohuti!’ 
Ina Iakobo ro ibo, ‘E e, ibo pua buro naramu. Oro kamade na-woi-die mo aboto, modi kiwoubua namabu sirio ro mo ro oro nemapoi, dimidai buro! Mo auna kamade ie oro mo ro sosoro beda sosoro nowea abora idaibo sosoro ie Godi sosoro woidomari kowea aboto, mabu mo oro ro ta-nemaidodorai-ro. 
Abora oro binio to nemediai mo edi nirimagare kiwoubua namabu sirio ro na-niwou-die oro ro kimidai aboto, mabu Godi nou meamea tanaro mo aboto ta-wisioidirotiti. Mo ro sirio ia se niworohuti, arua oro do ie oro nama-omia-ri.’ Nou ro ina ina binio to gemediawado, womu tato Iso ti-garaidodorai. 
Ina Iso ro iato gutura, ‘Neitiro anamada-aimai-ri, mo mutu atu se anamado-ou-ri.’ 
Iakobo ro a-gemowameai nou ibo, ‘Auna dubu, oro umoro ie mo merebusere pupuwo tato ta-woi-mo kou aboto, mo kiwoubua namabu sirio kainakaina mamio mutu, mo modobo ie neio mea se kimowotoi. Mo ro neio nama-imagege-ri hio ito namadimo-ou-ri neio amadimo-orowaburai-ri ipi ato. 
Auna dubu, modobo buro ie oro keba se ba-daimai oro mo ro umodi to anama-obodoro-ri mo merebusere kiwoubua namabu sirio mutu, ina mo neio kou to nama-ou-ri, womu tato oro kematimai Idomu duriomoro ato.’ 
Iso ro ibo, ‘Oro mo ro emowameserai-ri ra arua dubu.’ Ina nou ro iato gemowameai, ‘E e, marasio buro, oro ro emowameserai ate, oro kamade ta-woi mo aboto. Mo oro ro ina kowarebai modobo pua.’ 
Iedio saiki ro nato Iso nou ioudo gaimai-ro Idomu to gorowameai. 
Ina Iakobo nou Idomu to ou pua, nou ata moro towamo masiro Sukoti neito gou, iato moto aise gididi, ibose mapagea sirio iato gitomo kiwoubua namabu sirio sapuwo to. Ina nou rie iedio moro ro ararasoro ‘Sukoti’, Hiburu owera to owamo ibo ‘Mapagea’. 
Iakobo ro ta-gemeserai Rebeni duriomoro oromo teibo turituri ato na-owamo nou mea se gorowateai-ro Keineni duriomoro to, Hiwi gu dubu Sekemi beda sabowa to gomidiro, neito gorowateai-ro. Taie iedi sabowa ro nato saiki beda sapuwo rido idiawado-die nou urubia mutu parai moto iato geremari-rimo. 
Neio parai moto beda moro ato geremari-rimo, iedi goto kere ro aise gomidai. Sekemi abera Hamo nou edi dubu mere peteibi ro neibi aboudo gomidai nou ro, 100 siriba mani to. 
Taie iedi goto kere ro nato nou nadi iato gitomuti, nou ro masiro a-giduti, ‘Ere, nou ata masiro Iawe mo ro edina urio na-nemowabutititi’. 
