﻿Karatamuai.
39.
Iosepa Isipi duriomoro to Isimere urubia ro ta-gowou-rimo ina iato neio ro ta-gaiwai-rimo Potipa aboto nou ro mani to ta-gahodorai. Pero Isipi duriomoro eputa dubu e, nou saro gabo Potipa ro emeaurititi. Pero moto iedi urubia ro na-emotoititi-mo neio imese Potipa ro iaurititi. 
Iawe ro Iosepa woki emati pua, nou mutu imidirotiti, ina nou rie nou beda tanaro ra na-isioidirotiti saro rido nou ro mea wisa aise kowea ie. 
Iosepa Potipa moto ato na-imidirotiti nou umoro ta-goi Iawe Iosepa mutu e ina noudo ie Iosepa aboto nou auna kamade ro owatititi. 
Taie Potipa ro gabo nato gapoi Iosepa aboto nou ro otoi ri Potipa saro gabo ato nou sowake oroho na ie. Potipa ro auna woko gomia nou moto kemeauri sapuwo to, idaibo, iedi moto ro nato woko urubia na-irohotiti-mo imese Iosepa ro iaurititi. Ina ibose Potipa imese namabu patu Iosepa ro emeaurititi. 
Ina Iawe ro Potipa korosa ta-gomia ibose iedi urubia ro woko na-isioidirotiti-mo nou moto ato Iawe ro neio mutu atu se korosa ta-gimia. Beda mutu namabu patu ro giamo Potipa edi moto goro nato, moto pari ato edi namabu ro na-gorowotoi Iawe ro imese korosa aise gimio, mabu Iawe ro Iosepa ta-emaragoidirotiti-ro. 
Potipa ro beda namabu sirio iworohutiti nou ro Iosepa tu to aise gimeseruti. Iosepa ro emeaurititi imese sirio namabu, Potipa ro ata woko ata emaragoidirotiti pua, nou simara durupi eremododiaititi. Ata tau ato Potipa edi orobo ro ubi nato goi Iosepa aboto. Nou auna ubi ro owamotiti Iosepa mutu kirobu-ma. Iosepa nou mea domere ie, amura ia ie. Taie ata tau ato nou ro iato gutura Iosepa aboto, ‘Oro dou-ro neitiro nato irobu-mari!’ 
Ina Iosepa a-gorowairiai. Nou ro ibo, ‘Oro uramu ro sirio namabu mo tu to ta-gimeseruti-ro. Nou umoro towamo-die namabu patu nato mo ro mea se nemeauri. 
Ata omidiro pua mo sosoro nedi moto ro nato. Nou ro sirio namabu patu mo tu to ta-gimeseruti-ro, nou ro ata nakomu ata orobai pua mo aboudo, kaupoti oro, mabu oro nou orobo ie. Mo ro ubauba beda sosoro nama-osioidiro-ri Godi aboto?’ 
Iedi orobo ro sirio saiki patu Iosepa nou ro aise wesebotiti nou mutu irobuti-mari kaupoti Iosepa ia aise wirowairititi iedi tanaro nou kisioidiro aboto. Nou aboto aupise ateawadotiti pua. 
Iosepa ata tau ato nakara se gosioidiro woko moto goro ato ata dubu ata omidiro pua. 
Potipa orobo ro nou sodo rido gomudurai-ro. Nou ro ibo, ‘Dou-ro oro, nedi tanaro ro nou namado-osioidiro-ri.’ Iosepa sodo nou ro iato gowopurutai-ro nou tu ato aise gomowamo iato nou tere ri imese gosuwoidiro-ro moto goro rido. 
Potipa orobo umoro na-goi ibo Iosepa sodo ta-wemeserai-ro nou ro iato na-gosuwoidiro-ro moto goro rido, 
taie nou sowake urubia aboto iato giaia ibo, ‘Neito dirowidiro-rimo! Nedi Hiburu sowake dubu ro neito na-gou-ro nimo isaubuti-ri gowou-ro Potipa ro. Nou ro odoro-die mo aboto mo mutu irobu-marie, 
kaupoti mo iamo nutura ina nou sodo nou rie emeserai-die mo abato, nou e nou sodo.’ 
Taie nou ro aise gorobidiro iedi sodo ro urubia ro iauri ri womu tato nou uramu ti-gorowameai-ro. 
Taie nou ro iato gorowauti uramu aboto beda sosoro tanaro gororosioidiro. Nou ro ibo, ‘Oro edi Hiburu sowake dubu ro na-gowodoro-ro neito, nou ubi ie mo asaubuti ri nou aupise na-wou-die 
mo ro auna iamo nato niaia urubia ro irorowai ri, nou na-wosuwoidiro-die nou sodo nato nani kemeserai ie mo abato.’ 
Iosepa eputa dubu ro na-girorowai nou orobo ro beda owera gorowauti nou sapuwo to iato nou niro korosa nou ro aise gemowai. 
Taie Iosepa Potipa ro iato gohiai dibura to aise gedea. Isipi duriomoro eputa dubu ro urubia edi dibura moto neito na-iaremotiti, Iosepa edi atu dibura moto ro neito gibiria-rimo. Nou iato imese imidirotiti dibura goro ato. 
Iosepa na-imidirotiti dibura ato Iawe nou mutu imidirotiti ina Iawe nirimagare ie nou aboto. Ina noudo ie dibura moto kiauri dubu auna ia kamade ro gowatititi Iosepa aboto, 
nou ro ibose Iosepa gaubai imese sirio dibura urubia nou ro wiaurititi. Dibura moto kiauri dubu ro imese woko patu Iosepa tu to gimeseruti iedi dibura moto ro nato. 
Nou ata ata kimaragoidiro tato imidirotiti mabu nou ro imese woko sirio Iosepa tu ato giedea mabu Iosepa Iawe ro iaurititi nou do ie nou ro beda tanaro na-isioidirotiti saro rido nou ro mea wisa aise kowea ie. 
