﻿Karatamuai.
50.
Iakobo na-garaburai Iosepa nou auna nirimagare goi nou aboto. Nou ro iato aise gohiai idobi imese gemerete, ibose pamo ato iato gosome. 
Taie Iosepa iato gutura pamo woko umoro urubia aboto, nou durupi neio ro mea mino to osioidiro-ri, mea meresini emaromori. Taie iedi umoro urubia ro neio ro Iakobo edi pamo durupi ro mea mino to goworohuti-rimo, modobo pua nou durupi hoho ro korobai daro kepuse aboto. Neio ro katahiti obotama to mea mino to taie iedi umoro urubia ro neio simara muro to gosioidiro-rimo ina neio ro edi durupi ro 40 saiki neito gemododiai-rimo, modobo pua nou kepuse aboto. Isipi urubia neio idaibo sosoro tanaro to iworohutiti-mo neio pamo urubia, 40 saiki nou durupi neito kemododia ie mea mino to. Taie Isipi urubia Iakobo pape na-irowomidirotiti 70 saiki neito wirowomidirotiti. 
Taie iedi pape ro na-goroporeai Iosepa ro nato gutura eputa dubu iedi gabamani urubia ro neio aboto. Nou ro ibo, ‘Nio modobo buro ra mo owera kemowou eputa dubu aboto? 
Mo abera dubu karaburai aupise na-gowamo-ro nou ata owera ta-gutura-ro mo aboto, ina mo ro morobise owera ta-nutura ibo mo ro anama-owou-ri, mo abera dubu nou beda bobo goro gemododiai Keineni duriomoro ato iato nama-edea-ri. Eputa dubu ba-demowapotai-mo ibo “Mo kadodorai modobo ie, abera dubu pamo durupi nama-owou-ri ito iato nama-edea-ri, ina anamadi-orowameai-ri neito.”’ 
Taie eputa dubu ro na-girorowai edi owera ro nou ro a-gutura-ro ibo, ‘Nou beda morobise owera garo abera aboto modobo ie aise kisioidiro. Ba-mowou abera dubu pamo ba-medea iato bobo goro to.’ 
Taie Iosepa iedi owera na-girorowai nou iato geremododiai, iato abera dubu durupi imese gowou. Sirio ia ro gou-rimo nou mutu imese aise garaubai, eputa dubu iedi gabamani urubia ro neio ta-garadabuai-rimo, Isipi awawo urubia sabowa edi urubia ro giauri-rimo neio ibose ta-garadabuai-rimo, Iakobo pamo durupi ibo gowaboi-rimo Keineni duriomoro to. 
Ibose Iosepa edi naramio ro neio ta-garadabuai-rimo, etio ro irowomidirotiti Iosepa mutu ibose etio ro irowomidirotiti nou abera ra naramio ra neio mutu Goseni ato iedio urubia sirio ro imese aise garaubai neio mutu atu se gou-rimo. Goseni ato merebusere kainakaina kiwoubua namabu neio kawakawa gimeserai-rimo. 
Arua rubi neio Iosepa mutu edina urubia ro na-gou-rimo neio gabo ato koroho namabu neito gou-rimo, arua urubia neio hosi to gou-rimo 
taie Keineni duriomoro to na-gorowateai-rimo, ata moro ta-ararasoro Atadi Iodeni oromo bara ato owamo, woiti takamai edina moro ato na-iamutiti-dumo neito gorowateai-rimo. Neito na-gorowateai-rimo taie Iakobo pamo durupi neio ro aise gedea-rimo iato gemerete-rimo. Iosepa pape 7 saiki to gomidiro iato. 
Ina Keineni urubia ro na-giwia-rimo edi tanaro na-gisioidiro-rimo Atadi ato neio ro ibo, ‘Nedi Isipi urubia ro neio ro pape auna ia se emaragoidirotiti-dumo.’ Ina edi moro ro neio ro nou ri giditi-rimo Eiboro Misiraim, ibo owamo Hiburu owera to ‘Isipi urubia pape’. 
Ina Iakobo ro beda owera garo keba se nou pamo durupi sapuwo to nou dubu mere sirio aise gosioidiro-rumo. Taie neio ro nou durupi na-gowou-rimo imese gibiria-rimo Makapera bobo goro to Mamere abato na-owamo. Iedi bobo goro ro pari mutu Hiti gu dubu e Eporoni nou aboudo keba ia se Aberaham ro gimidai mani to. 
Taie Iosepa nou abera na-gibiria mea mino to, iedi tanaro ro imese na-goroporeai-rimo Iosepa etio mutu gou-rimo nou naramio arua rubi nou mutu na-gou-rimo ina neio ibose atu se imese gorowameai-rimo Isipi duriomoro to. Taie. 
Iakobo na-garaburai nou wapo gabo ato iato Iosepa edi naramio ro neio nakara se nato geremowauti-rimo. Neio ro ibo, ‘Etu umoro ra Iosepa nou serawo towamo nimo aboto, mabu nou aboto nimo ro ubauba ia tanaro ta-nisioidirotiti-mo. Etu mutu umoro ra nou wisa ubauba to kowameai nimo aboto.’ 
Taie neio owera iato gemeiriai-rimo Iosepa aboto ibo, ‘Oro abera ro nimo ta-nimowapotai nedi owera ro nou ido garaburai owera ibo ie, 
“Nio ro ubauba ia tanaro ta-gisioidiro-rimo nou aboto. Nio ro Iosepa ba-demowapotai-mo nou ro woki imimati ri.” Ina abora oro aboto buro a-norowaro-dumo nimo beda ubauba tanaro nisioidiro-rimo oro ro nimo woki ba-dimimati-ro. Oro edi abera ro nedio urio ro na-emowabutiti ibose nimo nou ubi tanaro ti-nisioidirotiti-dumo.’ Nedi owera ro Iosepa ro na-gimidai nou auna idobi gedea. 
Iosepa naramio iato gou-rimo nou aboto neio iato giroborea-rimo nou sosoro gabo ato, owera iato garo-rimo ibo, ‘Nimo oro sowake urubia to namadima-ararasoro-ri.’ 
Kaupoti Iosepa ro iato gimowameai, ‘Nio tere na ie! Mo Godi sosoro omidiro pua. 
Nio ubi ta-giamo mo ubauba owai ri, kaupoti Godi ro gewesegeruti edio tanaro ro meana to, nou ro gedea, nou ro nou mabu ato gosioidiro nedi tanaro ro urubia sirio nou ro sogoi ri korowaburo aboudo iwameai rie keremiro to, taie torowomidiro edi urubia sirio ro abora. 
Nio tere na ie, dosiomai-rimo mo aboto. Nio merebusere mutu mea mino to anama-iworohuti-ri.’ Nou ro beda owera to gimowauti neio kamade aise goi-rimo. Taie. 
Iosepa imese imidirotiti Isipi duriomoro ato naramio mutu womu tato nou 110 kisimisi ro na-gorobai. 
Nou na-imidirotiti Isipi duriomoro ato, nou mere Eparaimi merebusere ta-girasomai ina Eparaimi edi merebusere ro neio ro merebusere ta-girasomai-rimo. Iosepa mere Manase nou ro mere ta-garasomai masiro Makiri. Iosepa ro Makiri edi merebusere ro na-girasomai nou ro aise giahuruworo. 
Iato Iosepa naramio aboto owera iato gemeiriai neio ou-ri nou aboto. Neio na-gou-rimo nou ro iato gimowapotai, ‘Nio mo ro kimeserai aboto aupise ie. Nio aramio merebusere mutu Godi ro mea mino to ama-iaurititi-ri. Nou ro nio aramio merebusere ama-iwosuruwo-ri nedi duriomoro ro neido, ito ama-iwameai-ri Godi ro beda duriomoro gemapoi Aberaham Aisaki Iakobo neibi aboto. Mo sosoro gabo ato morobise owera daro-rimo! Isiraere urubia Isipi duriomoro namadime-emeserai-ri mo soro ba-dimidai-mo Isipi duriomoro rido ba-diwameai-mo ito!’ Ina neio ro ibo, ‘Nimo ro oro edi soro ro anamadimi-iwameai-ri ito.’ 
Taie Iosepa 110 kisimisi to wimidirotiti nou iato aise garaburai. Taie pamo woko umoro urubia neio ro nou pamo durupi mea mino to na-gemododiai-rimo, meresini to kemaromo obotama to na-getebuti-rimo taie imese gibiria-rimo pamo durupi bokose goro to. Iedi tanaro sirio ro iato gororosioidiro-rimo Isipi ato. Taie. Keba keba tau ato tanaro patu beda sosoro to gororosioidiro-rimo nou totomu e. Taie. 
