﻿Iona.
1.
Ata dubu masiro Iona Amitai, Isiraere duriomoro ato gomidiro. Iawe ro ibo, 
‘Oro ito ba‑dedei auna sabowa to masiro Niniba. Neio ba‑dimowapotai ibo mo ro wisa anama‑aiwai‑ri neio ubauba tanaro sapuwo to. Urubia iato ubauba ia se orowomidiro‑die, ubauba tanaro auna ia se isioidirotiti‑dumo.’ 
Iona ro na‑girorowai edi owera ro, nou ubi tato aise goi, nou imese godau ata moro to, ito edei pua. Nou buru oromo to na‑gohau sawa pe iato ta‑gorobu Iopa sabowa ato. Taie pe wisa na‑gaiwai, sawa pe edi dubu ro na‑giauri nou aboto nou ro ibo, ‘Modobo ie, ba‑dorora‑ro.’ Taie imese godau‑ro muso duriomoro to, masiro Tarasisi, Iawe aboudo odau rie. 
Neio na‑giabu‑rimo ipi ato, auna surama Iawe ro nato gemeiriai‑ro. Taie edi urubia ro pe ato na‑gorowomidiro tere ro girobai, neio iato a‑geremasibai‑rimo ‘Nimo anama‑iroruwo‑ri!’ Taie neio simara orora iato giroru‑rimo, ‘Nimo diwarebai‑rimo! Modobo pua nimo bukopu ro kimarumo! Nimo diwarebai‑rimo!’ Neio umoro pua Iona norou torobu pe goro ato. Iato beda nakomu ro giamo aise gihere‑rimo pe toutou owai ri, kaupoti modobo pua, surama imese pupuwo ia se gou‑ro, Iona isana norou ibo gorobu. 
Taie pe eputa dubu nou imese godoro, Iona nou ro iato gamutia. Nou ro ibo, ‘Oro deribua‑ro! Oro etou ri orobu norou? Oro simara orora dararatoro nimo iwarebai ri! Etu umoro ra nimo korowaburai moro rido nou ro nirimagare anamadi‑imowai‑ri.’ 
Ina urubia ro ibo, ‘Nou boido ra mabu? Etona mabu ato ra nedi surama ro auna se na‑ihuduti‑die?’ Taie neio ota iopu iato geremewesere‑rimo, Iona masiro se gapimaidiro‑ro ohu ato. 
Neio ro ibo, ‘Oro nou se ie nimo ubauba oro ro niwai, mibo oro ro nimia‑die! Oro beda dubu ra? Oro beda woko dubu ra?’ 
Ina Iona ro ibo, ‘Mo Hiburu dubu e. Mo Iawe ohu ato na‑omidiro nou ia se nemowabutiti. Duriomoro oromo nou ro gisioidiro. Nou aboudo nodau‑die.’ Neio iedi owera ro na‑girorowai‑rimo auna ia tere ro aise girobai. Taie neio ro ibo Iona aboto, ‘Oro ata ubauba tanaro osioidiro! Nimo aupise ie kimarumo, mabu mibo oro ro owou‑die nedi pe ro neito! 
Ba‑dimowapotai‑ro surama ra bukopu ra nimo ro beda tanaro to namadimi‑iadibiai‑mari!’ 
Ina Iona ro ibo, ‘Io mo nou se ie ubauba mo ro nosioidiro. Mo deherai‑rimo obo to! Ina surama ra bukopu ra nato amado‑oroporeai‑ri.’ 
Neio ro eherai pua, aibi aise giabidiro‑rimo egea se giabidiro‑rimo modobo pua, surama auna ia se gihuduti‑ro, bukopu gesagesa aise gorowiti‑rimo pe to, modobo pua neio sopu to kiairio. 
Taie neio ro keba se Iawe aboto iato giaiauti‑rimo, ‘Nimo ro edi tanaro namadimo‑osioidiro‑ri, woki ba‑dimati‑ro, iedi ubauba ro namadimo‑osioidiro‑ri oro ia ubi ato ororosioidiro.’ 
Taie Iona neio ro korobai, obo to aise gigirimaidiro‑rimo, imese gororuwo obo to, iato gasio aise gereredea. 
Neio ro na‑gowea‑rimo gasio na‑gereredea, auna ia se gimaragoidiro‑rimo Iawe aboto, nou abora tanaro ororosioidiro. Neio ro Iawe ohona iato gematowo‑rimo, ina nou sosoro gabo ato keremowotouti owera iato gutura-rimo. 
Iona na‑geherai‑rimo, Iawe ro nakere gebari nato gemeiriai‑ro, ina Iona nou ro aise gomogodia. 
