﻿Mataio.
2.
Iesu mamu ro Beterehema sabowa ato goroto. Beterehema sabowa Iudia duriomoro ato owamo. Iedi tau ro nato eputa dubu to Herodi ro gomidiro, Iudia duriomoro nou ro giauri. Taie kiboni sapuwo to karatamudiro auna umoro na peteibi ro saiki kidiawado moro rido na-gou-birimo, Ierusarema sabowa to ta-gorowateai-birimo. 
Neibi ro ibo, ‘Iedi bamuai ro mamu ro dese to na-owahau, boira Iu eputa dubu to edi na ro nama-ararasoro-ri? Kiboni nou sapuwo to saiki kidiawado sapuwo rido kebase ta-nowea-bimo na-imewia-die, ina saiki korioduti moro to neito nowasoro-diebimo nou emowabu ri.’ 
Nedi owera ro eputa dubu ro na-girorowai, Ierusarema sabowa urubia mutu, neio ubauba kimaragoidiro ro girobai. 
Taie tuturu to owamo pua eputa dubu Herodi ro Godi ra urubia ra turituri awawo urubia, Mose sabi kitamudiro urubia mutu, owera neio aboto nou ro nato gemeiriai neio ou ri nou aboto. Neio na-gou-rimo, taie nato gimodowa ibo, ‘Godi ro kohodowa dubu koroto moro boira? Tarena Buka ato beda sosoro owera gowapotai-rimo?’ 
Nou neio ro ibo gemowameai-rimo, ‘Nou mamu ro Beterehema sabowa ato ama-oroto-ri, Iudia duriomoro ato na-owamo. Mabu nedi owera ro tiamo Tarena Buka ato Godi ipusu owera dubu Maika nou ro kebase ta-gisioidiro ibo, 
Beterehema sabowa oro! Iuda duriomoro ato na-owamo, oro masiro mutu e. Arua sabowa Iuda duriomoro ato na-iamo, oro idaibo sosoro pua. Eputa dubu to edi dubu ro nama-ararasoro-ri, oro aboudo amadi-osuruwo-ri. Nou sipisipi kimowotoi dubu sosoro ie, Isiraere urubia nou ro ama-iauri-ri.’ 
Taie nedi owera ro eputa dubu ro na-girorowai, nou ro nedi auna umoro na peteibi ro iato piro se gidabuai-biro. Nou ro ibo, ‘Nibi ro nedi kiboni ro beda tau ato gowea-bimo keba se? 
Beterehema sabowa to ba-dou-bimo. Nedi mere ro mea ia se ba-dosora-bimo, namabimo-owea-ri neito ba-dorowameai-birimo mo emowapotai ri. Mo ibose anama-ou-ri nou emowabu ri.’ 
Taie nedi owera ro eputa dubu aboudo na-girorowai-birimo, neibi iato aise gasiriai-birimo, iedi atu kiboni ro nou se gobodoro-birimo, saiki kidiawado moro rido na-gimewia-ro. Neibi ro na-giauri-birimo iedi kiboni ro aise gouwado, womu tato kiboni tupu se ti-gotobowa bamuai korobu moro abato. Taie neibi auna ia kamade mutu aise godoro-birimo bamuai kainai korobu moto to. 
Taie iedi bamuai kainai ro sosoro na-gowea-birimo mamu Maria mutu, neibi kauhio to na-girimusubuwa-birimo, Iesu iato gemowabu-birimo. Taie tako rido awawo wisa namabu gorodi, meamea nibo dehoro teibo mutu, neibi ro na-giehuti-birimo, ata inisensi to asoro-dumo, ina ata mura to asoro-dumo, iedi bamuai kainai ro iato gomio-birimo. 
Ata tau neibi hiwo to Godi ro owera nato gimowapotai-bi ibo, ‘Nibi edi gabo rido gou-diebimo, ioudo orowameai ate Herodi aboto, ata gabo rido ba-dorowameai-bimo simara duriomoro to!’ Neibi ro iedi owera ro na-girorowai-birimo, taie ata gabo rido imese gaimai-birimo. 
Iedi auna umoro dubu peteibi ro na-gasiriai-birimo, ina nou saro gabo ato Abera Naramu edi sowake urio ro nato gou-ro hiwo to Iosepa aboto. Nou ro ibo, ‘Iosepa deribua, mere ra mamu ra Isipi duriomoro to ba-diwadau-ma, mere kainai Herodi ro kopia aboudo. Nibi iato aise ba-domidiro-bimo womu tato owera mo aboudo namabimi-irorowai-ri nibi korowameai sapuwo to. Mabu nedi bamuai ro Herodi ro osora opia ri emahuwo.’ 
Nedi owera ro Iosepa ro na-girorowai, neitiro nou ro iato iwediouti-ma pua, duwo ato giwadau-maro ioudo Isipi duriomoro to. 
Taie neibi iato aise imidirotiti-bimo womu tato neibi ro na-girorowai-birimo ibo eputa dubu Herodi ta-garaburai. Kebase Abera Naramu ipusu owera dubu edi owera ro na-gisioidiro Tarena Buka ato, tanaro morobise to noti gororosioidiro ibo, Mo mere ta-nemowapotai Isipi duriomoro rido osuruwo ri. 
Herodi umoro na-goi ibo nedi auna umoro dubu peteibi ro neibi ro nou a-gasaubuti-birimo, iato nou punugo ta-garauduti serawo ri. Taie nou ro boso koroho urubia nato gimowapotai imese dubu bamuai kainakaina sirio, 2 kisimisi rido na-ororuwo-die iopiauti ri, Beterehema sabowa ato na-orowomidiro, ibose gomo ato edi sabowa ro giamo. Mabu nedi auna umoro na peteibi ro Herodi kebase neibi ro ibo gemowapotai-birimo, netewa teibo kisimisi teibo ta-gororoporeai-rido kiboni nato gimewia-ro. 
Kebase Godi ipusu owera dubu Ieremaia edi owera ro na-gisioidiro, tanaro morobise to noti gororosioidiro-dumo ibo, 
Auna iamo Rama sabowa ato ta-girorowai-dumo! Idobi diamo iato taro-die! Kamade tato tau iato ta-gereredea! Rasere ro pamo dubu mere kainakaina idobi imerete! Nou ubi tato ie urubia ro kemadoho. Mabu boira? Mabu ata dubu mere ata eremeserai pua. 
Herodi na-garaburai, iato nou saro gabo ato, hiwo to Abera Naramu edi sowake urio ro ina Iosepa aboto nato gorowapotai-ro, 
nou ro ibo, ‘Iedi mere ro mamu mutu neido ba-diwameai-ma Isiraere duriomoro to. Mabu nou edi urubia ro ubi na-iamotiti nou opia ri, neio abora pua ie, ta-gorowaburo-dumo.’ 
Taie Iosepa ro nedi owera ro na-girorowai, neibi na-geremododiai-birimo, taie ioudo imese gaimai-birimo Isiraere duriomoro to. 
Ina ipi gabo ato owera nou ro nato girorowai ibo, ‘Abora Iudia duriomoro ato eputa dubu to Herodi simara mere Akerasi nou ro omidiro, abera bobo nou ro gorobai.’ Kaupoti nedi owera ro Iosepa ro na-girorowai, nou abato tere kimaragoidiro nato gereredea. Taie Iudia duriomoro to korowameai gabo aise goropai-ro. Ina iato Godi ro Iosepa aboto owera hiwo to nato garo-ro ibo, ‘Iudia duriomoro to owou ate, Gariri duriomoro to ba-dowou!’ Taie nou Gariri duriomoro to aise gou, 
ito na-gorowateai, Nasareta sabowa to aise gemobodiai, iato imidirotiti-bimo. Keba se Godi ipusu owera urubia ro edi owera ro na-gisioidiro-rimo Tarena Buka ato, tanaro morobise to noti gororosioidiro-dumo ibo, ‘Nou Nasareta dubu to amadima-asoro-ri.’ 
