﻿Mataio.
5.
Ina ioudo Iesu ro na-giwia urubia sirio nou aboto na-gou-rimo, nou iato aise gidiai damera ohu to. Taie nu iato aise gomi urubia nou ro itamudiro ri. Nou kowasoro urubia ro na-gowea-rimo neio saro rido aise gidiai-rimo nou aboto. 
Taie Iesu ro urubia owera kimowauti nato gatamuai, nou ro ibo gitamudiro. 
‘Urubia etio ra Godi sosoro gabo ato neio nakara se umoro ie ibo nimo rabesi urubia ie, neio Godi aboudo meana amadimi-iauri-ri. Mabu Godi ro kiwaboi tanaro idaibo urubia nou ro ta-girapoi odouti ri. 
Urubia etio ra nitonito se na-irowomidirotiti, neio Godi aboudo meana amadimi-iauri-ri. Mabu neio Godi ro ido ama-iageawado-ri. 
Urubia etio ra keremowabu tato na-irowomidirotiti, neio Godi aboudo meana amadimi-iauri-ri. Mabu neio Godi ro duriomoro ama-imapoi-ri. 
Urubia etio ra auna ubi ro na-iamo Godi edi meamea tuputupu tanaro ro kororosioidiro aboto, neio Godi aboudo ibose meana amadimi-iauri-ri. Mabu neio tuputupu ubi tanaro wisana Godi ro ama-isioidiro-ri. 
Urubia etio ra arua urubia nirimagare na-imati-dumo, nedi urubia ro Godi aboudo meana amadimi-iauri-ri. Mabu Godi ro wisana neio aboto nirimagare tanaro ibose to ama-isioidiro-ri. 
Urubia etio ra ata ubauba ata neio niro turi ato kowamo tato, neio Godi aboudo meana amadimi-iauri-ri. Mabu neio ro Godi sosoro amadimo-owea-ri. 
Urubia serawo tau ato muro etio ro iwaititi-dumo, neio ro Godi aboudo meana amadimi-iauri-ri. Mabu neio Godi ia ro merebusere to ama-iapoi-ri. 
Urubia etio ra meamea tuputupu tanaro kisioidiro sapuwo to ubauba mino to na-iworohuti-dumo, neio Godi aboudo meana amadimi-iauri-ri. Mabu Godi ro kiwaboi tanaro idaibo urubia nou ro ta-girapoi odouti ri. 
Nio arua urubia ro ubauba owera na-imio-dumo, ibose bagea owera na-imasaubuti-dumo, ina ubauba mino to na-iworohuti-dumo, mabu nio mo kowasoro urubia ie, nio Godi aboudo meana amadimi-iauri-ri. 
Ina ba-dimaragoidiro-mo, idaibo tanaro Godi ipusu owera urubia aboto kebase etio ro gorowomidiro, neio aboto ta-gororosioidiro-rimo. Nio modobo ie auna ia auna ia kamade ro kiwati. Mabu nio sapuwo to auna wisa towamo-die Adiri sabowa ato, nio ro saiki ata nou amadimi-imade-ri.’ 
Iesu ro owera ina aise gemoguwado ibo, ‘Mo na-nowasoro-dumo nio damena topo sosoro ie, urubia sirio nedi duriomoro ro nato na-orowomidiro neio sapuwo to ie. Kaupoti damena simara topo na-iasoperai, ina topo kowameai aboto ata gabo tato ie, ubauba imese koi ie. Taie iedi damena ro urubia koroho moro to aise kiherai ie, neio ro aise kituti ie. 
Ina idaibo sosoro ie nio pina woroworo sosoro ie, urubia sirio nedi duriomoro ro nato na-orowomidiro, nio iauri-dumo. Ina ata sabowa damera ato na-owamo, nou koropirowa gabo tato ie, paease iauri-dumo urubia ro. 
Ina urubia ro erempa kiwatuti ato, neio ro soboro gugu to kiatimo ra? E e neio ro kenene ato kiamiti ie, moto urubia ro iedi pina woroworo ro namabu mea se nato kiauri ie. 
Ina idaibo sosoro ie, nio aboudo pina woroworo ro urubia sosoro gabo ato ba-miriwaretiti-mo. Ina noudo ie nio urubia ro namadimi-iauri-ri nio ro meamea tanaro namadimi-isioidiro-ri, neio ro nio Abera Adiri sabowa ato na-imidirotiti-die nou amadime-emowabu-ri.’ 
‘Nio ibo gimaragoidiro-mo mo Godi ro neito na-nemeiriai-ro, nou ro edi sabi sirio ro Mose aboto na-giaiwai-ro imese na ito iasiai rie, ibose Godi edi ipusu owera urubia ro Tarena Buka ato edi owera ro gisioidiro-rimo iasiai ri. E e marasio mo sabi iasiai ri ou pua. Mo neito na-nou-ro neio edi owera ro morobise to kororosioidiro aboto nou-ro, ibo pua neio edi owera ro iasiai ri. 
Morobise owera nou e mea se neito ma-dirowidiro-rimo! Toboro ra duriomoro ra nama-iamotiti-mari, Godi edi sabi sirio ro Mose aboto na-giaiwai-ro ararasoperai-ri pua, womu tato sabi edi ubi ato gimeiriai-ro tanaro noto amadimo-ororosioidiro-ri. Godi edi sabi sirio ro ata kainai titi ata, o ata kainai mako ata ararasoperai-ri pua, womu tato sabi edi ubi ato gimeriai-ro tanaro noto amadimo-ororosioidiro-ri. 
Ina noudo ie Godi edi sabi sirio ro giaiwai-ro Mose aboto, etu ra ata sabi kainai ata kesebea ato, ina nou ro arua urubia idaibo sosoro na-itamudiro, nirimagare buro ie nedi dubu ro Godi edi kiwaboi maumo ro neito ama-odoro-ri sekere, kaupoti nou masiro tato dubu to ama-ararasoro-ri. Kaupoti etio ra Mose edi sabi sirio ro na-ibodoro-dumo ina urubia na-itamudiro-dumo, nedi urubia ro awawo masiro mutu e Godi ro kiwaboi maumo ato. 
Ina noudo ie nio mo ro auna owera ibo mimowapotai-ro, Parasi urubia, Mose sabi kitamudiro urubia, neio ro meamea tuputupu tanaro morobise to kisioidiro pua. Neio Godi edi kiwaboi maumo ro neito odouti-ri pua. Ina neio edi mino ro nio ro namadimi-ibodori-ri, Godi edi kiwaboi maumo ro neito nio imese odouti-ri pua. Kaupoti nio ro meamea tuputupu tanaro morobise to namadimi-isioidiro-ri, ibo pua nedi urubia ro neio sosoro, io nio Godi edi kiwaboi maumo ro neito amadimo-odouti-ri.’ 
‘Nedi owera ro nio ro kebase umoro ta-goi-rimo, nimo nasa naminami ro keba ia tau ato gimidai-rimo ibo, “Urubia iopiauti mamo. Urubia dubu ro ata na-opia, nu koto kiauri dubu aboto kowou ato nou koto kiauri dubu ro wisa ama-omia-ri.” 
Kaupoti nio mo ia ro owera ibo mimowapotai-ro! Ata dubu serawo na-woi ata dubu aboto, nu koto kiauri dubu aboto kowou ato, nou koto kiauri dubu ro wisa ama-omia-ri. Ina ibose ata dubu ro ata dubu ubauba owera to na-ematubutai ibo, “Oro imese eputa tato ia ie!”, edi dubu ro auna koto to kowou e, koto kiauri urubia ro wisa amadimo-omia-ri. Ina ibose ata dubu ro ata dubu na-ematubutai ibo, “Oro imese ubauba ia ie!”, etu umoro ra edi dubu ro Godi ro era paruo to ama-atowea-ri. 
Ina noudo ie oro Tarena Moto to dao na-owou Godi aboto ematowo ri, ina oro kimaragoidiro to na-irariomaidiro-die ibo, ata dubu mo aboto serawo ie, ata tanaro na-nosioidiro nou aboto. 
Keba tanaro oro ro nou dosioidiro, dao demeserai patapata gomo ato, Tarena Moto rido dosuruwo-ro. Nedi dubu ro nou mutu nedi mibo ro hio ito kagodo, ina daradabuai-do. Taie oro saro to dorowameai Tarena Moto to, dao patapata ato ematowo ri. 
Ina ibose oro serawo dubu ro koto aboto na-owou, hio ito dadabuai. Iedi mibo ro ipi ato nou mutu hio ito doporeai-do. Nedi mibo ro oro ro hio ito koporeai tato, oro mea se, oro nou ro koto kiauri dubu aboto ama-owapotai-ri. Oro iato etou ra, oro nou ro pesomani tu to ama-edea-ri. Ina oro nou ro dibura to aise ama-edea-ri. 
Morobise owera nou e, neito ma-dirowidiro-rimo! Oro imese gorowaguwo oro iato ama-imidirotiti-ri kosuruwo gabo tato ie, womu tato kosuruwo wisa momuo se nama-aiwai-ri.’ 
‘Nedi owera ro nio ro kebase umoro ta-goi-rimo ibo Arua mamio o dubu mutu oroho mamo! 
Kaupoti nio mo ia ro owera ibo mimowapotai-ro! Ata dubu ubi na-iamo ata orobo mutu koroho, nedi dubu ro nou ro tanaro morobise to ta-emesioidiro. 
Ina noudo ie oro giropu maumo ato ata ubauba ubi tanaro ata na-owamo, hio ito dowagare, ba-deherai. Nu idaibo maumo emabuti-die oro ro ata orobo ata na-emodumia iedi idomari ro hio ito daubidiro ba-deherai. Sapuwo idomari kaubidiro ato, io ata nakomu tato ie. Ina oro modobo pua momuo durupi nou ro kemamuai era paruo to keherai, imese ubauba tanaro ia ie. 
Ibose ata ubauba tanaro ata oro abato na-owamo, hio ito dowagare ba-deherai. Nou idaibo maumo emabuti-die, oro ro ata ubauba tanaro ata na-osioidiro tumodi tu to, iedi tu ro ba-deherai. Sapuwo tu kasiai ato io ata nakomu tato ie, modobo pua durupi momuo se nou ro kemamuai era paruo to keherai, imese ubauba tanaro ia ie.’ 
‘Nedi owera ro Mose aboudo nio ro kebase ta-girorowai-rimo ibo, Ata dubu ro orobo na-wararubia, modobo ie nou ro kararubia peba titi kisioidiro orobo aboto kaiwai. Taie nedi orobo ro nou ro nato kararubia ie. 
Kaupoti nio mo ia ro owera ibo mimowapotai-ro! Ina oro ro idaibo tanaro kosioidiro ato simara orobo aboto, oro nou ro mau kesebea tato, ina oro ro kararubia tanaro na-osioidiro, nou oro ro piro tanaro orobo to kapoi ie nou orio uramu ro nama-edea-ri. Ina ibose nedi orobo ro ata dubu ata ro nato na-edea, nedi dubu ro nou ro piro tanaro kosioidiro ie.’ 
‘Ina ata owera ibo ie, nedi owera ro nio ro kebase umoro ta-goi-rimo. Nimo edi nasa naminami ro nedi owera ro keba ia tau ato neio ro gimidai-rimo ibo, Oro ro beda hodo kemasaubiai ra asiai mamo. Oro ro kemasaubiai tanaro ata dubu aboudo na-wosioidiro, Abera Naramu masiro na-wapoi koko owai ri, durupi to aise gi-isioidiro-ri. 
Kaupoti nio mo ia ro owera ibo mimowapotai-ro! Hodo kasaubiai ato, ata masiro apoi mamo. Hodo kasaubiai ato, Adiri sabowa masiro apoi mamo oro owera pupuwo kowai aboto. Mabu Adiri sabowa Godi komidiro moro ie. 
Ibose hodo kasaubiai ato, sopu duriomoro masiro apoi mamo oro owera pupuwo kowai aboto. Mabu nedi sopu duriomoro ro Godi sairo teibo nato iwotoititi-ma. Ibose hodo kasaubiai ato, Ierusarema sabowa masiro apoi mamo oro owera pupuwo kowai aboto. Mabu Ierusarema sabowa auna ia eputa dubu Godi nou komidiro moro ie. 
Ibose hodo kasaubiai ato, oro ro simara eputa apoi mamo oro owera pupuwo kowai aboto. Mabu oro simara sobo muruwa keakea kowai, o garegare kowai, oro aboudo modobo pua. 
Ata namabu masiro apoi mamo, o ata dubu masiro apoi mamo, oro owera pupuwo kowai aboto. Oro ro ibo gi-utura-ri, “Io, mo ro anama-osioidiro-ri,” o ata tau ibo gi-utura-ri, “E e, mo ro osioidiro-ri pua.” Arua owera oro ro dorogora se nama-aro-ri oro kemasaubiai owera pupuwo kowai aboto, io Satani aboudo amadidimo-ou-ri.’ 
‘Nedi owera ro nio ro kebase ta-girorowai-rimo ibo, Idomari kowaubidiro ato wisana ibose to kowaubidiro ie. Ibonoro iopu kowaubidiro ato wisana ibose to kowaubidiro ie. 
Kaupoti nio mo ia ro owera ibo mimowapotai-ro! Ubauba tanaro oro aboto etu ro osioidiro, wisana ubauba to emowameai mamo. Oro ata dubu ata ro na-iatoia, ina derewesegerai sapuwo tawe dao rido miatoia-ro. 
Oro sodo ata ro na-emediai, ina oro nou ro koto aboto na-owou, iedi namabu ro aise domia, ina siginisi ibose domia. 
Ibose oro ata gabamani dubu ata ro na-emediai mibo namabu egea mere se emowou ri, ipi ato emedea mamo sabowa to aise demowateai. 
Ibose ata dubu ata namabu ri na-orowapotai oro aboto ematimai mamo aise domia. Ata dubu ata oro aboudo namabu doro to omidai ri, ematimai mamo aise dowarebai.’ 
‘Owera nio ro kebase ta-girorowai-rimo ibo, “Nio simara gu urubia se gi-imati-ri nirimagare. Ina nasa urubia ba-dihoio-mo.” 
Kaupoti nio mo ia ro owera ibo mimowapotai-ro! Nasa urubia nirimagare aise gi-imati-ri. Ibose nio ubauba se etio ro iworohuti-dumo, ina nio temeteme na-imio-dumo, neio sapuwo to Godi aise gi-ararato-ri neio meana iwaititi ri. 
Nio ro idaibo tanaro namadimi-isioidiro-ri, nio Abera Adiri sabowa ato na-imidirotiti-die, nio nou morobise merebusere to amadima-ararapoi-ri. Mabu saiki nou ro emeiriotiti-die ubauba urubia sapuwo to, ibose meamea urubia sapuwo to. Ibose daroho na-emeirio-die tuputupu tanaro kisioidiro urubia sapuwo to, ibose kerewaekerewae tanaro kisioidiro urubia sapuwo to emeirio-die. 
Nio simara urubia se nirimagare na-imati-dumo, ina nio ro simara urubia se na-iwarebai-dumo, nou sapuwo to Godi ro mea wisa nio ama-iwameai-ri ra, a? Kerewaekerewae urubia ro idaibo tanaro se tisioidirotiti-dumo. 
Neio ro simara urubia se nirimagare na-imati-dumo, ina arua urubia idaibo meamea tanaro na-isioidiro-dumo, neio nio ro amadimi-irohodorai-ri ra? Io Godi umoro tato urubia idaibo tanaro neio ro nou isioidirotiti-dumo. 
Nio Adiri Abera imese meana ia ie, auna nirimagare ia ie imese sirio urubia aboto. Ina noudo ie nio nou sosoro korowomidiro modobo ie, imese sirio urubia nirimagare kimati modobo ie.’ 
