﻿Mataio.
10.
Iesu ro 12 kowasoro urubia nato girumai nou aboto ou ri. Taie neio nou ro pupuwo korosa nato gimia ubauba urio urubia aboudo imabodoidiro ri, ibose erere temeteme, urubia ro na-giworoho-rimo meana kiwaititi sapuwo to. 
Ina nedi kowasoro urubia ro nou neio masiro ie. Kebase Saimoni ie, nou ata masiro Pita. Nou neama Enduru, Iemisi nou Sebedi mere ie, ina neama Ioane, 
Piripi, Batoromiu, Tomasi. Mataio takesi mani edi dubu ro imadetiti. Ata Iemisi nou Arapasi mere ie, Tediasi. 
Ata Saimoni nedi dubu ro Roma urubia masawe nou ro iaurititi. Iudasi Kerioti sabowa dubu e. Nedi dubu ro Iesu nou ro gapoi nasa urubia aboto. 
Iedi 12 kowasoro urubia ro Iesu ro korosa na-gimia neio nedi owera ro nou mutu gitiodorai. Nou ro ibo, ‘Nio na-nitiodorai, Iu owera karo tato urubia aboto ou ate. Ibose Samaria duriomoro ato oroho ate. 
Kaupoti nio mo ro Isiraere urubia aboto nitiodorai. Neio kararaseperai sipisipi sosoro ie, sipisipi kimowotoi dubu aboudo gararaseperai-rimo. 
Nio edi koroho namadimo-oroho-ri, nedi mea owera ro neio ba-dimowauti-mo ibo, Godi edi kiwaboi tanaro ro neio aboto aupise ta-gosiomai-die. 
Ina temeteme urubia neio abato na-orowomidiro meana ba-diwaititi-mo. Pamo urubia pamo rudo ba-diwame-rimo. Katio urubia meana ba-diwaititi-mo. Ibose ubauba urio mutu etio ro orowomidiro, neio aboudo iedi ubauba urio ro ba-dimabodoidiro-mo. Nedi pupuwo korosa ro nio aboto wisa tato se naiwai, ina nio ro ibose urubia wisa tato se meana ba-diwaititi-mo nedi pupuwo korosa ro neito. 
Nio namadimo-ou-ri, ata mani ata iwou ate, dorogora se mani tato ba-dou-mo. 
Ibose nio ro baiko iwou ate, senisi namabu iwou ate, didi tamaka iwou ate, kiradiouti gonopu iwou ate, dorogora se ba-dou-mo. Mabu nio edi urubia aboto namadimo-ou-ri, nio abato kiamo tato namabu wisa na modobo ie sabowa urubia ro neito kiwarebai. 
Nio beda sabowa to kou ra, auna sabowa ra o kainai sabowa ra, ito na-orowateai-dumo, tauo keba se iedi sabowa ro nato mea tuputupu tanaro dubu se gi-osora-ri. Idaibo dubu nio ro na-owea-dumo, nio nou ro kidabuai ie nou moto to. Iedi moto ro neito nio nou ro kiwodoro ato, tauo kebase moto urubia aboto ibo gi-utura-ri, “Miro nio abato ba-mowamotiti.” Taie iedi moto ro emeserai mamo, iato se gi-orowomidiro-ri womu tato iedi sabowa ro nio ro na-emeserai-dumo. 
Iedi moto urubia ro nio neio ro mea se na-iwarebai-dumo, iedi miro ro neio abato aise ba-mowamotiti. Ina ata sapuwo rido kiauri ato, nio neio ro mea se kiwarebai tato, iedi miro owera ro neio aboudo aise gi-owameai-ri. 
Ina beda sabowa rido ra nio kimaidodorai tato, ibose ubi tato na-woi-dumo nio edi mea owera ro kirowidiro aboto, poro panese se gi-imahudumai-ri. Taie iedi sabowa ro nio ro emedio mamo, aise gi-emeserai-ri. 
Nio mo ro morobise owera mimowapotai-ro, Sodom ra Gomora ra ubauba ia tanaro kisioidiro sabowa teibo ie. Neitiro ro ubauba wisa egea mere se amadi-imidai-ri. Kaupoti nio beda sabowa rido ibeiouti-dioumo, ibose neio ro nio edi mea owera ro kirowidiro tato, iedi sabowa ro Godi edi koto saiki ro nato neio ro auna ia ubauba wisa amadimi-imidai-ri. Sodom ra Gomora ra kainai se amadi-imidai-ri.’ 
Iesu ro kowasoro urubia owera aise gimowautiwado. Nou ro ibo, ‘Owera neito ma-dirowidiro-rimo! Nio mo ro sipisipi sosoro nitiodorai kaupoti nedi duriomoro ro nato serawo tumu soka toroho-dumo. Ina noudo ie kemaka beda sosoro kiraroweauti ra, ibo girimi-iraroweauti-ri. Ibose dumu pawa beda sosoro ra ubauba tato, ibo gi-orowomidiro-ri. 
Mea se keremowotoi mutu, mabu urubia iato torowomidiro nio neio ro amadimi-irobo-ri, gabamani aboto amadimi-iworoho-ri koto owera aro ri. Ibose nio neio ro Iu urubia karadabuti moto ato kerei to amadimi-ipesuti-ri. 
Nedi ubauba tanaro sirio ro nou ri amadimo-ororosioidiro-ri mabu nio mo kowasoro urubia ie. Nio gabamani aboto, eputa urubia aboto, ibose Iu owera karo tato urubia aboto namadimi-iworoho-ri, iedi tau ro nato neio sosoro gabo ato nio ro mo sapuwo to amadimo-orowauti-ri. 
Kaupoti nio koto aboto namadimi-iworoho-ri, tere kimaragoidiro mutu ou mamo ibo nio ro beda owera amadima-aro-ri, ibose beda mino to amadima-aro-ri koto abato. Iedi tau ro nato nio Tarena Urio ro kutura owera amadi-imasouti-ri. 
Nio ro karo owera nio simara owera pua, Tarena Urio ro amadi-imasouti-ri. Nio Abera Godi nou edi Tarena Urio ro nio matagoro rido owera nou ro amadi-imowauti-ri. 
Naramio ro simara niramio amadimi-iasouti-ri arua urubia aboto iopiauti ri. Ibose abeamio ro simara merebusere arua urubia aboto amadimi-iasouti-ri iopiauti ri. Merebusere ro mamio abeamio ubauba mino to amadimi-iworohuti-ri, ina neio ro arua urubia aboto amadimi-iasouti-ri iopiauti ri. 
Nio sirio urubia ro amadimi-ihoio-ri, mabu nio ro mo nowasoro-dumo. Kimibiria to koko se etio ro iwotoi-dumo, womu tato neio pamo namadimi-iauri-ri, womu tato womu tato keremiro neio ro amadimi-iwia-ri. 
Ata sabowa to kou ato ina nio iedi sabowa urubia ro ubauba namadimi-iwaititi-ri, iedi sabowa ro emedio mamo, ata sabowa to aise gi-orowadau-ri. Nio mo ro morobise owera nama-imowapotai-ri, nio ro Isiraere duriomoro ato sirio sabowa kiraturio to iporeai-ri pua, urubia mea owera kimowauti aboto, Imese Urubia Kiauri Dubu nedi sopu duriomoro ro nato amadi-orowameai-ri. 
Sikuru mere nou auna pua, kitamudiro dubu auna ie. Ibose sowake koroho dubu nou auna pua. Eputa dubu auna ie. 
Nedi sikuru mere ro nou kitamudiro dubu sosoro kararapoi aboto, io nou modobo ie. Ibose sowake koroho dubu ro nou eputa dubu sosoro kararapoi aboto modobo ie. Mo moto abera sosoro ie, ina mo neio ro ubauba urio eputa dubu Beresebu neito nasoro-dumo. Ina noudo ie nio neio ro ubauba masiro to auna se amadimi-iasoro-ri, mabu nio mo moto urubia ie. 
Ina noudo ie nio masiro etio ro namadimi-imatubuti-ri, ibose ubauba tanaro nio aboto namadimi-isioidiro-ri, nedi urubia ro nio ro tere imati mamo. Abora urubia ro piro se beda tanaro isioidiro-dumo, neio Godi ro paea se amadi-iwapotaidiro-ri. Piro se beda tanaro isioidiro-dumo, neio Godi ro paea se amadi-iwapotaidiro-ri. 
Nio mo ro duwo ato beda owera nimowauti, saiki ato urubia sirio ba-dimowapotaidiro-mo. Nio mo ro nakara moro ato beda owera nimowauti, sabowa gebari ato ba-dobodorouti-mo. 
Sopu duriomoro durupi etio ro iopiauti-dumo, neio tere imati mamo. Nio durupi etio ro imowagarewado-dumo, ido nio urio neio ro kiopiauti modobo pua. Kaupoti nio ro modobo ie Godi tere kemati, mabu nou kaupoti abato owamo pupuwo korosa nio keremiro nou ro imowagarewado ri, ina nio urio durupi mutu era paruo to nou ro kihere aboto. 
Morobise ie, netewa teibo pisiwi kainai teibo awawo mani to kimade pua. Kainai ia mani iopu to kimidai-ma ie. Nedi pisiwi kainakaina ro Godi ro mea ia mino to imowotoititi-die, neitiro nou ro woki kimati-ma modobo pua. Kaupoti nio Abera Godi ro gabo kadodorai tato, ata pisiwi ata karaburai modobo pua. 
Ina nio ia sapuwo to, nio Godi ro auna se timaragoidirotiti-die, nio eputa ato beda mutu sobo muruwa ro irowotoititi, neio momuo se nou ro ta-gioputi. 
Ina noudo ie nio tere na ie, nio pisiwi kainakaina sosoro pua. Godi auna se nio aboto irarowotiti-die.’ 
‘Ina noudo ie nio mo ro nedi owera ro nou mimowapotai-ro, urubia sirio aboto etio ro namadimo-owauti-ri ibo, “Mo Iesu kowasoro dubu e,” nedi urubia ro mo ro ibose to anama-iwauti-ri mo edi Abera ro Adiri sabowa ato na-omidiro-die nou aboto ibo, “Nedi urubia ro mo ia urubia ie.” 
Kaupoti beda urubia sirio aboto etio ro namadimo-owauti-ri ibo, “Nimo Iesu kowasoro urubia pua,” nedi urubia ro wisana mo ro ibose to nama-iwauti-ri mo edi Abera ro Adiri sabowa ato na-omidiro-die nou aboto ibo, “Nedi urubia ro mo urubia pua.” ’ 
‘Mo nedi duriomoro ro neito na-nou-ro nio ibo gimaragoidiro-mo mo ro miro kowou. E e, urubia aboto mo ro miro owou pua, kororohoio nimowou-ro ina neio ihoduti rie. 
Ina noudo ie mere ro simara abera masawe ama-owea-ri, besere ro simara mamu masawe ama-owea-ri. Ibose eterera ro simara daramuabere masawe ama-owea-ri. 
Urubia dubu boinana masawe muso moro dubu ro owea-ri pua. Nou simara ia karima borubi ro amadimo-owea-ri masawe. 
Etio ra simara mamio abeamio aboto auna se na-imaragoidiro-dumo, ina mo aboto auna se kimaragoidiro tato, idaibo urubia modobo pua mo kowasoro urubia to kararasoro. Ibose etio ra simara merebusere aboto auna ia se na-imaragoidiro-dumo, ina mo aboto egea mere se na-imaragoidiro-dumo, idaibo urubia modobo pua mo kowasoro urubia to kararasoro. 
Etio ra simara ubi tanaro isioidiro-dumo, ina Godi ubi tanaro se kisioidiro tato, idaibo sosoro urubia modobo pua mo kowasoro urubia to kararasoro. 
Etio ra simara keremiro na-eremaragoidiro-dumo, iedi keremiro ro saiki ata amadimi-iasopere-ri. Etio ra simara keremiro namadimi-iasepere-ri mo sapuwo to, nedi urubia ro saiki ata womu tato womu tato keremiro amadimi-imade-ri. 
Nio beda urubia ro kiwodouti ra moto to, ibo pua nio kawakawa kiwodouti, neio ro idaibo mo kowodoro ie. Ibose mo etio ro kowodoro ra, ibo pua neio ro mo kawakawa se kowodoro, mo neito etu ro nemeiriai-ro Godi neio ro ibose nou kowodoro ie. 
Ibose Godi ipusu owera urubia etio ro kiwodouti ra, mabu nedi urubia ro Godi ipusu owera imowautiti-dumo, neio atu se Godi ipusu owera urubia mutu Godi ro atu sosoro wisa ibose to ama-imio-ri. Ina ibose mea tuputupu urubia etio ro kiwodouti ra, mabu nedi urubia ro meamea tuputupu urubia ie, neio atu se meamea tuputupu urubia mutu Godi ro atu sosoro wisa ibose to ama-imio-ri. 
Mo edi kowasoro urubia ro neio aboto egea mere se kiwarebai kainai etu ro kaiwai ra, mabu neio mo kowasoro urubia ie, nio mo ro morobise owera mimowapotai-ro, morobise ie nedi urubia ro neio ro mea wisa amadimi-imade-ri.’ 
