﻿Mataio.
13.
Iedi atu saiki ro nato Iesu moto rido na-gosuruwo-ro imese godori Gariri obo paruo bara to, taie iato aise gomi. 
Nou urubia sirio ro na-gowea-rimo, neio nou aboto aise garadabuai-rimo. Urubia sirio nou ro na-giwia, nou pe to aise gorora. Iedi urubia sirio ro obo paruo bara ato ibose to gorowotoi, 
neio nou ro totomu se gitamudiro-ro. Ata totomu nou gimowauti, nou ro ibo, ‘Neito mea se dirowidiro-rimo! Ata tau pari kisioidiro dubu pari to nato gou iopu iheruti ri. Nou ubi ie iedi iopu sirio ro eremapuse ri mea mino to kisuruwo aboto. 
Nou ro ota iopu edi kiheruti na-giheruti arua erehe moro ato gararemuti-rimo. Arua dorogora se gabo bara to gararemuti-rimo, tuturu to owamo pua iato pawa ro giroruwo-ro. Iedi ota iopu ro neio ro aise giwadaudiro-rimo. 
Arua iopu nadi goto ato gararemuti-rimo. Neio kebase mea mino to gosuruwo-rimo, mabu mea goto kere maumo ato egea mere se ta-gowamo. 
Kaupoti neio saiki turi korosa ro na-giwia, neio pupuwo tato ro girobai, puara aise gitemeiriaiwado-rimo. Mabu neio sipi goto maumo to mea mino to imesebeauti pua. Mea goto ohu ato kainai ia se gowamo, maumo ato nadi ro gowamo-ro. 
Ina arua ota iopu ununu ota sere maumo to giretuti, neio ibose ta-gisuruwo-rimo. Kaupoti neio mea se kisuwoduti aboto, ununu ota sere ro aise giaupotawado-rimo. 
Ina mea goto ato edi na ro gararemuti-rimo mea se neio ro gisuruwo-rimo. Arua ota rido iopu sipu tato se giasesuti-rimo. Arua ota rido sirio mere se giasesuti-rimo. Ina arua ota rido imese sirio ia se giasesuti-rimo.’ 
Iesu ro owera neito gopai, ‘Etio ra mo owera modobo ato kirowidiro aboto, mo owera gare se ba-memedea-rimo.’ 
Taie nou edi kowasoro urubia ro nato gou-rimo nou aboto emodowa ri. Neio ro ibo, ‘Mabu boira urubia oro ro totomu se na-imowautiti?’ 
Iesu ro neio ibo gimowameai, ‘Godi ro kiwaboi tanaro edi umoro ro piro se kebase ta-gowamo, nedi umoro ro nio aboto se ta-niaiwai, arua urubia aboto iwapotai pua. 
Ina noudo ie nedi morobise umoro ro etio abato iamo, Godi ro ina orio umoro ohu rido neio ia ama-imotomo-ri. Ina nedi umoro ro neio abato imese auna ia se amadimo-oi-ri. Kaupoti etio abato iamo edi kainai umoro ro, neio aboudo Godi ro imese moro to amadi-iwameai-ri. 
Ina noudo ie mo ro urubia totomu se kimowauti. Mo ro edi totomu ro na-nimowauti, neio ro kowea sekere. Kaupoti totomu maumo mea se eibimai-ri pua. Ibose mo edi kitamudiro owera ro neio ro kirowidiro sekere. Kaupoti neio ro maumo mea se imade-ri pua. 
Godi ipusu owera dubu Aisaia ro owera kebase na-gowapotai-ro neio sapuwo to, abora morobise to noto ororosioidiro-dumo. Nou edi owera ro ibo ie, Godi ro ibo neio ro morobise owera kirowidiro sekere, kaupoti maumo neio ro kowea modobo pua. Neio ro kiwia sekere, kaupoti neio ro mea se keibimo modobo pua. 
Mabu neio giropu imese akau ta-girimowaititi-rimo. Nedi urubia ro idomari nakara se ta-gorowasiouti-rimo. Ina noudo ie neio ro modobo pua mea owera kirowidiro aboto. Neio ro mea owera kirowidiro rasiri ie, nedi urubia ro mo aboto ba-gerewesegerai-rimo. Ina neio edi ubauba ro mo ro nato ba-nimatopeamuti.’ 
Iesu ro kowasoro urubia iato gimowapotai, ‘Nio ro Godi aboudo meana tiauri-dumo. Mabu sirio tanaro mo ro na-nisioidiro nio ro simara idomari to tiauri-dumo, ibose mo edi kitamudiro owera ro nio ro simara gare to tirowidiro-dumo. 
Nio mo ro morobise owera a-nimowapotai, Godi edi ipusu owera urubia sirio ro, ibose meamea tuputupu urubia kebase etio ro gorowomidiro, nio ro abora edi tanaro ro na-iauri-dumo mo ro edi pupuwo korosa tanaro ro na-nisioidiro, nedi urubia ro auna ia ubi ta-iamotiti simara ia idomari to kiauri aboto. Kaupoti neio ro iauri pua. Nio ro abora nedi owera ro na-irowidiro-dumo, neio auna ia ubi ta-iamotiti simara ia gare to irowidiro ri. Kaupoti neio ro irowidiro pua.’ 
‘Owera neito ma-dirowidiro-rimo! Urubia dubu ro iopu na-giheruti nedi totomu ro maumo nou anama-imowauti-ri. 
Beda ota iopu ro gararemuti-rimo gabo bara ato, nou maumo ibo ie. Urubia ro mea owera na-irowidiro-dumo Godi edi kiwaboi tanaro ro nou sapuwo to, neio ro maumo mea se imade pua. Ubauba dubu Satani iato na-wou-die, iedi ota iopu ro neio aboudo aise kiwagarewado ie. 
Ina beda ota iopu ro gararemuti-rimo nadi goto ato nou maumo ibo ie. Nedi urubia ro Godi edi mea owera ro kamade mutu kirowidiro sekere. 
Kaupoti iedi mea owera ro sipi neio abato mea mino to iwodouti-ri pua. Idaibo urubia tuturu tau to iwotoi-ri pua. Mibo sirio neio aboto kou ato, Godi edi mea owera ro neio ro aise kimeseruti ie. 
Ina iedi ota iopu ro gararemuti-rimo ununu ota sere abato, nou maumo ibo ie. Nedi urubia ro neio kimibiria urubia ie Godi edi mea owera ro nato. Kaupoti neio abato siriosirio kimaragoidiro ro kiamo ie, mani aboto kimaragoidiro, namabu aboto kimaragoidiro. Ina nedi mea owera ro kiroromowado aboudo gabo neio ro kiwasiouti ie. Nedi urubia ro neio maumo ato Godi edi mea owera ro woko mea se osioidiro-ri pua. 
Ina iedi ota iopu ro gararemuti-rimo mea goto ato, maumo ibo ie. Nedi urubia ro mea se neio ro gimidai-rimo. Nedi mea owera ro neio ro kimibiria ato nou wisa mutu e, neio korowomidiro keremiro maumo ato. Ina neio korowomidiro keremiro maumo ato meamea tanaro se kisioidiro ie. Ina nedi urubia ro neio aboudo Godi ro mea wisa imadetiti. Arua aboudo auna ia se imadetiti, ina arua aboudo auna mere se imadetiti, ina arua aboudo egea mere se imadetiti.’ 
Ina ata totomu nou e Iesu ro nou gimowauti. ‘Godi ro kiwaboi tanaro idaibo sosoro ie. Urubia dubu ro meamea woiti iopu pari ato nato gibouti. 
Urubia sirio isana norou girobu, nasa dubu duwo turi ato nato gereredea-ro iedi pari ro neito. Taie ubauba sugamuso iopu egea mere se woiti sosoro ie nou ro aise gibouti, kibouti na-gororoporeai ioudo aise godau-ro. 
Taie iedi woiti iopu sirio ro pari ato mea se gisuruwo-rimo. Morobise woiti mea se beda sosoro gisuruwo-rimo, ubauba sugamuso ibose to gisuruwo-rimo. 
Taie iato etou ra, neio pari woko urubia ro na-giwia-rimo, pari abera aboto nato gou-rimo nou umoro owai ri. Neio ro ibo, “Auna dubu, oro ro meamea woiti iopu se a-gibouti ra? Ina ubauba sugamuso na-isuruwo-dumo etu ro gibouti?” 
Pari abera ro ibo, “Mo umoro ie ata nasa dubu ata ro gibouti.” Ina sowake urubia ro ibo, “Ina oro ubi beda sosoro owamo, ubauba sugamuso nimo ro iaubuti ri ra?” 
Pari abera ro ibo, “E e nio ro iaubuti ate, ibose to morowotoi, mabu nio ro namadimi-iaubuti-ri, etu umoro ra nio ro woiti kiaubo. 
Taie marasio, neio atu se ma-misuruwo-mo, womu tato neio awawo namadimo-oi-ri, taie iedi tau ro nato urubia mo ro nato nama-imowapotai-ri iebuti ri. Ubauba sugamuso kiwoiriamuti, taie era to aise amadimi-ihere-ri. Morobise woiti mo edi ohona kiaremo moto ro neito amadimi-iaremo-ri.” ’ 
Kowasoro urubia ina nedi totomu ro nou gimowauti. ‘Godi ro kiwaboi tanaro mirie iopu sosoro ie. Ata tau ata dubu ro nedi iopu ro pari ato nato gobowai. 
Nedi mirie iopu ro imese kaina ia ie. Imese ota iopu sirio kiauri ato neio gebarigebari ie, kaupoti mirie iopu imese kaina ia ie. Ina nou kororomai ato, atemo nato na-iheruti, ata sosoro kotoi ie. Ina arua ota na-orowotoi pari ato, neio nou ro sopu to kiauri ie, iedi ota ro imese gebari ia ie. Pawa sirio ro nato na-emou-dumo, toto iato aise keremari ie.’ 
Iesu ro ina kowasoro urubia ata totomu nou gimowauti. ‘Godi kiwaboi tanaro isiti parawa sosoro ie. Ata orobo ro parawa isiti mutu na-ebeguouti iedi parawa ro aise kaupai ie.’ 
Iesu ro edi kitamudiro owera to urubia sirio na-itamudirotiti, ata kitamudiro mino to itamudirotiti pua, totomu to se itamudirotiti. 
Nedi tanaro ro nou ro na-gisioidiro, beda owera gowapotai-ro Godi ro kebase ipusu owera dubu aboto, morobise to noti gororosioidiro-rimo ibo, Urubia mo ro kimowauti ato, mo ro neio totomu kimowauti ie. Neio mo ro imese paea se nato nama-imowauti-ri ibo, duriomoro ido to gosioidiro, tau keba ia se tanaro piro se iamotiti, ina owera nedi tanaro ro nou sapuwo to anama-iwapotai-ri. 
Taie Iesu ro edi soirio ro na-gemeserai, nou edi moto ato gomidiro neito imese godoro. Nou kowasoro urubia ro na-gowea-rimo, nou aboto saro rido imese godoro-rimo. Taie neio ro Iesu nato gemodowa-rimo, ‘Oro ro edi totomu ro nimowauti ubauba sugamuso na-gisuruo-rimo nou sapuwo to, maumo oro ro mea se kemabuti modobo ra?’ 
Taie kowasoro urubia nou ro ibo gimowameai, ‘Meamea ota iopu edi dubu ro gibouti, mo nouse ie Imese Urubia Kiauri Dubu, mo nowapotaidiro-die. 
Pari owapotaidiro-die sopu duriomoro gebari. Meamea ota iopu iwapotaidiro-die urubia Godi edi kiwaboi maumo ro nato na-orowotoi. Ubauba sugamuso iwapotaidiro-die edi urubia ro isioidiro-dumo Satani edi ubi tanaro ro. 
Nedi nasa dubu ro ubauba sugamuso na-gibouti, Satani nouse ie. Woiti kiwoiriamuti tau iana saiki owapotaidiro-die. Iedi kiwoiriamuti urubia ro, Godi edi sowake urio sirio ro neio iwapotaidiro-die. 
Ubauba sugamuso urubia ro beda sosoro iaubo-dumo ina era to na-ihere-dumo, io idaibo sosoro tanaro iana tau ato ibose to amadimo-ororosioidiro-ri. 
Imese Urubia Kiauri Dubu mo nouse ie, womu tau ato mo simara sowake urio sirio duriomoro gabogabo to anama-imerio-ri. Neio ro morobise woiti amadimi-ihoduti-ri ubauba sugamuso aboudo. Edi urubia ro ubauba tanaro na-isioidiro-dumo, ibose imese beda mutu urubia ro arua urubia ubauba kisioidiro aboto na-iwaboi-dumo, neio mo edi sowake urio sirio ro mo edi duriomoro gebari ro neido neio ro amadimi-iwagare-ri, 
ina neio imese sirio se pupuwo ia era korosa to binio to aise amadimi-itabiti-ri. Womu tato womu tato idobi diamo iato ama-ereredea-ri, temeteme iamo matagoro karabowa iato amadimo-oroho-ri. 
Ina meamea tuputupu urubia neio Godi ro woroworo ama-iwai-ri. Saiki sosoro woroworo neio ro amadimi-imewiti-ri, neio edi Abera ro Godi nou edi kiwaboi maumo ro nato. Etio ra mo owera modobo ato kirowidiro aboto, mo owera gare se ba-memedea-rimo.’ 
‘Godi edi kiwaboi tanaro ro nou auna ia mani namabu sosoro ie, nedi auna mani namabu ro goto maumo ato goropirowa. Taie ata dubu ro nato gowea iedi auna mani namabu ro goto maumo ato, ina nou ro aise gowameai goto maumo to. Iedi dubu ro auna kamade ro gowati kowea sapuwo to. Taie nou ioudo na-gorowameai-ro, nou edi namabu sirio ro nou abato na-giamo mani na ri aise giahodorai. Iedi mani sirio ro nou ro na-gimidai, taie iedi goto kere ro nou ro neito gomidai.’ 
‘Ibose Godi ro kiwaboi tanaro idaibo sosoro ie, ata besinisi dubu nu neido gou meamea sowio sapuwo to nadi iosora ri. 
Taie nou ro nato gowea auna ia mani nadi, iedi auna ia mani nadi ro ibo pua arua nadi sosoro, nou ata sosoro ia ie. Taie nou ioudo na-gorowameai-ro, nou edi namabu sirio ro nou abato na-giamo mani na ri aise giahodorai. Iedi mani sirio ro nou ro na-gimidai, taie iedi auna ia mani nadi ro nou ro neito gahodorai.’ 
‘Ina ata owera ibo ie, Godi ro kiwaboi tanaro neti sosoro ie. Iedi neti ro oromo damo ato kodobia ato, sirio erere nakere neio ro kodouti ie. 
Iedi neti kidimai ato, erere nakere aise kiahuruwo ie. Meamea nakere atu moro to kiaremo ie. Ubauba nakere aise kihere ie. 
Womu tau nama-orobai-ri, idaibo tanaro neio ro amadimo-ororosioidiro-ri. Godi edi sowake urio sirio ro neio ro ubauba tanaro urubia, meamea tuputupu urubia, ibo amadimi-ihoduti-ri. 
Ubauba tanaro urubia neio ro auna ia korosa era to amadimi-ihere-ri. Neio temeteme idobi iamo iato amadimi-imarotiti-ri.’ 
Iesu ro kowasoro urubia nato gimodowa, ‘Nio mo ro nedi totomu owera ro na-nimowauti maumo nio ro umoro a-woi-dumo ra?’ Ina neio ro ibo, ‘Io.’ 
Ina neio Iesu ro ibo gimowameai, ‘Ina noudo ie Mose sabi kitamudiro urubia abato, etio ra Godi edi kiwaboi tanaro ro nou sapuwo to na-garatamudiro-rimo, neio moto abera sosoro ie. Moto abera ro urubia kiwarebai sapuwo to nou ro kiwosuduti ie kiaremo moro rido orio ia meamea namabu tagara ia meamea namabu mutu.’ 
Iesu ro urubia totomu kimowauti na-goporeai, taie iedi moro ro nou ro aise gemeserai, 
imese gidiai simara kororomai sabowa to. Nou edi tau ato gorowateai nou ro urubia sirio Iu urubia karadabu moto ato iato gitamudiro. Urubia sirio ro nou owera na-gemerewidiro-rimo, neio kimaragoidiro ro giopia mabu nou kitamudiro ata sosoro ie. Neio ro ibo, ‘Nedi dubu ro pupuwo tanaro na-isioidiro korosa muro mutu boido gowai? 
Marasio, nou moto keremari dubu nou mere ie, Maria ro goroto. Nou niramio mutu e, Iemisi, Iosepa, Iudasi daro Saimoni. 
Ibose nedi sabowa ro nato nou medamio mutu e. Nou ro idaibo pupuwo korosa, muro mutu boido gowai?’ 
Nedi urubia ro ubi tato goi-rimo nou sapuwo to kimibiria, ina ioudo nou ri gebeiouti-rimo. Iesu ro ibo neio aboto, ‘Godi ipusu owera urubia erere sabowa to na-irohotiti-mo, sabowa urubia ro neio mea se imaidodorowado-mo. Kaupoti neio simara sabowa urubia ro ibeioutiti-mo.’ 
Iesu ro simara sabowa ato sirio pupuwo korosa tanaro isioidiro pua. Mabu iedi urubia ro kimibiria imese kaina ia ie. 
