﻿Mataio.
17.
6 saiki saro gabo ato, Iesu ro Pita, Iemisi, nou neama Ioane neibi se gidabuai-bi, auna podo ohu to imese giwaboi-bi. 
Neibi sosoro gabo ato Iesu ata sosoro ta-goi, nou sosoro imese ta-garatidiai, saiki woroworo sosoro gimewia. Ibose nou edi obotama giroidiro imese keakea ia se giwotoi pina woroworo sosoro ie. 
Tuturu to owamo pua neibi sosoro gabo ato Mose ra Eraia ra paea se nato gorowapotai-rido. Neitiro Iesu mutu owera imese geremowauti-birimo. 
Pita ro ibo Iesu aboto, ‘Abera Naramu, neibi oro ro modobo ia to niwidiai-bidie. Mo ro netewa didi mapagea peteibi anama-itomai-ibiri. Ata oro do ie, ata Mose do ie, ata Eraia do ie.’ 
Pita owera Iesu aboto edi tau ato gutura, iedi na peteibi ro benenio ia toboro kere ro aise giatimai-bi. Ina toboro ohu rido Iesu sapuwo to Godi owera nato gutura-ro, ‘Iesu mo ia mere ie, mo auna ubi towamo nou aboto. Mo auna kamade ie nou aboto. Nou owera se ba-dirowidiro-bimo.’ 
Kowasoro na peteibi ro Godi owera kodu edi tau ato gemororowai-birimo, neibi tere ri durupi sopu to aise giwororuwo-birimo. 
Taie Iesu neibi aboto aise gou-ro, nou ro erere se iato giwasomo-ibi. Iesu ro ibo neibi aboto, ‘Direribuwa-birimo, nibi tere na ie.’ 
Neibi na-gireriburio-birimo, neibi ro iedi dubu teibo ro iwia-ma pua, ta-gararaseperai-rido, Iesu se gowea-birimo. 
Taie neibi podo ohu rido atu se imese giodori-biro, ina gabo ipi ato Iesu ro neibi koko owera nato gimowapotai-ibi, ‘Nibi ro beda tanaro owea-bimo, urubia imowauti ate womu tato Imese Urubia Kiauri Dubu mo nou se ie, nou Godi ro pamo rido namadi-owameai-ri, taie urubia nibi ro nato ba-dimowauti-bimo.’ 
Taie kowasoro dubu peteibi Iesu nato gemodowa-birimo, neibi ro ibo, ‘Mabu boira Mose sabi kitamudiro urubia na-iarotiti-dumo ibo Eraia kebase amadi-orowameai-ri, ina nou saro rido Godi ro kohodowa dubu ro amadi-ou-ri?’ 
Neibi Iesu ro ibo gimowameai-bi, ‘Io morobise owera ie, imese tanaro patu Eraia ro kou e imododiai-ri. 
Kaupoti nibi a-nimowapotai-bi ibo Eraia neito ta-gou-ro, kaupoti nedi dubu ro urubia ro mea se eibimai pua. Neio ro ubauba mino to goworohuti-rimo, simara ubauba ubi tanaro nou aboto aise gisioidiro-rimo. Ina idaibo atu sosoro ubauba tanaro neio ro amadimi-isioidiro-ri Imese Urubia Kiauri Dubu aboto.’ 
Kowasoro dubu peteibi ro Iesu owera na-gemororowai-birimo, neibi umoro samo to goi-birimo ibo nou ro obo to kiwarumiauti dubu Ioane nou owauti-die. 
Iesu kowasoro dubu peteibi mutu podo ohu rido na-giroruo-ibiro, urubia dubu patu maumo to aise godoro-birimo. Ata dubu edi topira maumo ro neido gerehidiro-ro Iesu aboto na-gou-ro. Taie nou sosoro gabo ato kauhio to aise girimusubua. 
Nou ro ibo, ‘Abera Naramu, mo mere nirimagare demowai-ro! Nou sirio tau ubauba urio ro oworohutiti, durupi aise komuguguti ie, goto ato iato aise keteamoidiro ie. Ata tau nou ro era to katowea ie, ina ata tau obo to iato keherai ie. 
Oro kowasoro urubia aboto egea se nowou-die, kaupoti neio ro meana kowai modobo pua.’ 
Iesu ro ibo, ‘Nio imese kimibiria tato urubia ie, ibose nio ro tuputupu tanaro kisioidiro pua. Mo nio mutu komidiro dese eremiri pua, kaupoti nio mea se imibiria pua. Mo nio mutu aise nama-omidiro-ri, nio mea se nato amadimi-imibiria-ri ra? Iedi mere ro neito ma-dowou-birimo.’ 
Neio ro nedi mere kainai ro Iesu aboto iato gowosuruwo-rimo. Iesu ro edi ubauba urio ro ioudo osuruwo ri nato gemadowerai. Taie iato etou ra iedi atu tau ro nato iedi mere ro meana aise goi. 
Iedi tanaro na-gororosioidiro nou saro gabo ato, kowasoro urubia ro Iesu nakara moro ato nato gemodowa-birimo. ‘Mabu boira iedi ubauba urio ro neibi ro modobo pua kemabodorai aboto?’ 
Iesu ro neibi ibo gimowapotai-ibi, ‘Mabu nibi kimibiria kainai ie, noudo ie nibi ro modobo pua kemabodorai. Nibi mo ro morobise owera mimowapotai-biro, nibi abato kimibiria mirie iopu kainai sosoro na-iamo, nibi ata ro modobo ie podo kemowapotai, Podo ioudo daraubai, iato dotobowa-ro! Nibi ata owera to podo ioudo karaubai ie, ata moro ato kotobowa ie. Imese tanaro nibi aboudo modobo ia ie, koko nibi ro iauri-ri pua.’ 
Taie ata tau Iesu kowasoro urubia mutu Gariri duriomoro ato nato garadabuai-rimo. Neio nou ro nedi owera ro nou gimowapotai, ‘Imese Urubia Kiauri Dubu urubia aboto amadima-apoi-ri. 
Nou neio ro amadimo-opia-ri, ina netewa didi saiki nama-orobai-ri, nou Godi ro pamo rido nato amadi-owameai-ri.’ Nedi owera ro kowasoro urubia ro na-girorowai-rimo, neio auna ia kamade tato aise goi-rimo. 
Iesu kowasoro urubia mutu Kapeniama sabowa to na-gorowateai-birimo, Tarena Moto takesi mani kimade urubia Pita aboto nato gou-rimo. Taie neio ro Pita nato gemodowa-rimo, ‘Nio kitamudiro dubu ro Tarena Moto takesi mani kiaremo pua ra?’ 
Ina Pita ro ibo, ‘Ina etou ri nou kiaremo ie.’ Iato Pita moto to aise godoro nedi owera ro Iesu emowapotai ri. Kaupoti nou Iesu ro gemadoheamuti, ‘Saimoni, ina oro beda sosoro imaragoidiro? Gabamani eputa urubia ro takesi mani simara merebusere aboudo kimade ra? O arua urubia aboudo ra?’ 
Ina Pita ro Iesu ibo gemowameai, ‘Arua urubia aboudo imadetiti-dumo.’ ‘Ehe, ina noudo ie eputa dubu simara merebusere ro takesi mani kiaremo pua. Ina neibi idaibo sosoro merebusere ie. 
Kaupoti neio neibi ro serawo kiwai modobo pua. Pita, obo paruo to ma-dodori, kimai ioudo ba-deherai. Kebase beda nakere ro ererebuai, matagoro ba-dabowa, mani iopu oro ro iato ama-owea-ri. Ba-dowou-ro Tarena Moto takesi kimade urubia aboto, nou ba-dimia, neitiro takesi mani ie.’ 
