﻿Mataio.
18.
Kowasoro urubia Iesu emodowa ri nou aboto nato gou-rimo. Neio ro ibo, ‘Godi edi kiwaboi maumo ro nato auna to etu ro ama-ararasoro-ri?’ 
Taie iato Iesu ro mere kainai se gorumai-ro, neio sosoro gabo ato aise gowotobowa. 
Nou ro ibo, ‘Nio mo ro morobise owera mimowapotai-ro. Nio kimaragoidiro patu kiwesegerai modobo ie, merebusere kainakaina sosoro, nio ro modobo ie neio sosoro kimaragoidiro kiworohuti. Nio ro keremowabu tanaro, ibose auna to kararasoro tanaro, kimeserai tato, nio Godi ro kiwaboi maumo to odouti-ri pua. 
Ina noudo ie etu ra sopu to korowororuwo mere kaina sosoro kararapoi aboto, nou ro Godi edi kiwaboi maumo ato auna ia masiro ama-omidai-ri.’ 
‘Idaibo sosoro mere kainai mo sapuwo to etu ro kemaidodorai ra, ibo pua nou kemaidodorai, nou ro mo kemaidodorai ie. 
Kaupoti etu ro kowaboi ra idaibo mere kainai, ubauba tanaro kosioidiro aboto, Godi ro imese ubauba ia wisa nou aboto amadi-aiwai-ri. Iedi dubu ro mere kainai ubauba to etu ro gowodoro, nou aboudo modobo ie auna nadi wagoha rudo kemobuai, oromo damo to keherai, ina nedi wisa ro kainai ie. Kaupoti Godi ro edi wisa ro namadi-aiwai-ri nedi dubu ro nou aboto, auna ia ubauba wisa amadi-aiwai-ri. 
Sopu duriomoro urubia, neio ro auna ia ubauba amadimo-owea-ri, mabu arua urubia kakate gabo ato iwaboi-dumo, ubauba tanaro kisioidiro aboto. Ubauba kiwaboi tanaro kororosioidiro ie, kaupoti etu ro urubia ubauba gabo imasouti-die, ina ubauba tanaro sirio urubia ro amadimi-isioidiro-ri, iedi ubauba kiwaboi urubia ro Godi aboudo awawo ubauba wisa amadimi-iwia-ri. 
Nio niro turi ato beda ubauba ubi sirio ro iamo, imese sirio ia se ba-diwagarewado-mo. Ina oro ro tu to o sairo to ubauba tanaro neito na-isioidiro, modobo ie iedi tu ro o iedi sairo ro kemotoria ina keherai. Io meana ia ie, oro tu kaupoti mutu o sairo kaupoti mutu womu tato womu tato keremiro ama-owea-ri. Modobo pua oro tu teibo mutu o sairo teibo mutu ubauba tanaro kisioidiro ina womu tato womu tato era to katowea. 
Ina ibose ie oro idomari ata ro ubauba ubi na-imaremo, iedi idomari ro modobo ie kaubidiro keherai. Io meana ia ie, oro kaupoti idomari mutu womu tato womu tato keremiro ama-owea-ri. Modobo pua oro idomari teibo mutu ubauba tanaro kisioidiro, ina womu tato womu tato era to katowea.’ 
Iesu ro ina kowasoro urubia ata owera iato gimowauti ibo, ‘Mea se! Idaibo sosoro kimibiria urubia mere kainakaina sosoro, neio kimaragoidiro to dorogora urubia to iasoro mamo. Mabu nio mo ro morobise owera mimowapotai-ro, Adiri sabowa ato neio edi sowake urio ro Godi sosoro gabo ato sirio tau aise imowotoititi-dumo. 
Nedi totomu ro mea se nou demaragoidiro-mo! Ata dubu ro 100 sipisipi kiworohuti ato, ina kaupoti nato na-wararaseperai, 99 kararaseperai tato sipisipi neio sapuwo to nou kamade egea mere se kowamo ie, nou ro ina mea moro ato egea mere se aise kimeserai ie. Taie nou ioudo aise kaimai ie iedi sipisipi ro osora ri. 
Ina nio mo ro morobise owera mimowapotai-ro iedi sipisipi kaupoti ro kowea ato, nou ro kamade mutu aise kohiai ie. Io morobise ia ie, auna kamade tau ro kereredea ie. 
Ina atu sosoro tanaro ibo ie, idaibo sosoro merebusere kainakaina kimibiria urubia, nio edi Abera ro Adiri sabowa ato na-omidiro-die, nou ubi tato ie neio ata kararaseperai.’ 
‘Oro boinana kimibiria dubu ro ubauba na-owai, nedi dubu ro oro ro modobo ie kotuputai. Nedi owera ro nitiro ro modobo ie nakara moro ato koporeai. Oro edi owera ro nou ro nirimagare mutu na-imidai, nedi dubu ro oro ro ina kadabuti ie. 
Oro edi owera ro nou ro na-iseiai, netewa teibo kimibiria dubu teibo didabuai-maro. Nibi ro atu se nedi owera ro nou mutu ina demododiai-bimo. Idaibo tanaro nou ri ba-disioidirotiti-mo, mabu owera Godi ro kebase gowapotai-ro ibo, koto ato kaupoti woiginisi ro owera na-waro, nou kaupoti modobo pua. Netewa teibo woiginisi teibo o netewa didi woiginisi peteibi atu owera na-waro-bimo, io nedi owera ro koko neito kowai ie. 
Ina nibi edi owera ro nou ro na-iseiai, taie mo urubia karadabuai ato neio aboto nato dowou-mo, neio mutu iato kemotuputi aboto. Ina mo urubia owera nou ro na-iseiai, taie iato aise demeserai-mo, ata kimibiria tato dubu o takesi kimade dubu nou nio ro beda sosoro na-iworohuti-dumo, nedi dubu ro idaibo sosoro ba-doworohuti-mo. 
Nio mo ro morobise owera mimowapotai-ro, nedi sopu duriomoro ro nato, nio ro beda tanaro ra adodorai tato, Adiri sabowa ato iedi atu tanaro ro Godi ro ibose to adodorai-ri pua. Ibose nedi sopu duriomoro ro nato nio ro ubi to beda tanaro amadimi-iadodorai-ri, Adiri sabowa ato Godi ro ubi to ibose to ama-iaidodorai-ri. 
Ina arua owera kidabuai aboto, nedi sopu duriomoro ro nato nio abato netewa teibo dubu teibo Godi nato na-wararatoro-do, mo abera Adiri sabowa ato na-omidiro-die nitiro edi ubi tanaro ro nou ro kosioidiro ie. 
Mabu nio abato netewa teibo o netewa didi dubu peteibi na-waradabuai-bimo, mabu neibi mo urubia ie, mo neibi turituri ato komidiro ie.’ 
Taie Pita Iesu aboto nato gou-ro, nou ro Iesu nato gemodowa, ‘Mo kimibiria boinana ro ata ubauba tanaro mo aboto na-isioidiro-die, nou edi ubauba ro mo ro beda mutu tau to kematopeamuti ra? 7 tau to kematopeamuti ra?’ 
Iesu ro Pita ibo gemowameai, ‘Oro mo ro ibo memowapotai-ro, 77 tau to gi-imatopeamuti-ri, 7 tau to modobo pua. 
Ina noudo ie, Godi edi kiwaboi tanaro ro eputa dubu sosoro ie. Iedi eputa dubu ro sowake urubia sirio nato girumai nou aboto ou ri. Neio ro doro to beda mani iopu gimade-rimo nou emowame ri girumai. 
Nedi doro to kimade mani ro kemowame woko na-gatamuai, nou sowake dubu ata ro ta-gimidai auna ia mani K10,000,000 eputa dubu aboudo. 
Iedi dubu ro modobo pua iedi doro ro nou ro kopia aboto. Taie eputa dubu ro woko urubia nato gimowapotai, iedi dubu ro orobo merebusere mutu, neibi edi namabu sirio ro ata dubu ro iahodorai ri, ina iedi mani ro eputa dubu nou emowameai rie. 
Iedi owera ro nou ro na-girorowai, eputa dubu sosoro gabo ato kauhio to nou mabu ato aise gomi. Nou ro eputa dubu iato gemagege, “Mo tau domia-ro, edi doro mani ro nou nama-osora-ri, iedi doro ro mo ro momuo se nato nama-emowameai-ri.” 
Iedi owera ro eputa dubu ro na-girorowai, nou abato nirimagare kimaragoidiro ro gereredea. Taie iedi sowake dubu ro nou ro nato gemowapotai ibo, “Marasio iedi doro ro, oro ro auna se gemaragoidiro, kamade mutu ba-dosuruwo.” Taie iedi dubu ro kamade mutu imese gosuruo-ro. 
Kaupoti iedi dubu ro nou ro ata ubauba tanaro nato gosioidiro, nou ro boinana sowake dubu nato gowea, 10 kina doro to nou aboudo kebase nou ro ta-gomidai. Iedi dubu ro nou ro aise gohiai, wagoha to iato gahumuwado. Nou ro ibo, “Doro to edi mani gomidai mo aboudo, abora hio ito demowameai-ro!” 
Iedi dubu ro kauhio to aise girimusubua, nou ro edi dubu ro iato gemagege, “Mo nirimagare demati-ro, mo tau egea mere se domia-ro, oro mani anamadi-emowameai-ri.” 
Kaupoti iedi dubu ro ubi oi pua nou owera kirowidiro aboto. Iedi dubu ro nou ro dibura to aise gedea, womu tato doro kowameai, dibura rido nato amadi-osuruwo-ri. 
Borubi sowake urubia ro nedi owera ro na-girorowai-rimo, neio auna kamade tato goi-rimo iedi dubu ro nou aboto. Taie neio nato gou-rimo auna dubu emowapotai ri. 
Taie iedi dubu ro eputa dubu ro nato gorumai nou aboto ou ri. Auna dubu ro ibo, “Oro ubauba sowake dubu e! Oro doro mo ro ta-nemasiai, mabu mo oro ro auna se nemagege-die. 
Ina noudo ie mabu boira oro nirimagare koi tato boinana sowake dubu aboto, oro mo ro nirimagare beda mino to nemowai?” 
Eputa dubu iato auna ia niro korosa nou ro gioro iedi dubu ro nou aboto. Taie iedi dubu ro nou ro dibura to aise gedea auna temeteme nou ro iato iauri ri, womu tato doro nou ro kiopia.’ 
Iesu ro owera ibo gopai, ‘Mo abera Adiri sabowa to na-imidirotiti-die, nou ro idaibo tanaro ama-isioidiro-ri nio aboto. Nio ro borubi kimibiria urubia neio edi ubauba ro nio ro morobise maumo rido kimatopeamuti tato, nio ro idaibo sosoro tanaro nou amadimi-iauri-ri.’ 
