﻿Mataio.
27.
Godi ra urubia ra turituri awawo urubia, duriomoro kiauri urubia mutu, saiki na-gowaroho Iesu kopia aboto aise gapoi-rimo. 
Taie Iesu neio ro tu teibo iato gemotohiti-rimo imese gowaboi-rimo Paireti aboto, Paireti Roma auna gabamani dubu e. 
Iesu kapoi dubu Iudasi, nou umoro na-goi ibo Iu eputa urubia neio atu se Iesu gapoi-rimo pamo kowea aboto, taie iato Iudasi auna ia kamade tato mibo ro gahidimai. Taie nou ro iedi 30 siriba mani iopu ro aise giwameai edi urubia ro neio aboto. 
Nou ro ibo, ‘Mo ro ubauba tanaro nosioidiro. Nou ata ubauba tato dubu e, nio tu to na-nedea opia ri.’ Neio ro ibo, ‘Oro beda ra? Oro simara mibo ie.’ 
Taie Iudasi ro 30 siriba mani edi na gimidai-ro Tarena Moto aboto aise giherai, iato nou aise gosuruo-ro. Nou ioudo na-godau-ro, iato aise garasaubiai. 
Godi ra urubia ra turituri awawo urubia ro nedi 30 siriba mani ro ta-giwoiti-rimo. Neio ro ibo, ‘Nedi mani ro isarena mani ie urubia dubu kopia aboto. Nedi mani ro nimo ro Tarena Moto mani bokose to kiedea modobo pua, sabi ie.’ 
Taie neio owera iato geremowauti-rimo. Neio ro ibo, ‘Nimo ro ata goto kere namadimo-omidai-ri mereki kisioidiro dubu aboudo nedi mani iopu ro neito.’ Neio ubi ta-goi-rimo daimodaimo urubia pamo durupi iedi goto kere ro iato imobuti rie. Taie iedi mani iopu ro neito goto kere aise gomidai-rimo. 
Nedi tau ro neido urubia ro nedi goto kere ro ‘Karima Kiroruo goto kere’ to asoro-dumo, mabu urubia dubu kopia mani to gomidai-rimo. 
Neio ro nedi tanaro ro na-gosioidiro-rimo, Ieremaia Godi ipusu owera dubu nou ro owera keba se na-gisioidiro, morobise to noti gororosioidiro-dumo ibo, Neio ro 30 siriba mani iopu na-gimidai-rimo, nedi mani iopu ro urubia dubu kapoi mani iopu e, Isiraere urubia ro nedi wisa ro nou na-gemapoi-rimo. 
Neio ro edi mani iopu ro nouto goto kere se gomidai-rimo mereki kisioidiro dubu aboudo, mo Abera Naramu ro kebase beda sosoro nemowapotai-ro. 
Iesu Paireti sosoro gabo ato aise gowotobowa-rimo, Paireti Roma gabamani eputa dubu e. Taie nou ro Iesu nato gemodowa ibo, ‘Oro ia nouse ra Iu urubia eputa dubu?’ Nou ro Paireti ibo gemowameai, ‘Oro beda sosoro utura-die, io mo nou se ie.’ 
Taie Godi ra urubia ra turituri eputa urubia, duriomoro kiauri urubia mutu, neio ro ibo ‘Nou ro ubauba tanaro ta-gisioidiro.’ Kaupoti Iesu ro neio owera imowame pua. 
Taie Paireti ro ibo, ‘Oro sapuwo to beda owera aro-dioumo? Neio owera oro ro imerewidiro pua ra?’ 
Kaupoti Iesu ro neio ata owera ata imowameai pua. Iedi gabamani eputa dubu ro Iesu na-giauri owera tato se na-gotoi, nou auna ia kimaragoidiro ro gopia. 
Kisimisi gabogabo ato Iu urubia Kimasaudai Soriomu na-isioidirotiti-dumo, Iu urubia sirio ro beda dubu ubi emedea-dumo dibura rido kowosuruwo aboto, Roma eputa dubu ro nou kemeiriai ie sabowa to. 
Ina iedi tau ro nato ata ubauba dubu dibura ato ibose to irohotiti, masiro Barabasi. Sirio urubia auna umoro ie Barabasi ata ubauba dubu e. 
Taie iedi urubia sirio ro atu moro to nato garadabuti-rimo. Neio Paireti ro nato gimodowa, ‘Nio ro beda dubu masiro apoi-dumo dibura rido mo ro kowosuruwo aboto, nou mo ro sabowa to aise anama-emeiriai-ri? Nio ubi ra Barabasi kowosuruwo, o Iesu, Godi ro kohodowa dubu to na-wasoro-dumo, nou kowosuruwo?’ 
Paireti iedi tau ro nato umoro mutu gomidiro ibo nedi Iu eputa urubia ro, Iesu neio ro oriori giauri-rimo, ina neio ro nou mabu ato gowou-rimo opia ri. 
Iedi tau ro nato Paireti koto sea to na-gomi neio koto owera imerewidiro rie. Tuturu to owamo pua Paireti orobo ro ata owera nou aboto nato gemeiriai-ro. Nou ro ibo, ‘Oro ro Iesu aboto ata ubauba tanaro ata osioidiro ate, mabu nou ata ubauba tato dubu e. Nedi duwo ro nato nou mo ro hiwo to ta-nemibia. Nou mo ro hiwo to na-niauri, mo auna tere ro norobai.’ 
Kaupoti Godi ra urubia ra turituri awawo urubia, duriomoro kiauri urubia mutu, neio ro urubia binio to ibo gimedeawado-rimo, ‘Nio Paireti ro namadi-imodowa-ri ibo “Mo ro dibura rido beda dubu namadi-owosuruwo-ri?”, nio ro Barabasi masiro ba-dapoi-mo, ina nou ba-demowapotai-mo Iesu opia ri.’ 
Taie Roma gabamani eputa dubu Paireti nou ro urubia sirio nato gimodowa, ‘Nedi dubu teibo ro neitiro sapuwo to nio beda sosoro imaragoidiro-dumo? Dibura rido mo ro beda dubu owosuruo-ri ra?’ Ina urubia sirio atu se nato giaia-rimo ibo, ‘Barabasi ro mosuruwo-ro!’ 
Ina Paireti ro ibo, ‘Ina Iesu, Godi ro kohodowa dubu to na-wasoro-dumo, mo ro beda mino to nama-oworohuti-ri?’ Neio imese sirio se auna se nato giaia-rimo, ‘Ota kemowotowa ato meremopoguti!’ 
Neio Paireti ro ina iato gimodowa, ‘Ina Iesu ro beda ubauba tanaro gosioidiro nou sapuwo to emopoguti ri ra?’ Kaupoti neio auna se nato giaiauti-rimo, ‘Ota kemowotowa ato meremopoguti!’ 
Paireti umoro keba se ta-goi ibo nou ro nedi tanaro ro kodiobo modobo pua, mabu neio ro boso katamuai gemaragoidiro-rimo. Paireti iato obo barugu se gerememidai-ro, urubia sirio sosoro gabo ato tu iato giwiouti. Nou ro ibo, ‘Nio ro nedi ubauba tanaro ro namadimo-osioidiro-ri, nedi dubu ro nio ro namadimo-opia-ri, mo nio aboto aradabuai-ri pua, nio simara mibo ie.’ 
Taie sirio urubia ina auna se nato giaia-rimo, ‘Nimo simara aramio merebusere mutu nimo simara mibo ie nou kopia sapuwo to.’ 
Taie iato Paireti ro Barabasi sabowa to aise gemeiriai. Kaupoti Paireti ro boso koroho urubia iato gimutura Iesu neio ro kerei to epesuti ri ina emopoguti ri ota kemowotowa ato. 
Roma boso urubia ro Iesu na-gorobai-rimo gabamani edi moto ato imidirotiti, goto didiri iato ta-gowamo nou neito gowodoro-rimo. Taie neio ro arua boso koroho urubia iato girumai-rimo iedi moro ro neito aradabuti ri. 
Neio ro Iesu obotama iato gowopurutai-rimo, eputa urubia neio karima obotama beda sosoro wiroidirotiti-mo, nou gowoiti-rimo. 
Neio ro unuunu kumabo na-gemawiauti-rimo eputa to iato gemamitiai-rimo. Eputa urubia beda sosoro hato iroidirotiti-dumo, nou idaibo sosoro gowati-rimo sete mino to. Ibose eputa urubia ro gonopu beda sosoro irobidirotiti-dumo, neio ro tumodi tu to idaibo sosoro gonopu nou gemowateai-rimo orobidiro ri. Taie neio bagea to iato giroboreauti-rimo nou sosoro gabo ato, iato gemowabu-rimo. Neio ro ibo gemasosowado-rimo, ‘Iu eputa dubu, oro tuturu tau to imidirotitiwairi.’ 
Taie nou gase to iato gamoruti-rimo, nou saro gabo ato gonopu iato gowasiri-rimo ina iedi gonopu ro neito eputa to iato gaukokobo-rimo. 
Taie kemasosowado saro gabo ato, karima obotama na-gowopurutai-rimo, simara obotama iato gowoiti-rimo. Taie nou imese gowaguwo-rimo kemopoguti moro to. 
Iesu neio ro na-gowaguwo-rimo kemopoguti moro to, ipi gabo ato neio ro ata dubu nato gowea-rimo. Nou Sairini sabowa dubu e masiro Saimoni. Nou neio ro nato gemowapotai-rimo Iesu ota kemowotowa emaratai ri. 
Neio ioudo gidiai-rimo womu tato Gorogota podo ohu to ti-gorowateai-rimo. Gorogota podo maumo owamo ibo, urubia dubu eputa soro sosoro ie. 
Taie Iesu neio ro waini obo iato gomia-rimo. Iedi waini obo ro karakara meresini obo mutu ta-gemeboguouti-rimo, temeteme kemadibiai aboto. Nou ro nedi meresini ro na-gowaibia, iato nou ubi tato aise goi kodio aboto. 
Nou neio ro aise gemopoguti-rimo, ina nou saro gabo ato, boso koroho urubia nou obotama sapuwo to iato gorio-rimo. 
Taie neio aise gomititi-rimo, Iesu se gemotoi-rimo. Iesu eputa ohu ato arua titi ota to nou gematiti-rimo. 
Iedi tau ro nato Iesu etou mabu rido gopia-rimo, nou eputa ohu ato iedi titi ro neio ro giamo ibo, nou Iesu e Iu urubia eputa dubu e. 
Ibose netewa teibo piro dubu teibo Iesu mutu atu se ta-gimopoguti-marimo. Ata tumodi sapuwo ato gororidiro, ata pere sapuwo ato gororidiro. 
Iesu ota kemowotowa to na-gamototaidiro, nou edi urubia ro gorohudirio-rimo, neio ro nou ubauba owera to iato gematebuti-rimo. Neio ro na-gemasosowado-rimo eputa se giweisorowado-rimo. 
Neio ro ibo, ‘Oro Godi mere ra, a? Oro ibo na-garo Tarena Moto oro ro kototoro ie, ina netewa didi saiki ato oro ro kididi ie. Ma-derebedai-ro ota kemowotowa rido!’ 
Ibose Godi ra urubia ra turituri awawo urubia, Mose sabi kitamudiro urubia, duriomoro kiauri urubia mutu, nou neio ro ubauba owera to ibose to gematebuti-rimo. 
Neio ro ibo, ‘Nou ro arua urubia iwarebidirotiti, ina abora nou nakara se korowarebai beda ra? Nou Isiraere urubia eputa dubu e. Nou abora ota kemowotowa rido merebedai-ro, ina nimo ro nato anamadimi-imibiria-ri ibo nou Godi ro kohodowa dubu e. 
Nou Godi sapuwo to timibiria. Godi ubi koi ato, ba-mapopo-ro, mabu nou ro ibo garo “Mo Godi mere ie.” ’ 
Ibose iedi piro dubu teibo ro giateidiro-ma Iesu neitiro ro ubauba owera ta-gomio-rido. 
Iedi tau ro nato saiki turi ato gotoi, iedi duriomoro gebari ro duwo ro aise gahidimai womu tato adimo saiki ti-gorobai. 
Iedi tau ro nato Iesu ro auna iamo nato gutura. Nou ro ibo, ‘Eri, Eri, rama sabakatani!’ Nou maumo owamo ibo, ‘Godi, Godi, mabu boira mo oro ro na-nemauriai-die?’ 
Korowotoi urubia ro nedi owera ro na-girorowai-rimo neio ro ibo, ‘Etu umoro ra, nou ro Eraia orumai owarebai ri.’ 
Taie ata dubu hio ito na-girario-ro, nou ro obotama karakara waini obo to aise gemodobia, taie iedi karakara waini obo ro gonopu to na-gemamitiai, Iesu ro imusubo ri gonopu to imese gemowioro. 
Kaupoti arua urubia iato na-gorowotoi, neio ro ibo, ‘Sianu, nou idomari to aise diauri-mo, etu umoro ra Eraia amadi-ororuwo-ri nou owarebai ri.’ 
Iesu auna ia iamo nato gutura, taie nou iato aise garaburai. 
Tarena Moto ato auna obotama ta-wororidirotiti, ibi gugu kainai imese tarena ia ie, iedi obotama ro Godi sosoro nou ro owasioidirotiti. Iesu pamo na-gowea, nedi obotama ro turi ato aise gerekekeai-rido. Ohu rido garatamuai-ro sopu to aise gororuwo-ro. Ibose iedi duriomoro gebari ro sopu momuruwo ro aise gomuruwouti. Iedi tau ro nato, nadi gebarigebari turi ato aise gararapepe-rimo. 
Ibose pamo urubia edi bobo ato girobu nadi magere aise gorodobuti-rimo, taie sirio tarena urubia etio ro gorowaburo-rimo kebase, neio durupi Godi ro pamo rido aise giwameai-ro. 
Iesu pamo rido Godi ro edi tau ato gowameai-ro, nou saro gabo ato nedi tarena urubia ro imese godoro-rimo Ierusarema tarena sabowa to, neio sosoro urubia sirio ro iato aise giauri-rimo. 
Iedi sopu momuruwo ro, arua tanaro mutu, boso eputa dubu ro na-giwia, ibose edi boso urubia ro Iesu na-gemotoi-rimo neio mutu atu se auna tere ro girobai. Taie neio ro ibo, ‘Morobise ie nedi dubu ro Godi mere ie!’ 
Sirio mamio ibose to ta-gou-rimo, iedi tanaro ro na-gororosioidiro-rimo, neio ro muso rido neido giauri-rimo. Nedi mamio ro Iesu neio ro gobodoro-rimo Gariri duriomoro rido nou kowarebai sapuwo to. 
Nedi mamio ro neio aboudo arua neibi ie, Maria nou Magadara sabowa orobo ie, ata Maria Iemisi ra Iosepa ra nou neitiro mamu e, ibose Sebedi edi mere teibo ro neitiro edi mamu ro, nedi orobo peteibi ro nedi mamio sirio ro neio mutu atu se ibo gou-rimo Iesu owarebai ri. 
Adimo na-gereredea-ro, ata suana sirio dubu masiro Iosepa nou Aramatea sabowa dubu e, nou Iesu kowasoro dubu to ta-gararapoi, 
nou imese gou-ro Paireti aboto. Nou ro nato gararatoro Iesu pamo durupi nou ro ebedai ri ota kemowotowa rido. Taie Paireti ro boso koroho urubia iato gimutura Iesu pamo durupi ota kemowotowa rido owororuo ri ina Iosepa aboto aiwai ri. 
Taie Iosepa ro Iesu pamo durupi marea tato obotama to iato goupiriamuti. 
Nou simara nadi bobo keba se ta-gosioidiro orio na ie, Iesu pamo durupi ito gibiria. Taie nou ro auna nadi magere mea se na-gopai, iedi moro ro aise gemeserai. 
Iesu bobo ata sapuwo ato netewa teibo orobo teibo iato gomidiro-rido, neitiro ro Iosepa ioudo giauri-rido. Nedi orobo teibo ro neitiro ie, Maria Magadara sabowa orobo ie, ina ata Maria neitiro ibo ie. 
Ata kowaroho Iu urubia komidiro saiki ato, Godi ra urubia ra turi awawo urubia Parasi urubia mutu Paireti aboto nato gou-rimo. 
Neio ro ibo, ‘Auna dubu, nimo ro ti-nemaragoidiro-dumo iedi karasaubuti dubu ro Iesu, nou keremiro ato idaibo owera nou iarotiti. “Netewa didi saiki nama-orobai-ri, mo ina keremiro to anamadi-orowameai-ri.” 
Oro emodowa ri nou-dioumo ibo modobo ra oro ro kemotoi urubia kimeiriai Iesu bobo neio ro emotoi ri womu tato netewa didi saiki namabimo-oroporeai-ri? Kemotoi urubia oro ro kimeiriai tato, kowasoro urubia amadimo-ou-ri, Iesu pamo durupi neio ro amadimo-owopirowa-ri. Urubia neio ro ibo amadimi-imowauti-ri Iesu pamo rido Godi ro ta-gowameai-die. Tanaro idaibo sosoro namadimo-ororosioidiro-ri, abora nedi karasaubuti owera ro auna ama-oi-ri, keba karasaubuti owera nou ro ama-emasaudai-ri.’ 
Paireti ro neio ibo gimowameai, ‘Modobo ie kemotoi urubia ba-dirobai-mo! Nio simara umoro to neio mea se ba-diwotoburio-mo!’ 
Taie turituri awawo urubia, Parasi urubia mutu, neio ro kemotoi urubia imese giwou-rimo Iesu bobo to. Taie, nedi awawo urubia ro nadi magere ato isabuna neio ro iato giedea-rimo, ibose neio ro kemotoi urubia iato giwotoburio-rimo, modobo pua arua urubia piro se kodoro. 
