﻿Mareko.
9.
Iesu iato gutura nou kowasoro urubia aboto sabowa urubia mutu etio ro gorowotoi nou abato, nou ro ibo, ‘Nio morobise owera niwapotai nio arua nama-orowomidiro-ri nio ro amadimo-owea-ri Godi eputa dubu to nama-omi-ri nou ro kiwaboi tanaro nio ro amadimo-owea-ri pupuwo mutu amadi-orowapotai-ri.’ 
6 saiki na-goroporeai-rimo Iesu netewa didi kowasoro dubu peteibi Pita Iemisi Ioane neibi mutu imese gidiai-birimo podo ohu to. Neibi iato nakara moro ato gomidiro-birimo iedi tau ro nato neibi sosoro gabo ato Iesu durupi aise garatidiai ata sosoro gotoi. 
Nou obotama benenio ia se gerememiouti imese keakea ia ie ata pokiri iopu tato ie. Nou edi obotama ro imese keakea ia ie, ata dubu keakea obotama mutu keremodobowa modobo pua. 
Eraia ra Mose ra neibi abato nato gorowapotai-rido, taie neitiro Iesu mutu owera imese geremowauti-birimo. 
Pita ro iato gutura Iesu aboto, ‘Kitamudiro dubu, neibi abora kamade ie modobo ato nioro-diebimo neito, nibi sapuwo to mapagea peteibi anamabimi-imotomai-biri, ata oro do ie, ata Mose do ie, ata Eraia do ie.’ 
Pita ro owera tere sobosobo gutura Iesu aboto neibi atu se tere ro girobai-bi. 
Ina neibi toboro kere ro aise giahidimai-bi. Iedi toboro kere maumo ro noudo owera kodu nato gemerorowai-birimo ibo, ‘Io mo mere ie ina mo auna ubi tiamo nou aboto. Nou ro beda owera karo ra modobo ie nio ro aise kosioidiro.’ 
Taie neibi iato na-girarowea-birimo nato Iesu se gowea-birimo nakara se na-gotoi neibi abato, netewa teibo dubu teibo ta-garaseperai-rido nou aboudo, iato Iesu neibi mutu atu se ioudo imese giroruwo-ibiro podo ohu rido. 
Neibi na-giroruo-ibiro nou ro neibi umoro owera iato gimia-ibi, ‘Nibi neido namabimo-orowameai-ri mo ubi tato ie arua urubia kimowauti beda sosoro tanaro owea-bimo nato womu tato Imese Urubia Kiauri Dubu na-gapoi namadimo-opia-ri ina amadi-eribua-ri.’ 
Taie Iesu ro beda sosoro owera to gitomu-bi neibi aise gimibiria-birimo. Neibi neido na-gorowameai-birimo ata owera ata orowauti pua. Kaupoti neibi nakara moro ato nato geremowagomea-birimo ibo, ‘Nedi keribua owera ro maumo beda sosoro ra?’ 
Taie neibi ro Iesu iato gemodowa-birimo ibo, ‘Mabu boira Mose sabi kitamudiro rubi na-iarotiti-mo ibo Eraia keba se amadi-orowameai-ri ina Godi ro kohodowa dubu nou ro amadi-ou-ri saro rido?’ 
Taie nou ro nato gimowameai-bi ibo, ‘Morobise ie Eraia ro ti-gorowameai-ro keba se tanaro patu nato imododiai ri. Eraia ro imese namabu patu meana ta-giwai nou ro gabo ta-gosowa keba se. Ina mabu boira Tarena Buka owera ro ibo na-waro Imese Urubia Kiauri Dubu to na-gapoi temeteme imidai ri ina urubia sirio ro nou ubauba mino to amadimo-oworohuti-ri? 
Mo ro a-nutura nibi aboto ibo Eraia neito ta-gorowameai-ro ina urubia ro nou neito goworohuti-rimo simara ubi tanaro to. Tarena Buka owera ro beda sosoro garo aise gororosioidiro-rimo nou sapuwo to.’ 
Iesu podo rudo na-gororuwo-ro netewa didi dubu peteibi mutu neibi neido na-girarowea-birimo auna topira gebari nou ro gorobu. Iesu kowasoro urubia, Mose sabi kitamudiro urubia mutu a-gorosobi-rimo. 
Taie iedi topira gebari ro Iesu ato a-gorowadaudiro ina neio nou aboto imese gorowarario-rimo nou kamade owai-ri. 
Neio Iesu ro nato gimodowa, ‘Nio owera to etou mabu ato ororobai-dumo Mose sabi kitamudiro urubia mutu?’ 
Ata dubu owera mutu nato gotobowa-ro edi topira maumo noudo, ‘Mo mere nowou-die oro aboto nou ubauba urio ro oworohuti, ibose nou owera iarotiti pua. 
Nou ubauba urio ro serawo beda tau ato koi ra, nou iato aise keteamoidiro ie goto ato, matatabu korodi imese korobu e, ibonoro kiririkiriri se gi-owaro-ri. Nou ibose goto ato korobu ato tu ra sairo ra koko poroporo kiwaititi ie. Ina oro kowasoro urubia ta-niratodai nedi ubauba urio ro neio ro emabodorai ri nou aboudo, kaupoti neio ro modobo pua kemabodorai.’ 
Iesu nato gerewesegarai neio aboto ibo, ‘Nio kimibiria tato urubia ie! Mo dese a-neremiri ra nio mutu koroho? Mo beda mutu saiki niporeai nio mutu? Neito ma-dowou-birimo edi mere ro!’ 
Taie iedi mere ro korobai simara abera ro urubia mutu neio ro imese gowou-rimo Iesu aboto. Iedi kowou ro na-gowou-rimo Iesu ubauba urio ro nato na-gowea-ro edi mere ro aise geteamoidiro imese gorowawodorowado matagoro rido matatabu se gosuruwo-rimo. 
Taie Iesu na-gerewesegerai abera aboto nato gemodowa ibo, ‘Nedi mere ro idaibo tanaro beda tau ato gerematamuai?’ Abera ro ibo, ‘Nou kainai ato gerematamuai idaibo tanaro kisioidiro. 
Iedi mere ro ubauba urio ro opia ri emirititi, ata tau era to katowo ie ina obo to iato kowamotoro ie. Bagea pua, oro ro natonato dimati-ro nimo, diwarebai-ro! Oro modobo ra idaibo tanaro kisioidiro?’ 
Iesu ro iato gemowameai ibo, ‘Oro etou mabu rudo utura-die idaibo owera? Morobise kimibiria etu ro oworohuti nou aboudo modobo ie imese tanaro kisioidiro aboto.’ 
Ina iedi dubu ro iato giaia, ‘Mo kimibiria mutu e. Mo dowarebai-ro kimibiria pupuwo demowai-ro!’ 
Iesu na-girarowea topira gebari na-gorowoiriamuti-ro nou aboto nou ro nato gemadowerai edi ubauba urio ro. Iesu ro ibo, ‘Oro ro edi mere ro gemadohuti owera karo moro rudo, ibose gare kirowidiro moro rudo. Oro pamo dubu sosoro na-omidiro dosuruwo edi mere ro demeserai-ro, oro neito orowameai ate ina!’ 
Iedi ubauba urio ro parara gebari nato gutura iedi mere ro aise geteamoidiro goto ato pamo se gereresuai, taie iedi ubauba urio ro imese gosuruo-ro nou aboudo. Iedi mere ro imese gorobu. Arua urubia ro ibo, ‘Pamo se esuai mere poti.’ 
Iesu ro iedi mere ro na-gemesiomai tu rido na-gorobai aise gowotobowa. 
Iesu moto to na-gorowameai kowasoro urubia ro nato gemodowa-rimo nakara moro ato, neio ro ibo, ‘Mabu boira nimo ro iedi ubauba urio ro owagare tato?’ 
Ina Iesu ro ibo, ‘Egeaegea tanaro kisioidiro modobo pua idaibo sosoro ubauba urio kimabodoidiro aboto, kararatoro nou se ie kaupoti nio ro neito kiwagarewado ie.’ 
Iesu nou simara kowasoro urubia mutu iedi duriomoro ro na-gemeserai-rimo neio ina imese goroho-rimo Gariri duriomoro ato. Iesu nou ubi tato ie urubia umoro koi ibo nou kowasoro urubia mutu nato torowomidiro, neio piro se goroho-rimo. 
Nou ro kowasoro urubia iato gimowapotai ibo, ‘Imese Urubia Kiauri Dubu to na-gapoi nou urubia ro amadima-apoi-ri iato amadimo-orobai-ri, ina amadimo-opia-ri, kaupoti netewa teibo saiki teibo namado-oroporeai-ri ina ata saiki ato amadi-eribua-ri bobo rudo nou keremiro ama-owea-ri ina.’ 
Nou ro ibo gitamudiro idaibo sosoro kaupoti nou kowasoro urubia ro nou beda sosoro owera to geremowagomea maumo meana se ememidai pua mabu neio tere ro giwati nou kemodowa aboto. 
Iesu nou kowasoro urubia mutu imese giodori Kapeniama sabowa to, taie neio moto goro to na-gemibiria iato imese gorowomititi. Iesu ro neio nato gimodowa, ‘Nio gabo ipi ato otona owera to eremowagomea-dumo?’ 
Ina kowasoro urubia ro nou owera na-gemororowai-rimo neio owera tato se gorowomidiro mabu neio edi owera to na-geremowagomea-rimo ibo owamo auna to etu ro ama-ararasoro-ri idaibo sosoro to geremowagomea-rimo. 
Taie nou ro neio na-giramairiai nou ia na-gomi taie nato gimowauti, ‘Etu ubi ra auna to kararapoi aboto nou modobo ie kainai to kararapoi amia urubia sowake koroho.’ 
Iesu ro mere kainai iato garamairiai turi ato aise gowotobowa, neio ro owea ri taie iato gatopea. Ina nou ro iato gutura, 
‘Etu ro kemaidodorai ra idaibo sosoro mere kainai mabu nou mo do ie, idaibo sosoro mo nou ro kemaidodorai ie. Mo etu ro kemaidodorai ra ibo pua mo nakara se kemaidodorai, kaupoti mo iedi dubu ro na-nemeiriai-ro nedi duriomoro ro neito nou ro nou ibose kemaidodorai ie.’ 
Ioane ro iato gemowapotai Iesu ibo, ‘Kitamudiro dubu, ata dubu nimo ro ta-nowea-rimo oro pupuwo to ubauba urio sirio nou ro gimabodoidiro urubia aboudo. Ina nimo ro nou egea se nodiobuti-dumo idaibo tanaro kisioidiro aboto mabu nou nimo mutu iradabutiti pua.’ 
Taie Iesu ro Ioane iato gemowameai ibo, ‘Idaibo dubu nio ro adohodai mamo idaibo tanaro kisioidiro ato, ido edi dubu ro nou ro mo masiro ubauba owai-ri pua. 
Etu ra ubauba kisioidiro tato nimo aboto io nou ia ro ama-iwatuti-ri nimo aboto. 
Mo ro morobise owera naro nio aboto, ata dubu ro nio obo nupu kimia ato mabu nio mo gu urubia ie, iedi dubu ro morobise ie nou ro mea wisa ido ama-imidai-ri.’ 
Iesu ro ina iato gimowauti nou kowasoro urubia mere kainakaina sapuwo to nou ro ibo, ‘Mo owera beda mere kainakaina ro na-irowidirotiti-dumo ina na-isioidirotiti-dumo, ina mere kainai boinana ata dubu ro nou ubauba osioidiro ri na-owaboi ina iedi mere kaina ro nou ro na-osioidiro ubauba tanaro, iedi dubu ro nou ro auna ia ubauba wisa kowea ie. Godi nou aboto auna serawo ama-oi-ri. Iedi dubu ro mere kainai ubauba to etu ro gowodoro nou aboudo modobo ie auna nadi wagoha rudo kemebuai oromo damo to keherai, nedi wisa ro kainai ie. Kaupoti Godi ro iedi wisa ro nama-aiwai-ri iedi dubu ro nou aboto auna ia ubauba wisa ama-aiwai-ri. 
Ina oro tumodi tu to ubauba tanaro neito na-osioidiro oro ro, modobo ie iedi tumodi tu ro kemotoria ina keherai. Io meana ia ie, oro tu kaupoti mutu womu tato womu tato keremiro ama-owea-ri. Modobo pua oro tu teibo mutu ubauba tanaro kisioidiro era to katowea ie. Iedi era ro duwo saiki, duwo saiki aise irewaretiti. Era iato korodouti pua ibose tiriwaretiti. 
Ina ibose ie oro sairo ro na-wowou ubauba tanaro kisioidiro aboto modobo ie oro ro iedi ata sairo ro kemotoria ina keherai, io meana ia ie oro sairo kaupoti mutu womu tato womu tato keremiro ama-owea-ri. Modobo pua oro netewa teibo sairo mutu ubauba kisioidiro era to katowea ie. 
Ina ibose ie oro idomari ata ro ubauba ubi na-emedea ata idomari kaubidiro modobo ie keherai ina kaupoti idomari mutu kodoro Godi edi mea sabowa ro neito. Mabu io mea tanaro ie idaibo sosoro oro kaupoti idomari mutu kodoro. Modobo pua oro idomari teibo mutu ubauba tanaro kisioidiro, era to katowea ie, 
iedi era ro nato “poporo gebari gebari tirohotiti-dumo neio korowaburo pua, nibo ohona ihotiti-dumo. Ina iedi era ro duwo saiki duwo saiki aise irewaretiti.”’ 
Iesu ro ina iato gimowauti, ‘Oro aboto mibo tau kou ato nou idaibo era sosoro ie. Urubia maumo tanaro idaibo sosoro era ro ama-iwaibirio-ri. Idaibo sosoro ie damena ro ohona mea topo kowai ie, era ro urubia ibo ama-iwaibirio-ri. 
Damena topo meana ie, damena topo na-wasoperai ohona topo tato ie. Ina etou nakomu namadimo-osioidiro-ri damena ina topo kowai aboto? Damena topo tato imese koi ie topo imese kasoperai ie.’ Ina noudo ie Iesu ro ibo, ‘Modobo ie imese sirio tau mea se gi-orowomidiro-ri nio komidiro keremiro mea se gi-owaboi-ri. Nio komidiro keremiro maumo ato mea damena topo kiamo modobo ie, ibose miro to gi-orowomidiro-ri korowomidiro.’ 
