﻿Mareko.
12.
Iesu ro totomu imowautititi urubia kitamudiro sapuwo to. Ata tau ato nou ro totomu nato gimowauti ibo, ‘Ata dubu ro gereipi pari nato gosioidiro. Nou ro kara to na-gemowagegeidiro taie turi ato nou ro bobo na-goboba, boroboro kupia kedea moro ie ohu ato gereipi sairo to kituti ato isi obo ito kisuputi ie. Ina ohu moto iato gididi pari kiauri moro ie. Taie pari abera ro arua urubia se girobai nou pari emeauri na. Nou ro ibo, “Nedi pari ro mea mino to ba-demeauri-rimo nio aboto niapoi, awawo namadimo-oi-ri arua iopu mo do ie, arua nio do ie”, taie iedi dubu ro iato imese gaimai ata muso moro to, iato ibo irohotiti, ibo irohotiti 
iato iedi gereipi pari ro na-gemeserai-ro kumabo awawo ta-goi-rimo, iopu gumuni se gorowotoi. Nou iato gimaragoidiro ata dubu nou ro aise gemeiriai iedi pari ro neito arua gereipi gumuni imade ri iwou ri nou aboto. 
Kaupoti iedi dubu ro na-gorowateai-ro neio ro na-gowea-rimo na-gorobai-rimo ubauba mino to iato gado-rimo. Na-gado-rimo taie imese gotiodorai-rimo ata gereipi gumuni tato tu kawakawa gorowameai nou. 
Iedi pari namutuna ro ina ata dubu iato gotiodorai nou na-gorowateai neio aboto iedi dubu ro neio ro korobai na-gado-rimo ubauba mino to eputa ti-gowakokobo-rimo. Neio ro nou aboto ata siripo tanaro gosioidiro-rimo. Iedi dubu ro na-gorowameai-ro, “O mo idaibo mino to noworohuti-dumo iedi urubia ro neio ro!” 
Ina nou ro ata sowake dubu iato gemeiriai atu urubia aboto, nou na-gorowateai iedi pari kemeauri urubia ro nou aboto mea tanaro osioidiro pua neio ro aise gopia-rimo. Ina iato iedi dubu ro nou ro sirio se iato gimerio sowake urubia. Pari kiauri urubia ro iedi urubia ro amia aise giesu-rimo arua ubauba mino to giado-rimo. 
Pari namutuna ro urubia kimeirio to ta-giporeai, kaupoti ia ro geremeserai kemeiriai aboto nou ia simara mere, nou ubi mere ie. Nou ro iedi mere ro saro ia rido gotiodorai. Nou ro ibo, “Nedi urubia ro neio ro mo mere mea mino to amadimo-oworohuti-ri mabu nou mo ia mere ie.” 
Taie urubia mere neido na-gemeiriai na-gorowateai nedi pari ro ito, iedi urubia ro na-gemeauri-rimo neio nakara se nato geremowauti-rimo nou neio ro na-gowea-rimo. Neio ro ibo, “Nou pari namutuna nou mere ro ou-die nou emeiriai-die nou ro. Modobo pua nedi pari ro nou ro imese moro to kirahidimai, mesuai-rimo nedi mere ro, pari nimo do to nato ama-ararapoi-ri.” 
Neio ro owera to auna se aro pua, iedi mere ro na-gorobai-rimo, iato gopia-rimo nou pamo durupi pari rido aise geherai-rimo.’ 
Iesu ro neio nato gimowapotai, ‘Pari namutuna ro iato beda tanaro ama-osioidiro-ri? Nou ama-ou-ri iedi gereipi pari neito iedi urubia nou ro neio ama-iopiauti-ri ina iedi pari ro etio ra mea se kemeauri urubia neio aboto ama-iapoi-ri. 
Nio ro Godi edi Tarena Buka owera ro a-ioputi-dumo ra? Io nio ro na-gioputi-rimo “Moto beda urubia ro gididi-rimo meamea posi se giosora-rimo ina mea ia posi neio ro a-gasoperai-rimo dorogora se gowatebetai-rimo, Godi ro na-gowea iedi posi ro nou ro ibo, ‘Nou modobo posi ie turi ato owotobowa na moto gebari koko poroporo nou ro ama-adiouti-ri.’ Nou ro beda owera garo iedi posi ro na-gomidai-ro iato gowotobowa turi ato, nou ro mea tanaro gosioidiro.”’ 
Iu awawo urubia umoro ta-goi-rimo ibo nedi totomu owera ro Iesu ro na-gimowauti urubia pari ubauba se na-gemeauri-rimo nou sapuwo to, nou ro neio ia sapuwo to gimowauti. Taie neio na-giraroweauti-rimo urubia sirio se giauri-rimo, neio ubi ie Iesu orobai ri koto to owou ri, mabu neio tere ro giwati iato neio ro modobo pua urubia dubu patu ato korobai nou. Iu eputa urubia ro Iesu iato aise gemeserai-rimo imese gou-rimo. 
Arua Parasi urubia Herodi kowarebai urubia mutu Iu eputa urubia ro iato gimeriai-rimo Iesu aboto. Iu eputa urubia neio ubi ie Iesu ro ata ubauba ata osioidiro ri ina nou neito eremamuai rie. 
Neio na-gou-rimo nou aboto nato gutura-rimo ibo, ‘Kitamudiro dubu, nimo umoro ie oro morobise dubu e, urubia beda sosoro imaragoidiro-dumo oro sapuwo to, oro ata tere tato ie neio aboto. Imese beda mutu urubia sirio ra neio imese atu sosoro ie oro sosoro gabo ato, ibose oro kitamudiro Godi sapuwo to imese morobise ia kitamudiro iworohutiti. Tauo nimo ma-dimowapotai-ro, nimo ro takesi mani kiaremo Roma gabamani eputa dubu nou aboto, io modobo ra o modobo pua ra?’ 
Iesu keba se umoro ta-goi neio beda sosoro kimaragoidiro gimaragoidiro-rimo, taie nou ro nato gimowameai ibo, ‘Mo nio ro etou mabu rido nowaibia-dioumo? Mani iopu neito ma-demowawea-rimo.’ 
Neio ro na-gemowarario-rimo, taie nou ro nato gimodowa, ‘Nodio asaso ro etu asaso ro iateidiro masiro mutu?’ Taie neio ro ibo, ‘Roma gabamani eputa dubu nou masiro Sisa nou asaso ro iateidiro masiro mutu.’ 
Taie Iesu ro nato gimowapotai ibo, ‘Beda nakomu ra Sisa masiro mutu modobo ie Sisa kemowameai, ina ibose Godi ro beda nakomu iaiwo-die modobo ie Godi kemowame.’ Neio ro na-girorowai-rimo edi owera ro Iesu aboudo kodurubo imese gorowotoi eputa se giweisorowado-rimo. 
Iedi tau ro nato Sadusi urubia ta-gorowomidiro. Neio Iu urubia ie kaupoti neio a-imibiriatiti-mo karaburai ato nou imese moro to karaburai ie nou ina keremiro owea ri pua. Arua Sadusi urubia Iesu aboto iato gou-rimo kemodowa owera mutu. 
Neio ro ibo, ‘Kitamudiro dubu, Mose ro na-gisioidiro titi idaibo sosoro ie, ata orobo ra mutu dubu merebusere tato karaburai ato, nou edi orobo garamu ro neama ro kewedea ie, ina nou ro merebusere kirasomai ato, nedi merebusere ro naramu masiro ato kirasomai ie, neama do pua nou ro kirasomai kawa kirasomai ie.’ 
Neio ro ibo, ‘7 naminiramio ta-gorowomidiro, keba se naramu ro gedea orobo. Naramu dubu mutu na-imidirotiti-do taie naramu dubu iato aise garaburai, edio orobo ro nou ro mere besere tato gemeserai-ro, taie edio orobo ro ibo imidirotiti 
ina turi dubu ro edi garamu iato gedea. Taie iato nou mutu ibo imidiro-do iato iedi turi dubu ro aise garaburai. Iedi orobo ro ina nou ro mere besere tato gemeserai-ro. Ina atu sosoro tanaro ibose to gororosioidiro turi dubu abato edi na na-gai-ro nou abato, 
edi orobo ro 7 naminiramio neio ro karemo to ti-goroporeai. Neio merebusere irasomo pua iedi orobo ro nou abato. Iedi orobo ro ibo imidirotiti womu tato ti-garaburai. Iedi kaupoti orobo ro 7 naminiramio neio ro garemo-rimo. 
Ina Godi ro pamo rido nama-iwoubua-ri etu orobo to ama-ararapoi-ri, keba dubu orobo ra o neama do ra o etu do ra? Mabu 7 urubia ro garemo-rimo iedi kaupoti orobo ro.’ 
Iesu ro neio iedi owera ro masawe to gimasiai. Nou ro ibo, ‘Nio etu ri aradoruti-dumo sirio tau to? O mabu nou ri ra nio umoro pua ra Godi edi tarena buka owera ro? Neido a-waradoruti-dumo ra nio? Nio umoro pua Godi nou urubia dubu e imese pupuwo ia ie. 
Urubia na-orowaburo-dumo neio Eredea Dubu edi sowake urio ro neio sosoro ama-irowomidiro-ri. Urubia erere se ama-irowomidiro-ri kararemo pua ie iato. Godi edi suwake urio na-orowomidiro Adiri sabowa ato neio sosoro ama-irowimidiro-ri. 
Nio imese umoro ie ina keremoputi ie Godi edi tarena buka ro urubia pamo rido amadimi-irurubua-ri keremiro to. Godi ro ta-gutura urubia pamo rido kireribua sapuwo to Mose ro edi owera na-gisioidiro nio ro a-geremoputi-dumo ra? Ibo iamo era ota ato na-ireware-ro Godi ro ibo nato gutura Mose aboto Aberaham, Aisaki, Iakobo mo neibi ro ti-nemowabutiti-bimo. 
Neibi ta-gorowaburo-birimo ina abora neibi keremiro ie Adiri sabowa ato. Godi abora temowabu-bimo. Urubia abora na-orowomidiro, urubia na-gorowaburo-rimo, neio atu se nou ro tiauri-die. Nio Sadusi urubia auna ia se aradoruti-dumo.’ 
Mose sabi kitamudiro dubu kaupoti Iesu aboto iato gou-ro nou ro ta-girorowai Iesu Sadusi urubia mutu owera saro na-geremowasiouti-rimo, nou ro ta-gemewidiro-ro Iesu ro neio karatoro owera wisa mea se gimowameai. Taie nou karatoro owera mutu nato gou-ro nou ro ibo, ‘Tarena Buka ato na-owamo beda tanaro ra imese auna ia tanaro?’ 
‘Arua tanaro neio sopu to iamo-die’ taie Iesu ro iedi dubu ro nato gemowameai ibo, ‘Isiraere urubia neito dirowidiro-rimo! Abera naramu Godi nimo ro na-nemowabu-dumo nou nakara ia se nou se Abera naramu ata tato ie. 
Godi nirimagare kemati modobo ie morobise giropu to, morobise ubi to, morobise kimaragoidiro to, morobise pupuwo to, imese nou aboto kiaiwai modobo ie. 
Ata auna tanaro ibo ie oro modobo ie arua urubia nirimagare kimati oro beda sosoro eremati nakara se oro ro idaibo nirimagare kowawuti modobo ie arua urubia aboto. Nedi tanaro teibo ro imese auna ia tanaro teibo ie.’ 
Taie Mose sabi kitamudiro dubu ro na-gemororowai nou ro ibo, ‘Kitamudiro dubu, io oro ro modobo owera aro-die, oro ro morobise utura-die idaibo Godi kaupoti nou se ie. 
Nimo ro modobo ie Godi giropu to nirimagare kemati, kimaragoidiro to, ibose morobise pupuwo to kisioidiro. Idaro urubia dubu modobo ie arua rubi nirimagare kimati nou beda sosoro eremati nakara se. Nedi tanaro teibo ro morobise ie neitiro auna ia tanaro teibo ie. Arua tanaro na-iamo idaibo tumu na kimatowo Godi aboto io neio sopu to iamo-die.’ 
Iesu ro iedi dubu ro na-geibimai nou ro wisa mea mino to gemowameai nou ro ibo ‘Oro ro aupise ta-emosiomai Godi edi kara goro ro neito kodoro aboto.’ Taie Iesu aboto modobo pua ina ata dubu ata kou karatoro owera mutu. 
Iesu nou Tarena Moto ato gitamudiro urubia sirio neio ta-goroiti taie nou ro neio nato gimodowa ibo, ‘Mabu boira Mose sabi kitamudiro urubia ro neio ibo na-itamudiro-dumo Godi kohodowa dubu nou gu Deibidi aboudo orobu-die? 
Tarena Urio ro Deibidi kutura owera umoro ta-gowai, Deibidi ro ibo, Godi ro ta-gutura mo Abera naramu aboto, “Mo tumodi sapuwo ato oro ba-domidiro womu tato oro nasa rubi mo ro nama-itaumai-ri oro sairo mabu ato.” 
Deibidi ia ro ibose ta-wasoro Godi kohodowa dubu nou Abera naramu to. Ina mabu boira arua rubi ro ibo na-waro-dumo “Godi kohodowa dubu nou Deibidi gu aboudo orobu-die?”’ Urubia sirio na-gorowomidiro nou kitamudiro tau ato neio imese auna ia kamade ro giwati. 
Neio ina Iesu ro iato gitamudiro, ‘Umoro umoro se nio keremowotoi mutu Mose sabi kitamudiro urubia abeamio tanaro kitamudiro ata sosoro ie, neio tanaro ibodoro mamo, neio ibose ie auna ubi ie meamea namabu to keremeduti urubia ro imowabu ri. Awawo urubia to kararasoro neio auna ubi ie, arua urubia ro ibo aro ri “auna dubu dematateai-mo tou-die.” Neio ubi ie idaibo tanaro kororosioidiro ohona kimade moro ato. 
Ibose neio auna ubi ie meamea komidiro moro kimaberewado karadabu moto ato io ubauba komidiro moro dorogora se urubia do ie. Neio ubi ie urubia ro meamea keta se kimosouti orowomititi na. 
Ibose nedi urubia ro neio garamio auna kiaserai ie namabu aboto. Neio Godi aboto kararatoro tau ato tututu kararatoro owera nou karowado ie urubia ro imowabu ri. Nedi urubia ro idaibo na-isioidiro-dumo Godi ro neio timerebidiro-die ubauba temeteme saiki ata amadimo-owea-ri.’ 
Iesu Tarena Moto ato na-gomidiro Godi sapuwo to na-iaiwotiti-dumo mani iedi mani bokose ro nou gomo ato gomidiro. Taie urubia na-godouti-rimo Tarena Moto to Iesu ro urubia se giauri neio nirimagare mani na-gibiti-rimo iedi bokose goro neito. Namabu sirio urubia ro kainakaina mani iaremo pua iedi bokose goro ro neito. 
Taie iato namabu tato garamu abere ro godoro-ro nou ro netewa teibo garegare mani iopu teibo nou se gibitidiro-ma. Iedi mani iopu teibo ro auna mani iopu teibo pua, beda sosoro ra netewa teibo toea teibo nou gibitidiro-ma. 
Iesu ro ta-gowea iedi garamu orobo ro taie nou kowasoro urubia iato girumai, ‘Ma-dou-rimo neito mo aboto. Iedi garamu abere ta-wodoro-ro neito nou ro netewa teibo toea teibo nou ibitidiro-ma nedi bokose ro neito. Nou mo ro na-nowea edi toea teibo na-iworohuti-ma nou ro imese momuo se aise iwou-madie. Ata nakomu ata nou ro emeserai pua moto goro ato. Nio mo ro morobise owera nimowapotai, nedi garamu orobo ro auna ia mani iedea bokose goro to, ibo pua arua rubi idaibo sosoro mani na-iaiwo-dumo. 
Nio ro ta-iauri-mo awawo mani urubia mani na-iaremo-dumo, kaupoti neio mani iporewado pua kiaremo to, maumo nosonoso tirobu esepaesepa tirobu. Kaupoti nedi orobo ro nou ro ata nakomu ata emeserai pua, imese momuo se tiaiwai-die. Nedi orobo ro namabu tato orobo ie, nou edi na mani iopu ro na-waiwidirotiti ohona imade na nou ro imese momuo se tiedea.’ 
