﻿Mareko.
15.
Turituri rubi neio eputa urubia arua, Iu awawo urubia, Mose sabi kitamudiro urubia imese Iu kanisere urubia neio sirio se ta-garadabuti-rimo atu moro to. Ina kowaroho duwoduwo ato Iesu kopia sapuwo to kaupoti moro to owera mea se gemobodiai. Taie iedi Iu eputa urubia ro Iesu neio ro na-gorobai-rimo iato gemotohiti-rimo, imese gowaboi-rimo Roma gabamani auna dubu aboto masiro Paireti. 
Taie Iesu Paireti ro nato gemodowa, ‘Oro Iu eputa dubu nou se ra?’ Ina nou ro neito gemowameai, ‘Oro beda sosoro aro-die, io nou se ie.’ 
Taie Iu eputa urubia ro inaina bagea owera aise gimogu-rimo nou sapuwo to. Neio ro ibo, ‘Nedi dubu ro nou ro ubauba tanaro ta-wisioidirotiti morobise ie.’ 
Taie Paireti ro ina nou nato gemodowa, ‘A-irowidiro ra? Oro ro neio wisa beda ito ama-imowameai-ri? Oro ibose to ama-otoi-ri ra owera aro tato?!’ 
Iesu nou ata sosoro dubu e, nou ubauba tato ie, ina noudo ie nou ro wisa imowameai tato. Paireti woki ro gopia mabu Iesu nou ro na-giauri owera tato na-gotoi. 
Kisimisi gabogabo ato Iu urubia Kimasaudai Soriomu kosioidiro ato Roma Gabamani auna dubu nou sirio tau ibo irowatititi kaupoti dubu dibura rido nou ro kemeiriai ie, Iu urubia beda dubu aboto iamo ubi io neio ro masiro to na-wapoi-dumo taie Gabamani ro iedi dubu ro nato kemeiriai ie sabowa to. 
Iedi tau ro nato amia Iu urubia ubi ie Roma urubia kiwagare Iu duriomoro rido, ina nou ri Roma urubia giesu-rimo pamo se. Taie iedi urubia ro iedi tanaro ro na-gosioidiro-rimo neio imese sirio se dibura to aise giedea-rimo Roma boso urubia ro. Barabasi ata nou se ie urubia nou mutu giopiauti-rimo. 
Taie iedi tau ro nato Iu urubia sirio ta-garadabuti auna topira ro gorobu, taie nato gou-rimo Paireti aboto, nou ro kaupoti dubu owatateai ri dibura aboudo, nou idaibo sosoro na-irowatiti kisimisi gabogabo ato. Taie neio ro ibo, ‘Oro ro modobo ie ata dubu ata sabowa to kemeiriai.’ 
Paireti umoro ta-goi turituri rubi neio awawo urubia Iesu neio ro na-gohoio-rimo mabu urubia sirio ro Iesu owera irowidiro-mo, Iesu nou ri gowou-rimo nou aboto. Ina Paireti ro iedi topira gebari ro neito gimodowa, ‘Nio ro edi dubu ro na-wasoro-dumo “Iu Eputa Dubu” to nio ubi ra nou mo ro kemeiriai sabowa to?’ 
Taie iedi turituri rubi neio awawo urubia ro topira maumo ato urubia neio ro nato gimowapotaidiro-rimo ibo, ‘Paireti namadi-utura-ri ibo “etu namadi-emeiriai-ri mo ro sabowa to?”, nio ro ibo ba-dutura-mo “Barabasi ro ba-morowameai sabowa to!”’ Taie iedi tanaro aise gororosioidiro. 
Taie Paireti ro urubia sirio iato gimodowa, ‘Iesu nio ro asoro-dumo ibo nou Iu eputa dubu e, ina beda mino to nama-oworohuti-ri nou?’ 
Neio iato binio to giaiauti-rimo, ‘Nedi dubu ro meremopoguti ota kemowotowa ato!’ 
Ina iedi Roma gabamani dubu ro nou ro ibo, ‘Mabu boira? Nou beda sabi gesebea?’ Nou neio ro masawe to ina iato gemowameai-rimo auna se ‘Meremopoguti ota kemowotowa ato!’ 
Taie Paireti ro urubia ubi aise gomidai. Taie nou ro Roma boso urubia iato gimowapotai Barabasi owosuruo ri dibura rido, ina wisa na Iesu kerei to epesuti ri ina nato emopoguti rie ota kemowotowa teibo ato iato araburai ri. 
Roma boso urubia ro Iesu na-gorobai-rimo gabamani edi moto ato imidirotiti sibura bobo to ito iato gowodoro-rimo. Taie neio ro arua boso urubia iato giramairiai-rimo neio atu moro to imese garadabuti-rimo. 
Taie neio ro Iesu obotama na-gowopurutai-rimo karima obotama iato gowori-rimo eputa urubia neio karima obotama beda sosoro wiroidirotiti-mo, nou idaibo sosoro gowati-rimo. Neio ro ununu kumabo ta-gemawiauti-rimo nou iato gemamitiai-rimo eputa ato, eputa urubia neio beda sosoro hato iroidirotiti-mo ina idaibo sosoro gemowati-rimo. 
Neio ro ibose bagea to garo-rimo nou aboto ibo, ‘Iu urubia eputa dubu oro tuturu tau to imidirotitiwai-ri.’ 
Ina edi boso urubia ro Iesu gonopu to eputa to iato gado-rimo, gase to iato gamoruti-rimo woidomari abo, arua ro bagea to na-giroboreauti-rimo iato gemowabu-rimo. 
Neio ro nou kemasosowado na-goroporeai karima obotama na-gowopirutai-rimo, taie nou simara obotama iato gowori-rimo. Nou ioudo imese gowosuruwo-rimo opia moro to emopoguti ri ota kemowotowa teibo ato. 
Iedi tau ro nato Saimoni gabo ato gowea-rimo Sairini sabowa dubu e Arekasanida ra Rupasi ra neitiro abera ie. Nou boso urubia ro gemutura-rimo ibo, ‘Ei oro ro demaratai Iesu ota kemowotowa.’ 
Iesu neio ro imese gowaboi-rimo ata damera to masiro Gorogota. (Gorogota Damera urubia dubu eputa soro sosoro ie.) 
Neio ito na-gorowateai-rimo arua rubi ro nou meresini iato gemowou-rimo odio ri temeteme kemadibiai aboto, kaupoti nou eputa se geweisorai nou ro odio pua. 
Taie Roma boso urubia ro kowaroho saiki ato gemopoguti-rimo ota kemowotowa ato, taie neio durumai iato geremewehere-rimo, etu durumai ro a-gobeidiro tuturu tau to Iesu obotama nou ro komidai ie. Nou obotama sirio idaibo sosoro mino to gowamade-rimo. 
Neio ro eputa abato idaibo titi nou iato gematiti-rimo ibo, Nou Iu Urubia Eputa Dubu e. 
Sabi edi dubu teibo ro na-isebotiti-do neitiro ibose to gimopoguti-marimo, ata nou tumodi sapuwo ato, ata nou pere sapuwo ato neitiro ibo giroridiro-ma kemowotowa teibo ato. 
Urubia ro Iesu na-gorohudirio-rimo, neio eputa se giweisorowado-rimo nou ubauba owera iato gomio-rimo ibo, ‘Nou e oro ma-dowea umoro a-woi.’ Arua ibo garo-rimo, ‘Ae! Oro ibo na-garo keba se “Mo ro kototoro ie Tarena Moto ina netewa didi saiki ato kididi ie.” Ina oro abora bida ra? 
Ma-derebedai-ro ota kemowotowa rido!’ 
Turituri rubi neio awawo urubia, Mose sabi kitamudiro urubia neio ibo se iato ta-goroho-rimo, neio ro nou iato gemasosowado-rimo. Neio iato geremowauti-rimo, ‘Nedi dubu ro nou arua urubia se iwarebidirotiti ina mabu boira nou nakara se orowarebai tato? 
Nou morobise ia Godi kohodowa dubu ato, ibose nou morobise ia Iu urubia eputa dubu to na-warasoro, nimo ro namadimo-owea-ri nou kerebedai moro ato morobise to nato namadimi-imibiria-ri.’ Ina iedi na dubu teibo ro sapuwo sapuwo ato na-giroridiro-ma ota kemowotowa ato neitiro ibose Iesu ubauba owera ta-gomio-rido. 
Saiki turi rido womu tato adimo saiki na-gereredea iedi duriomoro gebari ro duwoduwo ro imese ta-gatimuti. Iedi duwoduwo ro imese ta-gowamowado-ro womu tato adimo saiki ro ti-gorobai. 
Taie adimo ato Iesu nou auna ia iamo nato gutura simara owera to, Eroi Eroi Rama Sabakatani! Nou maumo owamo ibo, Godi! Godi! Mabu boira mo oro ro na-nemauriai-die?! 
Urubia arua iato etio ro gorowotoi neio ro ibose nou iamo ta-gemorowai-rimo kaupoti neio ro mea se imidai pua. Neio ro ibo, ‘A-emorowai-mo nedi dubu ro Eraia arahuomai.’ 
Taie tuturu to pua kaupoti dubu nou obotama kere iato na-godobia karakara waini obo to, iedi kososouti obotama kere ro gonopu mutu na-gematahiti iato gemowioidiro nou ro karakara waini obo ioudo imusubai ri. Nou ro na-gemowioidiro, taie iedi dubu ro nou ro ibo, ‘Egea mere se memotobowa-birimo, etu umoro ra Eraia nou amadi-ororuwo-ri Godi ipusu owera dubu nou ro ama-ebedai-ri, ota kemowotowa ohu rido.’ 
Taie Iesu nou auna ia iamo nato gutura taie iato nou aise garaburai. 
Tarena Moto goro ato auna obotama ta-wororidirotiti. Ibi gugu kainai imese tarena ia ie iedi obotama ro Godi sosoro nou ro owasioidirotiti. Iesu pamo na-gowea edi obotama ro turi ato aise gerekekeai-rido, ohu rido garatamuai-ro kerekekeai aise gororuwo-ro sopu to. 
100 boso urubia iedio eputa dubu ro na-iaurititi nou ibose ti-gotoi Iesu sosoro gabo ato, nou ro ta-gowea Iesu karaburai moro ato. Nou ro ibo, ‘Nou morobise Godi ia mere ie.’ 
Ibose edi mamio ro gorowotoi muso rido neido girarowo-rimo etou tanaro gororosioidiro-rimo nou giauri-rimo. Nedi mamio ro neio ro gorowotoi Maria Magadarena, Sarome, ina ata Maria, Iosepa orio Iemisi neitiro mamu e. 
Iesu neibi ro owarebidirotiti-bimo Gariri duriomoro ato. Ibose arua mamio Iesu mutu Ierusarema sabowa to na-godoro-rimo neio ibose idomari ri ta-gou-rimo. 
Iosepa nou ata auna masiro dubu e kanisere ato, nou Aramatea sabowa dubu e. Nou kimibiria ta-owamotiti Godi edi kiwaboi tanaro ro nou emotoititi nou ro. Iedi saiki ro nato Iu urubia komidiro saiki sapuwo to namabu a-geremododiai-rimo. Adimo na-gereredea-ro Iosepa nato gou Roma gabamani eputa dubu Paireti nou ro gemotobowa, tere ro owati pua. Taie nou ro nato garatoro Iesu pamo durupi ebedai ri ina ibiria ri nadi goro to. 
Paireti a-giwagogorai Iosepa beda owera gutura ibo Iesu ta-waraburai mabu nou tuturu to ororidiro pua. Nou owera iato gemeiriai 100 boso urubia eputa dubu aboto nou Gorogota Damera rido ou ri Paireti aboto. Iedi dubu ro iato gou-ro, taie Paireti ro ibo, ‘Iesu a-waraburai ra?’ 
Ina iedi boso dubu ro nou ro ibo, ‘Io ta-waraburai.’ Taie iedi gabamani dubu ro nou ro na-girowai iedi owera ro ina Iosepa aboto nato gutura ibo, ‘Iesu pamo durupi ba-debedai-ro!’ 
Tauo Iosepa keba se Iesu durupi oupiriamuti na keakea obotama se gememidai-ro iato nou ro Iesu durupi mea mino to neito goupiriamuti, taie nou durupi nadi goro to iato gibiria. Taie nou ro boroboro nadi iato gowawodorowado magere damo neito gemopai. 
Maria Magadarena, Iosepa mamu Maria neitiro ro giauri-rido Iesu pamo durupi beda moro to gedea-rimo. 
