﻿Ruka.
3.
Ata auna dubu masiro Taiberia Sisa sirio duriomoro patu nou ro iaurititi Roma sabowa rido. Arua dubu nou maumo ato isioidirotiti-mo woko nou ro giapoi neio. Idaibo Ponita Paireti ro Iudia duriomoro nou emeaurititi. Ina Herodi ro Gariri duriomoro emeaurititi, nou naramu Piripi ro Ituria daro Tirakoniti duriomoro teibo nou emeaurititi-ma. Raisania ro Abirini duriomoro emeaurititi, 
ina iedi tau ro nato ta-gomidiro-rido ibose Anasi ra Kaiapa ra neitiro Godi ra Urubia ra turituri urubia eputa dubu teibo ie, neitiro Ierusarema sabowa ato imidirotiti-do. Taiberia 15 kisimisi to na-gomidiro eputa dubu to, taie iedi tau ro nato Godi owera nato garo-ro Ioane aboto Sekaraia edi mere ro, nou imidirotiti goto se duriomoro ato. 
Taie Ioane ioudo na-gohau-ro, Iodeni oromo bara ato irohotiti urubia iato imowautititi, ‘Derewesegerai-mo Godi aboto ina nio mo ro obo to nato anama-iwarumiauti-ri, iato Godi ro nio edi ubauba ro ama-imatopeamuti-ri.’ 
Aisaia Godi ipusu owera dubu owera tiamo Tarena Buka ato Ioane sapuwo to. Nou ro ibo, ‘Ata dubu kaunene tiarotiti goto se duriomoro ato, “Abera Naramu gabo ba-demesioidiro-mo tuputupu se ba-demowou-mo ata kerewai kerewai tato se. 
Podo gawagogo ba-diatumuti-mo ibose podo kiokio ba-diasio-mo atu mako ato ba-miamo. Gabo beda moro ato owamo kerewai kerewai se, tuputupu se ba-dowou-mo emia ba-dimotoho-mo. Ibose bobobo gabo ba-diatumuti-mo, goto paupau na-iamo ba-dimatauti-mo. 
Ina imese urubia ro paea se amadimo-owea-ri Godi edi kiapopo tanaro ro beda sosoro owamo-die.”’ 
Ioane aboto urubia sirio nato gou-rimo, neio nou ro obo to iwarumiauti ri. Ioane na-giraroweauti nou ro iato gutura neio aboto ibo, ‘Nio imese pamo bagawe sirio ie! Nio umoro etu ro iwai Godi serawo na-wou-die nou aboudo korowadau? 
Nio modobo ie meamea tanaro kisioidiro, ina iedi meamea tanaro ro urubia neio ro amadimi-iwapotaidiro-ri ibo nio tau kerewesegerai e ubauba aboudo. Nio modobo pua ibo kutura “Nimo modobo ie mabu nimo nasa Aberaham ie, nimo nou urubia ie.” Nio mo ro abora a-nimowapotai Godi nou modobo ie Aberaham orio urubia kimesioidiro nedi nadi sirio ro neito! 
Kabi towamo-die abora, paea se ta-gedea-die ota iebuti ri. Beda ota ra iopu tato io neio kiebuti aboto ama-orowotoi-ri, iato era to ama-ihere-ri. Beda ota ra iopu mutu neio ro ama-orowotoi-ri.’ 
Urubia sirio edi owera ro na-girowidiro-rimo neio ro Ioane iato gemodowa-rimo, ‘Ina nimo ro beda tanaro anamadimi-isioidiro-ri?’ 
‘Oro abato sodo teibo kiamo-ma ato, oro ro modobo ie ata kaiwai sodo tato mere aboto. Ibose oro abato ohona na-iamo modobo ie arua kiaiwai ohona tato mere aboto.’ 
Ioane aboto ibose takesi kimade urubia ta-gou-rimo, neio ubi ie Ioane ro iwarumiauti ri obo to. Taie takesi kimade urubia neio iato ibose to gutura-rimo Ioane aboto, ‘Kitamudiro dubu nimo beda tanaro namadimi-isioidiro-ri?’ 
‘Nio ro modobo pua gabamani ro beda mako kimedea ra didi mani kimade kawa kimade piro to.’ 
Ibose boso koroho urubia ro ibo, ‘Ina nimo beda ra? Beda tanaro namadimi-isioidiro-ri?’ ‘Nio mutu ibose masawe to arua urubia mani imediawado mamo, nio karasaubuti tanaro kisioidiro modobo pua. Nio gabamani ro beda mani imiotiti modobo ie kamade mutu kimade.’ 
Iedi tau ro nato urubia Godi ro kohodowa dubu nou gemasebidiro-rimo. Neio ro Ioane na-giauri-rimo beda tanaro gisioidiro, neio ro nu a-gatidiouti-rimo. Neio ibo gimaragoidiro-rimo, ‘Etu moro ra nou Godi ro kohodowa dubu nou se ie?’ 
Taie Ioane ro ibo, ‘Ata dubu tou-die mo saro rido, nou auna dubu e, mo modobo pua nou tamaka hodo kemopuruti aboto. Nio mo ro obo kawakawa to niwarumiauti kaupoti nedi dubu ro nio nou ro Tarena Urio to ama-iwarumiauti-ri, daro era to ama-iwarumiauti-ri. 
Nou namadi-ou-ri nou ro ama-imododiai-ri ota iopu, takamai nou ro ama-iamotuti-ri, mea ota iopu nou ro takamai rido ama-iwagarewado-ri. Takamai tima moro to ama-iaremo-ri, meamea ota iopu tima moro to ama-iaremo-ri. Takamai nou ro kaupoti moro to nama-iwoiriamuti-ri, taie era to nato ama-iherai-ri. Iedi era ro korodouti pua, iato ibose to iriwaretiti, womu tato womu tato era ie. Isana nou ro meamea ota iopu kiaremo moto ato nato ama-iaremo-ri.’ 
Ioane orodiobutiti pua, meamea owera nou ro urubia neito aise itomutititi neio pupuwo kiwaititi sapuwo to. 
Iedi tau ato na-iwarumiautiti urubia Ioane ro obo to, taie Iesu nou ro nato gowarumia obo to. Iesu kararatoro owera iato garo Godi aboto. Iedi kararatoro na-gararatoro toboro magere aise gorodobura-ro, taie Tarena Urio nato gororuwo-ro toboro rido nou aboto dumu sosoro. Taie owera kodu toboro rido nato gutura-ro ibo, ‘Oro mo ia mere buro ie, mo auna nirimagare ie oro aboto, ibose mo oro aboto auna kamade ro nowatititi.’ Ata saiki ato Herodi owera Ioane ro paea mata se gemowapotai ibo, ‘Oro ro ubauba tanaro gosioidiro Herodiasi na-gedea, nou oro eterera ie!’ Herodi ro ibose sirio ubauba ta-isioidirotiti urubia aboto, nou ubauba idaibo sosoro ohu ra maumo ra aise iremotomotiti. Ioane ro Herodi paea mata se emowapotaidirotiti, ina noudo ie Herodi ro Ioane dibura to nou mabu ato gedea. 
Iesu 30 kisimisi sosoro ie nou woko nato gatamuai. Urubia a-gimaragoidiro-rimo ibo nou Iosepa ro garasomai. Ina Iosepa Heri ro garasomai. 
Heri Matata ro garasomai. Matata Riwai ro garasomai. Riwai Meriki ro garasomai. Meriki Ianai ro garasomai. Ianai Iosepa ro garasomai. 
Iosepa Matatia ro garasomai. Matatia Eimosi ro garasomai. Amosi Nahuma ro garasomai. Nahuma Esiri ro garasomai. Esiri Nagai ro garasomai. 
Nagai Mata ro garasomai. Mata Matatia ro garasomai. Matatia Semeini ro garasomai. Semeini Ioseke ro garasomai. Ioseke Ioda ro garasomai. 
Ioda Ioanane ro garasomai. Ioanane Resa ro garasomai. Resa Serubabere ro garasomai. Serubabere Searitiere ro garasomai. Searitiere Neri ro garasomai. 
Neri Meriki ro garasomai. Meriki Adi ro garasomai. Adi Kosama ro garasomai. Kosama Eremadama ro garasomai. Eremadama Eri ro garasomai. 
Eri Iosua ro garasomai. Iosua Eriesere ro garasomai. Eriesere Iorimi ro garasomai. Iorimi Matata ro garasomai. Matata Riwai ro garasomai. 
Riwai Simioni ro garasomai. Simioni Iuda ro garasomai. Iuda Iosepa ro garasomai. Iosepa Ionama ro garasomai. Ionama Eriakimi ro garasomai. 
Eriakimi Merea ro garasomai. Merea Mena ro garasomai. Mena Matata ro garasomai. Matata Natani ro garasomai. Natani Deibidi ro garasomai. 
Deibidi Iesi ro garasomai. Iesi Obedi ro garasomai. Obedi Boasi ro garasomai. Boasi Saromoni ro garasomai. Saromoni Nasoni ro garasomai. 
Nasoni Aminadabi ro garasomai. Aminadabi Rama ro garasomai. Rama Hesoroni ro garasomai. Hesoroni Peresi ro garasomai. Peresi Iuda ro garasomai. 
Iuda Iakobo ro garasomai. Iakobo Aisaki ro garasomai. Aisaki Aberaham ro garasomai. Aberaham Tera ro garasomai. Tera Nahoro ro garasomai. 
Nahoro Seruge ro garasomai. Seruge Reu ro garasomai. Reu Perege ro garasomai. Perege Eberu ro garasomai. Eberu Seraha ro garasomai. 
Seraha Kainani ro garasomai. Kainani Apakisadi ro garasomai. Apakisadi Sem ro garasomai. Sem Noa ro garasomai. Noa Rameke ro garasomai. 
Rameke Metusara ro garasomai. Metusara Inoki ro garasomai. Inoki Iaredi ro garasomai. Iaredi Mahararere ro garasomai. Mahararere Kenan ro garasomai. 
Kenan Inosi ro garasomai. Inosi Seti ro garasomai. Seti Adam ro garasomai. Adam Godi ro gosioidiro. Taie. 
