﻿Ruka.
19.
Iesu Ieriko sabowa aupiaupi na-gemowaititi-ro kodoro aboto ie 
ata dubu iato imidiro nou namabu sirio dubu e. Nedi dubu ro nou takesi mani kimade auna dubu e masiro Sekiasi. 
Sekiasi komukere dubu e Iesu sosoro kowea modobo pua urubia dubu patu maumo rido. Kaupoti nou auna ubi ro gowamo Iesu sosoro mea se kowea aboto. 
Taie nu keba moro to na-girario ota ohu to aise gioidiro. Nou ro kimaragoidiro to ibo, ‘Iesu ibose to amadi-ou-ri mo ro nu sosoro mea se nato nama-emowea-ri.’ 
Iesu ioudo na-gou-ro nu idomari na-gimeriai-ro nou ro Sekiasi se gowea ota ohu ato na-gomidiro-ro. Taie Iesu ro ibo, ‘Sekiasi, mo abora oro abato anama-omidiro-ri, samo to dororuwo-ro.’ 
Taie Sekiasi ro na-girorowai nedi owera ro nu ota ohu rido hio ito to aise gororuwo-ro. Taie Iesu nou ro kamade mutu aise gohiai iato neitiro atu se imese gou-rido nou moto to. 
Urubia sirio ro na-girorowai-rimo Iesu ro beda owera gutura Sekiasi aboto, neio auna masawe goi-rimo. Neio ro ibo, ‘Iesu modobo pua piro dubu ro na-wadabuai nou moto ato omidiro-ri.’ 
Kaupoti Sekiasi aise geribidiro, nou ro ibo, ‘Abera Naramu owera neito ma-dirorowai-ro mo aboto, mo edi namabu sirio ro na-niworohuti turi ato anama-iapepea-ri sapuwo namabu tato urubia neio anama-imio-ri. Mo ro takesi mani piro to edi urubia aboudo na-nimadetiti-ro neio mo ro anama-imowame-ri, ina ohu rido iato anama-imotomo-ri.’ 
Taie Iesu ro na-girorowai nedi owera ro nou ro ibo, ‘Oro Aberaham gu dubu e. Ina noudo ie oro moto urubia oro ia mutu, nio Godi ro simara ubauba aboudo ta-iapopo-ro. 
Mabu Imese Urubia Kiauri Dubu mo nou se ie mo nedi duriomoro neito nou ri nou-ro, etio ro garasoperai-rimo Godi aboudo neio iosora ri ina iapopo ri.’ 
Iesu ro urubia sirio nedi totomu ro nou gimowauti mabu nu aupise ie Ierusarema sabowa to korowameai aboto. Neio ro ata mino to gimaragoidiro-rimo ibo Godi ro kiwaboi tanaro samo ito amadi-ororosioidiro-ri Ierusarema sabowa ato. Ina noudo ie 
Iesu ro ibo, ‘Ata auna dubu nu muso duriomoro to gou eputa dubu masiro omidai ri. Ina nu ioudo orowameai rie simara duriomoro to, eputa dubu to nou ro omidiro rie. 
Nu ido gasiriai ito, tauo kebase nou ro 10 sowake urubia giramairiai-ro. Taie neio erere se mani nato gimio. Nou ro ibo, “Nedi mani ro neito besinisi ba-ditamudiro-mo womu tato mo neito korowameai nio aboto.” 
Kaupoti nedi dubu ro duriomoro urubia ro a-gohoio-rimo neio ubi tato ie nou ro komidiro aboto eputa dubu to. Taie neio ro arua urubia nato gimeriai-rimo, nou neio ro saro rido gobodoro-rimo. Neio ro ibo, “Nimo ubi tato ie nedi dubu ro nimo eputa dubu to nou ro kararasoro.” 
Kaupoti nedi dubu ro eputa dubu masiro aise gomidai, taie nu iato simara duriomoro to aise gorowameai-ro. Nou ro ibo, “Dirumai-mo iedi sowake urubia ro mo ro mani keba se etio aboto niaiwo, mo umoro oi rie ibo, neio ro orio mani beda mutu giwia-dumo.” 
Keba dubu ro ibo, “Auna dubu, mo oro ro edi mani iopu ro na-nomia-ro, mo ro 10 tau to orio mani ta-nosioidiro.” 
Eputa dubu ro ibo, “Oro mea sowake dubu e, oro umoro ie kainakaina tanaro kisioidiro mea mino to. Oro mo ro auna sosoro woko nama-omia-ri. Oro gabamani to nama-owomi-ri 10 awawo sabowa oro ro ama-iauri-ri.” 
Iato ata sowake dubu ro ibo, “Auna dubu, mo oro ro edi mani iopu ro na-nomia-ro mo ro neito 5 tau to orio mani ta-nosioidiro.” 
Eputa dubu ro ibo, “Oro ibose mo ro auna woko anama-omia-ri. Oro ro 5 awawo sabowa ama-iauri-ri.” 
Taie iato ata dubu ro gosuruo-ro nou ro ibo, “Eputa dubu, oro mani nou e oro ro edina nomia-ro mo ro tako maumo ato nemoworohuti. 
Mabu mo tere ie oro koko dubu e. Ata dubu ro kiedea ie edi namabu ro oro ro nou kimade ie. Oro sabowa ro oworohuti, oro woko kisioidiro pua.” 
Eputa dubu ro ibo, “Oro imese ubauba sowake dubu e! Oro edi owera to na-waro-die wisa oro aboto orowameai. Oro auna umoro ie mo koko dubu e, a? Ata dubu ro kiedea ie edi namabu ro mo ro kimade ie. Mo sabowa ro noworohuti, mo woko kisioidiro pua. 
Mabu boira mo mani banega to emedea tato? Mo idaibo na-norowameai-die oro ro didi mani ohu rido ba-nemotomai.” 
Taie iedi eputa dubu ro aise gerewesegerai gomo ato edi urubia ro gorowotoi neio aboto nou ro ibo, “Iedi mani ro dowasiri-mo nou abato na-iamo, 10 tau to orio mani edi dubu ro gosioidiro nou aboto ba-daiwai-mo.” 
Kaupoti neio ro ibo, “Auna dubu, nu mani mutu e, nou ro 10 tau to orio mani ta-gosioidiro.” 
Ina eputa dubu ro ibo, “Etio abato na-iamo sirio se neio ohu rido anama-imotomo-ri. Ina etio abato ra kiamo tato, neio aboudo momuo se anama-iwatateai-ri. 
Abora mo nasa urubia boira mo etio ro neseai-rimo eputa dubu to komidiro aboto? Nedi urubia ro neito ba-diwou-rimo mo sosoro gabo to, neio nio ro nato ba-diopiauti-mo.” ’ 
Iesu ro urubia totomu kimowauti na-goroporeai, nu keba se ioudo gasiriai-ro Ierusarema sabowa to. 
Oribi Podo abato edi sabowa teibo ro na-giamo-ma Betepage ra Betani ra aupise ie kiwasomai-ma iedi sabowa teibo ro. Taie nou ro netewa teibo kowasoro dubu teibo nato gimeiriai-ma ata sabowa to keba se ou ri. Taie nou ro ibo, 
‘Nitiro keba se dou-do edi sabowa ro neito, ba-dodoro-do sabowa goro to, nitiro ro iato amado-owea-ri orio doniki kainai kemobuai ama-otoi-ri. Nedi doniki kainai ro nou gimini ohu ato, ata dubu ata ro omidiro pua. Nitiro ro kowea ato ba-demopurutai-rido mo aboto neito ba-dowou-rido. 
Nitiro ata dubu ata ro nama-imodowa-mari, “Etou mabu rido emopurutai-do edi doniki kainai ro?” Ina ba-demowapotai-do ibo, “Nimo Abera Naramu ubi ie nou ro koworohuti.”’ 
Taie edi kowasoro dubu teibo ro keba se ioudo gasiriai-rido edi sabowa ro neito, iedi doniki kaini ro iato aise gowea-rido kemobuai na-gotoi. Iesu ro edi owera to gimowauti-ma, neitiro ro doniki kainai hodo to kemebuai kotoi se gatowamo-rido. 
Doniki namuturubi ro na-giwia-marimo kemopuruti moro ato, neio ro ibo, ‘E nitiro ro doniki kainai etou mabu rido emopurutai-do?’ 
Ina kowasoro dubu teibo ro ibo, ‘Neitiro neito Abera Naramu owera gabo modobo nou-diedo, nu ubi ie nedi doniki ro nou ro koworohuti.’ 
Taie neitiro ro edi doniki kainai ro imese gowaguwo-rido Iesu aboto. Neitiro ro na-gowateai-rido nou aboto, neitiro edi ohu sedo ro aise gipuruti-rido doniki gimini ato iato gisouti-rido. Taie Iesu neitiro ro aise gowia-rido doniki gimini ohu to, 
Ierusarema sabowa to imese godoro edi doniki ro neito. Ina arua kowasoro urubia ro na-gowea-rimo neio ibose ohu sedo aise gipuruti-rimo, taie keba gabo moro ato iato gisouti-rimo. 
Nu Ierusarema sabowa kowasomai aupise ie, ipi gabo ato Oribi Podo gawagogo ato kowasoro urubia sirio auna topira ro gorobu. Neio ro beda pupuwo korosa tanaro iaurititi-mo neio auna kamade ro nou ri giwati, neio ro auna ia se Godi iato gemowabu-rimo. 
Nimo Eputa Dubu nou se ie, Godi ro oro korosa ta-gomia, Abera Naramu pupuwo mutu oro nou se tou-die, korosa towamo oro abato. Adiri sabowa ato miro iato towamo-die, Godi ohu ato etu ro imidirotiti-die imese gebari pere ia ie! Nedi owera ro neio ro Iesu neito gemowabu-rimo. 
Arua Parasi urubia ro na-girorowai-rimo kowasoro urubia kiaiauti moro ato, neio ro ibo, ‘Kitamudiro dubu, oro kowasoro urubia dimadowerai! Modobo pua neio idaibo na-iaiauti-dumo!’ 
Iesu ro neio ibo gimowameai, ‘Nio mo ro imese nimowapotai, mo kowasoro urubia ro idaibo kiaiauti kemeserai rasiri ie, nadi ro ba-siaiauti-mo.’ 
Iesu Ierusarema sabowa aupiaupi na-gemowaititi, nou ro sabowa gebari na-gowea iato nou ro idobi se gememai. 
Nou ro ibo, ‘Mo imese auna ubi ro owamo abora nio ro umoro koi aboto ibo miro etou tanaro ro amadi-owou-ri. Kaupoti nio aboudo nedi tanaro ro abora ta-woropirowa. 
Auna ubauba tau nedi sabowa gebari ro nou ro ama-orobai-ri. Boso urubia ro amadime-emowaperai-ri, nadi amadimi-itomuti-ri neio kirarato moro ie. 
Ierusarema oro urubia mutu ubauba amadimo-owai-ri ata nakomu ata masiro ararasoro-ri pua, imese aise amadimo-opisiamuti-ri. Nedi tanaro sirio ro nou ri amadimo-ororosioidiro-ri, mabu Godi ia ro odoro-die nio ubauba aboudo iapopo ri, kaupoti nu nio ro mea se eibimai pua.’ 
Iesu edi kodoro ro na-godoro Tarena Moto kara goro to, nou ro nato namabu korowamade urubia sirio se giwia namabu gorowamade-rimo mani to. Taie edi urubia sirio ro nou ro ioudo aise gibodoidiro-ro. 
Nou ro ibo, ‘Tarena Buka ato owera ibo tiamo Mo moto owamo ibo Godi aboto kararatoro moto ie. Ina abora nio ro piro urubia koropiro moro to apoi-dumo.’ 
Iesu sirio saiki aise irohotiti Tarena Moto kara goro to urubia sirio nou ro aise itamudirotiti. Ina edi sabowa ro nato ta-irowomidirotiti Godi ra urubia ra turi turi awawo urubia, Mose sabi kitamudiro urubia, duriomoro kiauri urubia mutu. Neio ro Iesu kopia gabo nato gemosora-rimo, 
kaupoti nu neio ro kopia modobo pua. Urubia sirio nou abato aise iateidirotiti mabu neio auna ubi ro iamotiti nou owera kemowidiro aboto. 
