﻿Kobodorouti.
7.
Godi ra urubia ra turituri auna dubu ro Sitibini iato gemodowa, ‘Morobise ra? Oro ro idaibo sosoro ubauba owera a-iarotiti ra?’ 
Ina neio Sitibini ro ibo gimowameai, ‘Nio mo urubia ie, gare neito ma-demedea-rimo! Nimo morobise auna ia pupuwo Godi na-imidirotiti-die nimo nasa Aberaham nou aboto ta-gorowapotai. Aberaham Haran duriomoro to ido to gorowateai nou keba se Mesopotamia duriomoro ato imidirotiti Godi nato gorowapotai nou aboto. 
Godi ro ibo a-gutura Aberaham aboto, Oro koroto duriomoro, oro urubia, ba-dimeserai-ro. Mo ro edi duriomoro ro nama-emapoi-ri oro ito ba-dou iato ba-dimidirotiti. 
Taie Aberaham ro edi owera ro na-girorowai nou ro Mesopotamia duriomoro aise gemeserai imese gaimai Haran sabowa to. Aberaham Haran sabowa ato na-imidirotiti nou abera nato garaburai, ina nou Godi ro ioudo gemeiriai-ro neito nimo abora nedi duriomoro ro nato ti-norowomidiro. 
Godi ro Aberaham keba se otuputai pua ata goto kere ata nou ro karahidimai aboto, kaupoti hodo nou ro ta-gasaubiai-ro Aberaham aboudo nou ro ama-emohodowa-ri ata duriomoro nou merebusere, aramio, nasaio nou ia mutu neio korowomidiro aboto imese sirio tau. Nedi tau ro nato Aberaham ro ata mere besere ata arasomai pua. 
Godi ro ibo, Oro aramio merebusere ata duriomoro ato apira urubia sosoro ama-irowomidirotiti-ri. Duriomoro abeamio iato na-worowomidiro oro nasaio ro wisa tato woko amadimi-imesioidirotiti-ri neio abato, ina ubauba mino to amadimi-iworohuti-ri 400 kisimisi to. 
Godi ro ibose ta-garo, Oro nasaio nedi urubia ro neio ro amadimi-iworohuti-ri ubauba se, ina iedi urubia ro mo ro ubauba wisa neio aboto anama-iaiwo-ri. Ibose oro nasaio ro iedi muso duriomoro ro saro to nato amadime-emeserai-ri, mo ro neio nedi duriomoro ro neito anamadi-iwameai-ri, ina mo neio ro iato anamadime-emowabutiti-ri. 
Godi ro ibose ta-garo Aberaham aboto, “Imese dubu mere modobo ie dubu simara takamai kasiai kuriai, neitiro hodo ibo neremasaubiai-rido.” Ina Aberaham ro na-girorowai taie nou ro ioudo gatamuai-ro, nou mere Aisaki mamu ro na-goroto kaupoti woiki na-goroporeai dubu simara takamai na-gemasiai iato gemuriai. Taie iedi atu tanaro ro Aisaki ro dubu mere na-garasomai Iakobo, nou ro atu tanaro ibose to gosioidiro. Ina ibose Iakobo edi 12 dubu mere ro na-girasomo nou ro idaibo sosoro tanaro nou gisioidiro neio aboto. Io, iedi 12 urubia ro nimo nasaio gu neio aboudo irobu-die. 
Iakobo nou 12 dubu mere girasomai ina neio auna masawe ro iwatiti Iosepa aboto, taie nou nou ri gahodorai-rimo Isipi urubia aboto wisa tato woko iato isioidiro ri neio abato, kaupoti Godi nou mutu ta-idabutititi. 
Ibose nou Godi ro ta-owairiawadotiti-ro koko tanaro aboudo. Nou ro Iosepa mea muro kimaragoidiro ta-gomio, ina noudo ie Iosepa ro eputa dubu Pero auna kamade emowaitititi. Iosepa nou ro ohu to na-gowioidiro Isipi duriomoro ato, gabamani masiro nou ro aise gomia. Eputa dubu edi moto urubia sirio ro, nou aboto aise giapoi nou ro emeauri ri. 
Kaupoti Isipi ra Keineni ra duriomoro teibo ato auna sogoi tau ro gereredea saiki auna ia se itoititi pari ohona iato mea mino to isuwodutiti pua. Ina urubia iato na-irowomidirotiti iedi duriomoro teibo ro nato neio imese auna ia sogoi ro iwatititi. Taie Iakobo edi 12 dubu mere ro nimo nasaio ohona tato gorowomidiro. 
Kaupoti Iakobo ro na-girowai owera ibo Isipi duriomoro ato ohona modobo ato tiamo, urubia ro ioudo imade-dumo, taie nou ro neio iato gimeiriai ohona imade ri. Io neibi keba tau e ito na-gou-birimo Isipi duriomoro to. 
Ina ata tau Isipi to na-gorowameai-birimo Iosepa naramio aboto nato geremabowa ibo nou etu ra, ina Pero umoro nato goi ibo urubia neito na-woroho-dioumo iedi urubia ro Iosepa simara karima borubi ie. 
Taie Iosepa ro naramio iato gimeiriai nou abera Iakobo nou urubia mutu ou ri Isipi duriomoro to. Nedi urubia ro bame gou-rimo atu se, Iakobo mutu Isipi duriomoro to, imese 75 urubia neio ro gou-rimo. Neio iato na-irowomidirotiti Isipi duriomoro ato, Iakobo aise garaburai, ibose nou 12 dubu mere iato gorowaburo-rimo. 
Neio edi pamo durupi ro Sekemi sabowa to giwameai-rimo, Aberaham ro keba se beda bobo gomidai pamo durupi neito gibiti-rimo. Iedi bobo ro Sekemi sabowa ato na-owamo Aberaham ro gomidai mani to Hamo edi mere peteibi ro neibi aboudo. 
Godi ro keba ia se owera ta-garo Aberaham aboto ibo, “Mo ro Keineni duriomoro oro aramio nasaio neio aboto anama-aiwai-ri.” Io nedi tanaro ro kororosioidiro tau aupiaupi ro ta-gorobai. Ina nimo nasaio Isipi duriomoro ato na-gorowomidiro neio imese sirio ta-goi-rimo, womu tato 
ata orio eputa dubu na-gomi Isipi duriomoro nou ro giauri, ina nedi eputa dubu ro Iosepa ro keba se beda meamea tanaro isioidirotiti, orio eputa dubu ro aise iwaruriautititi, 
ibose nou ro nimo nasa naminami auna se isaubutititi. Ina ubauba tanaro isioidirotiti neio aboto, nou ro ta-gedea ata sabi bamuai kainakaina sapuwo to, neio iwosuwoduti ri goto ato iwotodo ri orowaburo ri, idaibo sosoro sabi nou ro nou gedea. 
Iedi tau ato gororosioidiro-rimo edi tanaro ubauba ro, Mose nato goroto mamu ro, nou imese mea ia mere ie, nou 3 sogomi to moto goro ato piro se owomidirotiti-do mamu ra abera ra ro. 
Neitiro ro Mose bamuai edi kowosuruwo ro na-gowosuruwo-rido nou aise gemeserai-rido, iato eputa dubu besere ro gou-ro nou ro na-gowea edi bamuai ro aise goumai-ro nou ro owoubuatiti, simara mere to aise gapoi. 
Mose auna na-goi nou Isipi urubia ro auna se atamudirotiti-mo nou tanaro kisioidiro mutu auna ia pupuwo ie ibose owera karo pupuwo ia ie. 
Mose 40 kisimisi ro na-gorobai nou ubi nato giedea simara Isiraere urubia kiraturiomai aboto. 
Nou edi tau ato gou ito, Isiraere dubu nou ro nato gowea Isipi dubu ro kado moro ato, nou aise girario edi dubu ro owairiai ri. Mose ro iedi Isipi dubu ro nou sapuwo to pamo se gesuai. 
Mose ro ta-gimaragoidiro ibo nou simara Isiraere urubia umoro amadimo-oi-ri ibo nou Godi ro neio iwairiai na gohodowa-die, kaupoti nou neio ro eibimai pua. 
Ata saiki na-gowaroho neio nou ro ina nato giraturiomai, Isiraere dubu teibo se giwia-ma karaberemo moro ato, nou neido na-girario nou ubi ie neitiro iwasiri-mari. Nou ro ibo, “Ibo orowati mamo nakaranakara se, naminiramio ibo korowati pua.” 
Kaupoti edi dubu ro gatamuai karaberemo Mose nou ro aise gohoiotai, nou ro ibo, “Dutu Isipi dubu oro ro pamo se na-gopia neito a-wararasoro ra, a? Auna to omidiro ri etu ro gaubai oro? Etu ro owapotai nimo oro ro kiauri? Oro ubi ibo a-owamo ra mo opia ri dutu beda sosoro gopia Isipi dubu?” 
Mose ro na-girorowai edi owera ro nou tere ri eputa dubu aboudo aise godau Midiani duriomoro to taie nou karaho iato goi, ina orobo iato aise gedea. Nou ro netewa teibo mere teibo girasomai-ma edi orobo ro nou abato. 
40 kisimisi saro gabo ato Godi sowake urio nato gorowapotai Mose aboto goto se duriomoro ato, Sinai podo gawagogo ato. Nou ro nato gowea ota ato era pina na-giriware-ro, nou a-giwagogorai iato kimaragoidiro ro gopia edi tanaro ro nou ro na-gowea. Era nou ro aupiaupi na-gemowaititi nou ubi ie mea se owea ri. Kaupoti ioudo nou ro owera kodu se girorowai na-gutura-ro, 
Mo Godi ie, oro nasa peteibi Aberaham, Aisaki ina Iakobo mutu mo neibi ro noti nemowabu-bimo. Mose iato aise gomugugurai nou ro aise kiauri modobo pua edi era ro na-giriware, nou tere ro gorobai. 
Abera Naramu ro ibo, Oro edi sairo pata teibo ro na-iroidiro-ma dipurutai-ma, nedi moro ato na-wotoi tarena ia goto ie. 
Mo ro simara idomari to ti-niaurititi mo urubia Isipi duriomoro ato neio temeteme iamo mutu woko na-isioidirotiti-dumo. Mo nou ri nororuo-die neio iapopo ri iedi ubauba ro nou aboudo. Mose, oro abora mo ro a-nemeiriai Isipi duriomoro to. 
Ina Godi ro iato gemeiriai atu dubu, Isiraere urubia ro edi na dubu na-ebeiouti-mo ibo, Auna to omidiro ri etu ro gaubai oro, a? Etu ro owapotai nimo oro ro kiauri? Kaupoti Godi ro Mose noti gohodowa-ro neio iauri na, iapopo na. Godi edi sowake urio ro, Mose aboto ota rido owera ioudo na-garo-ro, sowake urio nou mabu ato Godi ia ro gemeiriai-ro Mose owarebai ri, urubia nou ro ubauba komidiro moro rido ioudo iapopo ri, ina Isiraere urubia kiwaboi dubu to ararasoro ri. 
Mose ro Isiraere urubia Isipi duriomoro rido na-giwosuruwo-ro, Toketoke Oromo bara to na-giwateai-ro, ina ioudo goto se duriomoro to giwaboi-ro. Mose ro edi kiwaboi ro na-iwaboititi-ro 40 kisimisi maumo ato nou ro awawo korosa tanaro nedi duriomoro peteibi ro nato isioidirotiti. 
Mose ia ro Isiraere urubia ta-gimowapotai ibo, Godi ro nio ata ama-imohodowa-ri nou ipusu owera dubu to ararapoi ri mo beda sosoro ra. 
Mose ro gidabuai nimo nasa naminami goto se duriomoro ato. Ina Godi sowake urio owera kodu Mose ro nato gemororowai Sinai podo ohu ato. Taie Godi ro womu tato keremiro kimio owera nimo Isiraere urubia sapuwo to Mose aboto nou ro nato gaiwai-ro. 
Kaupoti nimo nasa naminami neio ubi tato goi-rimo Mose edi owera ro nou kirowidiro aboto. Neio ro Mose a-webeioutiti-mo, neio ubi a-iamotiti Isipi duriomoro to korowameai. 
Ina nou mabu ato gemowapotai-rimo Eroni neio ro ibo, “Nimo ota titi orora dimesioidiro-ro, nimo keba to neibi ro anamabimi-iwaboioidirotiti-ri. Nimo edi dubu ro na-niwosuruwo-ro Isipi duriomoro rido, nimo umoro pua etou tanaro ro gororosioidiro nou aboto. Iedi dubu ro otou na owati?” 
Iedi tau ro nato neio ro iato gosioidiro-rimo burumukau ota titi sosoro, iato dao neio ro iato gemematowo-rimo nou sapuwo to, neio auna kamade ro giwati edi tanaro ro na-gisioidiro-rimo. 
Ina neio edi tanaro ro nou isioidiro moro ato Godi ro na-giwia-ro neio nou ro huru se gimowou-ro. Neio huru edi kimowou ro na-gimowou-ro neio ro iato gatamuai-rimo saiki, sogomi, kiboni neio kimowaibiti. Godi ro ibo gutura, keba se nedi owera ro nou ipusu owera dubu Eimosi nou ro ta-gisioidiro ibo, Edi 40 kisimisi ro nato nio goto se duriomoro ato na-wirohotiti-mo, nio meamea nakomu mo aboto a-iaiwotiti-mo ra, a? E e, iaiwotiti pua. Ina ibose dao mo ia aboto nio ro emematowotiti pua. Nio ro nedi tanaro ro isioidirotiti pua mo aboto, 
orora dubu Moreki parai moto mutu na-oworohutiti-mo nou emowabutiti-mo. Ina ibose kiboni orora Repani nio ro ta-emowabutiti-mo. Edi ota titi ro na-gisioidiro-rimo neio gimowabu-rimo. Ina abora nou rie nio orowomidiro-ri pua nedi mea duriomoro ro nato, nio neido mo ro anama-imabodorai-ri muso duriomoro to masiro Babironia, ina ata sapuwo nio ubauba keremiro to iato ama-irowomidiro-ri. 
Godi ro Mose ibo gotomudiro, “Mo edi tarena parai moto ro idaibo sosoro muro to nio ro neito ba-dosioidiro-mo.” Ina neio ro edi mino ro neito gosioidiro-rimo. Ina nimo edi nasa naminami ro goto se duriomoro ato na-irohotiti-mo, iedi tarena parai moto ro neio ro nou oworohutiti-mo moro gabogabo. 
Ina ibo irowomidirotiti saro to Godi ro edi duriomoro urubia ro nato iwagareawadotiti-ro, taie nimo nasa naminami Iosua ro nato iwoutiti-ro edi orio duriomoro ro neito. Neio ro edi na parai moto ro na-gimowameserai-rimo orio duriomoro to nou mutu godoro-rimo womu tato Deibidi eputa dubu to ti-gomi. 
Deibidi edi tau ato na-gomidiro eputa dubu to Godi auna kamade ro owatititi nou aboto. Nou ro Godi nato gemodowa ibo, “Oro Godi ie Iakobo ro na-emowabutiti. Modobo ra oro Tarena Moto mo ro kemidi?” 
Kaupoti Tarena Moto Deibidi ro ididi pua, nou ro edi mere ro na-garasomai Soromoni, Tarena Moto nou ro gemidi. 
Kaupoti Godi ohu ia ato na-omidiro-die urubia dubu ro tu to kididi moto nou nato komidiro pua. Ina Godi ipusu owera dubu Aisaia ro ibo ta-garo, 
Abera Naramu ro ibo, Mo komidiro moro ie Adiri Sabowa, mo ro ioudo niauri-die. Mo sairo teibo sopu duriomoro ato niwotoititi-ma. Mo beda sosoro moto namadime-emidi-ri nio ro? Mo komidiro moro ata ata ro kemesioidiro modobo pua. 
Mea se dimaragoidiro-mo, imese namabu sirio mo simara pupuwo to mo ia ro nisioidiro.’ 
Ina Sitibini ro owera aise gemogu nedi awawo urubia ro neio aboto, ‘Nio imese akau ia urubia ie, nio eputa koko ia ie, nio gare tato ia ie. Nio niro turi Godi aboto morobise to iaiwai pua, nio ro nu owera irowidiro-ri pua idaibo. Tarena Urio nio aramio negenege, nasaio ro beda sosoro emoputiti-mo, ina abora nio ro ibo emoputi-dumo. 
Keba ia tau ato Godi imese ipusu owera urubia sirio na-imeiriotiti-ro nio aramio negenege, nasaio neio ro ubauba ia se iworohutiti-mo. Godi ipusu owera urubia ro nio nasaio ta-imowautiti-mo ibo ata mea dubu amadi-ou-ri, kaupoti nedi urubia ro na-imowautiti-mo nio nasaio ro giopiauti-rimo. Ina dutu ata nedi mea dubu ro nio ro noti gapoi-dumo ina iato gesuai-dumo. 
Mose edi sabi sirio ro Godi edi sowake urio ro Mose aboto neio ro giaiwai-rimo, ina abora nio abato tiamo. Kaupoti nio ro ibodoro pua!’ 
Sitibini ro edi owera ro gimowauti Iu eputa urubia neio auna serawo goi-rimo kimegege se girarowo-rimo nou aboto. 
Edi tau ro nato Sitibini Tarena Urio ro goworohuti. Nou toboro to na-girarowea, nou ro Godi edi woroworo ro nou se gowea, ina Iesu tumodi sapuwo ato gotoi-ro. 
Nou ro ibo, ‘Mo na-nirarowea Adiri magere ta-worodobura-ro Imese Urubia Kiauri Dubu Godi tumodi sapuwo ato totoi-die.’ 
Ina Iu eputa urubia ro edi owera ro na-girorowai-rimo, neio gare aise geremoputi-rimo. Kai diamo mutu iato gorowaberai-rimo Sitibini aboto nu neio ro aise gohiai-rimo, 
imese gomudo-rimo sabowa rido amede daimo to, iato nadi to aise gobo-rimo. Nou masiro etio ro gowai-rimo ubauba, neio ohu namabu na-gipuriti-rimo, orio dubu masiro Sauro nou sairo mabu ato giaremuti-rimo. 
Sitibini neio ro nadi to na-gobo-rimo karaburai aupiaupi ro gowamo-ro nou ro ibo, ‘Abera Naramu Iesu, mo urio dememidai-ro.’ 
Taie iato nou kauhio to aise gorodiriti. Nou ro ibo auna se, ‘Abera Naramu oro ro neio aboto emowamedei ate neio ro etou ubauba osioidiro-diomo mo aboto, ba-dimatopeamuti.’ Iato nou aise garaburai. 
