﻿Kobodorouti.
15.
Arua urubia Iudia duriomoro rido giodori-ro Entioko sabowa to, neio ro Iu owera karo tato urubia Iesu edi urubia ro na-gowasoro-rimo owera ibo gimowauti-rimo, ‘Nio ro modobo pua kimibiria kawakawa se kiworohuti, nio Godi ro ubauba aboudo nato iapopo-ri pua, womu tato nio dubu simara takamai kiwasio kiworiouti, Mose ro beda sosoro itamudirotiti.’ 
Nedi owera ro Pauro ra Banabasi ra ro na-girorowai-rido neitiro auna ubi tato goi-rido. Neitiro neio mutu auna ia owera to gorowati-rimo. Iesu patu urubia ro owera iato gisioidiro-rimo ibo, modobo ie Pauro ra Banabasi ra nimo ro Ierusarema sabowa to kimeiriai-ma arua kimibiria urubia mutu. Iesu kitiodorai urubia, Iesu urubia etio ro emeauri-dumo Ierusarema sabowa ato na-orowomidiro, neio mutu nedi owera ro atu se mea mino to emotuputi rie. 
Iesu patu urubia ro neio iato gimeiriai-rimo Ierusarema sabowa to, neio Ponika ra Samaria ra duriomoro teibo to aise godoro-rimo, sabowa iato na-giamo neio iato ta-garaperewado-rimo. Kimibiria urubia iato na-gorowomidiro erere sabowa ato Pauro ra Banabasi ra ro neio iato gimowauti-rido Iu owera karo tato urubia beda sosoro gerewesegere-rimo morobise Godi aboto. Kimibiria urubia ro nedi owera ro na-girowidiro-rimo, neio auna kamade ro giwati. 
Pauro ra Banabasi ra edi urubia mutu gou-rido neio Ierusarema sabowa to na-gorowateai-rimo, Iesu kitiodorai urubia ro, Iesu urubia etio ro emeauri-dumo, Iesu urubia mutu nedi urubia sirio ro neio ro aise giramairiai-rimo. Neitiro ro neio iato gimowauti-rido ibo Godi ro beda tanaro gisioidiro neitiro Iu owera karo tato urubia abato na-irohotiti-do. 
Kaupoti arua Parasi urubia Iesu edi urubia ro na-gowasoro-rimo neio aise girerubua-rimo owera mutu. Neio ro ibo, ‘Iu owera karo tato kimibiria urubia neio modobo pua kimibiria se kiworohuti. Neio modobo ie dubu simara takamai kiwasio kiworiouti, ibose Mose edi sabi sirio ro neio ro modobo ie aise kibodoro.’ 
Iesu kitiodorai urubia, Iesu urubia kemeauri urubia mutu neio nakara se iato garadabuai-rimo nedi owera ro emotuputi ri. 
Neio tuturu tau to geremowagomea-rimo. Taie, Pita aise geribuwa, nou ro ibo, ‘Naminiramio, nio umoro ta-goi-rimo mo Godi ro nio soirio maumo rido keba se nohodowa, Iu owera karo tato urubia imowauti ri mea owera Iesu sapuwo to. Neio ro nedi mea owera ro ta-girorowai-rimo mo aboudo, neio iato aise gimibiria-rimo. 
Imese urubia Godi ro kimaragoidiro timeaurititi-die, ina nedi kimowauti owera ro etio ro gimibiria-rimo neio Godi ro aise gimaidodorai-ro. Godi ro Tarena Urio keba se beda mino to gemeiriai-ro nimo aboto, nou ro atu sosoro tanaro nou gosioidiro-ro neio aboto. Nou ro idaibo mino to gowawea-ro ibo neio nou ro ta-gimaidodorai-ro. 
Godi ro kiauri maumo ato nedi urubia ro ata kemeteruti tato ie neio nimo mutu atu sosoro ie. Neio na-gimibiria-rimo Godi ro neio niro turi edi tau ro nato mareamarea tato aise gimowai. 
Ina noudo ie abora mabu boira Iu owera karo tato urubia nio ro mibo na-imotomo-dumo? Godi gabo nio ro a-owasiouti-dumo ra? Atu sosoro mibo nimo nasa naminami nimo ia mutu kiratidiro modobo ra? 
Kaupoti nimo Iu urubia kimibiria tiamo ibo, Abera Naramu Iesu edi wisa tato nirimagare ro nimo Godi ro neito se anamadi-iapopo-ri. Ina Iu owera karo tato urubia neio ibose ie Abera Naramu Iesu edi wisa tato nirimagare ro neito amadi-iapopo-ri.’ 
Pita owera karo na-goporeai taie Pauro ra Banabasi ra aise giriribua-rido owera mutu. Urubia sirio imese owera tato gorowomidiro neitiro owera gare se gimedea-marimo. Neitiro ro urubia neito gimowauti-rido Godi ro beda pupuwo korosa tanaro gisioidiro Iu owera karo tato urubia ro iauri ri. Iedi pupuwo korosa tanaro ro Godi pupuwo to neitiro ro durupi to nou gisioidiro-rido. 
Pauro ra Banabasi ra neitiro owera karo na-goporeai-rido, taie iato Iemisi ro gotobowa nou ro ibo, ‘Naminiramio, owera mo aboto neito dirowidiro-rimo! 
Nimo Saimoni Pita ro beda owera to nimowapotai-die abora, io morobise ie nou keba tau e Godi ro idaibo sosoro nirimagare nou gowawea-die Iu owera karo tato urubia aboto. Neio aboudo nou ro amia urubia ta-gihodowa nou urubia to ararapoi ri. 
Ina idaibo sosoro owera tiamo Godi ipusu owera urubia ro keba se nou gisioidiro-rimo. 
Abera Naramu ro ibo, Eputa dubu Deibidi sapuwo rido ama-otoi-ri nu idaibo anama-emabuti-ri. Nu moto ta-geresebuti, kaupoti saro gabo ato mo anamadi-orowameai-ri, nu moto mo ro mea se anama-emowotobowa-ri, ibose keresebea moro anama-emodomo-ri. 
Ina noudo ie erere duriomoro urubia mo neio ro anamadimo-osora-ri. Neio mo ro keba se na-nirapoi, neio mo urubia ie. Abera Naramu ro nedi owera ro ibo garo-ro. 
Nou ro nedi owera ro keba ia se gowapotai-ro.’ 
Ina Iemisi ro owera ibo gemoguai, ‘Ina noudo ie mo ibo nimaragoidiro Iu owera karo tato urubia na-erewesegere-dumo Godi aboto, modobo pua nimo ro neio mibo kimotomo. 
Modobo ie nimo ro neio peba titi se kimesioidiro, ibo modobo pua nedi tanaro peteibi ro neio ro nou kisioidiro-ibi. Orora aboto beda ohona kiedea ra neio ro modobo pua kiho. Mabu orora aboto ohona kiaremo ato iedi ohona ro ubauba neito aise kiwai ie. Upo tanaro neio ro kisioidiro modobo pua. Ibose dao karima mutu iho mamo, idaibo urubia ro hodo to na-iopiauti-dumo, karima keba se kosuputi modobo ie. Iu owera karo tato urubia Iesu na-owasoro-dumo neio ro nedi sabi peteibi ro Mose sabi maumo ato na-iamo-ibi neibi se ba-mimaragoidirotiti-bimo. 
Mabu Mose edi sabi ro keba ia se gatamuai-rimo sabowa gabogabo ato na-itamudirotiti-dumo. Ina abora komidiro saiki gabogabo ato neio ro Iu urubia karadabu moto ato neito aise imoputiti-dumo.’ 
Iesu kitiodorai urubia, Iesu urubia etio ro emeauri-dumo, imese Iesu patu urubia, neio atu se owera na-geremowauti-rimo neio ro ibo, ‘Modobo ie nimo aboudo arua urubia kimeiriai Pauro ra Banabasi ra mutu ama-iodori-ri Entioko sabowa to.’ Taie neio ro nato giaubai-marimo netewa teibo dubu teibo Iudasi abera masiro Sabasi, ina ata dubu Sairasi, neitiro mea dubu teibo ie kimibiria naminiramio sosoro gabo ato. 
Neio ro peba titi aise gisioidiro-rimo neitiro neio ro nou mutu gimeiriai-marimo Entioko sabowa to. Ina peba ato nedi owera ro neio ro giamo. ‘Nedi peba titi owera ro Iesu kitiodorai urubia, Iesu urubia etio ro emeauri-dumo nedi peba ro nimo aboudo ie. Nimo nio urubia ie. Nio Entioko sabowa ato na-orowomidiro, Siria ra Sirisia ra duriomoro teibo ato na-orowomidiro, nio Iu owera karo tato urubia Iesu etio ro owasoro-dumo kamade owera nemeiriai-dumo nio aboto. 
Nimo ro owera keba se ta-nirorowai-rimo ibo, nimo aboudo arua urubia piro se ito ta-gou-dumo ata kitamudiro mutu urubia neito gitamudiro-dumo. Ina nio neio ro kamade tato neito giwai-rimo. Kaupoti nedi urubia ro neio nimo ro itiodorai pua idaibo tanaro isioidiro ri. 
Nedi tau ro nato nimo kaupoti kimaragoidiro niwia-dumo arua urubia nio aboto imeiriai ri Pauro ra Banabasi ra mutu ou ri. Nedi dubu teibo ro nimo namutuna teibo ie, 
Abera Naramu Iesu Keriso edi sowake ro na-irohotiti-do, neitiro keremiro aise iatowotiti-do. 
Ina Iudasi ra Sairasi ra nou mabu ato nimeiriai-madumo Entioko sabowa to Pauro ra Banabasi ra mutu atu se ou ri. Neitiro simara durupi to amado-ou-ri nedi atu owera ro neitiro ro nou amado-orowauti-ri nio aboto. 
Tarena Urio nimo mutu atu se ibo nimaragoidiro-dumo nimo ro nio arua mibo ohu rido imotomo-ri pua. 
Modobo ie nio ro nedi sipu tato tanaro peteibi ro nou se kibodoro-ibi. Orora aboto beda ohona kiedea ra nio ro modobo pua kiho. Ibose dao karima mutu iho mamo, idaibo urubia ro hodo to na-iopiauti-dumo, karima keba se kosuputi modobo ie. Ina ata owera nou e, upo tanaro nio ro kisioidiro modobo pua. Nio ro nedi tanaro peteibi ro kisioidiro-ibi tato, nio mea se ama-irowomidiro-ri. Nimo aboudo owera nou se ie. Iawo.’ 
Iedi dubu peteibi ro Ierusarema sabowa na-gemeserai-birimo imese giodori-ibiro Entioko sabowa to. Taie Entioko sabowa ato Iesu patu urubia neibi ro atu moro to na-gidabuai-birimo neibi ro nedi owera ro iato aise gaiwai-birimo neio aboto. 
Nedi peba titi ro na-gimoputi-rimo, neio ro kamade mutu gomidai-rimo, mabu nato mea pupuwo kimowaititi owera ro giamo. 
Iudasi ra Sairasi ra neitiro ibose Godi ipusu owera dubu teibo ie, neitiro ro sirio owera kimibiria urubia neito gimowauti-rido neio kimibiria pupuwo kimowaititi aboto. 
Iudasi ra Sairasi ra egea mere se ta-gomidiro-rido Entioko sabowa ato. Taie neitiro kimibiria urubia ro ioudo mea miro mutu aise gitiodorai-marimo, keba se edi urubia ro gitiodorai-marimo neio aboto gorowameai-rido. 
Isana Pauro ra Banabasi ra Entioko sabowa ato na-gomidiro-rido amia kimibiria urubia mutu, neio ro atu se urubia mea owera ta-imowautiti-mo, ibose neio ro owera Abera Naramu sapuwo to urubia neito ta-itamudirotiti-mo. 
Pauro ra Banabasi ra arua saiki ta-giporeai-rido Entioko sabowa ato komidiro. Taie Pauro ro ibo Banabasi aboto, ‘Neitiro keba se beda sabowa to nirohotiti-do Abera Naramu owera na-nimowautiti-do, neito anamado-orowameai-ri neio anamadi-iraturio-ri. Kimibiria urubia iato na-orowomidiro neio beda mino to hato orowomidiro.’ 
Banabasi ubi a-gowamo neitiro ro Ioane adabuai ri nu ata masiro Mareko neibi atu se ibo oroho rie. 
Kaupoti Pauro ro inaina aise garowado, ‘Marasio nou adabuai-ri pua! Neibi keba se atu se na-noroho-birimo, neitiro nou ro Pampiria duriomoro ato aise nibedidiro-maro.’ 
Taie neitiro nedi dubu ro nou sapuwo to auna owera to gorowati-rido, ina nou mabu rido ie neitiro aise gorohodowa-rido. Banabasi ro Ioane ata masiro Mareko nou ro gadabuai, neitiro ibo giabu-rido Saiporasi ura to. 
Wisana Pauro ro Sairasi gadabuai. Taie Entioko sabowa kimibiria urubia atu moro to na-garadabuai-rimo, Pauro neio ro Abera Naramu wisa tato nirimagare ato gedea-rimo nou ro owarebai ri. Taie neitiro atu se imese gasiriai-rido 
misinare aimara Siria ra Sirisia ra duriomoro teibo to, iato irohotiti-do. Pauro ro Iesu patu urubia iato na-gorowomidiro erere sabowa ato neio kimibiria pupuwo nou ro aise gimowaititi. 
