﻿Kobodorouti.
16.
Pauro Sairasi mutu Debe ra Risitira ra sabowa teibo to na-gou-rido, neitiro ro Iesu kowasoro dubu ata iato gowea-rido. Nu masiro Timoti, mamu Iu orobo ie ina edi orobo ro kimibiria orobo ie, kaupoti nu abera Iu dubu pua. 
Ina kimibiria urubia Risitira ra Ikoniam ra sabowa teibo ato na-gorowomidiro neio auna ubi ie Timoti aboto. 
Pauro ubi ie Timoti kadabuai misinare aimara nou mutu koroho, kaupoti Iu urubia sirio iato na-gorowomidiro neio umoro ie ibo nu abera Iu dubu pua, Giriki dubu e. Taie iato Timoti simara durupi takamai Pauro ro aise gowasiai iato guriai, Iu urubia ro nu kemaidodoro aboto. 
Ina nu Pauro ro aise gadabuai neibi sabowa gabogabo misinare aimara iato goroho-birimo. Ierusarema sabowa rido kitiodorai urubia ina Iesu urubia etio ro emeauri-dumo neio ro beda peba titi gimeiriai-rimo, nedi owera ro urubia neibi ro neito gimowauti-birimo neio ro mea se kibodoro aboto. 
Taie nedi owera ro na-girorowidiro-rimo, Iesu urubia erere sabowa ato na-gorowomidiro neio kimibiria pupuwo neibi ro neito gimowaititi-birimo. Saiki gabogabo kimibiria urubia sirio aise oititi-mo. 
Pauro edi urubia mutu na-goroho misinare aimara, Tarena Urio ubi tato goi neibi ro Eisia duriomoro ato kimowauti mea owera Iesu sapuwo to. Ina nou rie neibi Piridia ra Gereisia ra duriomoro teibo neitiro turituri ato godoro-birimo, ina ioudo aise gimobodiai-bi Misia duriomoro to. 
Neibi ioudo na-gou-birimo Misia duriomoro sobea korobai aupiaupi, neibi ubi ie Bitinia duriomoro to odoro ri. Kaupoti neibi ioudo Iesu edi Tarena Urio ro nou ro gitowerai-biro, 
Misia duriomoro aise gorohodorai-birimo imese giodori-biro Torowasi sabowa to. 
Taie iedi duwo ro nato Torowasi sabowa ato, Pauro ro hiwo to nato giauri Masedonia dubu nu a-gotoi. Nou ro Pauro hiwo to aise gemagege-ro ibo, ‘Oro Masedonia duriomoro to nimo iwarebai ri neito dabu-ro!’ 
Iedi hiwo ro nou saro gabo ato, neibi iato gabo niosora-birimo ito kiabu aboto. Neibi umoro ta-noi-birimo ibo Godi ubi ie neibi ito kiabu Masedonia duriomoro to neio imowauti ri mea owera Iesu sapuwo to. 
Neibi ro Torowasi sabowa na-nemeserai-birimo, imese niabu-birimo Masedonia duriomoro to sawa pe to. Iedi sawa pe ro ibose to gapere-ro, Samoteresi ura gare mata to gaudurai, imese gabu-ro womu tato ata kowaroho neibi nato norowateai-birimo Orio Sabowa to. 
Neibi Orio Sabowa rido sairo to nidiai-birimo Piripai sabowa to. Piripai sabowa ato Roma urubia iato wirowomidirotiti. Nou ata auna sabowa ie Masedonia duriomoro ato, ina neibi iato ta-nomidiro-birimo arua saiki to. 
Iu urubia komidiro saiki na-gorobai, kaupoti Iu karadabu moto iato otoi pua. Neibi ro kimaragoidiro to nowea-birimo ibo oromo bara mea karadabu moro ie, Iu urubia Godi aboto iato iraratorotiti-dumo, neibi iato imese nosuruo-birimo sabowa goro rido oromo bara to. Neibi ro iato arua mamio se niwia-birimo neio a-gorowomidiro, taie neibi neio aboto aise naradabuai-birimo, neibi ro neio owera iato nimowauti-birimo. 
Iedi mamio ro neio abato ata orobo iato ta-gomidiro, nu masiro Ridia, nu Taiatira sabowa rido gou-ro. Nu ata besinisi orobo ie, nou aboudo karimakarima sosoro obotama urubia ro auna mani to imadetiti-mo. Nu Iu orobo pua, kaupoti Godi nou ro emowabutiti. Pauro ro edi owera garo nu kimaragoidiro Abera Naramu ro aise gemodobura kimibiria aboto. 
Ridia moto ato edi urubia ro na-gorowomidiro, nu ia mutu obo to kiwarumiauti na-goroporeai, neibi nou ro iato nimagege-ibiro ou ri nou moto to. Nou ro ibo, ‘Nibi ibo na-imaragoidiro-bimo mo morobise kimibiria orobo ie, nibi mo moto ato aise ba-domidiro-bimo!’ Taie neibi ioudo aise nou-birimo Ridia moto to. 
Ata saiki neibi na-nou-birimo kararatoro moro to, neibi iato ata wisa tato woko besere ro niwia-ibi. Iedi besere ro nou abato ata sosoro urio ro imidirotiti, urubia umoro tato tanaro nou umoro koi ie, iedi urio ro nu nou ro emasoutiti-ro. Nou ro auna mani iaurititi iedi tanaro ro nou sapuwo to, ina iedi mani ro nou eputa urubia ro imadetiti-mo. 
Neibi na-nou-birimo Pauro mutu, saro rido iedi besere ro nou ro aise nibodoro-ibiro. Nou ro idaibo owera giaiauti, ‘Nedi dubu peteibi ro Auna ia Godi ohu ia ato na-imidirotiti-die neibi nou sowake dubu peteibi ie! Neibi ro nio imowauti-bimo ibo nio Godi ro kiapopo gabo boido aidiro-die!’ 
Sirio tau nedi besere ro idaibo tanaro nou isioidirotiti, nu idaibo sosoro na-irowautititi, Pauro nou ro masawe emowaitititi. Pauro aise gerewesegerai iedi besere ro nou aboto, nou ro ibo urio aboto, ‘Iesu Keriso edi pupuwo ro neito oro mo ro a-nemowapotai ioudo dosuruwo-ro!’ Taie iedi besere ro urio ro aise gemeserai. 
Ina nu eputa urubia na-geremasibai-rimo ibo, ubauba urio ta-waraseperai iedi besere ro nou aboudo, neio mani kiauri gabo ibose to gararaseperai. Taie neio ro Pauro ra Sairasi ra aise girobai-marimo, imese gimudo-marimo koto kiauri dubu teibo aboto. Sabowa urubia beda moro ato iradabutiti-mo koto kiauri dubu teibo iato gomidiro-rido. Neio ro ibo, ‘Nedi dubu teibo ro Iu dubu teibo ie. Urubia nedi sabowa ro nato neitiro ro igediouti-do! 
Neitiro ro ata sosoro kitamudiro iworohuti-do, ina nimo Roma urubia modobo pua idaibo tanaro nou kibodoro!’ 
Taie koroho kawa urubia sirio na-garadabuti-rimo, iedi dubu teibo ro ubauba owera to iato gimaro-marimo. Neitiro kiroidiro namabu Roma koto kiauri dubu teibo ro iato giwabuti-marido, ina neitiro owera to Pauro ra Sairasi ra amia urubia ro ubauba mino to gonopu to iato giado-marimo, 
taie dibura to aise giedea-marimo. Neio ro ibo dibura kiauri dubu aboto, ‘Nedi dubu teibo ro mea se ba-dimowotoi-ma!’ 
Nedi dibura kiauri dubu ro nedi koko owera ro na-girorowai, neitiro nou ro aise giwodoro-ma ibi gugu ia to. Nou ro neitiro sairo ota goro to iato gimowodouti-ma koko ia ti-gimowaititi-ma. 
Duwo turi korobai aupiaupi Pauro ra Sairasi ra Godi aboto gararatoro-rido, ibose Godi kemowabu ohare iato gemabodo-rido. Neitiro ro edi kemabodo ro na-gemabodo-rido borubi dibura urubia ro gare se gimedea-marimo. 
Neio auna ia sopu momuruwo ro gimabuwo-ro, iedi dibura moto gebari ro aise goromuruwouti. Dibura moto magere damo sirio imese aise gorodobuti-rimo. Ina dibura urubia aboudo anikapo nakara se aise geremapoduti-rimo. 
Taie dibura kiauri dubu norou aboudo na-geribidiro-ro, nu auna tere ro gorobai mabu magere nou ro kiaidiro se giwia. Nu ibo a-gimaragoidiro dibura urubia imese ta-wosuruwo-mo. Taie iato nu giri sipi rido se geremaubai, nu ubi ie nakara se ororopia ri. 
Kaupoti nu Pauro ro na-gowea-ro ioudo giaia-ro, ‘Ei urubia dubu, idaibo tanaro osioidiro ate, oro nakara se ororopia ate! Nimo ata osuruwo pua neido, momuo se nato ti-norowomidiro.’ 
Taie dibura kiauri dubu ro ata dubu aboto iato gutura pina owou ri. Nu auna ia tere ro gorobai, soro aise gorowamaro-rimo Pauro ra Sairasi ra aboto na-godoro neitiro sairo mabu ato egenabo gomi. 
Nou ro Pauro ra Sairasi ra ibi gugu rido aise giwosuruwo-maro. Taie nou ro ibo, ‘Auna dubu teibo, mo ro beda tanaro anama-osioidiro-ri mo Godi ro ubauba aboudo kapopo aboto?’ 
Ina nu Pauro ra Sairasi ra ro ibo gemowameai-rido, ‘Oro modobo ie Abera Naramu Iesu edi mea owera ro ba-dimibiria, ina oro, moto urubia mutu Godi ro nato amadi-iapopo-ri.’ 
Taie Pauro ra Sairasi ra ro neio Abera Naramu edi mea owera ro nato gimowauti-rido. 
Iedi atu tau ro nato dibura kiauri dubu ro neitiro iato girobai-maro ata moro ato ikoni kainakaina imowiouti-ma ri. Iato tuturu to eremasebidiro pua nu moto urubia mutu neio neitiro ro obo to aise giwarumiauti-rido. 
Obo to kiwarumiauti saro gabo ato, Pauro ra Sairasi ra dibura kiauri dubu ro aise giwou-ma nou simara moto to ohona iato gimesioidiro-ma. Nedi dibura kiauri dubu ro nu urubia mutu neio auna kamade ro giwati mabu neio Godi owera ta-gimibiria-rimo. 
Ata kowaroho Roma gabamani dubu teibo ro pesomani dubu peteibi nato gimeiriai-birido dibura kiauri dubu aboto. Neibi ro ibo, ‘Pauro ra Sairasi ra dibura rido ba-mosuruwo-rido!’ 
Taie dibura kiauri dubu ro Pauro ibo gemowapotai, ‘Roma gabamani dubu teibo ro owera ibo emeiriai-diodo nitiro osuruwo ri dibura rido. Nitiro mo ro abora neido a-nimeiriai-ma, mea muro to ba-dosuruwo-do.’ 
Kaupoti Pauro ro ibo pesomani peteibi aboto, ‘Nibi umoro ra neitiro Roma dubu teibo ie? Neitiro neio ro keba se koto aboto iwou-ma pua, urubia sirio sosoro gabo ato neio ro mabu tato moro ato niado-madumo, ina dibura to iato niedea-madumo. Neio ubi ra neitiro piro se imeiriai-mari? Etu ra aro! Koto kiauri dubu teibo neitiro ia ro se ba-mou-rido, neitiro iwosuruwo-ma ri dibura rido.’ 
Pauro ro beda owera garo pesomani dubu peteibi aboto, gabamani dubu teibo iato gimowapotai-mabirimo. Neitiro ro na-girorowai-rido ibo Pauro ra Sairasi ra Roma dubu teibo ie, koto kiauri dubu teibo auna tere ro girobai-ma. 
Taie neitiro nirimagare owera mutu iato gou-rido Pauro ra Sairasi ra aboto, neitiro gabamani dubu teibo ro aise giwosuruwo-marido dibura rido ina iato gimagege-marido iedi sabowa ro emeserai ri. 
Neitiro ioudo na-gosuruwo-rido aise gimobodiai-ma Ridia moto to. Kimibiria urubia sirio ta-garadabuti-rimo nou moto ato, taie neitiro ro neio kimibiria pupuwo iato gimowai-rido. Taie neitiro ro Piripai sabowa aise gemeserai-rido. 
