﻿Kobodorouti.
25.
Pesitasi gabamani to edi tau ato na-gomi nou ro 3 saiki se giporeai-bi Siseria sabowa ato komidiro, taie nu ioudo imese gidiai-ro Ierusarema sabowa to. 
Godi ra urubia ra turituri awawo urubia, Iu awawo urubia mutu iato ta-garadabuti-rimo Pauro neio ro Pesitasi aboto nato gowapotai-rimo. 
Neio ro Pesitasi iato gararatoro-rimo ibo, ‘Oro ro modobo ra nimo edi ubi tanaro ro nou kosioidiro? Modobo ra Pauro oro ro neito kemeiriai koto owera nato aro ri Ierusarema sabowa ato?’ Kaupoti Pauro Iu urubia ro sowake ta-gemedea-rimo ipi gabo ato opia rie. 
Iu awawo urubia Pesitasi ro ibo gimowameai, ‘Pauro Siseria sabowa ato ibose to ama-omidiro-ri, nu mo ro emeiriai-ri pua neito. Mo aupise ie korowameai Siseria sabowa to. 
Ina nio edi awawo urubia ro modobo ie nato karadabuai mo mutu atu se anama-iodori-ri Siseria sabowa to. Iedi tau ro nu nio ro nato amadimo-owapotai-ri mo aboto. Nou ro morobise to ubauba tanaro na-gosioidiro nio ro nu koto ato nato kowapotai modobo ie.’ 
Pesitasi Ierusarema sabowa ato ta-gomidiro 8 o 10 saiki to, taie iedi saiki nou ro na-giporeai nou iato aise gorowameai-ro Siseria sabowa to Iu awawo urubia mutu. Ina ata saiki na-gorobai Pesitasi koto sea ato imese gomi, owera iato gemeiriai Pauro owou ri koto aboto. 
Pauro edi tau ato na-gorowateai-ro koto aboto, edi Iu awawo urubia ro na-gou-rimo Ierusarema sabowa rido Pauro neio ro ta-gemowaperai-rimo turi ato imese gotoi. Taie neio ro iato gowapotai-rimo, ‘Nedi dubu ro sirio awawo sabi nou ro ta-isebotiti.’ Kaupoti neio ro modobo pua mea se kowawea ibo nou ro morobise to sabi ta-isebotiti. 
Iedi koto ro nou abato Pauro ro neio owera aise giaudurai nu nakara se koko sopu to kotobowa sapuwo to. Nou ro ibo, ‘Mo ro ata ubauba ata osioidiro pua, Iu urubia sabi ata mo ro esebea pua. Tarena Moto sapuwo to mo ro ata sabi ata esebea pua, ibose Gabamani dubu Sisa edi sabi ata ro mo ro esebea pua.’ 
Kaupoti Pesitasi ubi ie Iu urubia kamade kiwai aboto. Pauro nou ro nato gemodowa, ‘Oro ubi ra Ierusarema sabowa to kou? Oro neio mutu koto owera mo ro iato anama-imewidiro-ri.’ 
Kaupoti nu Pauro ro ibo gemowameai, ‘Ee! Nedi koto ro nato na-notoi Sisa sabi patu maumo ato owamo. Sisa sabi patu maumo ato mo koto kowai modobo ie. Oro imese auna umoro ie mo ro ata Iu sabi ata esebea pua. 
Mo ro ata ubauba ata kosioidiro rasiri ie mabu sabi ro aro mo kopia aboto, modobo ie mo nio ro nato kopia. Mo ro utura-ri pua ibo mo opia ate mo ro morobise to sabi kesebea rasiri ie. Ata dubu ata ro modobo pua mo didi mabu ato kapoi neio aboto. Mo ubi ie nedi tau ro nato mo koto owera Roma auna gabamani dubu Sisa nou ia ro kemewidiro.’ 
Taie nedi owera ro Pesitasi ro na-girorowai nou simara kanisere mutu se gomi neio Pauro sapuwo to owera iato geremowagomea-rimo. Taie Pesitasi ro ibo Pauro aboto, ‘Oro nakara se utura-die Sisa owea ri oro koto owera nou ro emewidiro ri. Modobo ie oro Roma sabowa to kou Sisa aboto, koto owera nou ro ba-memewidiro.’ 
Arua saiki ta-goroporeai-rimo, taie eputa dubu orio Herodi-Agiripa nu medera mutu Benisi neitiro iato giodori-maro Siseria sabowa to Pesitasi araturiomai ri. 
Neitiro iato egea mere se na-gomidiro-rido, Gabamani Pesitasi ro eputa dubu Agiripa nato gemowauti Pauro koto owera sapuwo to. ‘Ata dubu tomidiro-die dibura moto ato, Periki ro dibura moto ato gemeserai. 
Mo dutu ata na-nidiai Ierusarema sabowa to Godi ra urubia ra turituri awawo urubia, Iu awawo urubia mutu Pauro neio ro nato gowapotai-rimo. Neio ubi ie nu mo ro opia ri 
kaupoti neio mo ro ibo nimowapotai, “Roma tanaro ibo owamo, ata mere ata na-owapotai-dumo nu nimo ro tau se omia-ri pua ubauba wisa, tau keba se nu koto to edi urubia ro na-owapotai-dioumo neio nou mutu atu se kou e, taie neio owera nato keremowameduti ie. Ibose edi dubu ro modobo ie nou korowairiai owera karo.” 
Nedi Iu urubia ro neio mo mutu Ierusarema sabowa rido atu se norowameai-rimo Siseria sabowa to. Mo neito na-norowateai-ro mo komidiro kawa omidiro pua. Taie ata saiki na-gowaroho koto sea ato na-nomi, iato koto aise natamuai, mo ro owera iato nemeiriai Pauro owou ri koto aboto. 
Edi tau ato gowou-rimo Iu urubia owera mutu iato gotobowa-rimo. Neio ro nu iato gowauti-rimo nou ro etou ubauba tanaro isioidirotiti. Mo ro ta-nimaragoidiro keba se ibo nu kowapotai urubia ro amadima-aro-ri nou ro awawo sabi ta-gisebo. Kaupoti neio owera mo ro na-nimewidiro awawo sabi kisebo sapuwo to aro pua. 
Neio ro edi owera ro garo-rimo, simara kimibiria tanaro sapuwo to geremaro-rimo nou mutu. Ina ibose pamo dubu masiro Iesu nou sapuwo to geremaro-rimo. Kaupoti Pauro ro binio to garo ibo Iesu pamo pua, tomidiro. 
Mo umoro pua mea se kihoduti aboto nedi owera ro. Ina Pauro nou ri nemodowa, “Oro ubi ra Ierusarema sabowa to kou mo ro oro koto owera ina iato kemewidiro?” 
Kaupoti nou ro a-gutura ibo, “Mo ubi tato ie Ierusarema to kou, mo koto owera Sisa ro ba-memewidiro-ro Roma sabowa ato.” Taie nou ro edi owera ro na-gutura-ro nu mo ro Siseria ato aise nodiobo dibura ato, womu tato nu mo ro kemeiriai Roma Gabamani eputa dubu Sisa aboto.’ 
Taie eputa dubu Agiripa ro ibo Pesitasi aboto, ‘Mo ubi ie nu owera kemewidiro aboto.’ Ina Pesitasi ro ibo, ‘Nu owera oro ro kowaroho ama-emewidiro-ri.’ 
Ata saiki eputa dubu orio Herodi-Agiripa nou medera Benisi mutu, neitiro meamea namabu to na-geremeduti-rido, awawo urubia beda sosoro iremedutiti-dumo neitiro neito geremeduti-rido, amura ra sagaru ra to gotoburio-rido. Taie neitiro ito aise gosuruwo-rido koto beda moto ato iamotiti. Neitiro koto aboto boso eputa urubia mutu gou-rido ibose Siseria sabowa kiauri urubia neio mutu gou-rimo. Ina Pesitasi ro arua boso urubia iato girumai Pauro owosuruo ri dibura moto rido. Pauro neio ro na-gowosuruwo-rimo dibura moto rido, 
taie Pesitasi ro ibo, ‘Eputa dubu Agiripa, ibose nio etio ro orowomidiro, nio ro tiauri-dumo nedi dubu ro, Iu urubia sirio nato na-orowomidiro, ibose Ierusarema sabowa ato na-orowomidiro neio mo aboto sirio tau serawo owera mutu irohotiti-dioumo. Neio ro ibo, “Pauro modobo pua komidiro! Modobo ie nou kopia!” 
Kaupoti nedi dubu ro koto owera mo ro na-nemewidiro nou ro ata ubauba ata osioidiro pua nou sapuwo to kopia ie. Nu mo ro ba-nemeiriai sabowa to, kaupoti nou ro a-gutura mo aboto ibo, “Mo koto owera Sisa ro ba-memewidiro-ro.” Mo ubi ta-noi nu kemeiriai Roma sabowa to, nou koto owera Sisa ro iato emewidiro rie. 
Kaupoti mo abato meamea kimaragoidiro owera iamo pua nu beda owera mutu anama-emeiriai-ri Sisa aboto. Ina noudo ie nedi dubu ro neito nowou-die nio aboto. Nio sirio se na-orowomidiro nato, auna se eputa dubu Agiripa oro aboto ou-die nedi owera ro. Oro ro mo kowarebai sapuwo to Pauro mea se ba-demodoruti, ina mo ro mea umoro owera nou sapuwo to nato anama-emesioidiro-ri Sisa aboto. 
Modobo pua dibura dubu Sisa aboto kemeiriai kawa kemeiriai peba titi owera tato. Neio ro nu beda owera sapuwo to gowapotai-rimo Sisa ro nu peba rido neido ama-emoputi-ri.’ 
