﻿Kobodorouti.
26.
Eputa dubu orio Herodi-Agiripa ro ibo Pauro aboto, ‘Obiri oro korowairiai sapuwo to owera ma-daro-ro.’ Taie Pauro tu se gowotobowa, nu owera karo iato gatamuai. Nou ro ibo, 
‘Iu urubia beda sosoro owera garo-rimo mo sapuwo to, neio owera anama-imetebeai-ri. Eputa dubu Agiripa, mo abora auna kamade mutu notobowa oro sosoro gabo ato owera aro ri, 
mabu oro auna umoro ie nimo Iu urubia korowomidiro tanaro beda sosoro ra, ibose nimo beda tanaro mabu rido niragegetiti-dumo. Ina nedi tau ro nato modobo ie mo owera gare se kemedea. 
Imese Iu urubia sirio neio auna umoro ie, mo beda sosoro nimidirotiti, simara urubia abato mere kainai na-nomidiro womu tato mo ti-nou Ierusarema sabowa to. 
Mo neio mutu tuturu tau to nimidirotiti iato, neio auna umoro ie mo beda sosoro nimidirotiti. Ina neio ubi na-iamo oro kemowauti aboto oro neio ro ba-memowauti-mo, ibo mo keba se Parasi dubu to nararasorotiti. Morobise ie Iu urubia kimibiria maumo ato nimo Parasi urubia sabi sirio mea ia mino to nibodorotiti-mo, ibo pua arua Iu urubia sosoro. 
Ina abora mo nou e mo Iu awawo urubia ro koto ato noti nedea-dumo, mabu mo ta-nimibiria Godi ro hodo keba se ta-gasaubiai-ro nimo nasa naminami neio aboudo. 
Isiraere urubia 12 gu neio ro nou auna se emasebidirotiti-dumo nedi tanaro ro ororosioidiro ri. Neio ro duwo saiki Godi aise emowabutiti-dumo. Mona ia eputa dubu Agiripa, mo Iu urubia ro koto aboto nou ri nowapotaidiro-dumo mabu nedi hodo kasaubiai ro nou sapuwo to ta-nimibiria 
ibo morobise to gororosioidiro-rimo Godi ro Iesu pamo rido na-gowameai-ro.’ Ina Pauro aise gerewesegerai Iu urubia aboto, nou ro ibo, ‘Ina mabu boira nio aboudo modobo pua kimibiria ibo pamo urubia Godi ro kiwame?’ 
‘Eputa dubu Agiripa, mo ro ibo ta-nimaragoidiro modobo ie mo ro sirio tanaro kisioidiro Nasareta sabowa dubu Iesu nou kowasoro urubia ubauba kiwaititi aboto. 
Ina edi tanaro ro kisioidiro mo ro aise nitamuai Ierusarema sabowa ato. Godi ra urubia ra turituri awawo urubia mo neio ro pupuwo owera iato nomia-rimo Godi edi tarena urubia ro mo ro irobo ri ina dibura to iaremo ri. Ibose Iesu kowasoro urubia Iu urubia ro na-iopiautiti-mo, mo ro ibo nimaragoidirotiti io mea tanaro ie, mo ibose ubi ta-noititi Iesu kowasoro urubia kiopiauti aboto. 
Iu urubia edi karadabu moto sirio ro mo neito na-nidoutiti Iesu urubia mo ro ta-niadotiti. Mo pupuwo auna se nasibawadotiti Iesu kowasoro urubia ro nou masiro ubauba kowaititi aboto. Mo auna serawo ro owamotiti neio aboto, ina noudo ie muso duriomoro to aise nirohotiti Iesu kowasoro urubia iado ri, ibose dibura to iaremo ri. 
Eputa dubu Agiripa, ata tau mo ro pupuwo owera ta-nimidai-ro Godi ra urubia ra turituri awawo urubia aboudo. Neio ro mo peba titi owera ta-nemesioidiro-rimo nou mutu nemeiriai-rimo Damasikasi sabowa to, Iesu kowasoro urubia ubauba iwaititi ri. 
Mo ito na-nou ipi gabo ato, saiki turi ie naio, pina benenio mutu nato gerememiai-ro toboro rido. Iedi pina ro ibo pua saiki sosoro, imese benenio ia ie. 
Taie edi kerememiai ro na-gerememiai-ro, mo edi urubia mutu na-nou atu se aise norowaburuti-rimo goto ato imese nirobu. Taie iato mo ro owera kodu se nirorowai na-gutura-ro mo simara owera to, “Sauro! Sauro! Mo oro ro temeteme etou mabu ato nomiotiti? Oro giro batina ie, nou ri ireisorowadotiti. Mo oro ro ubauba na-nowaititi, oro nakara se orowaititi ubauba.” 
Ina mo ro nu ibo nemowameai, “Auna dubu, oro etu ra?” Ina Abera Naramu ro ibo, “Mo Iesu e, mo oro ro nomiotiti temeteme. 
Oro abora deribua, ta-narapoi mo woko emesioidiro ri. Abora oro ro etou tanaro owea, ina ido oro aboto beda tanaro ra nama-iwawuti-ri, urubia oro ro neito ama-imowauti-ri. Mo abora oro aboto nou ri norowapotai-die. 
Nedi saiki ro neido na-waratamuai oro mo ro anama-owairiawado-ri Iu urubia aboudo ibose Iu owera karo tato urubia aboudo. Oro mo ro neio aboto nemeiriai 
neio idomari imodobuti ri, neio sisibo maumo rido amadimo-osuwoduti-ri Godi edi woroworo ro neito. Neio amadima-aragarewado-ri Satani tu rido Godi aboto. Ina mo ro neio ubauba nato anama-imatopeamuti-ri. Keba se mo sapuwo to etio ro gimibiria-rimo neio mutu anama-idabuti-ri, ibose neio mo ro tarena anama-iwai-ri mabu neio kimibiria urubia ie. Neio mo mutu atu se anama-irowomidiro-ri.” 
Io eputa dubu Agiripa mo ro edi tanaro ro na-nowea, hiwo to kiauri sosoro niauri toboro ato edi tanaro ro gororosioidiro-ro. Iedi owera ro mo ro na-nirorowai taie iedi tanaro ro mo ro aise nisioidiro. 
Nedi owera ro urubia neito nimowautiti ubauba aboudo erewesegerai ri Godi aboto. Ina neio modobo ie Godi ubi tanaro se kisioidiro ibo neio morobise to ta-gerewesegerai-dumo ubauba aboudo. Mo ro keba se nedi owera ro kimowauti Damasikasi sabowa ato natamuai ina ioudo nidiai Ierusarema sabowa to urubia iato imowauti ri. Ina Iudia duriomoro gebari ato edi sabowa sirio ro na-iamo, edi atu owera ro ta-nimowautititi. Ina ioudo mo ta-nirohotiti Iu owera karo tato urubia aboto, nedi owera ro imowauti ri. 
Ina mo nou mabu ato norobai-rimo Tarena Moto ato, neio ubi ie mo opia ri. 
Kaupoti mo Godi ro ti-nowarebidirotiti-die, ina abora noudo notoi oro sosoro gabo ato. Nio abora etio ro orowomidiro kainakaina idaro awawo masiro mutu, mo ro edi tanaro ro na-niauri nio mo ro nou nimowauti. Nedi owera ro nio mo ro na-nimowauti atu sosoro owera ie, keba se ta-gisioidiro-rimo Godi ipusu owera urubia ro Mose mutu, ibo etou tanaro ro amadimo-ororosioidiro-ri 
Godi ro kohodowa dubu aboto, nu temeteme ama-iwia-ri, amadimo-opia-ri, ina nou keba dubu e Godi ro kowameai pamo rido. Nedi dubu ro nou ro amadi-owou-ri auna ia woroworo nou simara Iu urubia aboto, ibose Iu owera karo tato urubia aboto.’ 
Pauro ro edi owera garo koto abato, nou korowairiai sapuwo to gabamani dubu Pesitasi ro na-girorowai Pauro nou ro aise gemaea. ‘Pauro! Oro kawakawa ro ta-worobai! Oro auna sikuru ro gemowai eputa ubauba, neido ie oro kimaragoidiro tato owera karo!’ 
Pauro ro ibo, ‘Mona ia gabamani Pesitasi, mo ibo pua kawakawa ro korobai. Mo ro edio owera ro na-naro ibo pua karasaubuti owera, morobise owera ie. Mo ro mea kimaragoidiro owera naro. 
Eputa dubu Agiripa, (oro) umoro tiamo, mo ro paea se beda owera naro. Mabu iedi tanaro ro Iesu sapuwo to na-gororosioidiro-rimo piro se ororosioidiro pua, paea se gororosioidiro-rimo.’ 
Ina Pauro aise gerewesegerai Agiripa aboto. ‘Eputa dubu Agiripa, Godi ipusu owera urubia ro edi owera ro garo-rimo oro ro a-gimibiria ra? Mo umoro ie oro ro ta-gimibiria.’ 
Taie Agiripa ro ibo, ‘Oro kimaragoidiro ibo a-iamo ra, nedi komukere tau ro nato mo Iesu kowasoro dubu to oro ro owasaudai ri?’ 
Pauro ro ibo, ‘Komukere tau o tuturu tau auna tanaro pua. Mo ro Godi anama-araratoro-ri oro owasaudai ri Iesu kowasoro dubu to kararapoi ie. Ibo pua oro se kowasaudai, ibose mo owera gare etio ro nemedea-dioumo abora, nio atu se mo ubi ie kiwasaudai Iesu kowasoro urubia to kararapoi. Mo beda sosoro nimidirotiti nio modobo ie idaibo sosoro korowomidiro. Kaupoti nedi anikapo to nemotohiti-rimo nou sapuwo to aro pua!’ 
Ina iato eputa dubu Agiripa, gabamani dubu Pesitasi, Benisi, arua awawo urubia neio ro edi owera ro na-girorowai-rimo, neio iato imese gosuwoduti-rimo. Neio ro ibo, ‘Nedi dubu ro ata mea mabu tato ie dibura to kedea o kopia aboto.’ 
Eputa dubu Agiripa ro ibo Pesitasi aboto, ‘Nedi dubu ro neitiro ro ba-nemeiriai-do sabowa to orowameai ri, kaupoti nou simara ubi ie koto owera ina Sisa ro kemewidiro.’ 
