﻿1 Korini.
3.
Niramio mo ia nio mutu kebase na-nimidirotiti, nio kimibiria mutu modobomodobo oititi pua. Ina noudo ie mo ro owera beda sosoro karo ra urubia aboto Tarena Urio ro na-iworohutiti, idaibo owera nio aboto mo ro karo modobo pua. Nio ro durupi ubi tanaro auna se isioidirotiti-dumo, kimibiria mutu iroromawado pua. 
Nio ro kebase Iesu na-owasorotiti-mo nio bamuai kainakaina sosoro ie, ina mo nio mamu sosoro ie. Nio mo ro edi kitamudiro to na-nitamudirotiti, bamuai kainakaina beda sosoro ra mamio ro nono kimio, nio idaibo sosoro nitomutiti. Mabu nio ro koko ohona kiho modobo pua. Nio abora iroromai pua, atu sosoro irowomidiro, koko ohona kiho modobo pua. 
Nio durupi ubauba ubi tanaro aise isioidirotiti-dumo. Mabu nio masawe na-irereaurititi-dumo, nio ro sopu duriomoro urubia tanaro aise isioidiro ri ra? 
Nio ata ro kutura ie, ‘Mo Pauro nobodoro.’ Ina ata ro kutura ie, ‘Mo Aporosi nobodoro.’ Nio sopu duriomoro kimaragoidiro a-iworohuti-dumo ra? 
Abora mo ubi ie nio kimaragoidiro kimodobura aboto, ibo neitiro beda sosoro dubu teibo ra? Neitiro dorogora se dubu teibo ie, Godi sowake dubu teibo ie. Nou sowake na-nirohotiti-do, nio kimibiria neitiro aboudo gimidai-rimo. Neitiro Abera Naramu ro erere woko ta-nimia-maro. 
Ota mo ia ro nibouti, ina Aporosi ro obo to imawirititi. Kaupoti Godi nakara se nou se ie iedi ota ro kiwoubua, kiroromai sapuwo to. 
Ina noudo ie etu ro kibouti ra, ibose obo to etu ro kimawiriti ra, io neitiro auna dubu teibo pua. Godi nakara se nou se ie nu auna ia ie, ota nou ro iwoubuatiti. 
Ota etu ro kibouti ra, ina obo to etu ro kimawiriti ra, neitiro ro nedi woko ro kaupoti ubi ato kisioidiro ie. Ina neitiro nedi erere woko ro nou sapuwo to Godi ro wisa kimio-ma ie. 
Neitiro Godi woko dubu teibo ie, atu se nemesioidiro-do. Nio Godi pari sosoro ie, ibose nio nou moto sosoro ie. 
Mo Godi ro wisa tato nowarebai-ro nu moto mea siware mutu mo ro na-nemidi. Mo ro kebase turimida posi nowotobowa, iato arua urubia ro gou-rimo moto neio ro ididi-dumo. Kaupoti nedi kididi urubia ro neio ro modobo ie simara woko erere se kimeiouti. 
Mabu ata gabo owamo pua ata dubu ro ata turimida posi ata kowotobowa aboto. Kaupoti namabu, Iesu nouse ie mo ro nedi turimida posi ro na-nowotobowa. 
Kaupoti moto kididi namabu kididi urubia ro na-iaremuti-dumo moto ato, neio atu sosoro pua. Arua neio koko ota iaremuti-dumo idaibo kutika, kawoia sesere, siawiri moto neito ididi-dumo. Ina arua neio gorodo ota, bagara neito irimari-dumo. 
Kaupoti nimo Iesu ro koto edi tau ato nama-iwai-ri, nimo erere se moto keremari woko na-nisioidiro-dumo, neio ro paea se nato amadimi-iwapotaidiro-ri. Mabu erere moto keremari woko nedi koto saiki ro nato paea se amadimo-orowapotaidiro-ri. 
Moto koko se etio ro irimari-dumo, neio woko era ro iho-ri pua. Ina neio Godi ro nou sapuwo to mea wisa ama-imio-ri. 
Etio ro geremari-rimo gorodo ota to ina bagara to, neio woko ibose era to ama-iwaibirio-ri. Kaupoti neio woko era ro aise ama-ipisiamuti-ri. Nedi urubia ro neio Godi ro ubauba aboudo amadi-iapopo-ri sekere, kaupoti neio wisa Godi ro imio-ri pua. Nu idaibo sosoro ie nedi urubia ro neio moto era ro nama-iho-ri, ata dubu ro neio hio ito amadi-iwosuwoduti-ri keremiro kiwia sapuwo to. Kaupoti neio namabu sirio aise amadimi-imeserai-ri, era ro ama-iho-ri. 
Ina nio keba se umoro ta-goi-rimo ibo Godi edi tarena moto ro nio nou se ie, ina Tarena Urio nio abato timidirotiti. 
Godi edi tarena moto ro ubauba etio ro owaititi-dumo, io neio ia ama-iwai-ri Godi ro ubauba. Mabu Godi edi tarena moto ro tarena ia ie, ina nio nou se ie. 
Nio modobo pua nakara se na-warasaubuti-dumo. Duriomoro urubia ro kiauri maumo ato, nio ibo na-imaragoidirotiti-dumo nio mea muro urubia ie. Tauo keba se nio duriomoro urubia ro kawakawa urubia to kiasoro modobo ie, nio Godi sosoro gabo ato mea muro urubia to ararasoro ri. 
Mabu duriomoro urubia ro edi tanaro ro na-isioidirotiti-dumo mea muro tanaro to iasorotiti-dumo, ina Godi sosoro gabo ato imese kimaragoidiro tato tanaro ie. Ina mo ro beda owera naro, idaibo sosoro owera tiamo Tarena Buka ato, Nedi duriomoro muro kimaragoidiro urubia ro neio ro beda gabo isioidiro-dumo, neio gabo Godi ro kiwasiouti ie. 
Ina Tarena Buka ato ata owera ibose towamo, Abera Naramu auna umoro ie duriomoro kimaragoidiro urubia beda sosoro kimaragoidiro mutu irohotiti-dumo. Neio edi ubi tanaro ro aise ororosioidiro-ri pua. 
Ina noudo ie, nio ro modobo pua kiwaboi urubia kimowabu. Godi ro imese tanaro patu nio ta-gimesioidiro. 
Nio Godi owera kitamudiro urubia ta-gimohodowa idaibo Aporosi, Pita, ina mo ia, neibi nio kiwarebai urubia ie. Godi ro imese namabu na-gisioidiro, nio meana sapuwo to gisioidiro. Abora korowomidiro keremiro sapuwo to, korowaburo saro gabo ato beda mino to ama-orowomidiro-ri, nedi tanaro sirio ro nio meana sapuwo to ie. Mabu imese tanaro abora na-ororosioidiro-dumo, kimibiria urubia nio kiwarebai sapuwo to ie. Ibose keba moro ato etou tanaro ro amadimo-ororosioidiro-ri, Godi ro nio kiwarebai sapuwo to ie. Mo ro nedi owera ro dese to na-niatiti io morobise owera ie, amadimo-ororosioidiro-ri. 
Ibose nio ia Iesu Keriso urubia ie, ina Iesu Keriso Godi do ie. 
