﻿1 Korini.
10.
Ina noudo ie mo ubi tato ie nio ro woki kimatiti beda tanaro ro gororosioidiro-rimo nimo nasa, naminami neio aboto, neio atu se goto se duriomoro ato edi tau ato na-irohotiti-mo. Neio imese atu se toboro kere maumo ato outiti-mo nou ro iwaboititi. Nedi urubia ro toketoke oromo turi na-giabu-rimo womu tato ata sapuwo to mea se ti-gorowateai-rimo, 
io idaibo sosoro ie neio Mose ro obo to giwarumia. Io neio Mose ro obo to na-giwarumia nou kowasoro urubia to ararasoro rie. 
Nedi urubia ro edi mino to na-irohotiti-mo neio imese Godi ro ohona ata sosoro imiotiti-ro, ina iedi ohona ro neio ro atu se ihotiti-mo. 
Ibose neio obo Godi ro ata sosoro imiotiti-ro nadi rido. Neio obo edi nadi rido na-idiotiti-mo edi nadi ro neio nou mutu atu se outiti-mo. Iedi nadi ro Godi ro kohodowa dubu nou sosoro owapotaidiro-die nimo aboto. 
Io morobise ie neio meana Godi aboudo ta-iaurititi-mo sekere, kaupoti neio sirio se nou kamade tato owaititi-mo, neio ro nou sosoro gabo ato ubauba tanaro na-isioidirotiti-mo. Ina noudo ie nedi urubia ro ipi gabo ato Godi ro aise giopiauti, neio pamo durupi goto se duriomoro ato kimesere kawa imeseretiti-mo. 
Nedi tanaro ro na-gororosioidiro-rimo, nimo umoro koi sapuwo to gororosioidiro-rimo. Neio giropu auna ubi ro iamotiti iedi ubauba tanaro ro kisioidiro aboto, ina noudo ie nimo ro idaibo ubi imatiouti-ri pua. 
Neio arua ro orora ta-irorutiti-mo, nio ro idaibo sosoro ubauba tanaro isioidiro mamo. Nimo edi nasa naminami ro arua idaibo tanaro nou gisioidiro-rimo, ina neio Godi urubia sekere, kaupoti Tarena Buka ato owera ta-giamo ibo, Neio ro burumukau dawade gorodi to na-gosioidiro-rimo, taie iato gemowabu-rimo. Neio aise giriribua-rimo, muguru sosoro komaro iato gorowamaro iedi burumukau ro nou sapuwo to. Ibose neio ro soriomu nou sapuwo to iato gosioidiro-rimo, koko obo iato gidio-rimo. Neio kamade ri aise giaiauti-rimo wasare iato gemaboduti-rimo. 
Ina ata owera ibo ie, nimo ro modobo pua erere upo tanaro kisioidiro. Arua Isiraere urubia idaibo tanaro nou gisioidiro-rimo, ina noudo ie Godi ro ubauba temeteme nato gemeiriai-ro neio aboto, ina kaupoti saiki ato 23,000 urubia neio ro gorowaburai-rimo. 
Ina ata owera nou e, nimo ro modobo pua Abera Naramu kowaibirio nou edi turi mesebea ro kemasaudai. Ina arua Isiraere urubia idaibo sosoro tanaro nou gisioidiro-rimo, Abera Naramu neio ro a-gowaibirio-rimo, taie Godi ro bagawe sirio neio aboto nato gimeiriai-ro, bagawe ro pamo se nou ri iagegetiti-mo. 
Ibose masawe owera aro mamo Godi woko urubia aboto. Arua Isiraere urubia idaibo mino to gorowosuruwo-rimo masawe owera ibo iarotiti-mo Godi woko urubia aboto. Ina Godi edi boso sowake urio ro nou ri gemeiriai-ro neio aboto, neio aise giopiauti. 
Nedi ubauba tanaro sirio ro na-gororosioidiro-rimo neio aboto, nimo ro neio aboudo eremoputi rie ibo, morobise ie ubauba mimeserai-rimo. Nedi owera ro nou mabu ato giatiti-rimo, nimo itamudiro rie idaibo tanaro isioidiro mamo. Nimo nedi tau ato na-norowomidiro womu tau aupiaupi ro orobowado-die. 
Mabu nio na-imaragoidiro-dumo ibo, ‘Koko se ti-norowotoi, ubauba nimo aboto odoro-ri pua.’ Kaupoti mea se! Nio kiretei modobo pua! 
Beda mutu kiwaibirio tanaro sirio ra nio ro na-giauri-rimo ubauba kisioidiro aboto imudo ri, neio ata sosoro pua, imese sirio urubia atu sosoro kiwaibirio tanaro ta-giauri-rimo. Godi ro beda owera karo ra nou ro aise kisioidiro ie. Nio koko ia kiwaibirio aboudo, nou ro gabo aise imagerewado-ri pua. Kaupoti nio kiwaibirio tanaro ro kiwia ato, Godi umoro ie, nio kiwosuwoduti aboto gabo nou ro kimesioidiro ie, ina iedi koko kiwaibirio tanaro ro nio neio ro iwororuwoidiro-ri pua. 
Ina noudo ie nirimagare babio, nio orora kiroru tanaro aboudo ba-daragarewado-mo. 
Nio mea muro urubia ie, mo ro beda owera nisioidiro mea se nou ba-dimaragoidiro-mo. 
Nimo ro Iesu sapuwo to ohona kiho ato, eso owera na-niarotiti-dumo nou sapuwo to, iedi panikere ro Iesu karima panikere ie. Ina noudo ie atu se na-nidiotiti-dumo, nimo nou mutu kaupoti to imese kararapoi ie. Ina ibose beredi nimo ro kekekiouti ato nou eremasoro na ie, edi beredi ro Iesu durupi ie. Ina noudo ie nou atu se na-nouho-dumo nimo nou mutu kaupoti to imese kararapoi ie. 
Nedi beredi ro kaupoti ie, ina nimo kimibiria urubia imese sirio ia ie. Ina noudo ie nimo kaupoti urubia ie Iesu Keriso ro ta-nidabuai, mabu beredi kaupoti nouhotiti-dumo. 
Isiraere urubia nio ro ma-dimaragoidiro-mo neio ro edi tanaro ro na-isioidirotiti-mo. Godi aboto dao na-imatowotiti-mo ina etio ro ihotiti-mo, Godi neio mutu idaibo mino to ta-idabutiti. 
Mo owera maumo beda sosoro ra, nio ro mea se a-womidai-mo ra? Mo ibo a-naro ra ohona na-imamotiti-dumo ota titi aboto nou auna nakomu e? Ina ibose mo ibo a-naro ra ota titi sapuwo to na-imamotiti-dumo, neio morobise keremiro mutu e? 
E e! Marasio, mo ibo aro pua! Io nedi urubia ro Godi umoro tato urubia ie, ohona na-imamotiti-dumo neio ro ubauba urio aboto imatowotiti-dumo, Godi aboto imatowotiti pua. Mo ubi tato ie nio ubauba urio aboto karadabu. 
Nio ro Abera Naramu eremasoro na panikere rido kidio, ina ubauba urio panikere rido iato kidio, nio ro panikere teibo ibo imosuwotiti-madumo modobo ia pua! Imese sabi ia ie! Ina ibose nio ro ata saiki Abera Naramu ohona kiho nou eremasoro na, ina ata saiki ubauba urio ohona kiho neio kamade iwaititi ri, io modobo ia pua. Imese sabi ia ie! 
Nio ro idaibo tanaro teibo na-isioidirotiti-madumo arua urio kamade kiwaititi aboto, nio ro Abera Naramu kamade a-owaititi-dumo ra? O ibo a-imaragoidiro-dumo ra nio imese pupuwo ia ie, ina Godi nio pupuwo mutu modobo pua? A? 
Nio arua ro ibo iarotiti-dumo, ‘Imese tanaro kisioidiro nimo aboudo modobo ie, ata sabi tato ie.’ Kaupoti imese tanaro nimo ro kisioidiro aboto, arua tanaro ro nimo iwarebai-ri pua. Nio arua ro ibo iarotiti-dumo, ‘Imese tanaro kisioidiro nimo aboudo modobo ie, ata sabi tato ie.’ Kaupoti nimo ro arua tanaro kisioidiro ato, borubi kimibiria urubia pupuwo imowaititi-ri pua. 
Nakara se eremaragoidiro mamo, arua urubia sapuwo to aise gi-imaragoidiro-ri. 
Maketo rido kimade ato karima ohona, nio ro kiho modobo ie, ata sabi tato ie. Nio ro auna se imaragoidiro mamo ibo nimo ro ubauba tanaro nisioidiro-dumo nedi ohona ro na-niho-dumo. E e! 
Mabu nedi duriomoro ro nato ibose beda mutu namabu sirio ro iamo, imese Abera Naramu do ie, nou ro gisioidiro. 
Ata kimibiria tato dubu ata ro oro aboto na-utura ibo, ‘Oro dou-ro, ohona mo moto ato anamadi-iho-ri.’ Oro ubi kou nou moto to, orodiobuti mamo aise dou nou moto to. Nou ro oro beda ohona emaremuti, nu oro ro emodoruti mamo ohona sapuwo to, kamade mutu aise gi-iho-ri. 
Kaupoti oro ata dubu ro na-emowapotai ibo, ‘Nedi ohona ro tarena ie kiho aboto, orora aboto kebase ta-iaiwai-mo.’ Nou ro idaibo owera karo ato, oro ro iedi ohona ro iho ate! Mabu oro edi dubu ro emowapotai-die, nu simara kimaragoidiro ie ibo nedi ohona ro ubauba ie kiho aboto. Mo ro ibo utura pua, iedi ohona ro kiho modobo pua, 
iedi dubu ro nou ro imaragoidiro idaibo. Io mea tanaro ie iedi ohona ro oro ro kiho tato, ina iedi dubu ro nou kimaragoidiro oro ro ubauba emowai-ri pua. Kaupoti ata dubu ata ro idaibo owera karo tato nedi ohona ro nou sapuwo to, oro ro modobo ie nou kiho. Mabu boira mo ata dubu ata ro nou simara kimaragoidiro to sirio tau kotuputawado ohona kiho sapuwo to? 
Mo ro ohona Godi aboto eso owera karo ato, ina nato na-niho, mabu boira mo ata dubu ro nedi ohona ro nou sapuwo to kemosurupo? Iedi ohona ro eso owera karo saro gabo ato, Godi ro meana aise kiwai ie. 
Ina noudo ie nio ro beda ohona iho-dumo ina beda obo idio-dumo Godi masiro auna kowaititi sapuwo to gidimi-isioidiro-ri. 
Nio ro modobo pua tanaro kisioidiro ina arua urubia nio ro ubauba neito kiwaititi, idaibo Iu urubia, Iu owera karo tato urubia, ibose Iesu kowasoro urubia. Neio ro edi meamea tanaro ro namadimi-iauri-ri neio nio ro ubauba iwai-ri pua. 
Mo ro urubia beda sosoro niworohutiti nio ro ibo ba-diworohutiti-mo. Mabu mo nakara se orowarebai-ri pua, urubia sirio iwarebai rie, neio ro womu tato keremiro kowea aboto. 
