﻿1 Korini.
14.
Urubia nirimagare kimati gabo kaupoti nou se ba-dobodoro-mo. Tarena Urio ro kimibiria urubia modobo ta-iwaititi erere tanaro kisioidiro aboto. Modobo ie nio abato auna ubi ro kiamo nedi tanaro ro neio kisioidiro aboto. Godi ipusu owera kimowauti aboto nio abato auna ia ubi ro ba-miamo. 
Mabu ata dubu nou ro modobo kowai ie umoro tato owera to kimowauti aboto, ina nou ro iedi owera to aro, Godi ia emowauti, urubia ro maumo mea se omidai-ri pua. Morobise ie kimowauti dubu ro urubia imowauti-ri pua. Nou ro edi owera to imowauti, kebase piro se na-owamotiti Godi abato, Tarena Urio ro iaiwotiti-die. 
Kaupoti Godi ipusu owera etio ro imowautiti-dumo, neio edi owera ro tuputupu ia se ou-dumo urubia aboto. Neio edi ipusu owera ro na-imowauti-dumo, neio ro nouto iwarebai-dumo kimibiria urubia kiroromai sapuwo to. Ibose neio ro nouto kimibiria pupuwo imowaititi-dumo. Kimibiria urubia mibo na-iauri-dumo, neio ro kiarumiauti nedi ipusu owera ro nouto. 
Ina beda dubu ra umoro tato owera to na-imowauti, nou kimibiria pupuwo nakara se orowaititi, Iesu edi urubia ro nou ro pupuwo iwaititi-ri pua. Kaupoti Godi edi ipusu owera ro etio ro imowauti-dumo, Iesu edi urubia sirio ro neio ro kimibiria pupuwo iwaititi-dumo. 
Mo ubi sekere ie nio imese umoro tato owera to kimowauti. Kaupoti auna ia nakomu nou e, mo ubi ie nio ro Godi edi ipusu owera ro urubia kimowauti. Godi ipusu owera etio ro imowauti-dumo, neio awawo tanaro kisioidiro urubia ie. Etio ro imowautiti-dumo umoro tato owera to, nedi urubia ro neio sosoro pua, neio ro Godi urubia auna se iwarebai-ri pua. Umoro tato owera to urubia etio ro imowautiti-dumo, ina kiwesegere dubu tato, nedi urubia ro neio simara kimowauti owera maumo mea se kiwesegere modobo ie, Iesu urubia mea se kiroromowado sapuwo to. Idaibo tanaro kororosioidiro ato, nedi umoro tato owera kimowauti dubu ro nou Godi ipusu owera kimowauti dubu sosoro ie. 
Mo niramio, mo nio aboto kou ato, nio umoro tato owera to kimowauti ato, nio idaibo mo ro mea se kiwarebai ra? E e, nedi owera ro nio nou ro iwarebai-ri pua. Kaupoti mo ro korowauti ato Godi ro beda owera nemowauti-ro, o umoro owera Godi aboudo mo ro kimowauti ato, o Godi edi ipusu owera ro kimowauti ato, o ata kitamudiro owera Godi aboudo mo ro kimowauti ato, nio nedi tanaro sirio ro neio ro kiwarebai ie. 
Ibose ba-dimaragoidiro-mo, nou idaibo sosoro ie keremiro tato namo teibo beda sosoro ra gita ra ugeuge ra beda diamo isioidirotiti-do. Kiado urubia ro o kiourio urubia ro diamo mea se kiwapotai tato, iedi tau ro nato kirowidiro urubia ro umoro oi-ri pua iedi ohare diamo ro. 
Humuko diamo mea se kou tato boso urubia beda sosoro keremododiai ra boso aboto kaimowado ato? 
Ina atu sosoro tanaro nio ro tisioidiro-dumo. Nio karadabu ato urubia umoro tato owera to na-imowauti-dumo, nedi owera ro urubia ro maumo beda sosoro amadimo-oi-ri? Nio ro urubia imowauti pua, nio ro moto goro emowauti-dumo. 
Morobise ie nedi sopu duriomoro gebari ro nato, erere owera imese sirio ia ie, neio erere se maumo mutu e. 
Kaupoti mo umoro tato owera to ata dubu ata ro mo namadi-emowauti-ri, mo iato daimodaimo dubu to nou ro anamadi-apoi-ri, ina nu mo ro daimodaimo dubu to nama-apoi-ri. 
Ina idaibo sosoro tanaro kororosioidiro ie, nio abato umoro tato owera to kimowauti ato. Nio abato auna ubi ro iamo Tarena Urio ro modobo kiwaititi erere tanaro kisioidiro aboto. Ina noudo ie Tarena Urio aboudo beda tanaro ra Iesu urubia pupuwo auna se na-iwaititi-dumo, nedi tanaro ro kisioidiro aboto nio ubi auna ia ba-diwaititi-mo. 
Ina noudo ie nio ata ro umoro tato owera to kimowauti ato, nou ro modobo ie Godi kararatoro korosa omia ri, iedi owera ro maumo mea se kiwesegere aboto. 
Mo ro Godi aboto karo ato umoro tato owera to, mo edi urio ro nou ro karo ie. Kaupoti mo kimaragoidiro ro ata kiwarebai tanaro ata osioidiro-ri pua. 
Ina noudo ie mo iato beda mino to nama-orowati-ri? Ata tau mo ro urio to umoro tato owera to nama-aro-ri Godi aboto. Ina ata tau mo ro kimaragoidiro to anama-aro-ri Godi aboto. Mo wasare urio to anama-iwati-ri, ina wasare mo ro kimaragoidiro to ibose to anama-iwati-ri. 
Nio ata ro umoro tato owera to urio to Godi nama-emowabu-ri, ina arua urubia iato na-orowomidiro-die, neio umoro oi-ri pua nou beda owera to emowabu. Nou edi kararatoro owera ro koporeai ato, neio ro modobo pua atu se nato kutura, ‘Ibose ba-mororosioidiro-mo.’ 
Etu umoro ra nio ata ro Godi aboto eso owera mea se aro, kaupoti arua urubia nou ro pupuwo iwaititi-ri pua. 
Godi aboto mo ro eso owera naro, mabu mo umoro tato owera to auna se niarotiti, nio ro umoro tato owera to auna se iarotiti pua. 
Iesu urubia mo mutu atu moro to karadabuai ato, mo ubi ie 5 owera se karo urubia simara owera to kimowauti, neio kitamudiro aboto. Mo ubi tato ie 10,000 owera umoro tato owera to kimowauti, neio iwarebai-ri pua. 
Mo kimibiria naminiramio, nio Tarena Urio ro edi mino to modobo na-iwaititi-die erere tanaro kisioidiro aboto, nou sapuwo to na-imaragoidiro-dumo, merebusere kainakaina sosoro kimaragoidiro ba-dimeserai-mo. Awawo urubia sosoro gi-imaragoidiro-ri. Ibose bamuai kainakaina ro ubauba tanaro kisioidiro pua, neio sosoro gi-orowomidiro-ri ubauba tanaro kisioidiro tato. 
Tarena Buka ato Abera Naramu ro owera kebase ta-gowapotai-ro ibo, Mo simara urubia aboto daimodaimo urubia nama-imerio-ri, mo urubia neio ro umoro tato owera to amadimi-imowauti-ri. Kaupoti mo urubia ro mo owera daimodaimo urubia aboudo irowidiro-ri pua. 
Ina noudo ie, kimibiria tato urubia aboto Godi owera karo ie neio umoro tato owera to, paease kiwauti aboto ibo nedi urubia ro nou owera kimibiria tato urubia ie. Kaupoti kimibiria urubia aboto Godi ipusu owera kimowauti ie, ibo pua kimibiria tato urubia aboto. 
Etu umoro ra Iesu patu urubia nio atu moro to karadabuai ato, ina nio ro umoro tato owera to namadimi-imowauti-ri, Iesu gabo umoro tato urubia iato na-orowomidiro neio umoro oi-ri pua. Nedi urubia ro amadimi-imaragoidiro-ri ibo nedi urubia ro kawakawa urubia ie. 
Kaupoti etu umoro ra nio imese Godi edi ipusu owera ro simara ia owera to na-imowauti-dumo, ina kimibiria tato dubu nato na-ou-die, nou nakara se kerereibimai ie ibo, ‘Morobise ie, mo ubauba tanaro kisioidiro dubu e.’ Godi aboto aise ama-iroborea-ri nou kemowabu sapuwo to. Mabu nio imese Godi ipusu owera simara ia owera to imowauti-dumo, ina edi ipusu owera sirio ro nou ama-imeiouti-ri. Nedi dubu ro beda ubi tanaro ro iamo piro se nou niro turi ato, morobise to Godi ro nato amadi-iwapotaidiro-ri. Nou ro ibo ama-aro-ri, ‘Morobise ie, Godi nio kimibiria urubia abato tomidiro!’ 
Ina noudo ie niramio, beda tanaro kisioidiro ra? Ibo kisioidiro modobo ie, nio atu moro to karadabuai ato, ata ro wasare kiwati ie Godi aboto, ina ata ro ata kitamudiro owera kimowauti ie. Ina ata ro korowauti ie nu Godi ro beda owera gemowauti, ata mere ro korowauti ie umoro tato owera to, ina nu edi owera ro ata ro kiwesegerai ie urubia umoro owera to. Kaupoti nedi tanaro sirio ro nou kisioidiro ato, modobo ie imese Iesu urubia neio pupuwo kiwaititi sapuwo to. 
Urubia umoro tato owera to kimowauti ato, netewa teibo o netewa didi na peteibi ro neibi ro se erere se kimowauti modobo ie. Ina neibi ro beda owera to aro-bimo, nio ata ro neibi owera ba-miwesegere. 
Iedi moro ro nato kiwesegere dubu ata potoro ato, iedi na peteibi ro aise otobowa mamo, neibi modobo ie matagoro kiopai se korowomidiro. Neibi nakara se eputa ato keremowauti ie, ibose Godi aboto korowauti ie. 
Ibose Godi edi ipusu owera ro kimowauti ato, netewa teibo dubu teibo o netewa didi dubu peteibi neibi ro se kimowauti modobo ie. Neibi edi ipusu owera ro nio ro mea mino to ba-dimodobowauti-bimo. 
Ata komidiro dubu nu Godi ro ata owera kemowauti ato, kimowauti dubu nato aise korodiobo ie, ina modobo ie komidiro dubu ro nou bobo korobai ie. 
Godi ipusu owera etio abato na-iamo, urubia atu tau ato owera iwasoro mamo, neio modobo ie kaokao se kiwasoro. Io idaibo mino to kororosioidiro ato urubia sirio se mea se amadima-aratamudiro-ri, ibose pupuwo amadimo-oi-ri. 
Nou se dimaragoidiro-mo, Godi ipusu owera etio ro imowauti-dumo, neio ibo aro-ri pua ‘Mo nato orodiobo-ri pua, mabu mo gabo tato ie’. E e. Nou ro Godi ipusu owera kimowauti ato, nou simara ubi ato katamuai ie, ina simara ubi ato koporeai ie. 
Mabu nou e korowakopeamuti tanaro Godi aboudo ou-ri pua, nou ubi ie Iesu urubia ro tanaro mea se kisioidiro, miro nou aboudo ou-die. Nio karadabu ato, mamio ro modobo pua dorogora owera karo. Iesu urubia beda moro ato iradabu-dumo, nedi tanaro ro neio ro tirobidiro-dumo. Mabu Iu urubia sabi maumo ato idaibo owera tiamo, iedi urubia ro iwaboi-dumo Godi owera to, mamio ro modobo ie neio owera se kirowidiro. 
Mamio ubi na-iamo owera umoro mea se koi aboto, neio ro modobo ie simara moto ato uramio kiraratoro, ina neio umoro uramio ro amadimi-iwaititi-ri. Mabu mea tanaro pua mamio dorogora owera karo Iesu urubia karadabuai maumo ato. 
Korini urubia, Godi edi kitamudiro ro nio aboudo aratamuai pua, ibose nio aboto se orowateai pua. 
Nio etio ro imaragoidiro-dumo, ‘Nimo Godi ipusu owera kimowauti urubia ie’, o ‘Nimo Tarena Urio ro modobo ti-niwaititi erere tanaro kisioidiro aboto,’ nio nakara se keremasibai modobo ie ibo, mo ro nedi owera ro nio aboto na-nisioidiro, io Abera Naramu sabi owera ie. 
Nedi owera ro beda urubia ro iseio-dumo, neio ibose Godi ro amadi-iseiai-ri. 
Ina noudo ie mo niramio, morobise ubi nio abato ba-mowamo Godi ipusu owera kimowauti aboto. Ibose arua urubia idiobuti mamo umoro tato owera to kimowauti. 
Kaupoti nio karadabu ato, imese tanaro mea mino to gi-isioidiro-ri. 
