﻿1 Korini.
16.
Abora nio mo ro a-nimowapotai mani kidabuti sapuwo to, Ierusarema sabowa ato Godi edi tarena urubia ro na-orowomidiro neio kiwarebai sapuwo to. Ina mo ro ibose Gereisia kimibiria urubia ta-nimowapotai idaibo tanaro isioidiro ri. 
Nedi owera ro ibo ie, sirio woiki gabogabo ato, nio erere se keba saiki ato, simara modobo ato, mani iopu ba-dimaremo-mo. Nio ro idaibo tanaro namadimi-isioidiro-ri, ina mo nio aboto korowateai ato, mani kidabuti tau ato nio ororosora-ri pua. 
Mo nio aboto nama-orowateai-ri, nio ro beda dubu peteibi namadimi-ihodowa-ibiri mani kiwou aboto Ierusarema sabowa to, neibi mo ro kimabuti-bi sapuwo to peba titi se nama-imia-ibiri, taie nato anama-imeriai-biri peba titi mutu. 
Modobo nama-oi-ri neibi mo mutu atu se namabimo-ou-ri Ierusarema sabowa to. 
Mo nio aboto ido to anama-ou-ri, mabu mo ubi ie keba se Masedonia duriomoro ato edi sabowa ro na-iamo neio anama-iraturio-ri, ina nio aboto saro to anama-ou-ri. 
Etu umoro ra mo nio abato egea mere se komidiro, o tuturu tau to komidiro, womu tato kukamo tau nama-oroporeai-ri. Mabu mo ubi ie mo nio ia ro kemeiriai ioudo ata moro to. 
Nedi tau ro nato mo ubi tato ie nio abato egea mere se komidiro, ina nio nato kimeserai. Abera Naramu ubi ato, mo ubi ie nio mutu tuturu tau to komidiro. 
Kaupoti mo Epesesi sabowa ato nato anama-omidiro-ri, womu tato Ohona Kiwoiriamuti soriomu saiki nama-orobai-ri. 
Mabu mo ro edi mea woko ro na-nisioidirotiti gabo ta-gorodobura-die, sirio meamea iopu isuwoduti ri. Kaupoti sirio urubia mo aboto auna serawo ie. 
Timoti nio aboto nama-ou-ri, nu nio ro tere owaititi ate. Mo ro Abera Naramu woko beda sosoro nemesioidirotiti, nou ro ibose to emesioidirotiti. 
Ina noudo ie nu nio aboto namadi-ou-ri, modobo pua ubauba kimaragoidiro kiworohuti nou sapuwo to. Nu nio ro mo aboto miro mutu ba-dotiodorai-rimo. Nu mo ro ioudo namadi-emasebidiro-ri arua kimibiria borubi mutu namadidimo-ou-ri. 
Ina ata owera nou e, nimo ata kimibiria niama Aporosi nou sapuwo to ie. Aporosi auna se a-nemagege nou ro arua kimibiria borubi mutu nio iraturio ri. Kaupoti nu ubi tato goi nedi tau ro nato kou nio aboto. Nu a-gutura ibo, ‘Mo ro mea tau nama-owea-ri, neio mo ro nato anama-iraturio-ri.’ 
Nio kiraroweauti modobo ie, kimibiria maumo ato koko se ba-dorowotoi. Mibo tau ato aise iwagogorowado mamo, koko se gi-orowotoi-ri. 
Nio ro beda tanaro kisioidiro ra, nirimagare aise gi-owawuti-ri. 
Nio umoro ta-goi-rimo Akaia duriomoro ato Sitipani nu moto urubia mutu, neio keba urubia ie kimibiria urubia to kararapoi. Neibi durupi momuo se aise giaidodorowado-birimo, Godi edi tarena urubia ro kiwarebai aboto. Niramio, nio mo ro a-nimagege 
idaibo urubia owera gare aise gi-emedea-ri. Ina arua idaibo sosoro urubia pupuwo na-iasibowado-dumo nedi atu woko ro nato, neio owera se gi-irowidiro-ri. 
Mo kamade ta-noi Sitipani, Potunatusi, Akaikasi neibi neito na-gou-diebimo. Nio neito orowateai pua sekere, kaupoti nio bobo neibi ro girobai-bimo. 
Mo kamade ie mabu mo nio mutu atu se niro turi kimaragoidiro mutu, neibi ro toutou nimowaititi-birimo. Idaibo sosoro urubia modobo ie neio aboto meamea tanaro se kisioidiro. 
Iesu urubia Eisia duriomoro ato nato na-orowomidiro kamade owera emeiriai-dumo nio aboto imese. Akuira ra Pirisira ra ibose Iesu urubia na-iradabutiti-dumo neitiro moto ato, neio ro auna kamade owera emeiriai-dumo nio aboto. 
Imese kimibiria naminiramio ro nato na-orowomidiro, nio aboto kamade owera imeiriai-dumo. Naminiramio kororowea ato kamade beda sosoro irimatiti-dumo, nou gi-iwawuti-ri borubi kimibiria urubia aboto. 
Mo Pauro ie, nedi kamade owera ro mo ro simara tu to nisioidiro nio aboto. 
Abera Naramu etio ro nirimagare emati tato, neio Godi ro ubauba ba-miwai! 
Iesu Keriso wisa tato nirimagare nio abato ba-miamotiti. 
Nio imese Korini kimibiria urubia Iesu aboto nou ro na-gidabuti, mo edi nirimagare ro nio abato aise ba-mowamotiti. 
