﻿Epesesi.
4.
Mo ro Abera Naramu woko na-nemesioidirotiti, dibura to nou ri nedea-rimo, ina nio mo ro binio to nou ri nimediawado mea mino to korowomidiro aboto. Godi ubi beda sosoro owamo-die nio edi urubia ro na-girapoi mea se orowomidiro ri, nio idaibo sosoro ba-dirowomidiro. 
Nio keremiro kiwaboi maumo ato modobo ie sirio tau keremowabu tato se korowomidiro, mea miro keremaro tato korowomidiro, serawo samo to koi tato modobo ie, tanaro sobosobo se isioidiro mamo. Arua kimibiria urubia ro nio aboto beda ubauba tanaro kisioidiro ra nio ro ubauba to iwame mamo, nirimagare aise gi-eremati-ri. 
Nio imese kimibiria urubia Tarena Urio ro kaupoti urubia to ta-giapoi, ina noudo ie miro to ba-dirowomidiro arua kimibiria urubia mutu. 
Nimo kimibiria urubia sirio kaupoti durupi nou se ie, ina nimo niro turi ato atu Tarena Urio ro imidirotiti. Nimo Godi ro na-nirapoi-ro nou urubia to ararasoro ri, nou abato tiamo meamea tanaro nimo ro atu se woki to ti-niauri-dumo kororosioidiro aboto. 
Nimo Abera Naramu kaupoti nou se ie, kaupoti kimibiria gabo ato atu se noti niwotoi-dumo, ina obo to kiwarumiauti tanaro kaupoti nouse ie. 
Godi kaupoti nouse ie, ata pua ie, nu imese kimibiria urubia Abera ie. Imese sirio urubia nou ro iaurititi-die. Nu woko nimo keremiro maumo ato tisioidirotiti, ibose nu sirio kimibiria urubia abato imidirotiti. 
Kaupoti Iesu Keriso nirimagare maumo ato nimo erere kimibiria urubia nou ro modobo ta-niwaititi-ro erere tanaro kisioidiro aboto. 
Ina noudo ie Tarena Buka ro owera ibo aro-die, Nou ohu to na-gioro, nou ro edi sarupo urubia ro giaubo, nu neio ro saro rido aise gobodoro-rimo. Taie urubia nou ro erere se nirimagare namabu nato gimio. 
Nedi owera ro ‘Nu na-gioro’ maumo beda sosoro owapotai-die? Maumo ibo ie, Keriso Adiri sabowa rido gororuwo-ro sopu duriomoro to, nou iato bobo to aise gedea-rimo. 
Goto maumo to etu ro gimesebea, iedi atu dubu ro nou ro gioro ohu ia toboro ohu to, imese moro ato omidiro ri. 
Nedi dubu ro nouse ie urubia modobomodobo nou ia ro iwaititi erere tanaro kisioidiro aboto. Arua urubia kitiodorai urubia to giapoi, arua urubia Godi ipusu owera urubia to giapoi. Arua urubia Iesu Keriso sapuwo to mea owera kimowauti urubia to giapoi. Arua urubia Iesu urubia kemeauri urubia to giapoi, ina arua neio Godi owera kitamudiro urubia to giapoi. 
Neio Godi ro ta-giapoi nou simara urubia imododiawado ri meamea kiwarebai tanaro kisioidiro aboto, ina Keriso edi durupi ro pupuwo owaititi ri. 
Idaibo tanaro namadimo-ororosioidiro-ri, womu tato nimo kimibiria maumo ato kaupoti urubia to anamadima-ararapoi-ri, ina nimo imese Godi mere umoro atu se anamadimo-oi-ri. Ibose nimo ro mea mino to anamadimo-oromai-ri, momuo se modobomodobo anamadimo-oi-ri. Keriso beda sosoro imidirotiti mea ia se, nimo atu se idaibo sosoro anama-irowomidiro-ri. 
Nimo ro iedi tanaro ro namadimi-isioidiro-ri, nimo ido merebusere kainakaina sosoro irowomidiro-ri pua. Pe utumo kainakaina beda sosoro ra gawia ra bukopu ra ro na-iwawodorowado-dumo, nimo idaibo iwawodorowado-ri pua. Io idaibo ie karasaubuti urubia owera kirowidiro ato, bukopu ro ibo kiwodoro ie ina iato kiwosuruwo ie, karasaubuti urubia owera na-iaro-dumo nimo idaibo orowati-ri pua. Gawia ra bukopu ra neitiro ro karasaubuti kitamudiro urubia imabuti-madie. Nedi urubia ro inaina ibo isaubutiti-dumo. Neio ro sirio gabo kisioidiro ie, ina sirio karasaubuti gabo kiwaibirio ie nimo kimibiria urubia bagea gabo kibodoro aboto. 
Io nimo ro modobo pua idaibo owera gare se kimedea. Nimo ro owera arua urubia aboto karo ato nimo ro morobise owera nirimagare mutu anamadima-aro-ri. Nedi tanaro ro namadimo-osioidiro-ri, nimo nato nama-iroromowado-ri erere tanaro kisioidiro maumo ato, Keriso sosoro nato anama-irowomidiro-ri. Momuo durupi Keriso eputa ie, nimo nou durupi ie. 
Kimibiria urubia sirio nimo erere atemo ie. Ibose erere atemo durupi ato na-iamo woko nato na-isioidiro-dumo nirimagare maumo ato, edi durupi ro gamogamo Keriso ro kowaititi ie. 
Mo ro nedi umoro owera to nama-aro-ri Abera Naramu edi korosa ro neito nomia-ro nio kimowauti aboto, ibo nio Godi umoro tato urubia sosoro ina korowomidiro modobo pua. Neio abato meamea tuputupu kimaragoidiro iamo pua, imese potoro ia ie. 
Neio ro ubauba tanaro na-isioidirotiti-mo, neio kimaragoidiro patu duwoduwo ro iatimotiti-ro. Godi edi keremiro muro ro neio nakara se orowasioutiti-dumo. Mabu neio morobise umoro inaina aise ibeiouti-dumo. Neio giropu imese akau ta-geremowaititi-rimo, 
ina noudo ie morobise umoro neio abato iamo tato. Kororodiobuti tato tanaro na-isioidirotiti-mo, imese siripo tato ta-goititi-rimo. Nedi urubia ro neio siripo tanaro edi pupuwo maumo ro neito ta-godoro-rimo. Neio auna sogoi ro iwatiti erere mareamarea tanaro kisioidiro aboto. 
Kaupoti nio ro Iesu Keriso edi kitamudiro owera ro nou sapuwo to idaibo tanaro nou aratamudiro pua. 
Morobise ie nio Iesu Keriso sapuwo to owera ta-girorowai-rimo, ina morobise kitamudiro owera Keriso abato na-owamotiti nio ro ta-garatamudiro-rimo. 
Nio kebase ta-garatamudiro-rimo ibo nio tagara korowomidiro keremiro, tagara mareamarea obotama sosoro ie, nio ro kipuruti modobo ie. Nio kebase edi mino to na-irowomidirotiti, nio keremiro nakara se ubauba irimowaititi-mo. Nio auna ubi na-iamotiti ubauba tanaro kisioidiro aboto, iedi ubauba ubi ro nio neio ro a-isaubutititi-mo. Iedi karasaubuti ubi ro neio ro nio keremiro ubauba imowaititi-mo. 
Nio ibose ta-garatamudiro-rimo orio kimaragoidiro mino, 
ibose orio keremiro kiroiti aboto, orio obotama kiroiti beda sosoro ra. Nedi orio keremiro ro Godi ro gosioidiro nou simara keremiro mino to, idaibo morobise tuputupu tanaro kisioidiro, imese mareamarea tato korowomidiro. 
Ina noudo ie karasaubuti tanaro marea obotama sosoro ie, nio ro ba-dipuruti-mo, borubi kimibiria urubia mutu morobise owera to gi-eremowauti-ri. Mabu nimo atu se Iesu Keriso durupi to nararapoi-ro. 
Oro serawo koi ato ata tanaro sapuwo to, oro nedi serawo ro nou ro ubauba to aise edea mamo. Iedi serawo ro oro abato na-owamo duwo ro asiai mamo, samo to gi-oporeai-ri, 
mabu oro ro idaibo Satani bobo kemagerai ie oro nou ro ubauba to owodoro rie. 
Piro urubia neio Iesu kowasoro urubia to na-gararapoi-rimo piro tanaro aise ba-mimeserai-mo, woko se ba-misioidiro-mo. Neio modobo ie mea woko kisioidiro simara tu teibo to, ina noudo ie meamea kiwarebai tanaro amadimi-isioidiro-ri namabu tato urubia aboto. 
Nio owera karo ato nio matagoro rido karakara owera osuwoduti mamo, meamea owera se gi-orowauti-ri neio pupuwo kimowaititi sapuwo to. Nio owera beda urubia ro imerewidiro-dumo, modobo ie meana nio aboudo kimade, idaibo neio nio ro amadimi-iwarebai-ri. 
Godi edi Tarena Urio ro kamade tato owaititi mamo. Nou Godi ro gemeiriai-ro isabuna ri nio niro turi to, ibo nio nou merebusere ie ina nio nou ro ama-iapopo-ri womu saiki ato. 
Masawe kerereauri, serawo, masawe niro, keremaro, masiro ubauba korowaititi, ubauba ia kimaragoidiro arua urubia sapuwo to, nedi tau ro nato aise diwagareawado-mo. 
Kimibiria borubi aboto meamea tanaro aise gidimi-isioidiro-ri, ibose nirimagare aise gi-eremati-ri. Nio Godi ro ubauba tanaro sirio ta-gimatopeamuti, mabu Iesu Keriso aboudo orobu-die, nio aboto beda kimibiria borubi ro isioidiro-dumo ubauba, neio edi ubauba ro aise gi-imatopeamuti-ri Godi ro nio ubauba beda sosoro gimatopeamuti. 
