﻿1 Tesaronika.
4.
Naminiramio, nio abora Iesu Keriso urubia ie abora neibi ro nio a-nimagege-bimo neibi ro beda sosoro nitamudirotiti-birimo nio idaibo sosoro mino to ba-dirowomidirotiti, ina Godi nio ro kamade amadimo-owaititi-ri. Nio abora idaibo tanaro to orowomidiro ina neibi ro nio a-nimagege-bimo inaina meamea tanaro auna se isioidiro ri. 
Nio umoro ie nedi umoro owera ro neibi ro beda sosoro to naro-birimo kebase Abera Naramu Iesu nou aboudo gou-ro nio ro isioidiro ri. 
Godi ubi ie nio imese meana ia se korowomidiro nou sosoro gabo ato, simara ia orobo mutu gido-oroho-ri. 
Ibose Godi ubi ie dubu nio umoro kiamo oro simara ia orobo mea mino to gi-oworohuti-ri. 
Nio durupi modobo pua ubauba ubi tanaro nou kisioidiro aboto, io Godi umoro tato urubia idaibo sosoro ubauba tanaro neio ro isioidirotiti-dumo. 
Ibose Godi ubi tato ie idaibo sosoro tanaro oro ro kisioidiro ata dubu ubauba kowai aboto. Urubia ro idaibo sosoro tanaro na-isioidirotiti-dumo Godi ro ubauba wisa ama-iaiwo-ri neio aboto. 
Nimo Godi ro nirapoi-ro imese mea ia se orowomidiro ri nou sosoro gabo ato ina nou ubi tato ie nimo idaibo sosoro ubauba maumo ato korowomidiro. 
Ina beda mere ra nedi owera ro huru to kiedea ato ibo pua neibi kiedea-ibi huru to, nou ro Godi ia huru kemowou e, ina Godi edi Urio ro na-emeiriotiti-die nimo aboto imese tarena ia ie. 
Naminiramio nirimagare beda sosoro erematiti-dumo nou sapuwo to neibi ro modobo pua kiatiti nio aboto. Nedi tanaro ro nio Godi ro neito kebase ta-gitamudiro 
ina morobise ie nedi tau ro nato Masedonia duriomoro ato nio ro idaibo nirimagare tanaro tiwawutiti-dumo arua kimibiria naminiramio aboto. Naminiramio, neibi ubi ie nio ro idaibo sosoro tanaro auna ia se kisioidiro. 
Ina nio modobo ie pupuwo kiasibai mea muro tanaro neito korowomidiro, simara tu ra sairo ra to ba-dotobua-mo, arua rubi iaserawado mamo, nio imese sirio se simara woko aise gidimi-isioidiro-ri. Neibi ro kebase nedi tanaro ro nio aboto ta-nitamudiro-birimo. 
Nio idaibo sosoro tanaro namadimi-isioidiro-ri ina nio arua urubia iaserawado-ri pua. Kirowai tato urubia nio neio ro amadimi-imowabu-ri ibo nio meamea urubia ie meamea tanaro isioidiro-dumo. 
Naminiramio, neibi ubi ie nio buro umoro kiwai etio ra kimibiria mutu kebase na-gorowaburo-rimo neio sapuwo to. Neibi ubi tato ie nio mibo kimaragoidiro mutu korowomidiro arua urubia beda sosoro irowomidirotiti kamade tato, mabu neio ibo imaragoidirotiti-dumo karaburai ato imese karatowouti ie. 
Nimo ro ta-nimibiria-rimo Iesu ta-garaburai ina iato nou keremiro aise gowea, ina nou rie nimo ta-nimibiria-rimo Godi ro Iesu mutu kimibiria urubia na-gorowaburo-rimo atu se ama-iwameai-ri nou ia aboto. 
Neibi ro beda owera namabima-aro-ri ibo pua neibi simara owera, Abera Naramu nou owera ie. Nimo abora na-norowomidiro Iesu edi tau ato namadi-orowameai-ri, etu umoro ra nimo aise korowomidiro, nimo keba se ou-ri pua, etio ro gorowaburo-rimo kimibiria mutu neio ro amadimo-ou-ri kebase. 
Abera Naramu kaunene amadi-utura-ri, nimo ro humuko owera namadimi-irowai-ri ina ibose Godi sowake urio auna ato edi na ro imidirotiti nou owera kodu namadimi-irowai-ri, iato Iesu ro amadi-ororuwo-ri Adiri sabowa rido. Kimibiria urubia na-gorowaburo-rimo neio kebase amadi-iwameai-ri pamo rido 
ina etio ro orowomidiro nedi duriomoro ro nato kimibiria mutu iato neio ama-iwoubua-ri, iedi topira teibo ro iato namadima-aradabuai-ri tema ohu ato Abera Naramu mutu iato amadimo-ororowea-ri, taie nimo imese sirio se anama-irowomidirotiti-ri Abera Naramu mutu Adiri sabowa ato. 
Ina noudo ie nio etio ro orowomidiro mibo kimaragoidiro mutu, nedi owera ro neito keremowauti modobo ie toutou keremowaititi sapuwo to. 
