﻿1 Tesaronika.
5.
Naminiramio neibi modobo pua owera ina kiatiti nio umoro kiwai aboto nedi tanaro ro beda tau ato amadimo-ororosioidiro-ri. 
Nio auna umoro ie nedi tau ro namadi-orowateai-ri urubia Abera Naramu ro piro se amadi-iwaumo-ri, piro dubu beda sosoro to kou ra idaibo mino to amadi-ou-ri. 
Urubia ro ibo namadima-aro-ri ‘Nimo modobo ato norowomidiro boso tato ie mea se norowomidiro,’ taie iedi tau ro nato ubauba ro neio samo to ama-iwia-ri, idaibo sosoro ie urubia orobo mere temeteme ro samo to na-emowatumuti-die urubia Godi ro ubauba samo to ibo ama-iwai-ri, urubia ibo amadi-imabuo-ri. Urubia korowadaudiro moro amadimi-iosora-ri, korowadaudiro moro tato ie. 
Naminiramio nio duwoduwo maumo ato irowomidirotiti pua ina noudo ie nedi saiki ro nio nou ro imuhia-ri pua piro dubu sosoro namadi-ou-ri. 
Nio imese saiki woroworo ato irowomidirotiti, duwoduwo maumo ato irowomidirotiti pua. 
Nimo modobo pua arua urubia sosoro korowomidiro norou na-irobutiti, kiraroweauti modobo ie nimo, ibose simara durupi keremododiai mea se. 
Urubia norou duwo ato irobutiti, ibose etio ro idiotiti-dumo koko obo io neio duwo ato isioidirotiti-dumo idaibo tanaro, 
kaupoti nimo woroworo ato nirowomidirotiti ina noudo ie nimo keremiro kiwaboi modobo ie mea mino to. Nimo modobo ie durupi korowasiouti namabu teibo kirori-ma, kimibiria tanaro nirimagare tanaro mutu neitiro to aise ba-morowasioidiro-rimo. Ibose morobise kimibiria koko se ba-mirobidiro-rimo ibo Godi ro nimo ubauba aboudo anamadi-iapopo-ri, io nimo eputa korowasiouti nakomu nou se ie. 
Godi ro nimo nou ri irapoi pua saro gabo ato nou serawo oi ri ina nimo ubauba iwai ri, kimaragoidiro kaupoti nou se ie morobise Abera Naramu Iesu Keriso ro nimo ubauba aboudo anamadi-iapopo-ri. 
Nimo sapuwo to Iesu nou ri garaburai, gabo nou ro ta-gosioidiro nimo atu se orowomidiro ri nou mutu. Iesu iedi tau ato namadi-orowameai-ri, nimo pamo ato ra o korowomidiro ato ra io edi kimaragoidiro ro auna se imaragoidiro mamo nou sapuwo to. 
Ina noudo ie nio modobo ie korowarebai pupuwo korowaititi aboto, ina nio ro abora idaibo tanaro tisioidiro-dumo. 
Naminiramio, nio edi urubia ro iwaboi-dumo mea se Abera Naramu owera to, nio ro aise ba-diwarebidirotiti-mo. 
Nedi urubia ro mea mino to diauri-mo nirimagare tanaro gi-isioidiro-ri, mabu neio ro mea woko isioidirotiti-dumo nio abato. Ibose nio mea miro to ba-dirowomidiro. 
Naminiramio, nio ro ba-dimagege-mo etio ra norou se na-irobutiti, modobo ie neio woko se kisioidiro. Mea pupuwo kiwarebai ba-diaiwotiti-mo etio ro orowomidiro tere kimaragoidiro mutu, neio kimibiria pupuwo kimowaititi sapuwo to. Ibose aise ba-diwarebaititi-mo etio ra pupuwo tato iato na-orowomidiro. Namuturubi tanaro kisioidiro mutu sobosobo to aimowado mamo. 
Umoro aise gi-iamo-ri ubauba tanaro ubauba to iwame mamo. Borubi kimibiria urubia aboto ibose arua urubia aboto meamea tanaro aise gi-isioidiro-ri. 
Ibose nio abato maumo kamade aise gi-iamo-ri. 
Godi aboto kararatoro kimesere modobo pua, omuomu se gi-aratoro-ri. 
Ibose eso owera aise gi-aro-ri, etou tanaro ro kororosioidiro ra nio abato, modobo pua nio ro kidiobuti eso owera karo. Godi ubi ie nedi netewa didi tanaro peteibi ro nio ro nou kisioidiro-ibi mabu nio Iesu Keriso urubia ie. 
Ina ibose Tarena Urio ro tanaro na-isioidirotiti nou gabo nato emopai mamo. 
Godi aboudo owera kou ato, ata dubu ro edi owera ro nou korowauti ato ubauba to apoi mamo. 
Kaupoti nio ro mea se gi-eibimai-ri nou mea owera ra o ubauba owera ra, meana aise gi-irobidiro-ri, 
ubauba aise gi-ebeiomai-ri. 
Godi nakara se muro kimio dubu e nio nou ro marea tato ba-miwaititi, nio durupi urio mutu nou ro ba-miwasioutiti ubauba aboudo womu tato Iesu Keriso namadi-orowameai-ri. 
Nio Abera Godi ro girapoi-ro ina nou ro ama-isioidiro-ri nedi tanaro ro nio sapuwo to, mabu nou ro beda owera karo ra aise kisioidiro ie. 
Naminiramio, neibi sapuwo to nio kararatoro buro modobo ie. 
Naminiramio kororowea ato kamade beda sosoro irimatiti-dumo, idaibo sosoro kamade nou gi-iwawuti-ri kimibiria naminiramio aboto. 
Abera Naramu iedi pupuwo korosa ro towamo mo abato, ina noudo ie nedi peba titi owera ro imese sirio kimibiria naminiramio aboto ba-dimoputi-mo. 
Abera Naramu Iesu Keriso ro nio wisa tato se ba-miwarebaititi. 
