﻿2 Tesaronika.
3.
Niramio, neibi aboudo iana owera nou e. Neibi sapuwo to Godi imese tau aise ba-dararatoro-mo, mea owera Abera Naramu sapuwo to hio to korobodorouti aboto sirio duriomoro to, ina urubia sirio ro mea se imade ri, nio abato beda sosoro gororosioidiro-rimo. 
Neibi sapuwo to Godi nio ro sirio tau aise ba-dararatoro-mo, neibi nou ro ubauba urubia aboudo kiwasiouti-bi modobo ie. Mabu arua urubia neio kimibiria tato urubia ie. 
Kaupoti Abera Naramu morobise dubu e, nio nou ro pupuwo ama-iwaititi-ri. Ibose nio nou ro Satani aboudo ama-iwasiouti-ri. 
Neibi umoro ie nio neibi ro beda owera to nitomu-birimo, nio ro tanaro durupi to aise isioidirotiti-dumo. Ina ido durupi to ibose to amadimi-isioidiro-ri. Nedi umoro ro Abera Naramu aboudo ie. 
Nio edi keremiro ro Abera Naramu ro ba-mimeidirotiti Godi edi nirimagare maumo ro nato orowomidiro ri, ibose Keriso ro edi koko se kiwotoi tanaro ro nou ibodoro ri. 
Niramio, Abera Naramu Iesu Keriso nou sosoro gabo ato, nio mo ro a-nimowapotai, pupuwo tato kimibiria urubia aboudo ba-daragarewado-mo. Nedi urubia ro neibi edi kitamudiro owera ro neio ro ta-girowidiro-rimo, kaupoti neio ro mea se ibodoro pua. 
Mabu nio nakara se umoro ta-goi-rimo, neibi beda sosoro nimidirotiti-bimo, nio idaibo sosoro orowomidiro rie. Neibi nio abato na-nimidirotiti-bimo, neibi auna se imaragoidirotiti pua arua urubia ro iwarebai-biri, neibi simara tu mutu nimidiro-bimo. 
Ibose neibi ro arua urubia ohona didi se ihotiti pua, neio wisa aise nimowametiti-bimo. Neibi ro duwo saiki awawo woko nou nisioidirotiti-bimo simara ohona kowea sapuwo to ie, mabu neibi ubi tato ie nio ro tu to kimowahau-bi. Neibi woko nou mabu ato nisioidirotiti-bimo, neibi ubi tato ie urubia kiaserewado. 
Neibi aboudo modobo ie nio kimowapotai aboto ibo neibi iwarebai-biri. Kaupoti neibi ro nio kimowapotaidiro pua. Mabu neibi auna ubi ie neibi beda mino to nimidirotiti-bimo, nio idaibo mino to korowomidiro. 
Neibi nio mutu na-nimidirotiti-bimo, nedi sabi owera ro nio neito nitamudiro-birimo, ‘Etio ra pupuwo tato urubia woko isioidiro tato, idaibo urubia aise iwarebidiro mamo, neio sogoi ro kiwati modobo ie.’ 
Neibi ro nedi owera ro nisioidiro-bimo, mabu owera ta-nirowidirotiti-bimo ibo, nio abato kararaserewado urubia torowomidiro. Nedi urubia ro arua urubia tanaro maumo to punugo aise kiwaumudirio ie. 
Abera Naramu Iesu Keriso aboudo pupuwo korosa ta-nimidai-birimo idaibo urubia kimadowerai aboto ibo, ‘Nio edi kararaserawado tanaro ro ba-dimeserai-mo. Woko aise gi-isioidiro-ri ohona nio ro nato kowea ie.’ 
Ina niramio, ata owera nou e nio sapuwo to, meamea tanaro kisioidiro aboudo aratateawado mamo. 
Nedi peba titi ro nato neibi edi pupuwo owera ro beda urubia ro iwaruriauti-dumo, idaibo urubia nio ro modobo ie kieibimai, neio mutu aradabu mamo. Neio siripo koi modobo ie. 
Kaupoti neio nasa rubi to iapoi mamo, nio niramio ie, totomu se kimowauti modobo ie. 
Nimo Abera Naramu nakara se nou se ie, miro nou aboudo ororuwotiti-die. Erere tanaro kisioidiro maumo ato sirio tau nio nou ro miro ba-mimiotiti. Abera Naramu Iesu imese sirio tau nio abato ba-mimidirotiti. 
Ba-diauri-mo! Nedi iana owera ro na-nisioidiro awawo titi to mo ia simara tu sana ie nio ro ieibimai ri. Imese sirio peba titi na-nisioidirotiti, womu ato tu sana mo ro idaibo mino to nisioidirotiti. 
Abera Naramu Iesu Keriso ro nio imese sirio se wisa tato se ba-miwarebaititi. 
