﻿Pairimoni peba owera ie Pauro ro gemeiriai-ro.
1.
Mo masiro Pauro ie, Iesu Keriso sapuwo to urubia na-nimowautiti dibura to nou mabu ato norobai-rimo. Nimo badi neama Timoti nedi peba titi ro nou mutu nisioidiro-rido. Pairimoni neitiro oro aboto auna ia nirimagare ie, oro ata nou se ie neibi ro badi to nisioidirotiti-bimo mea owera urubia na-nimowautiti-bimo. 
Neitiro ata kimibiria medera Apia oro aboto kamade owera ibose to nemeiriai-do. Akipasi oro neitiro urio boso koroho boinana ie Iesu Keriso sapuwo to, oro aboto kamade owera nemeiriai-do. Ina Iesu patu urubia Pairimoni oro moto ato etio ro iradabutiti-dumo, nio aboto ibose to nemeiriai-do kamade owera. 
Wisa tato kiwarebai, miro mutu nimo Abera Godi, Abera Naramu Iesu Keriso mutu neitiro aboudo na-ororuwotiti-die, Pairimoni oro abato aise ba-miamotiti. 
Oro sapuwo to mo ro Godi aboto na-nararatorotiti, oro mo ro keba moro to naremotiti eso owera aise niarotiti imese sirio tau. 
Mabu oro sapuwo to owera mo ro ta-nirorowai ibo Abera Naramu Iesu edi mea owera ro oro ro na-gimibiria koko se torobidiro. Ina ata mabu nou e, Iesu edi tarena urubia ro neio imese oro ro nirimagare imatititi. 
Oro modobo ie borubi kimibiria urubia mutu naminiramio sosoro koroworohuti, ina Iesu aboudo edi meana ro na-niauri-dumo, io iedi umoro ro oro abato mea se ba-mosuruwo-ro. 
Neama, Godi urubia oro ro nirimagare na-imatititi, mo oro ro kamade nowaititi ibose pupuwo nowaititi. Auna mabu nou e, Godi edi tarena urubia ro oro ro kimibiria pupuwo beda sosoro imowaititi. 
Iesu Keriso pupuwo korosa mo abato towamo oro mo ro kemowapotai sekere ie mea tanaro osioidiro ri. 
Kaupoti oro mo ro a-nemagege nedi tanaro ro osioidiro ri nirimagare maumo ato. Mo Pauro ie, mo abora oromano buro ie. Iesu Keriso sapuwo to urubia na-nimowautiti dibura ato nou mabu ato norobai-rimo. 
Oro mo ro a-nemagege Onesima sapuwo to, nu mo karasomai mere sosoro ie. Mabu nu dibura abato na-irohotiti Iesu Keriso gabo ato mo ro nowotobowa. 
Keba se oro Onesima ro mea se owarebai pua. Abora mo nou ro mea se nowarebai, ina oro ido nou ro mea se ama-owarebai-ri. 
Onesima natonato buro ie abora oro aboto noti nemeiriai. Nu mo giropu mere ie, 
mo ubi ie nou mo abato se kateidiro. Nu mo ro korobiro sekere ie nato oro bobo ato mo kowarebai aboto, mo dibura ato na-nimidirotiti Iesu sapuwo to. 
Kaupoti mo ubi tato ie mo nakara se ata tanaro ata kosioidiro Onesima sapuwo to. Oro mo ro emediawado-ri pua mea kowarebai tanaro osioidiro ri, modobo ie oro ia simara ubi ato kosioidiro. 
Mabu boira oro Onesima ro egea mere se na-gemeserai? Etu umoro ra oro aboto orowameai ri, womu tato womu tato oro mutu iato ama-imidirotiti-ri. 
Modobo pua oro ro idaibo kimaragoidiro koworohuti ‘Onesima dorogora wisa tato woko dubu e.’ E e! Morobise ie nu oro wisa tato woko dubu e, ina abora nu oro morobise neama to ta-gararapoi, ina nu oro ro nirimagare ama-emati-ri. Nu mo ro na-niaurititi nato, nu mo morobise neama to nasorotiti, nirimagare mutu. Kaupoti mo umoro ie, nu oro ro nirimagare ama-emati-ri auna se. Oro kamade ama-oi-ri wisa tato woko nou ro beda sosoro ama-emisioidirotiti-ri. Ibose Abera Naramu kimibiria maumo ato nu oro neama ie, ina nu oro ro nirimagare ama-ematiti-ri. 
Neitiro ro Iesu woko badi to nemesioidirotiti-do. Mo umoro ie oro abato idaibo kimaragoidiro tiamo. Ina noudo ie Onesima oro ro kamade mutu ba-demaidodorai-ro. Mo oro aboto kou ato mo oro ro kemaidodorai, Onesima ibo ba-demaidodorai-ro. 
Nedi titi owera ro mo ro simara tu to nisioidiro. Oro abato nu doro na-owamo nu masiro ba-dowagare, ina mo masiro nou bobo ato ba-dedea, wisa mo ro anama-emowameai-ri. Keba se oro mo ro ta-nowarebai Iesu kowasoro dubu to ararapoi ri. Kaupoti mo ro iatiti-ri pua ibo oro mo abato nedi auna doro ro towamo. 
Ina nou mabu ato ie, mo neama buro, nedi nirimagare tanaro ro modobo ie oro ro kosioidiro, Onesima aise ba-demaidodorai, mabu oro mo mutu neitiro atu se Abera Naramu do ie. Modobo ie mo oro ro pupuwo kemowaititi nedi tanaro ro neito, mabu neitiro Iesu Keriso kowasoro dubu teibo ie. 
Oro aboudo modobo ra mo ubi tanaro kosioidiro? Mo nakara se umoro tiamo ibo oro ro ubi to ama-omidai-ri mo ro nedi owera ro niatiti nou sapuwo to. Ibose mo umoro ie mo edi ubi tanaro ro oro ro kisioidiro to ama-orohodorai-ri. 
Mo oro aboto simara se tinama-ou-ri mo kutuwa moro nou se ba-demododiai. Mabu mo auna se ti-nimaragoidirotiti ibo mo dibura rido kosuruwo ie, ina nio mo ro nato nama-iraturiomai-ri. Mabu mo umoro ie mo sapuwo to nio ro Godi auna se tararatorotiti-dumo mo dibura aboudo kosuruwo sapuwo to. 
Mo mutu edi dibura dubu ro irohotiti Epapara, nou ro mea owera urubia na-imowautiti Iesu sapuwo to, nou ro ibose kamade owera emeiriai oro aboto. 
Ibose kamade owera nedi urubia ro neibi ro emeiriai-bimo oro aboto Mareko, Arisitaka, Demasi, Ruka. Nedi na peteibi ro mo neibi ro nowarebidirotiti-bimo mea owera Iesu sapuwo to urubia kimowauti aboto. 
Abera Naramu Iesu Keriso edi wisa tato kiwarebai ro nio abato aise ba-mowamotiti. Nou se ie. 
