﻿Iemisi.
1.
Mo Iemisi ie, nedi peba titi owera ro nio aboto mo ro nisioidiro. Godi edi woko ro mo ro wisa tato se nemesioidirotiti, ina Abera Naramu Iesu Keriso woko dubu, mo nou e. Nio 12 gu Godi urubia ie duriomoro gabogabo na-gororoburutai-rimo karaho arua duriomoro ato na-goititi-rimo, nedi peba titi ro nio aboto nisioidiro. Ibose mo kamade owera ie nio aboto. 
Mo kimibiria niramio, koko kiwaibirio tanaro nio aboto beda tau ato kou ra, nio modobo ie kamade ro aise kiwati. 
Mabu nio umoro ie nedi koko tau sirio ro nio kimibiria kiwaibirio ie, ina iedi awawo kiwaibirio tanaro sirio ro nio neio ro pupuwo imowaititi rie koko se kirimowotoi aboto. 
Nio ro modobo pua nedi koko se kirimowotoi tanaro ro kimesere. Ina noudo ie nio Godi sosoro gabo ato kiroromowado, ina nio ro erere tanaro kisioidiro maumo ato imese momuo se ata ubauba tato ie, ubauba korowomidiro tanaro nio abato iamo-ri pua. 
Kaupoti nio ata abato auna muro kowamo tato, nou sapuwo to modobo ie Godi kararatoro. Ina muro Godi ro ama-aiwai-ri nou aboto. Mabu nu nirimagare ie urubia aboto, ina nou ro kemadowerai tato moro ato nou ro auna kamade mutu iaiwotiti-die urubia aboto. 
Kaupoti nedi dubu ro nou abato kimibiria aise kiamo modobo ie, modobo pua netewa teibo kimaragoidiro teibo mutu kararatoro. Mabu nio etio ra kimaragoidiro teibo mutu na-iraratoro-dumo, nio ota petata sosoro ie koriro obo ro na-iwawodorowado, giripai to kiwidiai ie, ina komiodoi obo ro iato kiwororuwo ie. 
Idaibo sosoro egea mere se kimibiria urubia neio ro modobo pua tanaro kaupoti kimaragoidiro ato kosioidiro. Ina idaibo urubia ro kararatoro ato, Abera Naramu aboudo ata wisa ata omidai-ri pua, neio kimaragoidiro teibo urubia ie. 
Ina kimibiria urubia etio ra sopu ia to na-orowomidiro modobo ie neio kamade ro kiwati, mabu neio awawo masiro mutu e. 
Abora etio ra suana sirio urubia to na-wararasoro-dumo nedi duriomoro ro nato, neio modobo ie kamade ro kiwati neio Godi ro sopu to kiwororuwo ato. Mabu iedi suana sirio urubia ro tumu kakamu sosoro ie sugamoso daimo ato na-irowotoi, 
saiki kemewea ato puara kakamu mutu aise kitemeiriai ie ina edi kakamu ro aise karaburai ie. Ina idaibo sosoro atu tanaro ibo amadimo-ororosioidiro-ri. Etio ra suana sirio mutu na-orowomidiro neio edi suana sirio ro neio aboto se na-imaragoidiro-dumo, neio namabu kimade tanaro kisioidiro moro ato keremiro nato amadimi-iasepere-ri. 
Koko kiwaibirio tanaro na-woroho-dioumo urubia aboto, ina neio koko se na-orowotoi, neio modobo ato ama-irowomidiro-ri. Nedi koko kiwaibirio tanaro ro namadimo-oroporeai-ri, Godi ro wisa womu tato keremiro ama-iaiwo-ri neio aboto. Etio ra Godi nirimagare na-emati-dumo, neio wisa Godi ro kebase ta-gimedea. 
Kaupoti urubia koko kiwaibirio tanaro ro na-iwaibirio-dumo, ubauba tanaro kisioidiro aboto, neio ro ibo utura mamo, ‘Nedi koko kiwaibirio tanaro ro ubauba tanaro kisioidiro aboto, Godi aboudo ou-diemo.’ E e. Mabu ubauba ro Godi modobo pua kowaibia, ibose Godi ro ata dubu ata owaibia-ri pua ubauba kosioidiro aboto. 
Kaupoti urubia kiwaibirio ato ubauba tanaro kisioidiro aboto, neio goino ro simara ubauba ubi mabu ato kiroboi ie. 
Ina iedi ubauba ubi ro, idaibo sosoro ie orobo niro mutu na-oroho. Ina iedi orobo ro bamuai kainai koroto ato, nedi bamuai ro nou masiro Ubauba Tanaro. Ina nedi bamuai ro nou auna koi ato, nou ro ina simara bamuai koroto ie. Nedi orio bamuai ro nou masiro Pamo. 
Mo niramio nirimagare babio, nedi owera ro nou sapuwo to nio modobo pua arua urubia ro kisaubuti. 
Imese sirio meamea tanaro, imese sirio meamea kiaiwo namabu mutu, ohu rido iroruwoidiro-die, Abera Godi aboudo ou-diomo. Nedi meamea kiaiwo namabu ro etu ro gisioidiro saiki, sagana, kiboni nou aboudo ou-diomo. Nu beda erewesegeruti-ri pua beda sosoro ra saiki, sogomi, kiboni, duwo neibi na-irimahudiriotiti-bimo. 
Nimo Godi ro orio keremiro ta-nimia-ro nou edi morobise owera ro neito. Nou ro simara ubi ato ibo gisioidiro nimo nou ia tarena urubia to iapoi ri. 
Mo niramio nirimagare babio, umoro ba-doi-mo ibo urubia dubu ro owera na-waro-die modobo pua owera karo aboto hio to karadabu, nio ro sirio tau modobo ie gare se kemedea. Ibose nio modobo pua serawo hio to koi. 
Mabu urubia serawo ro na-iworohuti-dumo neio modobo pua tuputupu gabo ato koroho, Godi ubi beda sosoro to iamotiti-die. 
Ina noudo ie nio abato beda ubauba tanaro ra nio ro kisioidiro ato nio mareamarea neito korowaititi ie, ibose nio nedi duriomoro ro nato na-orowomidiro sirio ubauba tanaro iamotiti, nio ro modobo ie edi ubauba sirio ro kiwagare, Godi edi mea owera ro nio ro mea se domidai-mo. Iedi owera ro nio giropu ato nou ro kebase ta-gibouti, ina nou ro modobo ie nio ubauba aboudo kiapopo. 
Godi edi owera ro beda sosoro aro nio ro durupi to aise kosioidiro. Ina nio ro beda tau ato irorowai-dumo owera, ibose durupi to isioidiro tato, nio idaibo nakara se arasaubuti-dumo. 
Ina etio ra Godi edi owera ro nou aboto na-irowidiro-dumo ina durupi to kisioidiro tato, edi urubia ro idaibo sosoro ie garasi ato sosoro na-ereauri-dumo iato neio sosoro kimaragoidiro rido samo to aise kararaseperai ie. 
Arua urubia ro Godi edi mea ia kitamudiro owera ro, sirio tau neio ro aise irimoputiti-dumo. Ina nedi urubia ro ata ubauba tanaro ata ro imatahiti pua. Neio ro woki imati-ri pua beda owera irowidiro-dumo ina durupi to aise kisioidiro ie. Nedi tanaro ro etio ro isioidiro-dumo, neio ro sirio tanaro kisioidiro maumo ato modobo ato ama-irowomidiro-ri. 
Urubia ro ibo na-imaragoidiro-dumo neio ro Godi edi ubi gabo ro tobodoro-dumo, kaupoti neio owera karo kororodiobuti tato, neio nakara se arasaubuti-dumo. Neio ro edi gabo ro na-obodoro-dumo ata meana ata owamo pua. 
Ina ata sosoro gabo towamo nou imese mareamarea tato ia ie. Nedi gabo ro nimo Abera Godi ro ubi to nou omadetiti ibo, nimo ro nito merebusere garamio mamio mutu mibo tau na-iauri-dumo neio kiwarebai. Ibose nimo sopu duriomoro edi mareamarea tanaro ro neio aboudo imese na to karagarewado ie. 
