﻿1 Pita.
5.
Iesu urubia kemeauri urubia nio abato na-orowomidiro, mo aboudo owera ibo ie nio aboto. Mo ibose Iesu urubia kemeauri dubu e. Iesu Keriso temeteme edi tau ato giwia, nou mo ro simara idomari to ta-niauri. Keriso gebari pere ie, nou sosoro namadi-orowawea-ri, mo, nio mutu, nimo atu se auna masiro Godi aboudo anamadimo-omidai-ri. Ina noudo ie nio mo ro binio to a-nimadowerai, pupuwo owera nio aboto ibo ou-die. 
Sipisipi kimowotoi urubia sipisipi mea mino to na-imowotoititi-dumo, Godi urubia nio ro idaibo mino to kimowotoi modobo ie. Nedi urubia ro neio Godi ro nio aboto giapoi-ro nio ro mea se emeauri rie. Nio ro nedi kemeauri woko ro morobise ubi mutu ba-demesioidiro-mo, Godi ubi beda sosoro owamo-die, ibo pua nio kimagege. Ibo pua mani aboto kimaragoidiro, kemeauri woko mea se nato kosioidiro kamade mutu. 
Nio ro edi sipisipi emeauri-dumo modobo pua nio ro owera to kiworohuti. Kimibiria urubia ro namadimi-iauri-ri nio edi meamea tanaro ro, neio ro nio mea se nato amadimi-imatiouti-ri. 
Ina noudo ie sipisipi kiwaboi auna dubu Iesu beda tau ato namadi-orowameai-ri, nio imese sirio se nou ro meana ia eputa dubu hato nato ama-iwoiti-ri. Nedi hato ro ubauba koi modobo pua, nanito nanito aise ama-iamotiti-ri nio abato. 
Ina ibose pupuwo owera orio urubia nio aboto ibo ie. Iesu urubia etio ro emeauri-dumo, neio owera aise gi-irowidiro-ri. Ibose nio keremowabu tato mino to ba-doroworohuti-mo. Mabu owera keba se ta-gisioidiro-rimo Tarena Buka ato ibo, Godi ro keremowabu urubia gabo imoputi-die, kaupoti nou ro keremowabu tato urubia aboto wisa tato nirimagare auna ia se iaiwotiti-die. 
Ina noudo ie nio modobo ie sopu to korowororuwoidiro, Godi edi pupuwo korosa ro nou maumo ato, Godi simara ubi tau ato nio nou ro ohu to kiwioro aboto. Nio nou ro auna nirimagare timatiti-die. 
Ina noudo ie nio beda mutu mibo patu ro iamo, Godi aboto se ba-diaiwo-mo. 
Mea se! Tanaro kisioidiro maumo ato modobo ie kororodiobuti, ibose kiraroweauti modobo ie. Nio nasa dubu Satani serawo tumu na sosoro ie, serawo iamo mutu iapeidirotiti urubia iho rie. 
Ina noudo ie kimibiria to koko se ba-dorowotoi. Satani edi ubi ro binio to ba-demowabeouti-mo. Mabu nio umoro ta-goi-rimo keba se ibo, nio kimibiria naminiramio sirio duriomoro ato na-orowomidiro atu sosoro temeteme tiauri-dumo. 
Ina abora nou ba-demaragoidiro-mo nio egea mere se mibo maumo ato amadimo-ou-ri. Godi imese wisa tato kiwarebai dubu e, ido nio nou ro modobomodobo nato ama-iwaititi-ri. Nio nou ro koko se ama-iwotoburio-ri, ina koko iato ama-imowaititi-ri. Nou ro girapoi-ro nedi womu tato womu tato meana ro iwamo-die, Iesu Keriso aboudo nio ro nou kimidai aboto. 
Imese pupuwo korosa womu tato womu tato nou abato ba-mowamotiti. Ibose ba-mororosioidiro-mo. 
Nedi peba titi kainai ro mo ro nisioidiro, ina mo Sairasi ro nowarebai. Mo umoro ie ibo nou ro beda owera karo ra aise kisioidiro ie. Nou mo kimibiria neama ie. Mo ro nedi peba titi ro nou mabu ato nisioidiro, mo ubi ie nio sirio tau Iesu Keriso sapuwo to kimibiria tanaro pupuwo kiwaititi. Mo ro beda owera nisioidiro Godi edi wisa tato nirimagare ro nou sapuwo to, io morobise owera nou se ie. Koko se nato ba-dorowotoi, huru to orowame mamo. 
Nedi urubia ro Godi ro ibose na-girapoi ina Babironi sabowa ato na-orowomidiro, neio ro emeiriai-dumo kamade owera nio aboto. Ibose mo edi mere ro Mareko kamade owera nou ro ibose to emeiriai nio aboto. 
Nio nakara se tu kamade mutu ba-deremamude-mo. Nio etio ra Iesu Keriso ro na-gidabuai, Godi edi miro ro nio abato aise ba-mowamotiti. Nouse ie. 
