﻿2 Pita.
2.
Godi ipusu owera urubia keba ia tau ato Isiraere urubia abato ta-gorowomidiro. Ibose neio abato Godi ipusu owera karatigi urubia iato ta-gorowomidiro. Neio ro morobise owera imowautiti pua, karasaubuti owera imowautiti-mo. Ina nedi atu sosoro tanaro ro nio abato karasaubuti kitamudiro urubia ro amadimi-isioidiro-ri. Neio ro bagea kitamudiro nio aboto piro se amadimi-iwodoro-ri. Neio edi karasaubuti kitamudiro owera ro urubia edi mea kimibiria ro amadimi-iporeawado-ri. Nedi urubia ro auna ia Abera Naramu ro neio sapuwo to auna wisa ta-gaiwai neio iapopo ri. Kaupoti nou neio ro ibo amadima-aratiouti-ri, ‘Mo umoro pua iedi dubu ro.’ Nedi urubia ro neio ro urubia tuturu tau to isaubuti-ri pua, iedi tanaro ro neio ro aise namadimi-isioidiro-ri, ina iedi mabu ro nou ato, neio Godi ro saiki ata ama-imadibiai-ri. 
Neio ro edi siripo tanaro ro namadimi-isioidiro-ri, ina sirio kimibiria tato urubia ro amadimi-iauri-ri, ina nou mabu ato ie Godi edi morobise gabo ro urubia sosoro gabo ato masiro ubauba amadimo-owaititi-ri. 
Nedi karasaubuti urubia ro neio ro urubia edi na to namadimi-itamudiro-ri, nedi owera ro neio ro nakara se gisioidiro-rimo, nio edi mani ro namabu mutu karasaubuti mino to imade rie. Nedi urubia ro ubauba wisa Godi ro ama-imio-ri, keba ia se ta-gimedea. Neio ro edi ubauba wisa ro namadimi-imade-ri Godi ro timerebidiro-die sianu, simara tau emou-dumo. Auna ubauba tau tou-die saiki ata neio nou ro ama-iohiai-ri. 
Ba-dimaragoidiro-mo, nio umoro neido doi-mo. Nio mo ro a-nimowapotai nedi urubia ro neio Godi ro saiki ata ubauba ama-iporeai-ri. Mabu Godi sowake urio sirio, ubauba tanaro etio ro gisioidiro-rimo neio wisa, gabo Godi ro imopai pua, imese ubauba ta-giwai, sisibo ia bobo goro to aise giherai. Taie magere aise gimopai. Neio ro womu tau koto ioudo emasebidirotiti-dioumo, simara ubauba wisa kimade aboto ie. 
Keba urubia nedi duriomoro ro nato na-irowomidirotiti, neio Godi huru kemoworoho urubia ie. Abata obo Godi ro na-gemeiriai-ro, urubia sirio iwasiai pua, nou ro aise giopiauti. Neio Noa ro ta-imowautiti meamea tuputupu tanaro kisioidiro sapuwo to. Ina Godi ro Noa kawakawa gowarebai, keremiro nou gomia 7 urubia mutu. 
Godi ro ibose Sodom ra Gomora ra sabowa teibo ubauba wisa na-gimia-ma neio ubauba tanaro kisioidiro sapuwo to, era to aise gimusubua-ma, ata nakomu ata ararasoro pua, imese aise giporeai-ma. Idaibo awawo tanaro Godi ro na-gisioidiro, urubia nato eremasibai rie, ibo ido Godi huru kemoworoho urubia neio nou ro idaibo mino to ama-iworohuti-ri. 
Kaupoti Aberaham aramu Roti, nedi ubauba ro nou aboudo Godi ro nou ia se gowadau Sodom sabowa rido. Mabu Roti mea tuputupu dubu e, nou ro iedi sabi kisebo urubia ro na-iaurititi ubauba tanaro sirio na-isioidirotiti-mo, nou neio ro auna mibo omiotiti-mo. 
Nedi ubauba tanaro sirio ro Roti ro simara idomari to na-iaurititi, ibose simara gare to ubauba owera na-irowidirotiti, nou urio neio ro idaibo adotiti-mo. Mabu neio ro edi tanaro ro na-isioidirotiti-mo, imese siripo ia tanaro isioidirotiti-mo. Ina Godi ro Roti neio aboudo aise gowagare. 
Godi aboudo tanaro koko pua nou ubi tanaro se kisioidiro urubia nou ro koko kiwaibirio tanaro aboudo kiwagarewado ie. Ibose nou aboudo koko pua ubauba tanaro urubia kirobidiro, iana koto saiki emasebidiro ri. Neio iato na-eremasebidiro-dumo, ubauba wisa kimade ta-gatamuai-dumo. 
Mareamarea ubi tanaro etio ro isioidiro-dumo, ina Godi edi ubi tanaro ro na-iseiotiti-dumo, nedi owera ro Godi ro wisa kimio sapuwo to, nou morobise ia owera ie nedi urubia ro neio sapuwo to. Neio ro Godi aboudo auna ia ubauba wisa amadimi-imade-ri. Nedi karasaubuti kitamudiro urubia ro neio auna keremowabu urubia ie, neio simara sapuwo to se keremaragoidiro ie. Neio ro awawo urio awawo masiro mutu tere kimati pua, neio ro ubauba owera karo kawa aise karo ie, ubauba neito aise iwaititi-dumo. 
Kaupoti Godi edi sowake urio sirio ro neio ata pupuwo korosa mutu irowomidirotiti, neio edi pupuwo korosa ro imese pupuwo ia ie. Nedi karasaubuti kitamudiro urubia ro neio mutu keremotobowa ato modobo pua. Ina Godi edi sowake urio ro neio ro nedi awawo urio ro kiasoro pua Godi sosoro gabo ato. 
Sirio tanaro sapuwo to neio imese umoro tato ie, kaupoti nedi tanaro sirio ro neio ro owera to ubauba iwaititi-dumo. Neio soka ra giro ra sosoro ie, durupi ubi tanaro kimaragoidiro tato se na-isioidirotiti-dumo. Tumu giro simara mamio ro na-girotuti-rimo urubia ro ido kiopiauti aboto ie, nedi urubia ro neio idaibo sosoro ie. 
Neio ro edi ubauba na-isioidiro-dumo arua urubia aboto, wisa neio aboto Godi ro ama-iwame-ri. Neio kiho kidio paease siripo tato se isioidirotiti-dumo. Neio auna ubi ie idaibo tanaro kisioidiro. Nedi karasaubuti kitamudiro urubia ro neio nio mutu na-iradabutiti-dumo, marea obotama sosoro ie. Nio neio ro idaibo ubauba iwaititi-dumo ibose siripo iwaititi-dumo. Neio auna ia ubi ro iamotiti durupi ubauba ubi tanaro isioidiro ri, idaibo soriomu kisioidiro, kidio, upo tanaro kisioidiro. 
Nedi urubia ro arua urubia upi neio ro idomari to se kimaipirio ie, idomari neio aboudo kiaubo pua. Neio ro ubauba tanaro kisioidiro aboudo korodiobuti pua, imese sirio tau noti isioidirotiti-dumo. Nedi karasaubuti urubia ro pupuwo tato kimibiria urubia poinai neio ro imaremo-dumo poinai ro irobo rie. Neio niro turi auna se gitamudiro-rimo namabu sogoi ro kiwati aboto. Nedi urubia ro Godi ro gabo kebase tau se ta-gimesioidiro, saiki ata nou aboudo ubauba amadimi-iwia-ri. 
Neio ro tuputupu gabo tau se ta-gemeserai-rimo, Baramu Beio nu edi gabo gosowa nou emamaro-dumo. Isarena na-imaiwo Baramu ro aise gimade, Isiraere urubia imini owera to ubauba iwai ri. Mabu nou mani sogoi ro owatiti. 
Kaupoti Godi ubi ato Baramu doniki ro gotuputai ibo, ‘Oro idaibo ubauba tanaro isioidiro.’ Doniki owera karo pua abora se garo, urubia dubu sosoro garo. Taie iedi owera ro Godi ipusu owera dubu Baramu nou ro na-girorowai, edi kawakawa tanaro ro kisioidiro aboudo doniki ro aise godiobo. 
Nedi karasaubuti kitamudiro urubia ro obo sosu sosoro ie, ina nedi obo sosu ro nato obo omidiro pua, imese ororo ia ie. Ina ibose neio wiawia sosoro ie auna saiki tau ato, gawia egea se na-ihuduti-die daroho nato aise ou-ri pua. Ina duwoduwo ibi gugu imese sisibo ia ie neio imasogoro-die. 
Mabu nedi urubia ro neio owera karo ato auna keremowabu e, ibose neio owera pararaparara karo kawa karo ie. Karasaubuti kitamudiro urubia ro arua urubia sairo rido na-imududirotiti-dumo, urubia aise iraidodorowadotiti-dumo. Taie neio edi ubi tanaro ro neio ro aise isioidirotiti-dumo. Neio ro auna se orio kimibiria urubia poinai imamo-dumo, ina neio ubi tanaro aise isioidirotiti-dumo. Orio kimibiria urubia ro kakate gabo dese to na-gimesere-rimo, idaibo mino to iageawado-dumo durupi ubauba ubi tanaro kisioidiro aboto orowame ri. 
Nedi karasaubuti kitamudiro urubia ro ibo iaro-dumo, ‘Nio durupi ubi tanaro aise gidimi-isioidiro-ri, ata sabi tato ie.’ Kaupoti nedi karasaubuti urubia ro neio ia imese ubauba tanaro sowake urubia ie, ubauba tanaro sowake neio ro irohotiti-dumo. Mabu urubia dubu ubauba ro na-oworohuti, iedi ubauba ro nou ubi tanaro urubia dubu ro aise kosioidiro ie. 
Ina Iesu Keriso nimo atu Abera Naramu, edi na ro niapopo-ro ubauba aboudo, nou umoro etio ro goititi-rimo, duriomoro urubia iedi marea tanaro aboudo ta-garagare-rimo. Kaupoti urubia edi mareamarea tanaro sirio ro nou aboto beda tau ato korowameai ra, ina iedi mareamarea tanaro ro poinai sosoro ie neio ro namadimi-iwakopeamuti-ri, ina namadimi-iwororuwo-ri, nirimagare iedi urubia ro keba ia se modobo ato irowomidirotiti pua, ina abora imese ubauba ia se orowomidiro. Ibo pua keba ia se beda mino to gorowomidiro. 
Mabu nedi urubia ro neio ro Godi edi tuputupu gabo ro umoro koi tato rasiri ie, io modobo ie. Mabu etio ra nedi gabo ro umoro koi tato, neio ubauba wisa kainai ie Godi aboudo namadimi-iwia-ri. Kaupoti etio ra nedi gabo ro umoro na-goi-rimo, ina ido Godi edi tarena owera ro huru na-gemowou-rimo, auna ia ubauba wisa Godi aboudo nou amadimi-iwia-ri. 
Totomu owera Tarena Buka ato idaibo urubia morobise to giwauti, Soka bekoko na-iromoruti, nu ina simara bekoko aise kimowameai ie. Ina ata muro owera idaibo urubia neio sapuwo to ibo ie, Giro batina obo to kowiouti ato, nou sigibere ato ina aise korowawodorowado ie. 
