﻿1 Ioane.
3.
Ei! Nio gare neito ma-diedea-rimo! Nimo Abera ro auna ia nirimagare momuo se nimia-ro nimo nou merebusere to kararasoro aboto. Ina nimo nou e nou merebusere ie. Kimibiria tato urubia ro Iesu mea se neio ro eibimai pua, ina noudo ie nimo neio ro ieibimai pua ibo nimo Godi merebusere ie. 
Nirimagare babio abora nimo Godi merebusere to nararasoro-dumo. Nimo beda sosoro nama-orowomidiro-ri umoro mea se iwai pua. Kaupoti nimo umoro tiamo Iesu korowapotai tau nimo nou sosoro anama-orowomidiro-ri. Mabu nou abora beda sosoro omidiro-die nimo ro anamadimo-owea-ri. 
Ina etio ro imaragoidiro-dumo nedi tanaro namadimo-ororosioidiro-ri, neio modobo ie ubauba aboudo karatateawado Iesu beda sosoro imidirotiti ubauba tato. 
Ubauba tanaro etio ro isioidiro-dumo Godi edi sabi ro neio ro isebo-dumo, mabu ubauba tanaro kisioidiro ato maumo ibo owamo sabi kisebo tanaro ie. 
Ina nio umoro ta-goi-rimo Godi ro kohodowa dubu ta-gorowapotai-ro imese urubia ubauba imatopeamuti ri. Iesu ata ubauba tanaro tato dubu e, 
ina nou mabu ato ie urubia etio ra Iesu mutu na-iradabutiti-dumo neio ubauba tanaro kisioidiro pua. Etio ra ubauba tanaro na-isioidiro-dumo neio ata umoro tato ie Iesu. 
Merebusere nirimagare babio, nio amia urubia ro kisaubuti modobo pua erere tanaro sapuwo to, mabu etio ro isioidiro-dumo tuputupu tanaro io tuputupu urubia to neio ro se ararasoro-dumo, Iesu idaibo sosoro tuputupu dubu e. 
Satani ro keba ia tau ato gatamuai womu tato abora nou ro ubauba tanaro noti isioidirotiti. Etio ro isioidirotiti-dumo ubauba io neio Satani patu urubia ie. Kaupoti Godi edi mere ro nou ri gorowapotai-ro Satani edi woko sirio ro na-gisioidiro nou ro itotouti rie. 
Godi ro etio iasoro merebusere to neio ubauba inaina kisioidiro pua, mabu Godi ro neio niro turi ato orio keremiro ta-gibouti, ibose neio Godi merebusere to imese nato ta-gararapoi-rimo, ina nedi urubia ro ubauba tanaro isioidiro-ri pua. 
Etio ra isioidiro tato tuputupu tanaro io neio Godi merebusere pua, ina ibose etio ra urubia nirimagare imati tato, io neio ibose Godi merebusere pua. Idaibo tanaro nimo ro na-niauri-dumo nimo umoro koi ie ibo Satani merebusere etio ra ina Godi merebusere etio ra. 
Nimo nirimagare keremati modobo ie. Nedi owera ro nio ro keba se nou girowai-rimo. 
Keina Satani namutuna ie nou simara neama na-gopia. Nou ro edi tanaro ro na-gosioidiro nio ro nou ematiouti ate! Mabu boira nou simara neama na-gopia? Mabu nou ro edi tanaro ro na-gisioidiro meana pua, ubauba ia ie, ina neama ro edi tanaro ro na-gisioidiro tuputupu ia ie. 
Ina noudo ie kimibiria borubi nio orowadaudiro ate kimibiria tato urubia ro nio namadimi-ihoio-ri. 
Nimo umoro ta-noi-rimo ibo nimo asaso pamo maumo ato orowomidiro pua, morobise keremiro maumo ato norowomidiro, mabu kimibiria borubi mutu nirimagare neremati-dumo. Etio ra nirimagare eremati tato neio asaso Godi sosoro gabo ato pamo urubia sosoro irobu, keremiro tato ie. 
Etio ro ihoio-dumo urubia neio idaibo ie Godi sosoro gabo ato neio ro urubia iopiauti-dumo, ina nimo umoro tiamo kororopiauti urubia abato womu tato keremiro iamo-ri pua. 
Nimo idaibo sosoro nimowapotai-die morobise nirimagare ibo ie, Iesu simara keremiro ta-gaiwai nimo sapuwo to. Ina nimo modobo ie kimibiria borubi sapuwo to simara keremiro kiaiwo. 
Kimibiria urubia etio ra namabu sirio mutu na-orowomidiro ina borubi kimibiria urubia mibo mutu na-orowomidiro idomari to se namadimi-iauri-ri, Godi edi nirimagare ro neio abato a-iamo ra? E e. Iamo-ri pua. 
Merebusere, nirimagare babio nimo nirimagare owera to se owawuti-ri pua, modobo ie nimo ro nedi nirimagare ro durupi to aise kowawuti. 
Nimo nirimagare keremati ato arua urubia mutu nimo umoro ie ibo nimo ro morobise gabo nobodoro-dumo. Ina nou mabu ato ie nimo niro turi ato sirio tau miro ro kiamo ie, ata tere kimaragoidiro tato ie Godi sosoro gabo ato. 
Nimo kimaragoidiro ato ibo, ‘Etu umoro ra nimo ro ubauba nisioidiro-dumo,’ kaupoti nimo ro isioidiro pua, Godi auna umoro ie nimo niro goro kimiauri aboto, nimo miro nou ro ina kimowame ie. Erere tau ato imese sirio tanaro na-ororosioidiro-dumo Godi nou auna umoro ie. 
Kimibiria namuturubi nirimagare babio, nimo keremasibai ato ibo, ‘Nimo ro ubauba isioidiro pua,’ nimo abato miro ro kiamo ie, ibose nimo kararatoro ato Godi aboto siripo ri imatarumawado-ri pua nou sosoro gabo ato. 
Nimo ro nou aboto beda namabu ri kararatoro ra, nou ro nimo kimio ie, mabu nimo ro nou owera ti-nibodoro-dumo ibose nou kamade ti-nowaititi-dumo. 
Godi ro nimo keba se ta-nimowapotai-ro netewa teibo tanaro teibo kisioidiro-ma aboto. Nimo modobo ie kimibiria kiamo nou mere Iesu Keriso sapuwo to, ina ata nou e nimo nirimagare keremati modobo ie arua kimibiria urubia mutu. Nedi owera ro nou sapuwo to Iesu ro keba se ta-nimowapotai-ro. 
Etio ro ibodoro-dumo Godi edi owera ro neio Godi mutu orowomidiro, ibose Godi neio mutu tomidiro. Nimo umoro beda sosoro koi ra ibo Godi nimo abato na-omidiro? Mabu nou ro Tarena Urio ta-gemeiriai-ro nimo aboto abora tomidiro nimo abato. 
