﻿1 Ioane.
5.
Etio ro na-imibiria-dumo ibo Iesu nou Godi ro kohodowa dubu e, io neio Godi merebusere to ararasoro-dumo. Etio ro emati-dumo Abera Godi nirimagare, neio ro nou merebusere ibose to imati-dumo nirimagare. 
Godi nimo ro nirimagare na-nemati-dumo ina nou owera kibodoro ato, nimo umoro neito ti-norowaititi-dumo ibo nou merebusere nimo ro morobise nirimagare ti-nimati-dumo. 
Godi owera na-nibodoro-dumo nimo ro nou nirimagare nemati-dumo. Godi owera koko pua kibodoro aboto, 
mabu nou edi merebusere sirio ro neio aboudo modobo ie duriomoro tanaro sirio kiwororuwoidiro aboto. Nimo edi kimibiria tanaro ro duriomoro tanaro patu neito niwororuwoidiro-dumo. 
Etio ro imibiria-dumo ibo Iesu nou Godi mere ie, io neio ro se iwororuwoidiro-dumo duriomoro tanaro patu, arua urubia ro modobo pua kiwororuwoidiro. 
Iesu Keriso na-gomidiro nedi duriomoro ro nato nou durupi Ioane ro obo to ta-gowarumia, io nou se pua, ina nou durupi rido karima ta-gosuputi pamo na-gowea. 
Tarena Urio morobise ie, nou ro timowautititi ibo Iesu nou paea dubu to goroho. Tarena Urio nakara se pua Iesu na-owauti, ibose nedi tanaro teibo ro na-gororosioidiro-rido, nou durupi obo to Ioane ro na-gowarumia, ina nou durupi rido karima na-gosuputi, neibi ro Iesu atu se gowauti-birimo ibo nou paea dubu to goroho nato. 
Urubia ro karo dorogora owera, auna nakomu pua nimo ro kimibiria ie, kaupoti Godi ro karo owera auna ia nakomu e, nimo ro modobo ie morobise to kimibiria, ina nou ia ro ta-nimowauti-ro nou simara mere sapuwo to. 
Etio ro imibiria-dumo Godi edi mere ro nou sapuwo to, iedi morobise owera ro Godi ro na-imowauti nou sapuwo to neio niro turi ato tiamo. Etio ra kimibiria tato Godi ro owera na-imowauti nou mere sapuwo to, io neio ro Godi karasaubuti dubu to asoro-dumo. 
Godi ro nimo keba se ta-nimowauti-ro ibo nimo ro womu tato womu tato keremiro nou aboudo ta-nowea-rimo, ina edi keremiro ro nou mere aboudo owamo-die. 
Godi mere etio abato omidiro nedi keremiro ro neio abato towamo. Ibose Godi edi Mere ro etio abato omidiro tato, iedi keremiro ro neio abato owamo pua. 
Godi edi mere ro nou sapuwo to nio na-imibiria-dumo mo ro nio aboto nisioidiro nedi owera sirio ro, nio umoro oi ri ibo womu tato keremiro nio abato towamo. 
Godi aboto nimo tere tato nararatoro-dumo, nou ro nimo kararatoro owera ti-nimerewidirotiti-die nou ubi tanaro maumo ato na-owamo. 
Ina nimo umoro kiamo ato ibo nimo kararatoro owera Godi ro ti-nimerewidirotiti-die, nimo umoro ie beda meamea ubi ato kararatoro ra nimo ro wisa kowea ie nou aboudo. 
Nio ro na-owea-dumo ata kimibiria boinana ubauba na-wosioidiro, nio ro modobo ie nedi namutuna ro nou sapuwo to Godi kararatoro, ina nou ro nou womu tato keremiro komia ie. Arua ubauba tiamo urubia ro kisioidiro ato neio Godi ro imese kiasiai ie, korowameai gabo tato ie. Nedi namutuna ro nou ro idaibo ubauba na-wosioidiro nou sapuwo to mo ro imowapotai pua nio ro araratoro ri Abera. 
Ata ubauba tanaro ata meana ato owamo pua, neio imese ubauba ia ie, kaupoti arua ubauba kisioidiro ato nio Godi ro imese iasiai-ri pua. 
Nimo umoro ie Godi merebusere ro ubauba inaina kisioidiro pua. Godi edi mere ro nou ro iwasioutititi, neio Satani ro modobo pua ubauba kiwaititi. 
Nimo umoro ie nimo Godi merebusere ie. Kaupoti arua urubia nedi duriomoro gebari ro nato na-orowomidiro, neio Satani pupuwo maumo ato torowomidiro. 
Nimo umoro ie Godi edi mere ro ta-gou-ro, nou ro gabo ta-nimodobura-ro nimo ro morobise Godi umoro koi aboto. Ina nimo morobise Godi abato norowomidiro, ibose nou mere Iesu Keriso nou abato norowomidiro. Morobise Godi nou se ie, womu tato keremiro mabu dubu e. 
Merebusere nirimagare babio, mea mino to ba-deremowotoi-mo, orora aboto orowaro mamo. 
