﻿Iudi.
1.
Mo Iudi ie, nedi peba titi owera ro mo ro nisioidiro Iesu urubia aboto. Mo Iesu Keriso wisa tato woko dubu e, ibose mo Iemisi neama ie. Godi ro edi urubia girapoi nou ia urubia to ararasoro ri, nedi peba titi ro nio ia aboto nisioidiro. Nio Abera Godi ro ta-gidabuai, nio nou ro nirimagare imatiti-die. Nio Godi ro ubauba aboudo tiwasioutititi womu tato Iesu neito namadi-orowameai-ri. 
Wisa tato kiwarebai tanaro, miro, nirimagare nio niro turi ato auna se ba-miamotiti. 
Namuturubi nirimagare babio, kebase mo ubi ta-gowamo ata owera nio aboto emeiriai ri. Nimo Iesu Keriso sapuwo to na-nimibiria-rimo, nimo Godi ro nou sapuwo to niapopo-ro ubauba aboudo. Ina mo ubi ie nedi kiapopo tanaro ro owera nou sapuwo to kisioidiro. Kaupoti nedi tanaro ro mo ro osioidiro pua. Mo ina na-nimaragoidiro modobo ie mo ro peba titi aise kisioidiro nio umoro kiwai sapuwo to. Nio mo ro abora binio to nou ri nimagege koko se irimowotoi ri, morobise owera Iesu Keriso sapuwo to na-nimibiria-rimo nimo ro nou kowairiawado modobo ie. Godi ro nedi morobise owera ro nou edi tarena urubia ro neio aboto kaupoti tau to imese gaiwai-ro imese tau sapuwo to. 
Modobo pua nedi morobise owera ro arua urubia ro ata mino to kowauti. Nio aboto nedi umoro owera ro mo ro nou ri nisioidiro, mabu nio aboto arua urubia piro se ta-giririmudurai-dioumo. Neio nakara se aro-dumo ibo neio kimibiria urubia ie, kaupoti neio aratigi-dumo kimibiria urubia to na-wararasoro-dumo. Nedi urubia ro neio sapuwo to Tarena Buka ato kebase giwapotai-rimo ibo, neio Godi ro ubauba wisa ama-imio-ri. Neio ro Godi emaragoidirotiti pua. Nedi urubia ro neio ro Godi edi wisa tato nirimagare ro ubauba mino to ewesegerewado-dumo. Neio ibo imaragoidirotiti-dumo siripo tanaro auna se kisioidiro modobo ie. Abera Naramu Iesu Keriso nimo ia kaupoti eputa dubu nou se ie. Kaupoti nedi urubia ro Iesu Keriso neio ro emowabetiti-dumo. 
Ina nio umoro sapuwo to nio kebase umoro ta-goi-rimo netewa didi tanaro peteibi keba ia se na-gororosioidiro-birimo. Mo ubi ie nio mo ro ina umoro kiwai. Isiraere urubia wisa tato woko na-isioidirotiti-mo Isipi duriomoro ato, neio Abera Naramu ro mea mino to giwosuruwo-ro. Neio na-woutiti-rimo ipi ato, arua ro nou owera imibiria pua. Taie nou mabu ato ie neio Abera Naramu ro aise iopiautititi. 
Ibose arua sowake urio sirio nio ro ma-dimaragoidiro-mo, neio erere woko Godi ro ta-gimio mea mino to isioidiro ri. Kaupoti neio ro Godi ubi tanaro a-gimasaudai-rimo. Neio arua simara mea komidiro duriomoro ro imese gemeserai-rimo. Ina noudo ie neio Godi ro sisibo ia ibi gugu to neito giwodoro womu tato womu tato seni to na-gimatahiriawado iato aise tirowomidirotiti. Neio ro edi auna koto saiki ro nou emotoititi-dumo, ina ioudo namadi-iwosuruwo-ri taie era paruo to aise ama-iherai-ri. 
Ina ibose mo ubi ie nio umoro kiwai Sodom ra Gomora ra sabowa teibo arua sabowa mutu gomo ato na-giamo, neio aboto beda ubauba tanaro ro gororosioidiro-rimo. Nimo neio aboudo keremoputi modobo ie womu tato womu tato era paruo sapuwo to, mabu neio ro imese ata sosoro siripo tanaro auna ia se isioidirotiti-mo. 
Iedi karasaubuti urubia ro nio aboto na-godoro-rimo, neio ro idaibo tanaro tisioidiro-dumo, durupi nakara se ubauba irimowaititi-dumo arua urubia mutu na-irohotiti-dumo. Mabu neio bagea hiwo owera to iremowautiti-dumo ibo, ‘Nio ro nedi tanaro ro ba-disioidiro-mo, ubauba tato ie.’ Ibose nedi urubia ro neio ubi tato ie Godi owera kirowidiro, auna se ibeoutiti-dumo. Neio ro owera to sowake urio sirio ubauba iwaititi-dumo. 
Keba ia tau ato Godi edi sowake urio ro auna to edi na ro ararasorotiti Maikoro, Mose pamo durupi kemoba sapuwo to nu Satani mutu owera to ta-gararaudurai-rido. Maikoro nu auna sekere ie, kaupoti Satani nou ro owera to ubauba nato owai pua. Nou ro ibo, ‘Oro ubauba wisa Abera Naramu ro ama-omia-ri.’ 
Nedi karasaubuti urubia ro ata sosoro ie. Neio ro sowake urio umoro oi pua, ina neio ro owera to ubauba iwaititi-dumo. Nedi urubia ro neio soka ra giro ra sosoro irohotiti-dumo, kimaragoidiro to etou tanaro kiraremaidiro ra, iedi tanaro ro dorogora se aise kosioidiro ie. Neio ro idaibo mino to pamo oworoho-dioumo keremiro imese moro to kiporeai aboto. 
Auna ia ubauba nedi urubia ro neio aboto ama-ereredea-ri, mabu neio ro Keina edi gabo ro nato gotobowa-dumo simara neama na-gopia. Neio ubauba maumo to imese godoro-rimo, Baramu beda sosoro gosioidiro. Neio auna ubi ie mani kimade, Baramu ro beda sosoro gosioidiro, Isiraere urubia isarena na-gimaiwai-rimo. Ibose Kora ro urubia ta-gimudo Abera Naramu owera neio ro a-giwaruria-rimo, ina Godi ro neio nou ri gipisiamuti. Nedi karasaubuti urubia ro urubia neio ro ibose to imudo-dumo Godi owera iwaruriauti ri, ina ibose nedi karasaubuti urubia ro Godi ro ama-ipisiamuti-ri. 
Karasaubuti kimibiria urubia nio mutu na-waradabu-dumo, nedi karasaubuti urubia ro nio neio ro marea iwaititi-dumo. Nedi ohona ro neio ro siripo mutu iho-ri pua, arua urubia aboto imaragoidiro-ri pua. Ibose nedi urubia ro ubauba sipisipi kimowotoi urubia sosoro ie. Neio simara durupi eremaragoidirotiti-dumo, sipisipi mea se imowotoi-ri pua. Nedi urubia ro neio nakara se orowarebaititi-dumo, arua urubia neio ro iwarebai-ri pua. Saiki auna se kotobowa ato neio daroho bubu sosoro ie, gawia kihudurai ato daroho aise eretei-ri pua. Mabu neio ro bagea owera karo ie, tanaro aise ororosioidiro-ri pua. Nedi urubia ro deimi ota sosoro ie, deimi iopu simara tau ato iasesuti-ri pua, sipi mutu ta-gaubai-rimo, imese pamo ia ie. 
Nedi urubia ro bukopu eputa sosoro ie, nedi bukopu gesagesa ro ota petata, ota puara soso mutu, poto to aise kiwidiawado ie. Nedi urubia ro siripo tanaro idaibo mino to isioidirotiti-dumo. Idaibo urubia owera aise irowidiro mamo, mabu neio kerewai kerewai kiboni sosoro ie. Idaibo tanaro urubia Godi ro kebase ta-gimohodowa duwoduwo ia ibi gugu neio womu tato womu tato iato ama-irowomidirotiti-ri. 
Inoki orora ie Adam. Nou 6 nasaio kebase ta-gorowomidiro ina nu 7 ie. Nedi karasaubuti urubia ro abora na-orowomidiro neio kebase Inoki ro ta-giwapotai-ro ibo, ‘Owera nou e neito ma-dirowidiro-rimo! Abera Naramu imese sirio ia tarena sowake urio mutu amadi-ou-ri, ota puara mororobiritai-rimo kioputi modobo pua. 
Urubia sirio koto iwai ri amadi-ou-ri, ina ubauba tanaro kisioidiro urubia ubauba nato ama-iwai-ri. Idaibo Godi tere kemati tato urubia neio Abera Naramu ro paea se nato ama-imowapotaidiro-ri ibo, “Nio ubauba tanaro kisioidiro urubia ie. Nio ro Godi sapuwo to ubauba owera ta-iarotiti-mo.” ’ 
Nedi urubia ro mouro owera auna se karo ie, ibose auna kimowameduti urubia ie. Neio abato edi ubauba ubi ro na-iamotiti, neio ubauba to neio ro iwaguwo-dumo. Neio karasaubuti urubia ie keremowabu auna ie. Neio auna ubi ie arua urubia owera meamea to kiageawado. 
Namuturubi nirimagare babio, nio ro ma-dimaragoidiro-mo nimo Abera Naramu Iesu Keriso edi kitiodorai urubia ro neio ro beda owera iarotiti-mo nio aboto, ibo ido etou tanaro ro amadimo-ororosioidiro-ri. Neio ro ibo, ‘Iana tau namadi-orobai-ri, keremasosowado urubia amadidimo-ou-ri, neio Godi tere kemati tato urubia ie, simara ubauba ubi gabo amadimi-ibodoro-ri.’ 
Nedi urubia ro nio abato torowomidiro, neio durupi edi ubauba ubi tanaro ro dorogora se aise kisioidiro ie. Neio niro turi ato Godi edi Tarena Urio ro omidiro pua. Ina noudo ie nio neio ro ihoduti-dumo. 
Namuturubi nirimagare babio, nio ro tarena owera ta-gimibiria-rimo. Ina nedi kimibiria tanaro ro moto posi sosoro ie. Mea se nato ba-dididi-mo nio kimibiria pupuwo kiwaititi sapuwo to. Ibose nio Godi mutu keremowauti ato nio Tarena Urio ro ba-miwaboidiro. 
Abera Naramu Iesu Keriso nou edi nirimagare ro ba-demasebidiro-mo, nio womu tato womu tato keremiro nou ro nama-imio-ri. Idaibo tanaro nio ro namadimi-isioidiro-ri, Godi edi nirimagare ro amadime-emaragoidirotiti-ri, ina nou maumo ato mea se ama-irowomidiro-ri. 
Kimibiria urubia kimaragoidiro teibo na-iworohuti-madumo, neio nio ro nirimagare kimati modobo ie. 
Ibose arua urubia era paruo to ou-dumo era ato aratowo ri. Nedi urubia ro nio ro hio ito diwagarewado-rimo, modobo pua neio era ro kioura. Ina arua urubia nio abato torowomidiro karasaubuti owera neio ro ta-gimibiria-rimo, neio nio ro nirimagare kimati modobo ie. Kaupoti mea se! Modobo pua nedi atu ubauba ro nio neito kodoro. Neio ro edi ubauba tanaro ro na-isioidiro-dumo, nio ro binio to nou ba-dimowabeouti-mo. 
Nio Godi aboudo keremeseruti ato ubauba tanaro isioidiro ri, nou aboudo gabo towamo-die nio kiwasiouti ubauba tanaro kisioidiro aboudo. Ina ibose nou edi woroworo ato na-imidirotiti, nou abato pupuwo towamotiti nio nou ro neito kiwateai aboto. Nio ata ubauba tato ama-orowotoi-ri, auna kamade mutu. 
Godi kaupoti nouse ie nou ro nimo ubauba aboudo ta-niapopo-ro Abera Naramu Iesu Keriso na-gemeiriai-ro neito. Imese meana ia, imese auna ia, imese pupuwo ia, imese auna ia masiro nou abato ba-miamotiti. Duriomoro ido to gosioidiro nou abato ta-iamotiti, ibose nou do to amadima-ararasoro-ri womu tato womu tato. Ibose ba-mororosioidiro-mo. 
