﻿Kiwapotai.
4.
Nedi tanaro sirio ro mo ro kiauri na-gororoporeai, mo toboro ohu to nato nawota. Ei! Mo sosoro gabo ato Adiri sabowa magere korodobura se nowea. Mo ro iedi atu kodu ro humuko diamo sosoro kebase ta-nirorowai, ina nato nirorowai ibo na-gutura-ro, ‘Oro mo aboto neito dioro-ro, ido to beda tanaro ro amadimo-ororosioidiro-ri morobise to, oro mo ro nou anama-emasouti-ri.’ 
Iedi tau ro nato, mo ina Tarena Urio ro noworohuti. Ina Adiri sabowa ato mo sosoro gabo ato eputa dubu komidiro nakomu nou se nowea. Ina iedi komidiro nakomu ro nato mo ro Godi se nowea na-gomidiro. 
Nou karimakarima benenio nadi sosoro nowea. Nou edi komidiro nakomu ato na-gomidiro darai ro ta-gemowagoberai, iedi darai ro auna gititi nadi sosoro ie. 
Iedi komidiro nakomu ro turi ato gotoi ina arua 24 komidiro nakomu ro gemowaperai-rimo. Iedi 24 komidiro nakomu ro nato 24 eputa urubia neio ro gorowomidiro. Neio keakea obotama to neito ta-geremeduti-rimo ina gorodi hato eputa urubia beda hato iroidirotiti-dumo neio ro eputa ato nou se giroidiro-rimo. 
Komidiro nakomu rido penenio se gerememiouti-rimo, ibose gururu ioudo aise geremohumo-rimo. 7 turupina neio ro giriware-rimo, nou komidiro nakomu sosoro gabo ato. Nedi 7 erempa pina ro neio ro Godi edi Tarena Urio ro 7 tanaro mutu nou e. 
Ibose komidiro nakomu sosoro gabo ato, auna obo paruo garasi se sosoro ie nou ro gomidiro. Iedi komidiro nakomu ro 4 keremiro nakomu neio ro aupise aiwidirotiti-bimo. Neibi idomari sirio mutu e, sosoro rido huru rido aise irarowotiti-dumo. 
Keba keremiro nakomu auna serawo tumu na masiro raioni nou sosoro ie, ata keremiro nakomu burumukau sosoro ie. Ina ata urubia dubu sosoro woidomari mutu e, ina ata auna banawario tamu to na-iarubiautiti nou sosoro ie. 
Nedi keremiro nakomu ro neibi erere se 6 tamu mutu e. Ina neibi durupi ato, ibose tamu maumo ato, idomari sirio ie neio aise irarowotiti-dumo. Neio imese sirio tau wasare aise iwatiti-dumo, keremasio pua ibo, ‘Imese pupuwo ia Abera Naramu Godi, nu tarena ie, tarena ia ie, imese tarena ia ie. Nu kebase ia se ta-imidirotiti, abora tomidiro, ina ido ama-imidirotiti-ri.’ 
Nedi 4 keremiro nakomu peteibi ro Godi emowabutiti-bimo, eso owera mutu. Nou ro imidirotiti womu tato womu tato turi komidiro nakomu ato. Neibi beda tau ato katamuai ra nou kemowabu, 
nedi 24 eputa urubia ro neio sopu to aise kiroruo ie nou sosoro gabo ato. Taie etu ro imidirotiti komidiro nakomu ato womu tato womu tato keremiro to neio ro atu se iato kemowabu e. Neio eputa rido eputa urubia gorodi hato neio ro aise kibedai ie nou sosoro gabo ato, sopu ato aise kiedea ie. Taie nu iato kemowabu e ibo, 
‘Nimo Abera Naramu Godi imese modobo ia ie, nimo ro, imese urubia mutu, oro kemowabu aboto, oro masiro nimo ro ohu ia to kowoubua aboto, ibose oro pupuwo aboto nimo ro kiroboreauti aboto. Mabu imese sirio nakomu oro ro simara ubi ato gisioidiro, ina abora aise noti iamotiti.’ 
