﻿Kiwapotai.
16.
Mo ro ina auna owera kodu nato nirorowai Tarena Moto goro rido na-gutura-ro ibo, ‘Ba-dou-mo, 7 karakara obo nuku Godi serawo edi na to na-iamo duriomoro gebari neito ba-demawiriti-mo!’ 
Tuturu to owamo pua keba sowake urio ro goto nato gemawirai, awawo ubauba temeteme ikoni keremapuse kawa aise geremapuse-rimo. Ibisa isabuna etio abato giateidiro-rimo ibose ibisa edi ota titi ro na-gemowabu-rimo, neio ia abato ubauba temeteme ikoni aise geremapuse-rimo. 
Ina iato tuturu owamo pua ata sowake urio Godi edi serawo karakara nuku obo ro buru oromo nato gemasia. Kemasia saro gabo ato, iedi buru oromo obo ro karima to aise garapoi, pamo urubia karima sosoro gomidiro. Imese sirio keremiro namabu patu buru oromo ato na-oroho-dumo neio aise gorowaburai-rimo. 
Netewa teibo serawo obo nuku teibo sowake urio teibo ro ta-giawirai-marido, ina ata sowake urio ro gou-ro imese beda mutu oromo sirio ro giamo obo sosu mutu nato gimasia. Neio imese sirio se urubia karima to aise gararapoi-rimo. 
Iato oromo sirio edi urio ro iaurititi, mo ro nou owera kodu se nemororowai ibo na-gutura-ro, ‘Godi etu ro gomidiro, ibose etu ro imidirotiti, oro imese tarena ia ie. Oro ro edi ubauba wisa ro na-iaiwo-die imese tuputupu ia se imerio-die nedi urubia ro neio aboto. 
Oro ro nedi tanaro ro nou mabu rido isioidiro mabu oro edi ipusu owera urubia ro, oro edi tarena urubia ro neio mutu, neio ro giopiauti-rimo karima nato garawiriti-rimo. Ina wisana neio edi kidio obo ro karima to nou mabu ato giwaititi.’ 
Ina iato owera kodu mo ro nato nirorowai kimatowo patapata rido na-gutura-ro ibo, ‘Io Abera Naramu Godi imese pupuwo ia, oro ro ubauba tanaro sapuwo to morobise tuputupu ia tanaro to iaiwotiti-die.’ 
Netewa didi serawo obo nuku peteibi ta-giawiriti-birimo, ina ata sowake urio Godi edi serawo obo nuku ro saiki nato gemawirai. Saiki Godi ro pupuwo korosa nato gomia urubia saiki korosa ro ioura ri. 
Iedi atu saiki era korosa ro saiki aboudo na-gou-ro urubia ubauba mino to gioura, ina neio ro Godi masiro erere tau ato imese ubauba gowaititi-rimo. Mabu nedi ubauba tanaro ro na-gororosioidiro-rimo neio abato, Godi ubi ato gororosioidiro-rimo. Kaupoti nedi urubia ro ubauba aboudo nato erewesegere pua, ubauba tanaro neio ro aise gisioidiro-rimo. Ibose Godi masiro neio ro auna owaititi pua. 
Netewa netewa sowake urio ro Godi edi serawo obo nuku ro ta-gimawiriti-birimo, ina iato ata sowake urio ro ibisa komidiro nakomu nato gemasia. Nou ro edi duriomoro sirio ro giauri duwo ro aise giahidimai. Ibisa edi urubia ro gobodoro-rimo neio temeteme na-giwaubere-rimo kimarihi se goroho-rimo. 
Neio ro ina Godi Adiri sabowa ato na-imidirotiti-die masiro ubauba nato gowaititi-rimo, mabu neio auna ikoni temeteme giwaubere-rimo. Kaupoti neio ro beda ubauba tanaro ra na-gisioidiro-rimo, nato erewesegere pua, inaina aise gisioidiro-rimo. 
5 sowake urio ro Godi edi serawo obo nuku ro ta-gimawiriti-birimo ina iato ata sowake urio ro Iupereitisi oromo gebari nato gemasia. Iedi obo gebari ro gomidiro egenabo gomiodoi oromo imese ororo ia se gowamo. Iupereitisi oromo obo beda tau ato gomiodoi nasa rubi sirio saiki kidiowado moro rido neio kiabu gabo gimesioidiro-rimo. 
Mo iato na-nirarowea netewa didi ubauba urio peteibi se niwia-ibi, neibi kohoke sosoro ie. Neibi erere se gosuwoduti-birimo, ata kanigiri matagoro rido gosuruo-ro, ata oromo ibisa matagoro rido ie, ina ata nou simara karasaubuti ipusu owera dubu matagoro rido gosuruo-ro. 
Neibi imese ubauba ia urio peteibi ie. Neibi ro awawo korosa tanaro amabimi-isioidiro-ri urubia sirio isaubuti rie. Eputa urubia imese sirio duriomoro gabogabo ato na-orowomidiro ubauba urio peteibi ro neio amabimi-iraturio-ri. Nedi ubauba urio peteibi ro eputa urubia sirio neio boso urubia mutu, neibi ro kaupoti moro to amabimi-idabuti-ri, taie boso aboto atu se nato amadimo-ou-ri. Nedi boso saiki ro imese auna ia saiki ro ama-owamo-ri, imese pupuwo ia Godi nou ro nedi saiki ro kebase ta-gohodowa. 
Iesu ro ibo, ‘Owera neito ma-dirowidiro-rimo! Piro dubu urubia umoro tato tau beda sosoro kou ra, mo idaibo mino to anamadi-ou-ri, nio ata umoro oi-ri pua. Etio ro irimowotoi-dumo kimibiria mutu ina Godi edi meamea obotama ro araraseperai tato, nedi urubia ro Godi ro meana ama-iwai-ri. Neio porose se oroho-ri pua.’ 
Nedi ubauba urio peteibi ro erere duriomoro eputa urubia sirio atu moro to iato gidabuti-rimo. Iedi moro to garadabuti-rimo Hiburu owera to asoro-dumo masiro Amagedoni. 
6 sowake urio ro Godi edi serawo obo nuku ro ta-gimawiriti-birimo. Ina iato ata ro gou-ro Godi edi iana ia serawo obo nuku ro nou mutu, taie ohu rido nato gemasia-ro. Tuturu to owamo pua Tarena Moto goro rido Godi edi komidiro nakomu ro owera kodu nou aboudo nato gosuruo-ro, ‘Nou se ie imese notoroporeai-dumo!’ 
Iato penenio aise gerememiouti-rimo. Toboro gururu aupi ato kutura, muso ato kutura ibo gorowati-rimo. Iato auna sopu momuruwo nato goromuruwouti. Urubia ro idaibo sopu momuruwo kiauri pua, abora ia nakomu gebari ro gororosioidiro, imese auna ia ie. 
Nedi sopu momuruwo ro nou ro iedi auna sabowa ro netewa didi patu to giapepeai-bi. Ibose duriomoro erere ato, erere awawo sabowa ato, moto sirio aise giwaposoro. Godi ro Babironi sabowa gebari woki emati pua, nou ro ta-gemaragoidiro-ro. Godi edi serawo waini obo ro neio aboto kainai se emagagai pua. 
Beda mutu ura ro giwadaudiro aise gararaseperai-rimo. Podo na-gorowotoi boito hato gou-rimo. 
Toboro rido koko daroho nadi iopu sosoro neio ro giretuti-ro, kainai abere mibo beda sosoro ra idaibo mibo ie. Iedi nadi ro na-giretuti-ro urubia neio ro aise giopiauti-rimo. Kaupoti nedi urubia ro Godi masiro ubauba aise gowaititi-rimo. Mabu iedi koko daroho iopu ro na-giretuti-ro imese ubauba mino to giretuti-ro, temeteme neio ro gimio-rimo. 
