﻿Kiwapotai.
22.
Iedi atu sowake urio ro mo nou ro ina nato nemowapotai-ro keremiro kimio oromo obo. Iedi obo ro imese garasi ia sosoro gerememiouti, ata pokiri iopu tato ie. Iedi obo ro Godi ra Sipisipi Dawade ra neitiro iedi komidiro nakomu ro ioudo ororuwotiti-die. 
Sabowa turi ia ato gabo iato gowamo, ina oromo ro gabo turi noko ia to gapepea-ro. Oromo bara ato keremiro kimio ota iopu kiho ato iato itoititi. Ina ibose oromo ata sapuwo ato ata keremiro kimio ota ibose to itoititi. Iedi ota teibo ro neido sogomi gabogabo ato erere iopu aise iasesutiti-dumo. Ota teibo iedi puara ro na-iwotoititi-do meresini ie duriomoro gabogabo urubia meana neito iwaititi ri. 
Nedi sabowa ro nato beda namabu ra o urubia ra Godi ro keba se owera to ubauba na-giwai, iato pua ie. Godi ra Sipisipi Dawade ra neitiro iedi komidiro nakomu ro iato aise ama-owamotiti-ri. Godi edi sowake urubia ro nou neio ro aise amadime-emowabutiti-ri. 
Nou sosoro neio ro amadimi-iauri-ri, ina nou masiro neio witoro ato ama-iateidiro-ri, paease iwapotaidiro ri ibo neio Godi do ie. 
Iedi sabowa ro nato duwo ama-araraseperai-ri mabu Abera Naramu Godi neio erempa ie, woroworo nou aboudo amadi-osuruwo-ri. Taie eputa urubia to womu tato womu tato neio ro ama-irowomidirotiti-ri. 
Iedi atu sowake urio ro owera mo aboto ina nato garo-ro. Nou ro ibo, ‘Nedi owera sirio ro oro ro na-irowidiro morobise to amadimo-ororosioidiro-ri, koko se kirobidiro modobo ie. Abera Naramu Godi, nou ipusu owera urubia neio urio aboto, owera nou ro iarotiti-die. Nou ro ibose sowake urio ta-gemeiriai-ro nou sowake urubia imowapotai ri ibo beda tanaro ra ororosioidiro ri Godi ro na-giapoi, aupise ie morobise to kororosioidiro.’ 
Iesu ro ibo, ‘Owera neito ma-dirorowai-rimo! Tau musomuso se owamo pua mo korowameai aboto! Etio ro isioidiro-dumo Godi ipusu owera nedi buka ro nato na-iamo, nedi urubia ro Godi ro neio korosa ama-iwaititi-ri.’ 
Mo Ioane ie, nedi owera sirio ro sowake urio ro giwapotai-ro, mo ia simara gare to nirowidiro, ibose beda tanaro ro gororosioidiro-rimo mo ro simara ia idomari to niauri. Mo iato kauhio to aise nirimusubua, sowake urio sairo mabu ato nou emowabu rie. 
Kaupoti nou ro ibo gutura-ro mo aboto, ‘Idaibo tanaro mo aboto aise gosioidiro-ro! Mo oro mutu neitiro atu se sowake dubu teibo ie, Godi ipusu owera urubia, oro kimibiria naminiramio, nimo atu se nedi buka owera ro nimo ro na-nibodorotiti-dumo, nimo nou sowake urubia ie. Oro ro Godi se ba-demowabu!’ 
Mo nou ro ina nato nemowapotai-ro ibo, ‘Nedi ipusu owera sirio ro nedi buka ro nato na-iamo oro ro koko iwaititi mamo, paease ba-miamo urubia ro ioputi ri. Mabu tau aupiaupi ro orobowado-die nedi tanaro sirio ro kororosioidiro aboto. 
Etio ra ubauba tanaro na-isioidiro-dumo, neio simara se ubauba tanaro aise ba-misioidiro-mo. Etio ra maremarea tanaro na-isioidiro-dumo, neio simara se mareamarea tanaro aise ba-misioidiro-mo. Etio ra meamea tuputupu tanaro na-isioidiro-dumo, neio ro ibose ba-misioidirotiti-mo meamea tuputupu tanaro. Ina ibose etio ra tarena urubia to na-ararasoro-dumo, neio tarena mino to ba-mirowomidirotiti.’ 
Iesu ro ibo, ‘Owera neito ma-dirowidiro-rimo! Tau musomuso se owamo pua mo korowameai aboto, imese urubia sirio beda tanaro gisioidiro-rimo wisa kimio sapuwo to. 
Keba moro mo do ie, saro gabo mo do ie, imese namabu mo ro ta-nimapogai. Keba moro ato ti-nitoititi, saro gabo ato ti-nitoititi-die, imese namabu sirio mo ro ta-nimapogai, mo do ie. Karatamuai moro mo do ie, ina womu mo do ie. 
Obotama etio ro giwiouti-rimo, mo sosoro gabo ato marea tato namadimi-iwotoi-ri, nedi urubia ro Godi ro korosa neio kiwai ie. Ina noudo ie nedi urubia ro Godi ro modobo ama-iwaititi-ri sabowa gebari edi magere ro neito kodouti aboto. Ina ibose keremiro kimio ota iopu nou ro ama-imapoi-ri neio ro kiho aboto. 
Kaupoti etio ra amadime-eremeserai-ri, auna sabowa to odoro tato, neio ibo ie, orora kiroru urubia, pakani urubia, soka urubia, upo koroho urubia, urubia kiopiauti urubia, auna kamade mutu karasaubuti tanaro kisioidiro urubia, ina durupi to aise kisioidiro ie. Nedi urubia sirio ro Godi edi sabowa ro neito odoro-ri pua. 
Mo Iesu e, sowake urio mo ia ro nemeiriai nio aboto nedi tanaro sirio ro iwapotai ri, Godi urubia umoro iwaititi ri. Mo auna eputa dubu e gu Deibidi aboudo orobu-die, Deibidi edi bobo ro mo ro korobai ie. Mo Idiai kiboni sosoro ie, orio saiki kowaroho ato mo ro kimewia ie.’ 
Tarena Urio, Sipisipi Dawade edi orio orobo ro nou mutu, neitiro ro ibo iarotiti-dioudo, ‘Modobo ie neito kou!’ Ibose nedi buka owera ro etio ro amadimi-irowidiro-ri, neio ibo ba-miarotiti-mo, ‘Modobo ie neito kou!’ Obo sogoi ro etio iwati, ba-mou-rimo obo idio ri. Etio abato ubi na-iamo, nedi keremiro kimio obo ro wisa tato se ba-midiotiti-mo. 
Mo aboudo koko owera nou e. Imese beda mutu urubia ro namadimi-irowidiro-ri Godi edi ipusu owera ro na-iamo nedi buka ro nato, nou ohu rido beda urubia ro itomo-dumo, neio ibose Godi ro iedi ubauba ia tanaro sirio ro nedi buka ro nato na-iamo, nedi urubia ro neio aboto ama-iaiwai-ri. 
Nedi buka ro nato Godi ipusu owera sirio ro na-iamo, neio aboudo etio ro namadimi-iwagare-ri, neio Godi ro imapoi-ri pua keremiro kimio ota iopu kiho aboto. Neio ibose Godi ro imapoi-ri pua nou edi tarena sabowa ro neito kodoro aboto. Nedi keremiro kimio ota ro, Godi edi tarena sabowa ro nou mutu, neitiro sapuwo to owera tiamo nedi buka ro nato. 
Iesu ia ro imowauti-die nedi owera ro ibo, nedi owera sirio ro na-iamo nedi buka ro nato imese morobise owera ie. Nou ro aro-die ibo, ‘Io morobise ie! Mo aupise ie anamadi-orowameai-ri.’ Ibose ba-mororosioidiro-mo! Abera Naramu Iesu, dou-ro! 
Abera Naramu Iesu edi wisa tato nirimagare ro imese kimibiria urubia mutu aise ba-mowamotiti. Nouse ie. 
