﻿Tauanga.
33.
Ko ngā haerenga ēnei o ngā tama a Īharaira i tō rātou putanga mai i te whenua o Īhipa i ō rātou rōpū i raro i te ringa o Mohi rāua ko Ārona. 
I tuhituhia hoki e Mohi ō rātou haerenga atu, ō rātou whakatikanga atu, he mea ki mai nā Ihowā; ā, ko ō rātou whakatikanga atu ēnei, me ō rātou haerenga. 
I tūria atu i Ramehehe i te marama tuatahi, i te kotahi tekau mā rima o ngā rā o te marama tuatahi; nō te aonga ake o te Kapenga i puta mai ai ngā tama a Īharaira, i runga tonu anō te ringa i te tirohanga a ngā Īhipiana katoa; 
i ngā Īhipiana e tanu ana i ā rātou mātāmua katoa, i patua nei e Ihowā i roto i a rātou; ā, mahi whakawā ana a Ihowā ki ō rātou atua. 
Nā, tūria ana e ngā tama a Īharaira i Ramehehe, ā, noho ana i Hukota. 
I tūria i Hukota, ā, noho ana i Ētama, i te pito o te koraha. 
I tūria i Ētama, ā, tahuri ana whaka Pihahirota ki te ritenga atu o Paara-Hepona; ā, noho ana i te ritenga atu o Mikitoro. 
I tūria i te ritenga atu o Pihahirota, ā, tika ana nā waenganui o te moana ki te koraha; ā, haere ana, e toru ngā rā ki te ara, i te koraha o Ētama, ā, noho ana i Mara. 
I tūria i Mara, ā, haere ana ki Erimi; kotahi tekau mā rua hoki ngā puna wai i Erimi, e whitu tekau hoki ngā nīkau; ā, noho ana rātou i reira. 
I tūria i Erimi, ā, noho ana i te taha o te Moana Whero. 
I tūria i te Moana Whero, ā, noho ana i te koraha o Hini. 
I tūria i te koraha o Hini, ā, noho ana i Ropoka. 
I tūria i Ropoka, ā, noho ana i Aruhu. 
I tūria i Aruhu, ā, noho ana i Repirimi, i te wāhi kāhore nei he wai hei inu mā te iwi. 
I tūria i Repirimi, ā, noho ana i te koraha o Hinai. 
I tūria i te koraha o Hinai, ā, noho ana i Kipiroto Hataawa. 
I tūria i Kipiroto Hataawa, ā, noho ana i Hateroto. 
I tūria i Hateroto, ā, noho ana i Ritima. 
I tūria i Ritima, ā, noho ana i Rimono Parehe. 
I tūria i Rimono Parehe, ā, noho ana i Rīpina. 
I tūria i Rīpina, ā, noho ana i Ritaha. 
I tūria i Ritaha, ā, noho ana i Keherataha. 
I tūria i Keherataha, ā, noho ana i Maunga Hapere. 
I tūria i Maunga Hapere, ā, noho ana i Harataha. 
I tūria i Harataha, ā, noho ana i Makaheroto. 
I tūria i Makaheroto, ā, noho ana i Tahata. 
I tūria i Tahata, ā, noho ana i Taraha. 
I tūria i Taraha, ā, noho ana i Mitika. 
I tūria i Mitika, ā, noho ana i Hahamona. 
I tūria i Hahamona, ā, noho ana i Moheroto. 
I tūria i Moheroto, ā, noho ana i Pene Iaakana. 
I tūria i Pene Iaakana, ā, noho ana i Horo Hakirikara. 
I tūria i Horo Hakirikara, ā, noho ana i Iotopata. 
I tūria i Iotopata, ā, noho ana i Eperona. 
I tūria i Eperona, ā, noho ana i Ehiono Kēpere. 
I tūria i Ehiono Kēpere, ā, noho ana i te koraha o Hini, arā o Karehe. 
I tūria i Karehe, ā, noho ana i Maunga Horo, i te pito o te whenua o Ēroma. 
Ā, i kake a Ārona tohunga ki Maunga Horo, he mea kī mai nā Ihowā, ā, mate iho ki reira, i te whā tekau o ngā tau o te putanga mai o ngā tama a Īharaira i te whenua o Īhipa, i te rā tuatahi o te rima o ngā marama. 
Ā, kotahi rau e rua tekau mā toru ngā tau o Ārona i tōna matenga ki Maunga Horo. 
Ā, i rongo te kīngi o Arara, te Kanaani, i noho nei i te whenua o Kanaana, i te taha ki te tonga, ki te taenga mai o ngā tama a Īharaira. 
Ā, i tūria e rātou i Maunga Horo, ā, noho ana i Taramona. 
I tūria i Taramona, ā, noho ana i Punono. 
I tūria i Punono, ā, noho ana i Opoto. 
I tūria i Opoto, ā, noho ana i Iteaparimi, i ngā rohe o Moapa. 
I tūria i Īmi, ā, noho ana i Riponokara. 
I tūria i Riponokara, ā, noho ana i Aramono Ripirataima. 
I tūria i Aramono Ripirataima, ā, noho ana i ngā maunga o Aparimi, i te ritenga atu o Nepo. 
I tūria i ngā maunga o Aparimi, ā, noho ana i ngā mānia o Moapa, i te wāhi o Horano e tata ana ki Heriko. 
Nā, ka noho rātou ki te taha o Horano ki Peteiehimoto, tae noa ki Āperehitimi, ki ngā mānia o Moapa. 
I kōrero anō a Ihowā ki a Mohi i ngā mānia o Moapa, i te wāhi o Horano e tata ana ki Heriko, i mea: 
“Kōrero ki ngā tama a Īharaira, mea atu ki a rātou: E whiti koutou i Horano ki te whenua o Kanaana; 
nā, me pei ngā tāngata whenua katoa i tō koutou aroaro, me whakamōtī ā rātou āhua kōhatu, me whakamōtī katoa anō hoki ā rātou whakapakoko whakarewa, ka whakakāhore anō hoki i ā rātou wāhi teitei katoa. 
Ā, ka tangohia te whenua e koutou, ka nohoia hoki; kua hoatu nei hoki e ahau te whenua kia nohoia e koutou. 
“Me rota tā koutou tuwha i te whenua hei kāinga mō ō koutou hapū; he nui, kia nui tōna wāhi, he iti, kia iti tōna wāhi; hei te wāhi i tika ai tōna rota te wāhi mō tēnei, mō tēnei; kia rite ki ngā iwi o ō koutou mātua te tūwhanga o ō koutou wāhi. 
“Ko tēnei, ki te kāhore e peia e koutou ngā tāngata whenua i tō koutou aroaro; nā, hei koikoi i roto i ō koutou kanohi ngā mea o rātou e whakatoea e koutou, hei tūmatakuru anō i ō koutou kaokao, ā, ka whakatoi rātou i a koutou ki te whenua e noho ai koutou. 
Nā, ko ngā mea i whakaaro ahau hei meatanga ki a rātou, ka meatia e ahau ki a koutou.” 
