﻿Tiuteronomi.
32.
Kia whai taringa mai, e ngā rangi, ā, ka kōrero ahau; whakarongo mai hoki, e te whenua, ki ngā kupu a tōku māngai. 
Ka kōpatapata iho tāku whakaako, ānō he ua, ka māturuturu iho tāku kupu me te tōmairangi; me te ua pūnehunehu ki runga i te tupu hou, me te ua tā ki runga i te tarutaru. 
Nō te mea ka kauwhautia e ahau te ingoa o Ihowā; waiho te nui i tō tātou Atua. 
Ko te Kāmaka, tika tonu tāna mahi; he whakarite tikanga nei hoki ōna huarahi katoa. He Atua pono, kāhore ōna hē, he tika, he tapatahi ia. 
Kua mahi rātou i te kino ki a ia, ehara rātou i te tamariki nāna, nō rātou te koha; he whakatupuranga mārō, parori kē rātou. 
Ko tā koutou utu ianei tēnei ki a Ihowā, e te iwi kūware, e kore nei e mōhio? Ehara ianei ia i tōu matua nāna koe i hoko? Nāna koe i hanga, nāna hoki koe i whakaū. 
Kia mahara ki ngā rā onamata; whakaarohia ngā tau o ngā whakatupuranga e maha. Ui atu ki tōu pāpā, ā, māna e whakaatu ki a koe; ki ōu kaumātua, ā, mā rātou e kōrero ki a koe. 
I tā te Runga Rawa whakaritenga kāinga mō ngā iwi, i tāna wehewehenga i ngā tama a te tangata, i whakatūria e ia ngā rohe mō ngā iwi, me te whakaaro anō ki te tokomaha o ngā tama a Īharaira. 
Ko tō Ihowā wāhi hoki, ko tāna iwi; ko Hākopa hei wāhi pūmau mōna. 
I kitea ia e ia ki te whenua koraha, ki te tahora tūhea e hāmama kau ana. I taiāwhiotia ia e ia, i atawhaitia, i tiakina hoki e ia, ānō ko te whatupango o tōna kanohi. 
Ānō he ēkara e whakakorikori ana i tāna ōhanga, e whakapāho ana i runga i āna pī, e roharoha ana ia i ōna parirau, e tango ana i a rātou, e waha ana hoki i a rātou i runga i ōna parirau. 
Nā Ihowā anake ia i ārahi, kāhore hoki he atua kē i tōna taha. 
Nāna hoki ia i whakaeke ki ngā wāhi tiketike o te whenua, hei hōiho mōna, ā, i kai ia i ngā hua o te māra; ā, nāna ia i ngongo ai i te honi i roto i te kāmaka, i te hinu hoki i roto i te kōhatu kiripaka; 
i te pata o te kau, i te waiū hipi, i te ngako reme, i ngā hipi toa o te momo o Pahana, i ngā koati, me te taupā o ngā whatukuhu o te wīti – ā, i inu koe i te wāina, i te toto o te karepe. 
Nāwai ā ka whai kiko a Iēhuruna, ā, whana mai ana; kua whai kiko koe, kua tetere, kua kī i te ngako; ā, whakarērea iho e ia te Atua nāna ia i hanga, whakahāwea ana ki te Kāmaka o tōna whakaoranga. 
Nā rātou i mea kia hae ia ki ngā atua kē, whakapātaritari ana rātou i a ia ki ngā mea whakarihariha kia riri. 
Ko ā rātou patunga tapu i tāpaea e rātou mā ngā rēwera, ehara nei i te Atua, mā ngā atua kīhai nei rātou i mōhio, he mea puta hou ake nōnāianei, kīhai nei i wehingia e ō koutou mātua. 
Ko te Kāmaka i whānau ai koe ka wareware i a koe, kāhore hoki ōu mahara ki te Atua nāna koe i hanga. 
Ā, ka kite a Ihowā, nā anuanu ana ia ki a rātou, mō te mahi whakapātaritari a āna tama, a āna tamāhine. 
Nā, ka mea, “Ka huna ahau i tōku mata i a rātou, ka titiro atu ahau he aha he mutunga mō rātou; he whakatupuranga parori kē hoki rātou, he tamariki kāhore he pono i roto. 
Nā, rātou ahau i mea kia hae ki te mea ehara i te Atua; i whakapātaritari kia riri ki ā rātou mea horihori. Nā, māku rātou e mea kia hae ki te hunga ehara i te iwi; māku rātou e whakapātaritari kia riri ki te iwi pōauau. 
Ka ngiha hoki te ahi i ahau e riri ana, ka toro atu ki te takere rā anō o te rēinga, pau ake hoki te whenua, tahuna ana ngā tūranga o ngā maunga. 
“Ka opehia e ahau ngā kino ki runga ki a rātou; ka whakapotoa āku pere ki a rātou. 
Ka hemo rātou i te matekai, ka pau hoki i te hana o te wera me te hunanga nui whakaharahara; māku hoki e tuku iho te niho o ngā kararehe ki a rātou, me te hūwhare whakamate o ngā mea e ngōki ana i te puehu. 
Ko te hoari ki waho whakamate ai, ko te wehi ki roto i ngā whare. Māna e huna ngātahi te taitama me te taitamāhine, te mea ngote ū rāua ko te tangata hina. 
I mea ahau, ‘Ka whakamararatia rātou e ahau ki tawhiti, ka meinga e ahau kia mutu te mahara ki a rātou i roto i ngā tāngata.’ 
Me i kāhore ahau te wehi i te ngākau kino o te hoa whawhai, kei pōhēhē ōna hoariri, kei mea rātou, ‘Kua kake tō tātou ringa, kāhore anō hoki a Ihowā i mea i ēnei mea katoa.’ ” 
He iwi whakaarokore hoki rātou, ā, kāhore he mōhio i roto i a rātou. 
Ē, me i tūpato rātou, me i mōhio ki tēnei, me i whakaaro ki tō rātou mutunga iho! 
Me pēhea e whai ai te kotahi i te mano, e whati ai ngā mano kotahi tekau i te tokorua, me i kāhore rātou i hokona e tō rātou Kāmaka, i tukua atu hoki e Ihowā? 
Nō te mea ehara tō rātou kāmaka i te pēnei me tō tātou Kāmaka, nā ō tātou hoariri nei anō te kī. 
Nō te mea ko ā rātou wāina nō te wāina o Horoma, nō ngā māra hoki o Komora: ko ā rātou karepe he karepe au kawa, ko ā rātou tautau kakati ana; 
ko tā rātou wāina ko te hūwhare whakamate o ngā tarakona, me te ware ngau kino o ngā ahipi. 
“Kāhore ianei tēnei i rongoātia ki roto ki ahau, i hīritia hoki ki waenga i āku taonga? 
Māku ngā utu e rapu, māku hoki e ea ai, ā te wā e paheke ai ō rātou waewae; e tata ana hoki te rā e hunā ai rātou, ā, kei te kaikā mai ngā mea i whakaritea mō rātou.” 
Nō te mea ka whakatika a Ihowā i tā tāna iwi, ka aroha hoki ki āna pononga; ina kite ia kua riro tō rātou kaha, ā, kāhore he mea i toe, i tūtakina ki roto, i waiho atu rānei ki waho. 
Ā, ka mea ia: “Kei hea ō rātou atua, te kāmaka i okioki atu ai rātou; 
i kai nei i te ngako o ā rātou patunga tapu, i inu hoki i te wāina o ā rātou ringihanga? Me whakatika rātou ki te āwhina i a koutou, kia ai hoki rātou hei kuhunga atu mō koutou. 
“Nā titiro, ko ahau, inā ko ahau ia, kāhore hoki he atua i tōku taha. E whakamate ana ahau, ā, e whakaora ana; i tukitukia e ahau, ko ahau anō e whakamahu ana; kāhore hoki he tangata e ora ai tētahi i tōku ringa. 
Nō te mea e totoro atu ana tōku ringa ki te rangi, me tāku kī anō: I ahau e ora tonu nei, 
ki te whakakoia e ahau tāku hoari kānapanapa, ā, ka mau tōku ringa ki te whakariterite; ka whakahokia atu e ahau he utu ki ōku hoariri, ka ea hoki i ahau tā te hunga e kino ana ki ahau. 
Ka whakahaurangitia e ahau āku pere ki te toto, ā, ka kai tāku hoari i te kikokiko; ki te toto o te hunga i patua, o ngā herehere, nō te māhunga o ngā rangatira o te hoariri.” 
Kia hari tahi, e ngā tauiwi, me tāna iwi: ka takitakina hoki e ia te toto o āna pononga, ā, ka whakahokia he utu ki ōna hoariri, ka whakamārie anō ki tōna whenua, ki tāna iwi. 
Nā, ka haere mai a Mohi, ka kōrero i ngā kupu katoa o tēnei waiata ki ngā taringa o te iwi, a ia, me Hohua, me te tama a Nunu. 
Ā, ka mutu tā Mohi kōrero i ēnei kupu katoa ki a Īharaira katoa; 
nā, ka mea ia ki a rātou: “Kia anga mai ō koutou ngākau ki ngā kupu katoa e kauwhautia atu nei e ahau ki a koutou i tēnei rā; hei whakahau atu mā koutou ki ā koutou tamariki kia puritia, kia mahia, ngā kupu katoa o tēnei ture. 
Nō te mea ehara tēnei i te mea noa iho ki a koutou; ko tō koutou oranga hoki ia, ā, mā tēnei mea e roa ai ō koutou rā ki te whenua ka whiti atu nei koutou i Horano ki reira ki te tango.” 
I kōrero anō a Ihowā ki a Mohi i taua tino rangi anō, i mea, 
“E piki koe i tēnei maunga, i Aparimi, ki Maunga Nepo, i te whenua o Moapa, e anga atu ana ki Heriko; ka titiro atu ki te whenua o Kanaana e hoatu nei e ahau ki ngā tama a Īharaira hei kāinga; 
ā, e mate koe ki runga ki te maunga e piki atu nā koe, ka kohia hoki ki tōu iwi; ka pērātia me Ārona, me tōu tuakana, i mate rā ki Maunga Horo, ā, kohia atu ana ki tōna iwi; 
mō kōrua hoki i hara ki ahau i waenganui o ngā tama a Īharaira i ngā wai o Meripa, i Karehe, i te koraha o Hini; mō kōrua kīhai i whakatapu i ahau i waenganui o ngā tama a Īharaira. 
Heoi, ka kite koe i te whenua i mua i tōu aroaro; otiia e kore koe e tae ki reira – ki te whenua e hoatu ana e ahau mō ngā tama a Īharaira.” 
