﻿Tiuteronomi.
33.
Ko te manaaki tēnei i manaaki ai a Mohi, te tangata a te Atua, i ngā tama a Īharaira i mua ake o tōna matenga. 
Nā, ka mea ia: I haere mai a Ihowā i Hinai, i rere mai i Heira ki runga ki a rātou; i whiti mai ia i Maunga Parana, ā, haere mai ana ia i ngā mano tini o te hunga tapu; he ture i tōna ringa matau mō rātou, e mura ana. 
Inā, e aroha ana ia ki ngā iwi; kei roto i tōu ringa āna tāngata tapu katoa; ā, noho ana rātou i ōu waewae; ka riro i a rātou katoa āu kōrero. 
Nā Mohi te ture i ako ki a tātou, hei taonga tuku iho, tuku iho mō te huihui o Hākopa. 
Ko ia anō te kīngi o Iēhuruna i te huihuinga o ngā upoko o te iwi, rātou ko ngā iwi katoa o Īharaira. 
“Kia ora a Reupena, kaua hoki e mate; otiia kia tokoouou ōna tāngata.” 
Ā, tēnei anō te manaaki mō Hūrā: nā, ka mea ia: “Whakarongo, e Ihowā, ki te reo o Hūrā, māu anō hoki ia e kawe ki tōna iwi. I kaha hoki ōna ringa ki te tohe mōna ake; ā, māu ia e āwhina ki ōna hoariri.” 
Ā, mō Rīwai i mea ia: “Kei tōu tangata tapu ōu Tumime me ōu Urimi, i whakamātautauria rā ia e koe ki Maha, i ngangautia rā e koe ki ngā wai o Meripa; 
i mea nei mō tōna pāpā rāua ko tōna whaea, ‘Kāhore ahau i kite i a ia.’ Kīhai anō hoki ia i mōhio ki ōna tuākana, kīhai i mātau ki āna ake tamariki; he mea hoki, e pupuri ana rātou i tāu kupu, e tiaki ana i tāu kawenata. 
Mā rātou a Hākopa e whakaako ki āu whakaritenga, a Īharaira hoki ki tāu ture; mā rātou hoki te paowa kakara e hoatu ki tōu aroaro, me te tahunga tinana ki runga ki tāu āta. 
Manaakitia ōna rawa, e Ihowā, kia aro mai hoki koe ki te mahi a ōna ringa; whatia ngā hope o te hunga e whakatika ana ki a ia, o ngā mea hoki e kino ana ki a ia, kei whakatika mai anō rātou.” 
Ko tāna kupu mō Pineamine: “Ko tā Ihowā i aroha ai ka noho hūmārie ki tōna taha – ko ia e uhi ana i a ia ā pau noa te rā – e noho ana i waenganui o ōna pokohiwi.” 
Ko tāna kupu mō Hōhepa: “He manaakitanga tōna whenua nā Ihowā; ki ngā mea papai o te rangi, ki te tōmairangi, ki te wai hōhonu e takoto ake ana i raro, 
ki ngā hua papai o te rā, ki ngā mea papai hoki e whakaputaina mai ana e te marama, 
ki ngā mea nunui hoki o ngā maunga onamata, ki ngā mea papai o ngā maunga tū tonu; 
ki ngā mea papai hoki o te whenua me ōna tini mea; ki te manakohanga hoki ana i noho i te rākau. Kia tae mai te manaaki ki runga ki te māhunga o Hōhepa, ki te tumuaki hoki ōna i wehea i ōna tuākana. 
He korōria kei te mātāmua a tāna pūru; ko ōna haona kei ngā haona o te unikanga; ka panā e ia ngā iwi, rātou katoa, ki ērā, tae noa ki ngā pito o te whenua; ā, ko ēnei ngā mano tini o Ēparaima, ko ēnei hoki ngā mano o Mānahi.” 
Ā, ko tāna kupu mō Hepurona: “Kia koa, e Hepurona, i tōu putanga ki waho; e Ihākara hoki, i ōu tēneti. 
Mā rātou ngā iwi e karanga ki te maunga; ki reira rātou patu ai i ngā patunga o te tika; nō te mea ka ngongo rātou i te raneatanga o ngā moana, i ngā taonga huna hoki o te onepū.” 
Ko tāna kupu mō Kara: “Ka manaakitia te kaiwhakawhānui i a Kara! Noho ana ia me he raiona kātua, haea iho e ia te ringa, āe rā me te tumuaki. 
Ā, tangohia ana e ia te wāhi tuatahi mōna; nō te mea kei reira te wāhi a te kaiwhakahaere tikanga e tiakina ana; ā, haere mai ana me ngā upoko o te iwi, ā, oti ana i a ia, rātou tahi ko Īharaira, te tikanga a Ihowā, me āna whakaritenga.” 
Ā, ko tāna kupu mō Rāna: “Hei kūao raiona a Rāna, ka mokowhiti mai ia i Pahana.” 
Ā, ko tāna kupu mō Napatari: “E Napatari, e mākona nei i te manakohanga, e kī ana hoki i te manaaki a Ihowā; nohoia e koe te taha ki te hauāuru me te tonga.” 
Ā, ko tāna kupu mō Āhera: “Ko ngā tamariki te manaaki mō Āhera; kia arongia mai ia e ōna tuākana, kia toua hoki tōna waewae ki te hinu. 
Ko ōu tūtaki he rino, he parāhi; ā, ka rite tōu kaha ki ōu rā.” 
“Kāhore he rite mō te Atua, e Iēhuruna, e eke hōiho nei i ngā rangi ki te whakauru i a koe, ki ngā kapua hoki, i runga anō i tōna korōria. 
Ko te Atua ora tonu tōu nohoanga, ā, kei raro ko ngā ringa o tua iho; ā, i peia e ia te hoariri i tōu aroaro, i mea hoki, ‘Whakangaromia!’ 
Nā, ka noho hūmārie a Īharaira, me te mātāpuna o Hākopa ko ia anake, ki te whenua wīti, wāina; āe rā, ka māturuturu iho te tōmairangi o ōna rangi. 
Ka hari koe, e Īharaira! Ko wai hei rite mōu, mō te iwi i whakaorangia nei e Ihowā, te pukupuku hei whakapuru mōu, ko te hoari hoki e whai korōria ai koe! Ā, ka tuku mai ōu hoariri i a rātou ki a koe; ā, ka takatakahi koe i ō rātou wāhi teitei.” 
