﻿Ko te Pukapuka Tuarua o  Hamuera.
1.
Nā, i muri iho i te matenga o Haora, te mea kua hoki mai a Rāwiri i te patunga i ngā Amareki, ā, kua rua ngā rā o Rāwiri e noho ana ki Tikiraka. 
I te toru o ngā rā, nā, ko tētahi tangata e haere mai ana i te puni i a Haora, he mea haehae ōna kākahu, he oneone i runga i tōna mātenga. Ā, nō tōna taenga mai ki a Rāwiri, ka hinga ia ki te whenua, ā, ka piko. 
Nā, ka mea a Rāwiri ki a ia, “I haere mai koe i hea?” Ka mea tērā ki a ia, “I mawhiti mai ahau i te puni o Īharaira.” 
Anō rā ko Rāwiri ki a ia, “I pēhea te mea rā? Tēnā, kōrerotia mai ki ahau.” Nā, ka mea ia, “Kua whati te iwi i te whawhai, he tokomaha hoki o te iwi i hinga, i mate. Kua mate hoki a Haora rāua ko tāna tama, ko Honatana.” 
Anō rā ko Rāwiri ki te tamaiti nāna nei i kōrero ki a ia, “I mōhiotia e koe ki te aha kua mate a Haora rāua ko tāna tama ko Honatana?” 
Nā, ka mea taua tamaiti nāna nei i kōrero ki a ia, “I tūpono noa ahau ki runga i Maunga Kiripoa, nā, ko Haora e okioki ana ki tāna tao. Nā, e whai tata ana i a ia ngā hāriata me ngā kaieke hōiho. 
Nā, i tōna tahuritanga ki muri, ka kite i ahau, ā, ka karanga ki ahau. Nā, ka mea ahau, ‘Tēnei ahau.’ 
“Anō rā ko ia ki ahau, ‘Ko wai koe?’ “Anō rā ko ahau ki a ia, ‘He Amareki ahau.’ 
“Nā, ka mea ia ki ahau, ‘Tēnā, e tū ki tōku taha, whakamatea hoki ahau, kua mau pū hoki ahau i te pōuri; nō te mea kei te toitū tonu te ora i roto i ahau.’ 
“Heoi, tū ana ahau ki tōna taha, whakamatea ana ia e ahau; i mōhio hoki ahau e kore rawa ia e ora ake i te mea ka hinga nei ia. Nā, tangohia ana e ahau te karauna i tōna mātenga, me te poroporo i tōna ringa, ā, kawea mai ana e ahau ki konei ki tōku ariki.” 
Kātahi a Rāwiri ka mau ki ōna kākahu, ā, haehaea ana e ia; ā, i pērā hoki ōna hoa katoa. 
Nā, ka uhunga rātou, ka tangi, ka nohopuku ā ahiahi noa, mō Haora, mō tāna tama, mō Honatana, mō te iwi anō a Ihowā, mō te whare hoki o Īharaira, i hinga nei i te hoari. 
Nā, ka mea a Rāwiri ki te tamaiti nāna nei i kōrero ki a ia, “Nō hea koe?” Anō rā ko tērā, “He tama ahau nā tētahi manene, nā tētahi Amareki.” 
Anō rā ko Rāwiri ki a ia, “He aha koe tē wehi ai? He aha i totoro ai tōu ringa ki te huna i tā Ihowā i whakawahi ai?” 
Kātahi a Rāwiri ka karanga ki tētahi o āna taitama, ka mea, “Whakatata atu, e rere ki runga ki a ia.” Nā, patua ana ia e ia, mate ake. 
I mea anō a Rāwiri ki a ia, “Hei runga i tōu mātenga ōu toto; kua whakaatu mai nā hoki tōu waha i tōu hē, kua mea, ‘Nāku i whakamate tā Ihowā i whakawahi ai.’ ” 
Nā, ka waiatatia e Rāwiri tēnei apakura mō Haora rāua ko tāna tama, ko Honatana; 
i mea hoki ia kia whakaakona ngā tama a Hūrā ki te waiata o te kōpere; (e mau nā te tuhituhi ki te Pukapuka a Iahera): 
“Tukitukia ana tōu ātaahua, e Īharaira, ki ōu wāhi teitei. Anō te hinganga o ngā mārohirohi! 
“Kaua e kōrerotia ki Kāta; kaua e kauwhautia ki ngā huarahi o Ahakerono; kei koa ngā tamāhine a ngā Pirihitini, kei whakamanamana ngā tamāhine a te kokotikore. 
“E ngā maunga o Kiripoa, kāti rawa he tōmairangi mō koutou, he ua, he māra e tukua ai te whakahere. I ākiritia kinotia hoki ki reira te pukupuku o te mārohirohi, te pukupuku o Haora, me te mea kīhai i whakawahia ki te hinu. 
He toto tēnā nō te hunga i tū, he ngako tēnā nō ngā mārohirohi, kāhore he whakahokinga mai o te kōpere a Honatana, kīhai anō te hoari a Haora i hoki kau mai. 
“Ko Haora, ko Honatana, he aroha, he whakaahuareka i tō rāua oranga; kīhai hoki i wehea i tō rāua matenga. Nui atu tō rāua tere i tō ngā ēkara, tō rāua kaha i tō ngā raiona. 
“E ngā tamāhine a Īharaira, tangihia a Haora, nāna nei ō koutou kākahu ngangana i huatau ai, nāna nei i piri ai ngā whakapaipai kōura ki ō koutou weruweru. 
“Anō te hinganga o ngā mārohirohi i waenganui o te tatauranga! E Honatana, i werohia nā i runga i ōu wāhi teitei. 
Mamae ana ahau, he whakaaro ki a koe, e tōku tuakana, e Honatana; nui atu tōku whakaahuareka ki a koe. He hanga whakamīharo tōu aroha ki ahau, nui atu i tō ngā wāhine aroha. 
“Anō te hinganga o ngā mārohirohi; anō te korenga o ngā patu o te pakanga!” 
