﻿1 Whakapapa.
16.
Heoi, kawea ana e rātou te āka a te Atua, whakatūria ana ki waenganui o te tēneti i whakaarahia e Rāwiri mōna; ā, tāpaea ana e rātou he tahunga tinana, he whakahere mō te pai ki te aroaro o te Atua. 
Ā, ka mutu tā Rāwiri whakaeke i ngā tahunga tinana, i ngā whakahere mō te pai, ka manaakitia e ia te iwi i runga i te ingoa o Ihowā. 
I tuwhaina anō e ia mā ngā tāngata katoa o Īharaira, mā te tāne, mā te wahine, kotahi rohi taro mā tēnei, mā tēnei, tētahi wāhi kikokiko, me tētahi keke karepe whakamaroke. 
I whakaritea anō e ia ētahi o ngā Rīwaiti hei minita ki mua i te āka a Ihowā, hei whakamahara, hei whakawhetai, hei whakamoemiti ki a Ihowā, ki te Atua o Īharaira. 
Ko Āhapa hei tuatahi; i muri i a ia ko Hakaraia, ko Teiere, ko Hemirāmoto, ko Tehiere, ko Matitia, ko Eriapa, ko Penaia, ko Opere-Eroma, ko Teiere hoki ki ngā hātere, ki ngā hāpa, ko Āhapa hei whakatangi i ngā himipora; 
ko Penaia hoki rāua ko Tahatiere, ko ngā tohunga, kia tūturu tonu tā rāua mau tētere ki mua i te āka o te kawenata a te Atua. 
I reira anō i taua rā ka whakaritea tuatahitia e Rāwiri he whakamoemiti mō Ihowā, nā te ringa o Āhapa rātou ko ōna tēina. 
Whakawhetai atu ki a Ihowā, karanga ki tōna ingoa; whakapuakina āna mahi ki waenganui o ngā iwi. 
Waiata ki a ia, hīmene ki a ia, kōrerotia āna mahi whakamīharo katoa. 
Kia whakamanamana koutou ki tōna ingoa tapu; kia hari ngā ngākau o te hunga e rapu ana i a Ihowā. 
Rapua a Ihowā, me tōna kaha, rapua tonutia tōna mata. 
Maharatia āna mahi whakamīharo i mahi ai ia; āna merekara, me ngā whakaritenga a tōna māngai; 
e ngā uri o Īharaira, o tāna pononga, e ngā tama a Hākopa, e āna i whiriwhiri ai. 
Ko Ihowā ia, ko tō tātou Atua; kei te whenua katoa āna whakaritenga. 
Maharatia tonutia tāna kawenata, te kupu i kīia iho e ia ki te mano o ngā whakatupuranga; 
te kawenata i whakarite ai ia ki a Āperahama, tāna oati hoki ki a Īhaka; 
ā, whakapūmautia iho hei tikanga ki a Hākopa, hei kawenata mau tonu ki a Īharaira, 
i a ia i mea rā, “Ka hoatu e ahau ki a koe te whenua o Kanaana hei wāhi pūmau mō koutou.” 
I te mea e torutoru ana anō koutou; āe, e tokoiti rawa ana, he manene hoki ki reira; 
i a rātou e hāereere ana i tēnei iwi ki tērā atu iwi, i tētahi rangatiratanga ki tētahi iwi kē. 
Kīhai rātou i tukua e ia kia tūkinotia e te tangata; āe rā, i rīria e ia ngā kīngi, he whakaaro ki a rātou. 
I mea ia, “Kei pā ki āku i whakawahi ai, kei kino hoki ki āku poropiti.” 
Waiata, e te whenua katoa ki a Ihowā; kauwhautia tāna mahi whakaora i tēnā rangi, i tēnā rangi. 
Whakapuakina tōna korōria i waenganui i ngā tauiwi, āna mahi whakamīharo i waenganui i ngā iwi katoa. 
He nui hoki a Ihowā, kia nui te whakamoemiti ki a ia; kia wehingia nuitia atu hoki ia i ngā atua katoa. 
He whakapakoko hoki ngā atua katoa o ngā iwi; nā Ihowā ia i hanga ngā rangi. 
He hōnore, he kīngitanga kei tōna aroaro; kei tōna wāhi te kaha me te koa. 
Tukua ki a Ihowā, e ngā hapū o ngā iwi, tukua ki a Ihowā te korōria me te kaha. 
Tukua atu ki a Ihowā te korōria e tika ana mō tōna ingoa; maua mai he whakahere, haere mai ki tōna aroaro. Koropiko ki a Ihowā i roto i te ātaahua o te tapu; 
kia wehi rā ki tōna aroaro, e te whenua katoa. E ū anō te ao, tē taea te whakanekeneke. 
Kia hari ngā rangi, kia koa te whenua; kia mea rātou i roto i ngā iwi, “Ko Ihowā te kīngi!” 
Kia haruru te moana, me ngā mea hua ana i roto; kia koa te māra, me ngā mea katoa i runga! 
Ko reira ngā rākau o te ngahere waiata ai i te hari i te aroaro o Ihowā, e haere mai ana hoki ia ki te whakarite i runga i te whenua. 
Whakawhetai ki a Ihowā, he pai hoki ia, he pūmau tonu hoki tāna mahi tohu. 
Mea atu hoki: “Whakaorangia mātou, e te Atua o tō mātou whakaoranga, kohikohia mātou, whakaorangia mātou i ngā tauiwi, kia whakawhetai ai mātou ki tōu ingoa tapu, kia whakamanamana ai ki tōu whakamoemititanga. 
Kia whakapaingia a Ihowā, te Atua o Īharaira ake nei, ā ake nei!” Nā, ka mea te iwi katoa, “Āmine!” ā, whakamoemiti ana rātou ki a Ihowā. 
Heoi, ka waiho e ia i reira, i mua i te āka o te kawenata a Ihowā, a Āhapa rātou ko ōna tēina, hei minita tonu ki mua i te āka, i ngā meatanga o tēnei rā, o tēnei rā, 
a Opere-Eroma me ō rātou tēina, e ono tekau mā waru; a Opere-Eroma hoki tama a Ierutunu, rāua ko Hōha hei kaitiaki tatau. 
Ko Hāroko tohunga me ōna tēina, me ngā tohunga, ki mua o te tapenākara o Ihowā i te wāhi tiketike i Kipeono, 
hei whakaeke tonu i ngā tahunga tinana mā Ihowā ki runga ki te āta tahunga tinana i te ata, i te ahiahi, hei mea i ngā mea katoa i tuhituhia ki te Ture a Ihowā, i whakahaua e ia ki a Īharaira. 
Ā, hei hoa mō rātou a Hēmana rāua ko Ierutunu, me ērā atu i whiriwhiria, i whakahuatia nei ngā ingoa, hei whakawhetai ki a Ihowā, nō te mea he pūmau tonu tāna mahi tohu. 
Hei hoa hoki mō rātou a Hēmana rāua ko Ierutunu me ngā tētere me ngā himipora mā ngā kaiwhakatangi kaha, me ngā whakatangi mō ngā waiata a te Atua. Ā, ko ngā tama a Ierutunu hei kaitiaki kūwaha. 
Nā, haere ana te iwi katoa ki tōna whare, ki tōna whare, ā, hoki ana a Rāwiri ki te manaaki i tōna whare. 
