﻿Hopa.
3.
I muri i tēnei, ka puaki te māngai o Hopa, ā, ka kangā e ia tōna rā. 
Nā, ka oho a Hopa, ka mea: 
“Kia ngaro te rā i whānau ai ahau, te pō, i kōrerotia ai, ‘He tamāroa kei roto i te kōpū.’ 
Waiho taua rā mō te pōuri; kaua e tirohia iho e te Atua i runga; kaua hoki e whitingia e te mārama. 
Kia poke ia i te pōuri, i te ātārangi hoki o te mate; kia tauria iho e te kapua; kia whakawehia anō hoki e te whakapōuritanga o te rā. 
Nā, ko taua pō – kia mau pū i te pōuri kerekere; kei honoa ki ngā rā o te tau; kei huihuia atu ina taua ngā marama. 
Nanā, kia mokemoke taua pō, kaua te reo koa e uru ki roto. 
Kia kangā hoki e te hunga kanga i te rā, e te hunga mōhio ki te whakaara rewiatana. 
Kia pōuri ngā whetū o tōna kākarauritanga; kia tatari ki te mārama, ā, kāhore noa iho; kei kite hoki i te tākiritanga ata – 
mōna kīhai i tūtaki i ngā tatau o te kōpū o tōku whaea, kīhai i huna i te māuiui kei kitea e ahau. 
“He aha ahau tē mate ai i te kōpū? He aha tē hemo ai i tōku putanga mai i te kōpū? 
He aha i rite wawe ai ngā turi mōku, me ngā ū hei ngote māku? 
Me i pēnā, kua āta takoto ahau, te ai he whakaohooho; moe ana ahau; kātahi ahau ka whai okiokinga, 
i roto i ngā kīngi, i ngā kaiwhakatakoto whakaaro o te whenua i hanga nei i ngā wāhi mokemoke mō rātou, 
i roto rānei i ngā rangatira whai kōura, ō rātou nei whare kī tonu i te hiriwa. 
Kua kāhore noa iho rānei, kua pērā me te materoto e ngaro nei me ngā kōhungahunga kāhore nei e kite i te mārama. 
Mutu ake i reira te whakararuraru a te hunga kino; okioki ana i reira, te hunga kua māuiui ngā uaua. 
Āta noho ana ngā herehere i reira tē rongo i te reo o te kaitūkino. 
Kei reira te iti, te rahi, kāhore hoki he rangatira o te pononga. 
“He aha te mārama i hōmai ai ki te tangata kei roto nei i te mate, te ora ki te tangata kua kawa te wairua? 
E kōingo nei ki te mate, heoi kāhore noa iho; e keri ana kia taea ia, nui atu i te keri i ngā taonga huna. 
Hari pū rātou, koa ana, ina kitea te urupā. 
He aha anō te mārama i hōmai ai ki te tangata kua huna nei tōna ara, kua oti nei te tūtakitaki mai e te Atua? 
Kīanō hoki ahau i kai, kua tae mai tāku mapu; ānō he wai ōku hāmama e ringihia ana. 
Nō te mea kua tae mai ki ahau te mea whakawehi e wehi nei ahau; ko tāku e pāwera nei kua pā ki ahau. 
Kāhore ōku hūmārie, kāhore ōku āta noho, ehara i te mea e okioki ana; nā, kua puta te raruraru.” 
