﻿Hopa.
8.
Nā, ka whakautu a Pirirara Huhi, ka mea: 
“Kia pēhea ake te roa o tāu kōrero i ēnei mea? Kia pēhea ake te roa o ngā kupu a tōu māngai e rite ai ki te hau kaha? 
E whakaparori kē rānei te Atua i te whakawā? E whakaparori kē rānei te Kaha Rawa i te tika? 
Ki te mea i hara āu tamariki ki a ia, ā, kua makā atu rātou e ia hei utu mō tō rātou hē. 
Ki te rapu wawe koe i te Atua, ā, ka īnoi ki te Kaha Rawa; 
ki te mea he mā koe, he tika, inā, ka ara ake ia ki a koe āianei, ka manaakitia anō e ia te nohoanga o tōu tika. 
Ahakoa i iti tōu tīmatanga, e nui noa atu tōu whakamutunga. 
“Tēnā rā, ui atu ki tō mua whakatupuranga; anga atu hoki ki te mea kua rapua e ō rātou mātua. 
Nōnanahi nei hoki tātou, kāhore hoki e mōhio; he ātārangi nei hoki ō tātou rā i runga i te whenua. 
E kore rānei rātou e whakaako i a koe, e kōrero ki a koe, e puaki mai rānei he kupu i ō rātou ngākau? 
“E tupu rānei te wīwī i te mea kāhore he repo? E nui rānei te raupō ki te kāhore he wai? 
I te mea he kaiota tonu, ā, kīhai i tapahia, kua maroke i mua ake i ngā otaota katoa. 
Ka pērā anō ngā ara o te hunga katoa e wareware ana ki te Atua, ā, ka riro ki te kore tā te tangata whakapono kore i tūmanako ai. 
Ka motuhia atu tāna i whakamanawa atu ai, ko te whare hoki o te pūngāwerewere hei tūmanakohanga mōna. 
Ka okioki atu ia ki tōna whare; heoi e kore e tū; ū tonu tāna pupuri atu, otiia e kore e mau. 
E matomato ana i te mea kāhore nei te rā, ā, e wana ana ōna peka i tāna kāri. 
Kapi tonu te pūranga i ōna pakiaka, e kitea ana e ia te wāhi kāmaka. 
Ki te whakamōtītia iho ia i tōna wāhi, ka whakakāhore taua wāhi ki a ia, ka mea, ‘Kāhore ahau i kite i a koe.’ 
Nanā, ko te hari tēnei o tōna ara, ā, ka tupu ake ētahi atu i roto i te puehu. 
“Nanā, e kore te Atua e whakakāhore ki te tangata tika, e kore anō e puritia e ia te ringa o ngā tāngata kino. 
Tērā anō tōu māngai ka whakakīia e ia ki te kata, ōu ngutu ki te hāmama. 
He whakamā te kākahu mō te hunga e kino ana ki a koe, ā, ka kāhore noa iho te tapenākara o te hunga kino.” 
